Romu 14 - FỊAFỊA BAỊBỤLỤ

Í Pembema Kịrayịsị Ḍukamẹnjịarị Mịnaḅọ Ḅụ Si Ḍọkị Ma

¹ Minini kụrọ-a ḅọ ọmịna ḅụ ḅẹ ḅọ sọ ḅii, ḅii ọmịnị mḅọ daa-ọkịị, kụma mḅọ kuroma mḅọ da-mu anga ḅẹ aị ḅụ ọmịnị mḅọ na ye-nụnụa ma.

² Gbọrụḅọ minini sime-ḅara ḅụ mḅọ fị-fị ye goyegoye fị ḅẹ-ḅiiarị, kụma minini kụrọ-a ḅọ mẹ ọgụ kịngẹ fị ḅẹ-ḅiiarị.

³ Fị, fị fịye goyegoye fị ḅarị ḅọ mẹ, ọkọ mịẹ-a ḅọ mẹ ḍiki-sima ma. Anịsakị ọgụ kịngẹ fịarị ḅọ mẹ pịkị fị-fị, fịye goyegoye fịarị ḅọ mẹ sọkịrị ḅịa, kẹ gotẹ ọkọ ḅẹẹarị, Tamụnọ mḅọ daa-ọkị tẹ.

⁴ Ị́yẹrị ḅọrọ tụḅọ tẹ jụmọ fịrịmẹnjịḅọ kọn ḅẹ? Mḅọ Nyanaḅọ mie mḅọ mịẹ iḅi na, si na kẹ mḅọ kọn ḅarịye. Mḅọ pịkị inetẹ iḅiye mịẹ ḅa, KỊNỊNYANAḄỌ ḅe ḅarasụa mḅọ pịrịarị ogbo.

⁵ Gbọrụḅọ ọkịarị gbọrụ ene opu ene sọ osi ene ma nẹngịm, jụmọ pịkị ene mamgba ọkị gbasịma wararị, ọrụḅọ-ọrụḅọ mḅọ ọlọ ye, ọlọ ye ḅẹ karakara nimi lamaa.

⁶ Gbọrụ ene ọkị gelemarị ḅọ mẹ gotẹ ọkọ mịẹarị ye mḅọ kụn kẹ KỊNỊNYANAḄỌ ḅe pịrị ḅẹ ḅara; fị-fị ye goyegoye fị ḅẹ-ḅiiarị ḅọ mẹ sọ KỊNỊNYANAḄỌ ḅe kụn gotẹ mịẹarị, gbala ọ̀ fịye mẹ gotẹ ịmịẹtẹ kẹ Tamụnọ ḅẹẹarị. Ja afịaị fị ḅẹ ḍọkị-a ḅọ mẹ sọ KỊNỊNYANAḄỌ ḅe kụn ḅẹ gotẹ ọkọ mịẹarị, tẹ ori ịmịẹtẹ kẹ Tamụnọ ḅẹẹarị.

⁷ Kụma wamịna-aḅụụ ḍumo amịna ḅụụ kịngẹ pịrịarị ḅọ ofori, gbọrụḅọ-sọ pịkị fịị amịna ḅụụ kịngẹ pịrị-a.

⁸ Wa ḍumoarị ḅẹḅẹ wa ḍumo KỊNỊNYANAḄỌ ḅe pịrịarị, wa pịkị fịị ḅẹḅẹ wa fịị KỊNỊNYANAḄỌ ḅe pịrịm. Anie ḅụ wa ḍumo-o, wa fịị-o, wa sime KỊNỊNYANAḄỌ ḅe pịrịm.

⁹ Kịrayịsị gotẹ fịị tẹ pịkị saakị tẹ ḍumo ye, ó ḍumo wararị apụ na fịtẹ-apụ na Nyanaḅọ sọ ḅẹm.

¹⁰ Anie ḅụ, ọgụ ngẹrị fịarị ḅọ, í tiegotẹ ị́ mịnaḅọ mẹ kọn-arị? Anịsakị fịye goyegoye fịarị ḅọ í tiegotẹ ị́ mịnaḅọ mẹ ḍiki-simarị? Wamịnị-mgba Tamụnọ tọrọkọ sịẹ tẹ ọ̀ wa kọn ḅa.

