Paka-so 33 - FỊAFỊA BAỊBỤLỤ

KỊNỊNYANAḄỌ Ḅe Tọnm Izirẹlị Sayịnayị Tụndụ Mẹ Ḅụ Paka-soo

¹ KỊNỊNYANAḄỌ ḅe nwẹnị Mozizi ḅẹẹ, “Ị́yẹrị na, tomi ma tẹ Ijiputi ama mẹ ḅio í ọkị-ḅo apụ ma na mịanga ḅụ ọ́ saakịị tẹ so ama mẹ tẹ à ye karị ḅara kẹ minini Ebira-amụ na, Ayịzịkị na, Jekọbụ na pịrịm ḅẹẹarị, ‘Ọmịna furo-ḅẹ-apụ mie arị anị kẹ pịrị ḅarịye’ nwẹn ḅẹẹ ama mẹ muu.

² À gbọrụ enjẹlị kẹ ọmịna tọrọkọ fịrịma ḅa, anịsakị à Kenanị ḅẹ apụ ma na, Amọrayịtị apụ ma na, Itayịti apụ ma na, Pẹrịzayịtị apụ ma na, Hivayịtị apụ ma na, Jebusayịtị apụ ma na dee-pakama ḅa.

³ Ọ́ saakị ḅụụ-ḅẹlẹmatẹ iḅiọkụma fịye so-pakamarị amakiri mẹ muu; kụma àrị ọmịna ogbo-ḅio sime tẹ ọmịnị na mu ḅịa, anieofori à ḅofa ọ́ ḅaa fama etela mẹ ḅụ, kẹ gotẹ ọkọ ḅẹẹarị, ọmịnị anie kọngọ kụrọtẹ atomi.”

⁴ Tomi ma mịna si oku ma naa tẹso, ịn kururum, tẹ gbọrụḅọ-sọ amịna akapa sụa-a.

⁵ Gbala KỊNỊNYANAḄỌ ḅe Mozizi ḅẹẹ tẹ, “Izirẹlịapụ ma ḅẹẹ, ‘Ọmịnị anie kọngọ kụrọtẹ atomi; arị ọmịna ogbo-ḅio ọmịnị na boowa kala sakị kẹ mu kụma arị ọ́ ḅaa fama ḅa. Anie ḅụ mịọkụ ọmịnị ọmịna oju ọmịna ḅiriaị ma sin, mịẹtẹ arị à kẹ ọmịnị na mịẹ ḅarị ḅara nimi ḅarị ḅara.’ ”

⁶ Anịẹrẹsị Izirẹlịapụ ma Orẹbụ Tụndụ ḅụ saakị tọrọkọ mu ịna ḅiriaị siinm ịna oju ḅụ.

Kobiri Akpụrụ-warị Mẹ

⁷ Mịọkụ Mozizi kobiri-ogbo mẹ ḅụ Akpụrụ-warị mẹ ḅelema tẹ pike, pikem ala-jụ ḅụ, tẹ anị sịnm Kobiri Akpụrụ-warị, anịsakị ḅẹḅọ-ḅẹḅọ tẹ KỊNỊNYANAḄỌ ḅe ḍọkị ḅọ, ḍọkị ḅọ paka Kobiri Akpụrụ-warị mẹ tẹ kobiri-ogbo mẹ ḅụ ḅele tẹ simearị ye mẹ mu ḅa.

⁸ Mozizi mẹnjị paka Akpụrụ-warị mẹ mu sakị, mu sakị tomi mamgba saakịm, tẹ ọrụḅọ-ọrụḅọ mḅọ akpụrụ-warị ḅọkọ ḅụ sịẹsime tẹ Mozizi ḍiki nwenii ọ̀ mẹnjị Akpụrụ-warị mẹ ḅio sọ-mu ḅa.

⁹ Mozizi mẹnjị Akpụrụ-warị mẹ ḅio sọ-mu tẹ ḅẹḅẹ, oḅuto kpo mẹ ideri-ḅo Akpụrụ-warị mẹ ḅọkọ ḅụ sịẹsime ḅa, tẹ KỊNỊNYANAḄỌ ḅe nwẹnị Mozizi na ẹkwẹn ḅa.

