Romu 10 - FỊAFỊA BAỊBỤLỤ

¹ Ị̀ amịnapụ, arị ì ḅioḅẹngbọ mẹmgba kẹ ḅiiarị mịnẹ ị̀ ama ḅẹ apụ ma paa ḅọrọma. Arị ịn gotẹ kpọma tẹmẹ-la ḅara kẹ Tamụnọ tẹkẹarị.

² Àrị àrị ine-ḅara, ine-ḅara mịẹ tẹ ó nimi ḅẹ ḅara mịnẹ ini ma ịn tẹmẹ-la ḅara kẹ Tamụnọ ḅụụ sịrẹrẹ wararị, kụma ịn kẹ ọ̀ ḅụụ sịrẹrẹ ḅara mẹ karakara nimi anị ḅụ ofori.

³ Tamụnọ ḅọrọ tẹ tomi kẹ ọ̀ ḅụụ karakara ḅụ wẹrịarị ḅọkọ mẹ in nimi-a; anie nakara ini ḅarana ḅụụkụrọma tẹ ḅọkọ ḍọkị amịna ḅụụ pịrịarị; miemẹ ẹrẹsị in ḍụkụ tẹ sịḅị-tuu Tamụnọ kẹ tomi kẹ karakara ḅụ wẹrịarị ḅọkọ mẹ pịrị-a.

⁴ Kẹ gotẹ ọkọ ḅẹẹarị, Kịrayịsị mịẹ tẹ Oloko mẹ ọ̀ ḅụụ daasịẹ tẹ, tẹ ḅẹḅọ-ḅẹḅọ, mḅọ nyana minini ḅụ Tamụnọ ḅọrọ tẹ mḅọ kẹ ọ̀ ḅụụ karakara ḅụ wẹrị ḅẹ ḅara.

Ḅọrọma Sime Inweni-mgba Pịrịm

⁵ Mie Mozizi Oloko mẹ ḅụ ḅọrọ tẹ Tamụnọ tọrọkọ iḅi-ḅọ sọ ḍọkị mẹ ḅụ kẹẹ koroma ye: “Oloko mẹ tọn ye mịẹ ḅọ, mịẹ ḅọ pịkị anị ḅụ ḅọrọ tẹ ḍumo ḅa.”

⁶ Kụma mie minini ḅụ ḅọrọ tẹ Tamụnọ tọrọkọ iḅi-ḅọ sọ ḅẹ ḅọ ḅụ Fịafịa Ḍiri mẹ ḍuko ye: “Ḅioḅẹngbọ ḅụ ḅẹẹ ma, Tụḅọ iwo so mu ḅẹ?” (anie, Kịrayịsị iderima-ḅoo).

⁷ Pịkị gbela ma, “tụḅọ ideri koro tomikiri mẹ ḅẹ suku-ḅio mu ḅẹ?” (anie, fị ḅụ Kịrayịsị saakịma).

⁸ Anị ḍukoarị ye anie mie: “Tamụnọ oku mẹ ọmịnị na kpeki wararị, anị ọmịna ḅịḅị ọgọnọ na ọmịna ḅioḅẹngbọ na ḅụ emi”, anie minini oku mẹ tẹ wa ḍukoarị ye mẹ.

⁹ Ị́ nwẹnị ḅịḅị kẹ ḍuko pakama mịnẹ Jizọsị anie KỊNỊNYANAḄỌ ḅe, tẹ pịkị minini mịnẹ Tamụnọ fịị ḅụ ọ́ saakịmam ḅẹḅẹ ị́ ḅọrọma ḅa.

¹⁰ Gbala wa nyana minini ḅụ mie Tamụnọ ḅọrọtẹ wa kẹ karakara ḅụ wẹrịarị ye, anịsakị wa ḅịḅị kẹ ḍuko pakama ye ḅụ mie wa ḅọrọtẹ ḅọrọmarị ye.

¹¹ Fịafịa Ḍiri mẹ ḅẹẹm, “Tamụnọ minini ḅọ, minini ḅọ papaa ḅara ọlọ ḅịa.”

¹² Miemẹ sime ḅẹḅọ-ḅẹḅọ pịrịm; Juu-ḅẹ apụ-o, Ja asịẹ ḅẹ apụ-o, anị tomi sẹlẹ-a. Tamụnọ ḅe anie inweni-mgba Nyanaḅọ, ọ̀ sịn tẹ ò boma-a ḅọ ofori.

¹³ Anie Fịafịa Ḍiri mẹ pịkị ḅẹẹ ḅara, “KỊNỊNYANAḄỌ ḅe ẹrẹ sịn tẹ ọ̀ ḅara ḅarasụa ḅii ḅọ, ḅii ḅọ ḅọrọma ḅa.”

¹⁴ Kụma in minini-a sakị, ịn tọ-ḅara mịẹ tẹ ọ̀ sịn ḅẹ mịnẹ ọ̀ ḅarasụa ịn pịrị? Amụ ini oku mẹ naa-a sakị, ndẹẹ in minini ḅẹ ḅara? Tẹ oku mẹ ḍuko ịn pịrị ḅọ ofori sakị, ndẹẹ ini inetẹ naa ḅẹ ḅara?

¹⁵ Tẹ ndẹẹ oku mẹ inetẹ ḍuko tẹ ye sọ ḅẹ ḅara, ini oku-mẹnjịapụ fịrịma pakama mu-a ogbo? Fịafịa Ḍiri mẹ ḅẹẹm, “Iḅi oku mẹ kẹ ḅoarị apụ ma aḅụọ ma ḅụụ-buama ḅara ḍikii!”

¹⁶ Kụma inweni-mgba amụ Iḅi Oku mẹ daa-ọkịa. Ayịzaya ḅioju sọ ḅẹẹm, “KỊNỊNYANAḄỌ, ndẹẹ wa kẹ ḅo oku mẹ daa-ọkị apụ?”

¹⁷ Mie ḅụ, oku mẹ naa ḅụ mie minini ḅoarị ye, anịsakị oku mẹ ḅoarị anga anie Kịrayịsị ḍuko pakama ḅụ.

¹⁸ Kụma à gbelarị: Izirẹlịapụ ma karakara ḅara ḅụ oku mẹ ịn naa-a? Anị sime-ḅara ḅụ ịn naam gbala Fịafịa Ḍiri mẹ ḅẹẹm: “Ịna pọkọ mẹ fie paka mu tomikiri mẹmgba kana-korom; ịna ẹkwẹn ma mu tomikiri ḅẹ ịkọlị ma lam.”

¹⁹ À pịkị gbelarị: Ma ma fie ye Izirẹlị atomi ma ịn naa-a? Mozizi ḅioju sọ kọkọ tarị pakịrị ḅịḅị mẹ pịrị: “À tomi kẹ karakara sịẹ sịn-a apụ ma mịẹ tẹ ị̀ atomi ma ḅụụ-sịnịsịnị ḅa; tẹ oḅori-sọarị asịẹ ma kẹ ị̀ atomi ma ịganịma ḅa.”

²⁰ Ayịzaya gbọrsịḅị ye kikima-a ḅara kẹ ḅẹẹarị, “Ị̀ ḍọkị sime-a apụ rẹ ị̀ ḍọkị ẹrịm; àrị ị̀ ḅụụ pakama ì gbela sime-a apụ rẹ pịrịm.”

²¹ Kụma Izirẹlị gbolomaye ḅụ Ayịzaya pịkị ḅẹẹm, “Bebe ene mẹmgba arị ị̀ aḅara finji pakama tẹ ḅịḅị poki-a na kọngọ koroma na atomi ma daa-ọkị ḅẹm.”