¹¹ Kẹ gotẹ ọkọ ḍukoarị, Fịafịa Ḍiri mẹ ḅẹẹarị, “Piki-pikiye-ofori ḅara ḅụ yẹrị anie ḍumo wararị Tamụnọ ḅe nwẹn ḅẹẹ sakị goyegoye, KỊNỊNYANAḄỌ ḅẹẹarị, ḅẹḅọ-ḅẹḅọ ị̀ tọrọkọ kparakị ḅa tẹ ọrụḅọ-ọrụḅọ ḍuko-pakama ḅa mịnẹ yẹrị anie Tamụnọ.”

¹² Wamịnị-mgba, ọrụḅọ-ọrụḅọ mḅọ amịna ḍumo kọn ḅara ḍuko Tamụnọ pịrị ḅa.

Mịẹtẹ Í Pembema Kịrayịsị Ḍukamẹnjịarị Ḅọ Si Mịẹ ma

¹³ Ọkọẹrẹsị, ó yee wa jụmọ-jụmọ sọkịrị wẹrịso, tẹ anie nakara ḍụkụ tẹ ị́ ḅụụ ḅo ye jụmọ da-mu si ḅio suu ma.

¹⁴ KỊNỊNYANAḄỌ Jizọsị ḅụụ àrị emi ye mẹ mịẹtẹ à nimi lama wararị mịnẹ fị-fịye goyegoye tomḅọ sima ḅẹ ye-a; kụma gbọrụḅọ nwẹnị ọkịm mịnẹ ja afịaị tomḅọ sima simam ḅẹḅẹ anie mḅọ ḅẹrẹ la tẹ.

¹⁵ Ị́ fịarị ye ḅụ ḅo ye si kẹ jen tomḅọ mịẹarị ḅẹḅẹ, ḅẹlẹma ḍumo ḅarị ị́ ḅụụ ofori. Ọkọẹrẹsị ḍụkụ tẹ ị́ fịarị fịye Kịrayịsị fịị pịrị tẹ ḅọ mẹ guluguluma ma.

¹⁶ Ḍụkụ tẹ tomi si ẹrẹ kẹ ị́ kẹ iḅi sịn ye sịn ma.

¹⁷ Tamụnọ Ama-da mẹ anị fị-na-ḅuu-na gboloma-a, kụma Fịafịa Tẹmẹ ḅe ḅara ḅo karakara mịẹ na, dein na, ḍereku na mie anị ḅio simearị.

¹⁸ Tomḅọ mị ḅọkọ ḅụ ḅọrọ tẹ fịrịmẹnjị Kịrayịsị pịrịarị sakị mie mḅọ Tamụnọ ḅioḅẹlẹma tẹ tomi pịkị mḅọ mịẹarị ye mẹ kẹ iḅiye sịn ḅarịye.

¹⁹ Ọkọẹrẹsị wamịna ogboku ḅụ dein pakama tẹ pịkị jụmọ-jụmọ kụrọma ḅarị aị mie wa ḍiki tẹ mịẹ ḅarịye.

²⁰ Fịye gotẹ Tamụnọ kọrị tẹ kọrịnama mẹ guluguluma ma. Tomḅọ fị-fị ye goyegoye ọmịnị inetẹ fị ḅa, kụma ọ́ fịarị fịye mịẹtẹ jụmọ si ḅio sọ ḅarị ḅẹḅẹ, anị fịye mẹ ḅarị iḅiye-a.

²¹ Mie ḅụ, mịẹ na-iḅi ye anie, anị ḅọrọ nama pẹị-o, iru ḅuu-o, anịanịa jen ye tẹ ọ́ mịẹarị tẹ ọmịna pembema Kịrayịsị ḍukamẹnjịarị ḅọ ḅịkịma ḅarịye nwẹn-sịn ye, ọ́ kẹ ọmịna ḅụụ gboloma ma.

²² Ọkọẹrẹsị miemẹ gbolomaye ḅụ ị́ ọkị anga emi-emii, ye anị Tamụnọ na ị́ na ngẹrị ogboku sime. Tomḅọ kẹ karakaraye sịn ye ḅụ mḅọ tẹmẹ ḅioḅẹngbọ ḅẹrẹkọn mḅọ ḅara sima-a ḅẹḅẹ, ḅioḅẹlẹ sime anị tomḅọ mẹ pịrịm.

²³ Kụma tomḅọ fịarị ye ḅụ mḅọ ḅio maaịn, maaịn tọn-arị ḅẹḅẹ, mḅọ mịẹarị ye mẹ Tamụnọ anị kẹ si kịẹn mḅọ pịrị ḅa, kẹ gotẹ ọkọ ḅẹẹarị, minini ḅụ mịẹ-a ye goyegoye anie si.