¹⁰ Tẹ tomi mamgba Akpụrụ-warị mẹ ḅọkọ ḅụ oḅuto kpo mẹ sịẹsime wararị ẹrị sakị tomi mamgba saakị sịẹsime tẹ ọrụḅọ-ọrụḅọ amịna akpụrụ-warị ḅọkọ ḅụ sunsin KỊNỊNYANAḄỌ ḅe pịrị ḅa.

¹¹ Mị-ḅara mie KỊNỊNYANAḄỌ ḅe kẹ Mozizi na tọrụ kẹ dama-dama tẹ ẹkwẹn ḅara, tomḅọ ẹkwẹn amịna ikiaḅọ pịrị ḅara. Mozizi pịkịma-so kobiri-ogbo mẹ ḅio sọ-mu sakị, ọ̀ fịrịmẹnjịḅọ Jọsụwa, Nọnị owiḅọtụḅọ Asatụḅọ ḅe Akpụrụ-warị mẹ ḅụ ò so-a.

KỊNỊNYANAḄỌ Ḅe Mininim Ori Ori Atomi Na Sime Ḅa

¹² Mozizi nwẹnị KỊNỊNYANAḄỌ ḅe ḅẹẹ, “Ḍikii ị́yẹrị ị̀ ḅẹẹm, ‘Mịna atomi ma ọkị-ḅoo,’ kụma anị ḅọ mẹ tẹ ị́ kẹ ị̀ ḅụụ sụa fịrịma ḅarị ḅọ ị́ mịẹ tẹ à nimi-a. Anịsọ ị́ ḅẹẹ tẹ, ‘ị́ ẹrẹ ḅụ arị í nimi wararị, anịsakị ì ḍiki-tọrụ ḅụ sọ ị́ ị̀ ḅụụ-ḅẹlẹarị.’

¹³ Anịẹrẹsị mịọkụ, arị ị́ tẹkẹm, í ḍiki-tọrụ ḅụ arị ị́ ḅụụ-ḅẹlẹm ḅẹḅẹ, mịọkụ í etela ma kẹ ì ḍie, mịẹtẹ arị í nimi, tẹ í ḍiki-tọrụ ḅụ arị ị́ ḅụụ-ḅẹlẹ ḅẹ ḅara. Pịkị kẹ ḅiokoroma, mịnẹ mị opu sịẹ mẹ anie ị́ atomi.”

¹⁴ KỊNỊNYANAḄỌ ḅe nwẹnị ḅẹẹ, “Yẹrị ḅarana ọmịnị na mu ḅa, anịsakị arị ịnyọsara kẹ ọ̀ pịrị ḅa.”

¹⁵ Mozizi nwẹnị KỊNỊNYANAḄỌ ḅe ḅẹẹ, “Ị́yẹrị ḅarana ị̀ na mu-a ḅẹḅẹ, mị yọ ḅụ wa dogi saakị ma.

¹⁶ Kẹ gotẹ ọkọ ḅẹẹarị, kịnị tọ-ḅara kẹ nimi ḅẹ, mịnẹ yẹrị na ị́ atomi ma na í ḍiki-tọrụ ḅụ ị́ ḅụụ-ḅẹlẹarị? Ị́ yẹrị ḅe na, ị́ atomi ma na ḅụụ sọ tẹ muarị ye ḅụ mie ị́ wamịnị na muarị ye mẹ tomikiri tọrụ mẹ ḅụ simearị osi atomi mamgba ḅụ anị giregire paka ḅarịye anị-a?”

¹⁷ KỊNỊNYANAḄỌ ḅe nwẹnị Mozizi ḅẹẹ, “Mị kpọkpọ gbọrụ ye mẹ tẹ í ḍuko ye mẹ à mịẹ ḅa, kẹ gotẹ ọkọ ḅẹẹarị, ì ḍiki-tọrụ ḅụ ị́ ị̀ ḅụụ-ḅẹlẹarị, anịsakị ị́ ẹrẹ ḅụ àrị í nimi wararị.”

¹⁸ Mozizi nwẹnị ḅẹẹ, “Àrị ị́ tẹkẹm, í ebube kẹ ì ḍie.”

¹⁹ KỊNỊNYANAḄỌ ḅe nwẹnị ḅẹẹ, “À mịẹtẹ à kọn iḅi mamgba ị́ tọrọkọ mẹnjị-ḅọrọ ḅa, tẹ ị́ tọrọkọ ḅụ ị̀ ẹrẹ ‘KỊNỊNYANAḄỌ ