Paka-so 36 - FỊAFỊA BAỊBỤLỤ

¹ “Bẹzalẹlị na, Oholiyabụ na, inetẹ kọrịnama kọrị ḅẹ ḅọ goḅọ-goḅọ, KỊNỊNYANAḄỌ ḅe namakọrị aka na, nimi na, sarama yefieye naa na kẹ ịn pịrị tẹẹ ịn kẹ Fịafịa Yọ mẹ ḅẹ akọrịnama ma kọrịị, KỊNỊNYANAḄỌ ḅe wẹrịtẹ tọn ḅara.”

Tomi Ma Tọnwa Ḍiepịrị-aị Ọkị-ḅom

² Mozizi nwẹnị Bẹzalẹlị na, Oholiyabụ na inetẹ ye mịẹ ḅẹ tẹ KỊNỊNYANAḄỌ ḅe ḅioḅẹngbọ ḅụ ịnyọ kẹ suu, tẹ amịna ḅioḅẹngbọ jike saakị apụ ma goḅọ-goḅọ sịn, ịn ḅo kọrịnama mẹ kọrị ḅarị ḅara.

³ Ịn nwẹnị Mozizi ḅara ḅụ tọn pịrị-a ḅara ḅụ kẹ Fịafịa Yọ mẹ ḅụ kọrịnama mẹ kọrị ḅarị agbamịẹ-aị mamgba tẹ Izirẹlị ḅe apụ ma ọkị-ḅo aị ma da ọkị. Dede goyegoye ḅụ ịn paa tọn pịrị agbamịẹ-aị ma ọkị-ḅo ọkị-ḅo ọ̀ pịrịm.

⁴ Mie ḅụ owiapụ tẹ inetẹ Fịafịa Yọ mẹ ḅụ kọrịnama goyegoye kọrịarị apụ mamgba ḅom, ọrụḅọ-ọrụḅọ kọrịnama mẹ tẹ mḅọ kọrịarị ye ḅụ ḅom,

⁵ tẹ Mozizi ḅẹẹm, “Tomi ma kẹ ḅo aị ma kọrịnama mẹ tẹ KỊNỊNYANAḄỌ ḅe tọnm wa mịẹ ḅarị ḅara mẹ ḅii ḅara, nẹngị lamam.”

⁶ Mie ḅụ Mozizi tọn tẹ ịn nwẹnị kpo-kpo gbolo inweni-ogbo mẹ ikelema-koro, “Yee gbọrụ owiḅọ, anịanịa gbọrụ ẹrẹḅọ sọ ḅarị Fịafịa Yọ mẹ gotẹ mịẹarị agba mẹ gotẹ jen agba mịẹ ma.” Mie ḅụ tomi ma jaị ọkị-ḅo dasịẹmam.

⁷ Kẹ gotẹ ọkọ ḅẹẹarị, ịn nyana tẹ ḅịtẹ kọrịnama mẹmgba kara tẹ kọn ḅa.

Ịn Saakị Akpụrụ-warị Mẹ Namam

⁸ Kọrịnama mẹ kọrịarị apụ ma ogbo-ḅio ḅụ kọrịnama aka ḍịntẹ apụ mamgba lọkọ-ḅịtẹ oyia awarị bulo tọrụ na, pọpụlụ nwẹn-sịn tọrụ na, awụ tọrụ na sụa aị kẹ Ọḅọkụ-Igbe koko Akpụrụ-warị mẹ namam, sẹrubimu nwẹn-sịn opu enjẹlị apụ ma sime-ḅara ịn nwẹn kẹ iḅiọkụ arị ḅirimam.

⁹ Ḅịtẹ warị-warị ma ḅẹ nangwọ si maa ḅụọ-kuḅu finji (12 m), arịḅẹ finjima sonioa ḅụọ-kuḅu (2 m); ḅịtẹ mamgba nangwọ gbasịm, pịkị finjima gbasịm, jen-jen nẹngị-a.

¹⁰ Ịn ḅịtẹ ma ḅụ sọnọ awarị gbin gbolomam; tẹ pịkị osi sọnọ awarị gbolomam.

