Paka-so 37 - FỊAFỊA BAỊBỤLỤ

Ini Ọḅọkụ-Igbe Mẹ Ịkasịm

¹ Bẹzalẹlị akasiya nwẹn-sịn sịn kẹ Ọḅọkụ-Igbe mẹ ịkasịm; anị ḅẹ nangwọ anie tẹra ḅụọ-kuḅu na ḅara tẹra ẹnzụ na (110 cm), maa ḅụọ-kuḅu na ḅara gbọrụ ẹnzụ na (66 cm) anie anị ḅẹ finjima; anị ḅẹ pokolo pịkị maa ḅụọ-kuḅu na ḅara gbọrụ ẹnzụ na (66 cm).

² Karakara jen ye gwa-a golu ọ̀ nwẹn sọ sara anị gbaịnm ọḅụ-na-kuḅu-na ḅụ, tẹ mgbọlị sọ ḅara kẹ golu sọ sara anị pono ikelema-korom.

³ Ò golu-golu inia nụnụma tẹmẹ anị ḅẹ inia ịkọlị ma pịrịm, maa anụnụma gbọrụ pakịrị anga, maa anụnụma pịkị anị ḅụ osi pakịrị anga.

⁴ Ori ịn kẹ akasiya nwẹn-sịn sịn ḅụ nangwọ, nangwọtẹ asịn ikiḅa pẹlẹm tẹ golu sọ sara arị gbaịnm;

⁵ tẹ nangwọtẹ asịn ma kẹ Ọḅọkụ-Igbe mẹ dogi ḅẹ ḅara kẹ nụnụma ma ḅio suum.

⁶ Ọ̀ gwa-a karakara golu kẹ ḅịḅị-gbaịnye ịn kẹ Ọkụrụkụrụ Emine sịn ye mẹ tẹmẹm: anị ḅẹ nangwọ anie tẹra ḅụọ-kuḅu na ḅara tẹra ẹnzụ na (110 cm); maa ḅụọ-kuḅu na ḅara gbọrụ ẹnzụ (66 cm) anie anị ḅẹ finjima.

⁷ Amana kẹ ḅakụ ḅara ḅụ ori ịn kẹ Sẹrubimu sin maa opu enjẹlị apụ tẹmẹm, ḅịḅị-gbaịnye mẹ ọgọnọ maa asịḅị ma ḅụ ori ịn tẹmẹm,

⁸ gbọrụ Sẹrobu gbọrụ sịḅị ọgọnọ ḅụ, gbọrụ Sẹrobu pịkị osi sịḅị ọgọnọ ḅụ gbọrụ ḅụụ ḅụ mie ọ̀ ḅịḅị-gbaịnye mẹ na anị ọgọnọ maa asịḅị ma ḅụ maa Sẹrubimu ma tẹmẹ pakama-ḅo ye.

⁹ Sẹrubimu ma ḅịḅị-gbaịnye mẹ ọgọnọ-jụ ḅụ ịna apamba finjima ḅịḅị-gbaịnye mẹ gbaịn wararị ịna tọrụ kẹ jen-jen da ḅara ḅụ, ḅịḅị-gbaịnye mẹ na Sẹrubimu ma atọrụ na dama wararị.

Ịn Fịturu Gbana Dẹbịlẹ Mẹ Ịkasịm

¹⁰ Ori ịn kẹ akasiya nwẹn-sịn sịn kẹ dẹbịlẹ mẹ sọ ịkasịm; anị ḅẹ nangwọ tẹra ḅụọ-kuḅu, anị ḅẹ finjima gbọrụ ḅụọ-kuḅu na ḅara maa ẹnzụ (44 cm); maa ḅụọ-kuḅu na ḅara gbọrụ ẹnzụ (66 cm) anie pịkị anị ḅẹ gele;

¹¹ tẹ gwa-a karakara golu sọ sara anị gbaịn tẹ mgbọlị sọ ḅara kẹ golu sọ sara anị pono ikelema-korom.

¹² Dẹbịlẹ tọrụ mẹ ḅẹ akaka ḅụ ọ̀ ḅara ẹnzụ (75 mlm) finjima kẹ ḅọrọ gelema anị ikelema-korom tẹ mgbọlị sọ ḅara kẹ golu sọ sara ọ̀ kẹ gbana ikelema ye mẹ pono ikelema-korom.

¹³ Ò golu-golu ini anụnụma tẹmẹ anị pịrịm, tẹ nụnụma ma kẹ ini ịkọlị ma ḅụ anị ḅẹ inia aḅụọ ma ḅụ oḅolom.

¹⁴ Nụnụma ma ọ̀ kẹ akaka ḅọrọ gelema ye mẹ kpekima oḅolom, kẹ dẹbịlẹ mẹ dogi ḅẹ nangwọtẹ asịn ikiḅa ma ọlọ ḅẹ aị ḅara ḅụ.

¹⁵ Ịn kẹ akasiya sịn-arị sịn ḅụ mie ori ịn kẹ dẹbịlẹ mẹ dogi ḅẹ nangwọtẹ asịn ikiḅa ma pẹlẹ ye, tẹ golu sọ sara arị gbaịnm.

¹⁶ Anịsakị ẹfẹrẹ ma tẹ dẹbịlẹ mẹ ọgọnọ gbana ḅẹ aị ma, anị ḅẹ ye sụa ẹfẹrẹ na, kẹ kụnụaị sụa ḅẹ ẹfẹrẹ na, anị ḅẹ ọlọ ye nyana opu ẹfẹrẹ na, kẹ iru agba mịẹ ḅẹ iru-sụaye na gwa-a karakara golu ọ̀ nwẹn kẹ arị tẹmẹm.

