Romu 12 - FỊAFỊA BAỊBỤLỤ

Tamụnọ Kọrịnama Kọrị Ḅụ Tomḅọ Kọn-arị Ḍumo

¹ Mie ḅụ, ị̀ amịnapụ, Tamụnọ nyana wa pịrị opu ọkụrụkụrụ mẹ ẹrẹsị àrị ọ́ tẹkẹm: Ọmịnị ọmịna aḅụụ kẹ ḍumo wararị agba sọma Tamụnọ pịrịị, tẹ ḅụụ sịkị ọ̀ fịrị na ọ̀ ḅioḅẹlẹma na pịrịị. Miemẹ anie karakara ḅara mẹ tẹ ọ́ kẹ sunsin ọ̀ pịrị ḅarị ḅara.

² Ọ́ mị tomikiri mẹ ḅẹ apụ anga, anga ḅara ḍiki angama, kụma ó minini Tamụnọ pịrị tẹ ori ọmịna ḅụụ ḅio ḅụ ó ḍima, tẹ ọ́ gbọrsịḅị ịwọ ḅioḅẹngbọ sụa. Anịtẹrẹmẹ mie ọmịnị inetẹ Tamụnọ ḅiiarị ye nimi ḅarịye — iḅiye tẹ, ọ̀ ḅụụ-ḅẹlẹ tẹ, kpaịn fama wararị ye.

³ Tẹ Tamụnọ kẹ, ò ḍiki-ḅụụjịrị iḅi ḅụ, ị̀ pịrị ḍiepịrịye la ḅara ḅụ, àrị ọmịna ḅụ ọrụḅọ-ọrụḅọ ḅẹẹarị: ḅụụ-gelema ḅara kẹ ị́ ḅụụ ọkị ị́ mịẹ gbẹẹ ḅara nẹngịma ma. Anie nakara, ḅụụ lẹgịma ḅara kẹ ị́ ḅụụ ọkị, tẹ Tamụnọ kẹ ị́ pịrị minini la ḅara kẹ ye ọkịị.

⁴ Gbala tomḅọ oju ḅụ pakịrị, pakịrị emi, tẹ mịna kịrị-kịrị apakịrị ma pịkị kịrị-kịrị akọrịnama nyana wararị.

⁵ Anị gbọrụ ḅara ḅụ, karakara ye wamịnị tọnwa-apụ sọ, Kịrayịsị ḅụ wa gbọrụ oju mịẹ wararị, tẹ jụmọ-jụmọ na oḅoloma wararị, gbọrụ oju ḅụ emi kịrị-kịrị apakịrị sime-ḅara.

⁶ Mie ḅụ wa wamịna kịrị-kịrị aḍiepịrị-aị ma kẹ Tamụnọ ḍiki-ḅụụjịrị wamịna-aḅụụ sime-ḅara ḍiki kọrịnama kọrị ḅa. Tamụnọ oku mẹ ḍuko-pakama ḅọrọ wamịna ḍiepịrịye ḅẹḅẹ, wa wamịna minini la ḅara ḍiki tẹ mịẹ;

⁷ anị ḅọrọ fịrịmẹnjị ḅẹḅẹ, wa mẹnjịị; anị ḅọrọ ye-toluma ḅẹḅẹ, wa ye mẹ tolumaa;

⁸ anị ḅọrọ ja apụ ḅiokpọma ḅẹḅẹ, wa anị mịẹ. Ja apụ na ye ḍiyarịḅọ emi-emii, mḅọ ḅara sarasara ḅara kẹ mịẹ; ḅẹrẹtọn kụrọ nyanaḅọ ḅẹḅẹ, mḅọ kụrọma kọrịnama kọrịị; iḅi ḅara kẹ kịnị na angarị ḅọ ḅẹḅẹ mḅọ tọrụ ḅẹlẹ ḅara kẹ anị mịẹ.