¹¹ Gbin gboloma wararị ḅịtẹ mẹ ḅẹ suku da sịḅị ḅụ ò bulo-bulo ḅịtẹ kẹ sololo ḅara gbin sụam tarịye mẹ na, maaịn karama ye mẹ na gbọrụ ḅara.

¹² Gbin gboloma wararị ḅịtẹ mẹ sịḅị ò ye-sololo-aị mesi oyi finji sụam gbọrụ ye ḅụ, maaịn karama ye mẹ sịḅị ḅụ ọ̀ pịkị ye sololo aị mesi oyi finji sụam, ye sololo aị ma jen-jen na dama-damam.

¹³ Ịn pịkị golu-golu ye sụka ọkọḅa mesi oyi finji tẹmẹm, tẹ kẹ in gbin gboloma wararị ḅịtẹ maa apakịrị ma sụka gbolomam; mie ḅụ Ọḅọkụ-Igbe koko Akpụrụ-warị mẹ bebe gberie sọm.

¹⁴ Ịn pịkị oḅori oju ḅẹ isuke kẹ ḍori ḅịtẹ kẹ ye gbaịn ḅịtẹ mie Ọḅọkụ-Igbe koko Akpụrụ-warị mẹ pịrịm; oyi gbọrụ ḅịtẹ finji ọ̀ nwẹn ḍorim.

¹⁵ Akpụrụ-warị mẹ gbaịn aḅịtẹ ma gberie-gberie ḅẹ nangwọ anie mesi sọnọa ḅụọ-kuḅu finji (13 m); anị ḅẹ finjima anie sonioa ḅụọ-kuḅu (2 m); oyi gbọrụ aḅịtẹ finji ma arịmgba gbasị-kịrịrịkwaịm wararị.

¹⁶ Ịn sọnọa ḅịtẹ gbin gbolomam, tẹ pịkị sonioa ḅịtẹ kẹ gbọrụ ḅụ gbinm.

¹⁷ Gbin gboloma wararị ye gbaịn ḅịtẹ mẹ ḅụ akaka da tẹịn sịḅị mẹ ḅụ ò ye sololo aị mesi oyi finji sụam, tẹ pịkị tẹ osi ye mẹ ḅẹ sịḅị ḅụ ye sololo aị mesi oyi finji sụam kẹ ye gbaịn aị ma kẹ gbọrụ ḅụ mịẹ.

¹⁸ Ịn nwẹnị ojo kẹ ye sụka ọkọḅa mesi oyi finji tẹmẹ kẹ Akpụrụ-warị mẹ sụka gboloma ḅẹ ḅara, mịẹtẹ anị bebe gberie-sọ ḅẹ ḅara.

¹⁹ Ịn pịkị ejimina oju apara na, oḅori oju apara na kẹ ọlọ akpa mịẹ ḅẹ tẹlẹma ḅara kẹ arị tẹlẹma Akpụrụ-warị mẹ gbaịn pịrịm.

²⁰ Anịtẹso ịn sụụn yarịrịtẹ akasiya nwẹn-sịn sịn kẹ sịẹ gele-geletẹ amasịn ma mịẹ Ọḅọkụ-Igbe koko Akpụrụ-warị mẹ pịrịm.

²¹ Amasịn gberie-gberie ḅẹ gele anie jeia ḅụọ-kuḅu (4 m), anị ḅẹ finjima anie maa ḅụọ-kuḅu na ḅara gbọrụ ẹnzụ na (66 cm).

²² Amasịn ma gberie-gberie ḅụ arị kẹ jen-jen ḅụ sụka ḅẹ maaịn emi; Ọḅọkụ-Igbe koko Akpụrụ-warị mẹ ḅẹ amasịn mamgba ḅụ ò miemẹ sụam.

²³ Mị-ḅara mie ịn kẹ amasịn ma ịkasị Ọḅọkụ Igbe koko Akpụrụ-warị mẹ pịrị ḅara: suku-jụ da pakịrị anga amasịn ma ḅẹ si.

²⁴ Anịsakị amasịn ma ḅẹ si ma suku in seleḅa kẹ otolo amesi sụam; gbọrụ amasịn maa otolo, maa otolo sime arị ḅio sụka ḅẹ ja maa sụa-paka aị pịrịm, jen pịkị maa otolo, pịkị sime arịḅẹ sụa paka aị pịrịm.

