Romu 13 - FỊAFỊA BAỊBỤLỤ

Kọrị Ḅẹrẹtọn-Siri Pịrị Ḅẹ Akọrịnama

¹ Sime ḅọ, sime ḅọ Ḅẹrẹtọn-Siri mẹ ḅịḅị pokii, tẹ sịḅị-tuu ịn pịrịị, ịn kọn-arị kụrọ mẹ Tamụnọ ḅara ḅom ẹrẹsị, tẹ opu kiri ḅụ lẹgị ḅọ, lẹgị ḅọ Tamụnọ mḅọ kẹ lẹgịmam.

² Anie ḅụ, ḅẹrẹtọn kiri ḅụ sime ḅọ na tụḅụrụarị ḅọ sime, sime, mḅọ Tamụnọ tọn ye na tụḅụrụarị, tẹ pịkị ò fomu-ḅara nụnụ ḅụụ pịrịarị.

³ Si mịẹ apụ anie ḅẹrẹtọn apụ gotẹ ḅalafaarị, iḅiye mịẹ apụ-a. Ị́ ḅẹrẹtọn kụrọ nyanaḅọ ḅe gotẹ ḅalafa ḅẹ ḅii-a ḅẹḅẹ, iḅiye ḍiki tẹ mịẹ, anịsakị ori í tokini ḅa,

⁴ ori Tamụnọ fịrịmẹnjịḅọ tẹ í iḅi gotẹ kọrịnama kọrịarị ḅọ ẹrẹsị. Í si amịẹaị mịẹarị ḅẹḅẹ, ò gotẹ ḅalafaa, gbala Tamụnọ kẹ ọ̀ pịrị kụrọ ḅụ ori inetẹ fomu-ḅara kẹ ị́ pịrị ḅa, ori Tamụnọ fịrịmẹnjịḅọ tẹ fomu-ḅara kẹ si mịẹ ḅọ, mịẹ ḅọ pịrịarị.

⁵ Ọkọẹrẹsị, kụrọ mẹ ḅara ḅụ simearị apụ ma ḅịḅị pokii, Tamụnọ ịganị ḅofa ḅo ị́ la kịngẹ gotẹ mịẹ ma, kụma ị́ tẹmẹ ḅioḅẹngbọ sọ kẹ ị́ ḅẹẹarị ḅara mịẹ.

⁶ Anie mẹ mie ó gotẹ ama-igbigi sọ osoarị ye; kẹ gotẹ ọkọ ḅẹẹarị, ḅẹrẹtọn-apụ ma ịna akọrịnama kọrịarị sakị goyegoye ịn kọrịnama kọrị Tamụnọ pịrịarị.

⁷ Anie ḅụ ọmịnị ịna ḅara ọlọ ye emi-emii, ọ́ kẹ ịn gbẹẹ, tomḅọ sịḅị, sịḅị osoarị igbigi-o, tomḅọ nyana-ye ḅụ mḅọ kẹ ama gbẹẹ ḅẹ ye-o, ọ́ gbẹẹ, tẹ pịkị mangịma na kụn na sọ kẹ inimgba pịrịị.

Tomi Kẹ Jụmọ-Jụmọ Na Anga Ḅẹ Ḅara

⁸ Ḅẹlẹma saa sikima kịnị aḅara jen saa fị ma, gbala jen tomḅọ ḅẹlẹmarịḅọ mẹ mie Oloko mẹ kokoarị ye.

⁹ Oloko mẹ tọn koromam: “Sẹfị ma; kịnị-ḅa ma; furu ma; ye mọnị ma”; mịna aị ma na jaị na kpọọ gboloma tẹ kẹ gbọrụ oloko mịẹ ye anie, “Ị́ ị́ ḅụụ ḅẹlẹma ḅara kẹ í pembe tomḅọ ḅẹlẹmaa.”

¹⁰ Í kura-aye kẹ ị́ ḅẹlẹmarị tomḅọ mịẹ ḅịa gbamasom, ọkọẹrẹsị jụmọ ḅẹlẹma mẹ anie Oloko mẹmgba koko fama mẹ.

¹¹ Miemẹ ọ́ mịẹ-a so ḅẹ ye-a, gbala ọmịnị sọ nimi ḅara ḅụ, mie mono ḅụ saakị na-iḅi sakị mẹ. Kẹ gotẹ ọkọ ḅẹẹarị, wa ḅọrọma ḅẹ sakị mẹ ḅo kpeki wa tarị, tarị minini sakị nẹngị tẹ.

¹² Ḍin mẹ mu lama tẹ, finji ene ḅo laa ḅẹ tẹ. Ó yee wa ḍin ḅẹ amịẹaị ma, tẹ sime kanakana pịrị aị ma, dasịẹma tẹ ịn kẹ bele ḅio ḅẹ owu sọ, sọ owuna-aị ma ọkị ḅiri.

¹³ Eneḅaka-fịafịa-ogbo ḅụ angarị apụ ḅara ḅụ, ó yee wa tomina tọrọkọ ḅụụ gbẹẹ ḅara anga; iru ḅuu bụlụ-bụlụma ḅara kẹ alalị fị-a ḅara, owiapụ na ereme na kọn na-iḅi-a mẹnjị kọn, anịanịa ḅụụ-sima amịẹaị mịẹ ḅụ-a, owu-sọ ofori, ḅụụ-sịnịsịnị sọ ofori ḅara.

¹⁴ Kụma KỊNỊNYANAḄỌ Jizọsị Kịrayịsị owuna-aị ma ọkị ḅiri, tẹ ḅarị tomḅọ si sime-ḅara kẹ ye sịn tẹ anị ḅii ye, ḅii ye mịẹ ma.