⁹ Ọ́ ḅụụ ḅụ gbọrụ aka sọ ofori ḅẹlẹma nyana tomi pịrịị. Ó siye goyegoye sịkị tẹ iḅiye goyegoye fịnamaa.

¹⁰ Ọ́ karakara Kịrayịsị ḍukamẹnjị amịnapụ ḅẹlẹma nyana jụmọ-jụmọ pịrịị, tẹ ḅio-sẹsẹ ḅụ jụmọ-jụmọ balaa.

¹¹ Ọmịnị ịnyọ kpọma tẹ kọrịnama kọrịị, tẹ ḅarị kọrịnama ḅụ ḅụụ-lọkọma. Ọ́ ḅụụ saakị KỊNỊNYANAḄỌ ḅe pịrị ḅara kẹ tẹmẹ-la ḅara kẹ fịrịmẹnjị ọ̀ pịrịị.

¹² Yee ọmịna ḅiokpọmaye mẹ mịẹtẹ ọ́ sakị mamgba ḅioḅẹlẹ; ḅụụ-fụka kiri ḅụ ó ye inemaa, tẹ sakị mamgba tẹkẹẹ.

¹³ Yee ọmịna pembema Kịrayịsị ḍukamẹnjịapụ tẹ mịẹ ḅẹ ọkụ ofori apụ ma ọmịnị na ọ́ nyana aị ḍiya, tẹ ọ́ ḅọkọ gbaịn igoniapụ pịrị ma.

¹⁴ Ọ́ Tamụnọ tẹkẹ ḅaa-ḅọkọ kẹ ọ́ ḍọkịarị apụ pịrịị, mịnẹ ori in bomaa. Inn, boma ngẹrị, wori-a.

¹⁵ Ó ḅioḅẹlẹarị apụ na sọ tẹ ḅioḅẹlẹẹ; tẹ owuarị apụ na sọ tẹ owuu.

¹⁶ Ọ́ gbọrụ ḅara kẹ ḅẹḅọ-ḅẹḅọ balaa. Ọmịnị opu amịẹaị mịẹ ma, kụma ọ́ ḅụụ lẹgịma tẹ kọrịnama kọrịị. Ọ́ ḅụụ kẹ ye-nimi ḅara ọkị ma.

¹⁷ Gbọrụḅọ si kẹ ị́ mịẹ-mịẹ, si kẹ mḅọ mịẹ ọkị ma. Ḅụụkụrọma tẹ ḅẹḅọ-ḅẹḅọ kẹ iḅiye sịn-arị ye ḍiki tẹ mịẹ.

¹⁸ Í inetẹ ḅara, inetẹ ḅara mịẹ tẹ ḅẹḅọ-ḅẹḅọ na dein ḅụ angaa.

¹⁹ Ì ikiapụ, ọ́ gbẹẹfị ḅii ma, kụma anie nakara ọ́ wẹrịso Tamụnọ pịrị tẹ ori ḍiki tẹ ḅii. Kẹ gotẹ ọkọ ḅẹẹarị, Fịafịa Ḍiri mẹ ḅẹẹm, “À gbẹẹfị ḅii ḅa, à gbẹẹ gbasịma ḅa, KỊNỊNYANAḄỌ ḅe ọkọ ḅẹẹm.”

²⁰ Anie nakara, Fịafịa Ḍiri mẹ mẹẹ: “Ḅuru ị́ na fịya-a ḅọ tarịarị ḅẹḅẹ, fịye kẹ mḅọ pịrị fị; minji mḅọ pọkọ-tarịarị ḅẹḅẹ minji kẹ mḅọ pịrị ḅuu; ị́ ọkọ mịẹarị ye mẹ mịẹtẹ ḅụụ-jịrị mḅọ gbaịn ḅa, kọrị-fịnị anị dọkịmarị ye gbaịn koro ḅara.”

²¹ Ḍụkụ tẹ siye ị́ nẹngịma ma; anie nakara iḅiye kẹ siye mẹ nẹngịmaa.