Ịn Kẹ Tọnjọ-Sịẹmaye Mẹ Tẹmẹm

¹⁷ Ọ̀ pịkị gwa-a karakara golu kẹ tọnjọ-sịẹmaye sọ tẹmẹm. Tọnjọ-sịẹmaye mẹ ḅụ tọnjọ mẹ sịẹma ḅẹ anga mẹ na, anị ḅẹ aḅụọ ma na ori amana kẹ ḅakụ-ḅakụ kọrịm. Anị ḅẹ kọpụ na, ejikila na, fịlawa amẹẹ na kẹ anị ḅirima aị ma na anị na gbọrụ ḅụụ ḅụ mie ori anị mịẹ ye.

¹⁸ Sonio ịkpangị anị ḅẹ akaka ḅụ sụa-pakam, tọnjọ-sịẹmaye mẹ ḅẹ gbọrụ pakịrị anga ḅụ tẹra ịkpangị anị ḅụ sụa-pakam, anịsakị tọnjọ-sịẹmaye mẹ ḅẹ osi pakịrị anga ḅụ tẹra ịkpangị pịkị anị ḅụ sụa-pakam.

¹⁹ Ịn kẹ alịmọnịdị sịn tokuru-mbi kịkama mịẹ tẹra akọpụ, gberie-gberie ejikila na, fịlawa na nyana wararị gbọrụ ịkpangị ḅụ; osi ịkpangị mẹ pịkị alịmọnịdị nwẹn-sịn tokuru-mbi mẹ kịkama mịẹ tẹra kọpụ, gberie-gberie ejikila na, fịlawa na nyana wararị — mị-ḅara mie anị tọnjọ-sịẹmaye mẹ ḅụ sụa-paka sonio ịkpangị ma ḅụ sime-ḅara.

²⁰ Anịsakị tọnjọ-sịẹmaye mẹ ḅioju ḅụ ịn kẹ alịmọnịdị sịn tokuru-mbi mẹ kịkama mịẹ inia akọpụ na, ịna ejikila na, fịlawa na emi;

²¹ tẹ tọnjọ-sịẹmaye mẹ ḅụ sụa-paka wararị sonio ịkpangị ma ḅụ gbọrụ ḅụ sime maaịn suku-ḅio ḅụ gbọrụ ejikila, gbọrụ ejikila arị na emi.

²² Arịḅẹ ejikila ma na, arịḅẹ ịkpangị ma na gbọrụ ḅụ ḅụ anị mịẹm; bebe ye mẹ gwa-a karakara golu kẹ gbọrụ ḅụ ḅụ ori amana kẹ ḅakụ-ḅakụ kọrịm.

²³ Gwa-a karakara golu mie ọ̀ kẹ anị ḅẹ sọnọma atọnjọ ma na, tọnjọ ma ḅịḅị ḅụ dọkịtẹ anga ma kịrị sin ḅarị kala sịzịlị na, kẹ tọnjọ ma sụa tẹ kẹ sịẹma ḅẹ pẹmpẹmtẹ kala apanị na tẹmẹ ye.

²⁴ Gwa-a karakara golu kpoo sọnọma ẹndẹ oyia asi finji mie ọ̀ kẹ anị na, anị ḅẹ ngwongwo mamgba na tẹmẹ ye.

Ịn Kụnụaị Dọkịma Anga Mẹ Namam

²⁵ Ori ịn kẹ akasiya sịn-arị sịn kẹ kụnụaị dọkịma ḅẹ agbamịẹ-anga mẹ namam; anị ḅẹ nangwọ gbọrụ ḅụọ-kuḅu na pakịrị na (45 cm) anịsakị anị ḅẹ finjima pịkị gbọrụ ḅụọ-kuḅu na pakịrị na (45 cm); anị ḅẹ nangwọ na finjima na gbasịm, tẹ anị tẹra ḅụọ-kuḅu (90 cm) kẹ gelem; anị ḅụ sụa-paka ịfalị ma na anị na gbọrụ ḅụ ḅụ emi.

²⁶ Ọ̀ gwa-a karakara golu sọ sara anị na, anị ḅẹ ọgọnọ mẹ na, anị ḅẹ akaka ma ikelema-koro na, anị ḅẹ ịfalị ma na, gbaịnm, tẹ ori mgbọlị sọ ḅara kẹ golu kẹ anị pono ikelema-korom.

²⁷ Anị ḅẹ ponoye mẹ suku ò golu-golu maa anụnụma sụam anị ḅụ dama-dama wararị maa apakịrị anga ḅụ kẹ ịn kẹ anị dogi ḅẹ nangwọtẹ asịn ikiḅa ma ọlọ ḅẹ aị mịẹm.

²⁸ Ịn kẹ akasiya sịn-arị sịn ḅụ mie ọ̀ nangwọtẹ maa sịn-ikiḅa ma pẹlẹ pakama-ḅo ye, tẹ golu sọ sara arị gbaịnm.

Ịn Fịafịa-Pulo Mẹ Na Kụnụaị Ma Na Mịẹm

²⁹ Ọ̀ fịafịa-pulo mẹ na sọ mịẹm, pịkị sẹntị gwa ḅọ pikiri gwa ḅara kẹ kụnụ lamarị karakara kụnụaị mịẹm.