Romu 3 - FỊAFỊA BAỊBỤLỤ

¹ Juu-ḅẹ-apụ sikima fịarị sọye tẹ Ja asịẹ ḅẹ apụ la-a ye emi? Anịanịa, tarị-ḅụụ sin tọ iḅi mịẹarị?

² Karakara-ḅara-ḅụ ḅọkọ, ḅọkọ ḅụ anị nyana iḅi ḅakam. Tarị ye, Tamụnọ ori oku mẹ kẹ Juu-ḅẹ-apụ ma ḅara sụam.

³ Kụma ini ḅẹ ja apụ nwẹnị Tamụnọ ḅii ḅara mịẹ-a, kụma ọ́ sịn-arị Tamụnọ sọ anị gotẹ amịna ḅịḅị sima ḅẹ?

⁴ Gbala-gbala ọkọ sime ye ofori. Inweni-mgba iruo apụ sọ tẹ sọ, Tamụnọ rẹ ọ̀ ḅịḅị ḍima ḍima-a. Fịafịa Ḍiri mẹ ḅẹẹm, “Ị́ ẹkwẹn sakị tomi nimi ḅa ị́ karakaraye ḍukoarị; ini ị́ kọn sakị ị́ ḅẹrẹ-ḅaraiḅi nyana ḅa.”

⁵ Mịọkụ wamịna amịẹ-irima nwẹnị iḅiọkụ Tamụnọ karakara mẹ pakama-ḅo ḅelema kụma, wa tiye ḍuko ḅẹ? Wa inetẹ ḅẹẹ ḅa Tamụnọ kẹ wa pịrịarị fomu-ḅara mẹ kura-a? (À nwẹn gbelarị ye mẹ, tomi kẹ ye gbela, gbela ḅara mie à gbelarị.)

⁶ Gbọrụ ḅọkọ sọ ḅụ-a! Tamụnọ ḅarị kuraye mịẹ-a kụma, ọ̀ tọ-ḅara kẹ inetẹ tomikiri mẹ kọn ḅẹ?

⁷ Kụma mịọkụ à kọn-arị nwẹn ḅẹẹ iruo mẹ mịẹtẹ Tamụnọ ebube na ọ̀ karakara na ḅịya paka banabana kụma ndẹẹ anị sime ḅẹ ḅara? À paa si mịẹ ḅọ ẹrẹ fị na-iḅi?

⁸ Ẹbịsịya gbọrụḅọ ḅẹẹ ḅa, ọkọ ḅẹḅẹ ó yee wa ḅẹẹ, “Ó yee wa siye mịẹ tẹ iḅiye anị ḅio paka-ḅo.” Ja apụ da-da kẹ ị̀ mịẹ-sima gotẹ ḅẹẹarị mịnẹ mie ị̀ ḅịḅị paka ye mẹ, yẹrị ọkọ kẹ in tolumam; ini ma ḅẹrẹ-ḅarasii sime ịn pịrị ḅa, anị sime na-iḅi ḅara ḅụ.

Karakara Mịẹarị Gbọrụḅọ Sọ Ofori

⁹ Wa ẹrị tẹ ḅara ḅụ ọ́ sịn-arị wamịnị Juu-ḅẹ-apụ ma kẹ iḅi kiri sịẹ Ja asịẹ ḅẹ apụ ma nẹngị anga emi? Gbala-gbala ọkọ sime ye ofori. À kẹ ó ḍie ḅọrọma tẹ ḅara ḅụ, Juu-ḅẹ-apụ na Ja asịẹ ḅẹ apụ na gbọrụ ḅara kẹ si mịẹ pọkọ tarị kụrọ mẹ suku-ḅio emii.

¹⁰ Fịafịa Ḍiri mẹ ḅẹẹm: “Karakara mịẹarị gbọrụḅọ-sọ ofori,

¹¹ gbọrụḅọ-sọ ye fieye naa-a, anịanịa sunsin Tamụnọ pịrịarị gbọrụḅọ-sọ ofori.

¹² Tomi mamgba Tamụnọ ḅụ mangị-so tẹ; inimgba etela-iri tẹ; kuraye mịẹarị ḅọ ofori, kpọkpọ gbọrụḅọ-sọ ofori.

¹³ Ịna ẹkwẹn ḅio kịnị toluma ḅaa aị ḅin wararị; ini ịna aḅẹlẹ kẹ si kẹ ja apụ mịẹ ḅẹ iruo kọn, kọn sararị, ịna ḅịḅị-ḅio paka-ḅoarị si ẹkwẹn ododo ḅịḅị ḅẹ fịla kịkam;

¹⁴ gbo-aị mie ịn kẹ ẹkwẹn sọma tẹ kọn-arị.