²⁵ Anịsakị Akpụrụ-warị mẹ ḅẹ maaịn karama pakịrị anga mẹ, anie tọrọkọ da pakịrị mẹ pịkị amasịn ma ḅẹ si ọ̀ nwẹn ịkasịm,

²⁶ na arịḅẹ seleḅa otolo amesi na amasịn ma suku ḅụ, gbọrụ amasịn maa otolo, maa otolo, jen amasịn suku pịkị maa otolo.

²⁷ In sonio maa asịn ịkasị Ọḅọkụ-Igbe koko Akpụrụ-warị mẹ ọḅụjụ mẹ ḅẹ ịrụa-ideriarị-anga anga mẹ da anga mẹ pịrịm.

²⁸ Ịn maa amasịn ịkasị Ọḅọkụ-Igbe koko Akpụrụ-warị mẹ ḅẹ ọḅụjụ ḅẹ ịkọlị ma pịrịm.

²⁹ Mịna ịkọlị ḅẹ amasịn ma arị suku ḅụ sụka gboloma mu ọgọnọ-jụ lam gbọrụ nụnụma ḅio ḅụ. Maa amasịn ma tẹ maa ịkọlị ma mịẹ aị ma mị ḅara mie ịn kẹ arị mịẹ ḅara.

³⁰ Nine amasịn na arịḅẹ seleḅa otolo na simem, gbọrụ amasịn goyegoye suku maa otolo emi.

³¹ In akasiya nwẹn-sịn sịn kẹ sọnọa ẹngbẹsẹ ḅọrọma asịn mịẹ Ọḅọkụ-Igbe koko Akpụrụ-warị mẹ ḅẹ gbọrụ pakịrị anga ḅẹ amasịn ma pịrịm,

³² anịsakị sọnọ sime Akpụrụ-warị mẹ ḅẹ osi pakịrị anga ḅẹ amasịn ma pịrịm, tẹ sọnọ pịkị sime Akpụrụ-warị mẹ ḅẹ ịrụa-ideriarị-anga anga ọḅụjụ ḅụ kunoma amasịn ma pịrịm.

³³ Ogboku ḅụ ḅọrọ ẹngbẹsẹ ma amasịn ma kẹ maa anga ḍie ḅẹ ogboku ḅụ gbọrụ sịḅị-jụ ḅọrọ mu osi sịḅị-jụ tolu-pakam.

³⁴ In golu sọ sara amasịn ma gbaịnm, tẹ arị ḅụ golu-golu anụnụma sụa ẹngbẹsẹ ḅọrọma asịn ma ọlọ aị mịẹm, tẹ golu sọ sara ẹngbẹsẹ ḅọrọma asịn ma gbaịnm.

³⁵ In bulo tọrụ na, pọpụlụ nwẹn-sịn tọrụ na, awụ tọrụ na sụa aḅịtẹ na, ḍoritẹ lọkọ-ḅịtẹ na kẹ kiki-pẹlẹm, ḅara-ḍịn apụ ịn kẹ Sẹrubimu sịn opu enjẹlịapụ kẹ arị ḅirimam.

³⁶ Ịn golu sọọ sara gbaịn wararị akasiya nwẹn-sịn sịn inia ḅeriaị ọgọnọ ḅụ ori arị sololom, arịḅẹ ye-sụka-aị ma golu, tẹ in seleḅa kẹ inia otolo tẹmẹ arị pịrị tẹ kẹ sụkam.

³⁷ Mẹnjị Akpụrụ-warị mẹ sọ-muarị ḅọkọ mẹ ọ̀ pịkị bulo tọrụ na, pọpụlụ nwẹn-sịn tọrụ na, awụ tọrụ na sụa iḅi aḅịtẹ na, ḍoritẹ lọkọ-ḅịtẹ tẹ laga kẹ ye ḍori ḍin apụ iri kẹ ḅirima ye kẹ sụam.

³⁸ Anị ḅẹ sọnọa ḅeriaị ma na arịḅẹ ye-sụka-aị na arị na ò golu sọ sara arị gbaịn tẹ golu kẹ ye-sụka-aị ma tẹmẹm, kụma arịḅẹ sọnọa otolo ma ori ojo kẹ arị tẹmẹm.