Romu 16 - FỊAFỊA BAỊBỤLỤ

Pọlụ Ḅii-ḅịḅị Kẹ Ò Nimi Tẹ Apụ Fịrịmam Romu Ḅụ

¹ À mịẹtẹ ọ́ wamịna ịyịmbara Fibi nimiarị, árị ma anie Kẹnịkịrịya ḅẹ sọsị mẹ ḅụ fịrịmẹnjịarị ḅọ.

² Tamụnọ atomi mịẹ na-iḅi ḅara ḅụ, ọmịnị à daa-ọkịị, KỊNỊNYANAḄỌ ḅe ẹrẹ ḅụ, tẹ ḅarasụa á pịrịị, árị ọmịna ḅara ḅii ye, ḅii ye ḅụ. Kẹ gotẹ ọkọ ḍukoarị, árị ma anie tọnwa-apụ ikiaḅọ, pịkị yẹrị sọ.

³ À ḅii-ḅịḅị kẹ Pirisila na, Akịwila na fịrịmarị; ini ma anie ị̀ na sọ tẹ Kịrayịsị Jizọsị kọrịnama mẹ kọrị, kọrị apụ, tẹ

⁴ ịn pịkị ịna ḍumo bala-a ḅara kẹ ḅarasụa ị̀ pịrịm. Àrị ịmịẹtẹ kẹ ịn ḅẹẹm, yẹrị ngẹrị-a, kụma Ja asịẹ ḅẹ apụ ma asọsị mamgba sọ ịmịẹtẹ kẹ ịn ḅẹẹm.

⁵ Ọ́ pịkị ḅii-ḅịḅị kẹ ịna warị kobiri, kobiri sọsị mẹ sọ pịrịị. Ó ḅii-ḅịḅị kẹ ì iḅi ikiaḅọ Epinẹtusi pịrịị. Ori anie Esiya ibe ḅụ tarị Kịrayịsị minini ḅọ.

⁶ Ó Meri, ịnyọ kpọma tẹ kọrịnama kọrị ọ́ pịrịarị ḅọ ma, ḅii.

⁷ Ọ́ pịkị ḅii-ḅịḅị kẹ ì pembema Juu-ḅẹ-apụ tẹ ị̀ na ikoli ḅio sime, sime apụ ma pịrịị, anie Andironikọsi na Juniya na. Fịrịmẹnjịapụ ma iḅiọkụ in nimi lama wararị, yẹrị na ini na, ini pịkị tarị Kịrayịsị ḍukamẹnjịapụ sọm.

⁸ À ḅii-ḅịḅị kẹ ì iḅi ikiaḅọ Amụpiliyatusu fịrịmam, anie KỊNỊNYANAḄỌ ḅe ḅụụ ị̀nịna gboloma ḅọ ḅe.

⁹ Ọ́ wamịnị na Kịrayịsị kọrịnama mẹ kọrị-kọrị Ụbanọsị na ì iḅi ikiaḅọ Sitakisi na sọ ḅii.

¹⁰ Ọmịnị Apẹlẹsị, kịnị mamgba nimi tẹ ḅara ḅụ, Kịrayịsị ḅụụ ḅụọ sin jen kiri sịẹma-a ḅọ ḅe, ḅii. Ọ́ pịkị Arisitobulọsị warị ḅẹ apụ ḅii.

¹¹ Ọ́ pịkị Ẹrodiyọnị, ì pembema Juu-ḅẹ-ḅọ ḅe na Nakịsọsị warị simearị Kịrayịsị ḍukamẹnjịarị amịnapụ mamgba ḅii.

¹² Ó ḅii-ḅịḅị kẹ Tirayịfina na Tịrayịfosa na pịrị ị̀ pịrịị, anie KỊNỊNYANAḄỌ ḅe kọrịnama mẹ kọrịarị apụ ma; ọ́ pịkị ì iḅi ikiaḅọ anie Pasisi, tẹ ịnyọ kpọma tẹ fịrịmẹnjị KỊNỊNYANAḄỌ ḅe pịrị ḅọ ḅe ḅii.

¹³ À ḅii-ḅịḅị kẹ Rufọsị, kịnị ẹrẹ naa tẹ, KỊNỊNYANAḄỌ ḅe kọrịnama-kọrịḅọ ḅe, na ó iyingi ị̀ kẹ á tụḅọ ḅara ọkị ḅọ ma na fịrịmam.

¹⁴ À ḅii-ḅịḅị kẹ Asinikiritusi na, Filẹgọnị na Hamisi na, Patirobasi na, Hamasi na Kịrayịsị ḍukamẹnjịarị amịnapụ mamgba tẹ ini na simearị apụ ma na fịrịmam.

¹⁵ À Filologọsị na Juliya na, Neriyọsi na, ori mbịra na, Olimipasị na, ini na simearị Tamụnọ atomi mamgba na ḅiim.