¹⁵ Ye kẹ kịnị lama na ḅaa na ịna ḅụụ sarasara ḅakam,

¹⁶ ịn la anga, la anga in sima kọsịmam.

¹⁷ Ịna ḍumo ḅụ dein ofori,

¹⁸ ịn pịkị Tamụnọ mangịma, fa ḅara nimi-a.”

¹⁹ Mịọkụ wa nimi tẹ mịnẹ Oloko mẹ ḅio kẹẹ koro wararị aị ma sime Oloko mẹ suku-ḅio sime apụ pịrịm. Miemẹ anie gbọrụḅọ sọ ḅarị kẹ gotẹ so aị nyana ḅịa ye Tamụnọ tomi mamgba kọn ḅarị sakị.

²⁰ Oloko mẹ koko ẹrẹsị Tamụnọ tọrọkọ karakara ḅẹ ḅọ ofori; Oloko mẹ bebe kọrịarị ye anie mịẹtẹ tomḅọ nimi mịnẹ mḅọ si mịẹ tẹ.

Tamụnọ Kẹ Ọ̀ Ḅụụ Ḅụ Wa Daa-karakaramarị Ḅara

²¹ Kụma mịọkụ Tamụnọ ọ̀ kẹ tomi kẹ ọ̀ ḅụụ karakara ḅara wẹrịarị ḅara kẹ wa ḍie tẹ. Anị gbala-gbala oloko mẹ na gboloma-a, karakaraye, Mozizi Oloko mẹ na ịkịankoroapụ ma na anị gbolomaye ḍuko tẹ sọ.

²² Jizọsị Kịrayịsị ḅụụ minini nyana anie Tamụnọ kẹ kịnị kẹ karakara ḅụ wẹrịarị. Kịrayịsị minini apụ mamgba Tamụnọ ọkọ mịẹ ịn pịrịarị, gbala-gbala ọ̀ kịrị pakama-a.

²³ Ḅẹḅọ-ḅẹḅọ si mịẹ tẹ Tamụnọ iḅi ḅụ ḅele tẹ.

²⁴ Kụma Kịrayịsị Jizọsị ịn pakịrịḅọ ḅe anie Tamụnọ gotẹ ye ḍiki-a ḅara kẹ tomi mamgba ḍiki-ḅụụjịrị tẹ ịn kẹ karakara ḅụ wẹrị ye.

²⁵ Kụma Tamụnọ ọ̀ kẹ tomina si sịkịrị sin ḅẹ agba mịẹm, anie ịn Kịrayịsị ḅụ nyana ḅẹ minini ḅụ. Ò gotẹ miemẹ mịẹ ye, kẹ ọ̀ karakara mịẹ mẹ ḍie-pakama ḅẹm, anie ò ye-inema la ḅara ḅụ ori elemu ịn mịẹ asi ma wẹrịso tẹ ye ẹrẹsị.

²⁶ Ò gotẹ miemẹ mịẹ ye, kẹ ọ̀ karakara mịẹ mẹ ḍie-pakama mị sakị mẹ ḅụ, mie ḅụ ọ̀ karakara mịẹḅọ sọ tẹ, ọ̀ pịkị Jizọsị ḅụụ minini nyana tomḅọ mẹ sọ kẹ karakara mịẹ ḅọ sọma tẹ.

²⁷ Wa tiye kẹ ḅụụ-boma ḅẹ? Gberie-sọ ofori! Tiegotẹ? Wa Oloko mẹ koko ye mụnọọ? Ẹn-ẹn, kụma minini gotẹ.

²⁸ Wa paa ḍukoarị, mịnẹ tomḅọ kẹ Tamụnọ ḅụ karakara ḅarịye minini, Oloko koko-a.

²⁹ Anịanịa Tamụnọ ḅe Juu-ḅẹ-apụ ngẹrị Tamụnọ mụnọọ? Ori Ja asịẹ ḅẹ apụ ma sọ Tamụnọ-a? Inn, ori Ja asịẹ ḅẹ apụ sọ Tamụnọọ.

³⁰ Gbọrụ Tamụnọ ngẹrị anie emi ye ḅẹ sakị, ori anie Juu-ḅẹ-apụ ma kẹ karakara ḅụ wẹrịarị ịna minini ḅụ, pịkị Ja asịẹ ḅẹ apụ ma sọ kẹ karakara ḅụ wẹrịarị ịn nyana minini ḅụ.

³¹ Anị kụma wa ḅọrọ minini mẹ gotẹ Oloko mẹ kẹ papaaye sịn ḅẹ mụnọọ? Gbala-gbala ọkọ-a! Anie nakara wa Oloko mẹ rẹ ọlọ kụrọmarị.