¹⁶ Ọ́ ḅẹlẹma ḅara kẹ jụmọ-jụmọ fịnama tẹ ọmịna aḅụụ ḅii. Kịrayịsị asọsị mamgba ḅii-ḅịḅị kẹ ọ́ fịrịma famam.

Kunoma Ḅụ Pọlụ Ịn Mịẹ Ḅẹ Ja Aị Ḍukom

¹⁷ Ị̀ amịnapụ, arị ọ́ tẹkẹm ó tomi kẹ ogbo-ogbo puu tẹ tomina minini pịkị iḅoarị apụ na, ọ́ tarị ḍawọ aị ma na tụḅụrụ wararị aị tolumarị apụ na ẹbị lamaa. Ọmịnị ịna ḅụ ḅụụ ḅelemaa!

¹⁸ Mịna aị ma mịẹarị apụ ma, ịn Wa Nyanaḅọ Kịrayịsị ḅe fịrịmẹnjị-a, ịna pọkọ-ḅẹngbọ ịna ḅụụ ḅẹrẹ tẹịnm. Ḅịḅị ḅẹlẹ ẹkwẹn mie ịn kẹ ye-nimia-apụ ma furuma, furuma tẹ in toluma irimarị.

¹⁹ Ḅẹḅọ-ḅẹḅọ ọmịnị Iḅi-Oku mẹ ọlọ kụrọma wararị mẹ naa tẹ, miemẹ ẹrẹsị àrị ó ḍiki ḅioḅẹlẹarị. À ḅiiarị mịnẹ iḅiye mịẹ ḅụ ó ye nimi apụ sọọ, tẹ ọ́ pịkị siye mịẹ-mịẹ ḅara nimi-a apụ sọọ.

²⁰ Tamụnọ, wamịna dein ḅụụ ḅụ sime tẹ ḅoarị ḅọ ḅe, ala-a sakị ḅụ Ekwesu fomu gbin tẹ ọmịnị ọ̀ nanga ḅọrọ ḅa. Wa Nyanaḅọ Jizọsị Kịrayịsị ḍiki-ḅụụjịrị na ọmịnị na simee.

²¹ Timoti, ị̀ na kọrịnama kọrị gbolomarị ḅọ ḅe, ó ḅiim; anị gbọrụ ḅara mẹ anie Lusiyọsị na, Jesịnị na, Sosipata na, ì pembema Juu-ḅẹ-apụ ma, sọ mịẹ ḅara.

²² Yẹrị, Tatịyọsị, tẹ Pọlụ ḅịḅị ẹkwẹn mẹ da mị ḍiri mẹ ḅio kẹẹ koroma ḅọ ḅe sọ Kịrayịsị ḍukamẹnjịapụ ḅii-ḅịḅị kẹ ọ́ fịrịmam.

²³ Gayọsị, à bịan warị mẹ, tẹ sọsị mẹ kobiri, kobiri anga mẹ nyanaḅọ ḅe, sọ ḅii-ḅịḅị kẹ ọ́ fịrịmam. Ịrasịtọsị (ama igbigi-kokoḅọ ḅe) na wamịna iyimbere Kwatọsị na sọ ḅii-ḅịḅị kẹ ọ́ fịrịmam.

²⁴ Wa Nyanaḅọ Jizọsị Kịrayịsị ḍiki-ḅụụjịrị ọmịnị-mgba na sime. Amẹnị.

Pọlụ Kẹ Ḍiri Mẹ Gbaịn Tokini Tẹkẹ

²⁵ Ó yee wa boma kẹ Tamụnọ pịrịị! Ori anie inetẹ mịẹtẹ à kẹ ḅo ọ́ pịrị Jizọsị Kịrayịsị gboloma Iḅi-Oku mẹ ḅụ ó nyana minini mẹ ḅụ ọ́ sịẹ kụrọ ḅarịye; anie iḅere-iḅerea kụra-ḅio kikima sime karakara mẹ, tẹ ọ̀ mịẹfinji ye mẹ sime-ḅara ḅụ.

²⁶ Mịọkụ, anị sime-ḅara ḅụ, ịkịankoroapụ ma kẹẹ aị ma ḅụ karakara mẹ bele paka tẹ, tẹ sime gbamaso Tamụnọ ḅe tọn ḅara ḅụ, ama sịẹ-sịẹ mamgba nimi tẹ minini tẹ anị ḍuko ḅara mịẹ ḅarị ḅara.

²⁷ Ori ḅe kịngẹ anie Tamụnọ, ori ḅe kịngẹ anie nimi Nyanaḅọọ; boma sime ọ̀ pịrị gbamasoo, Jizọsị Kịrayịsị ḅẹ ḅụụ. Amẹnị.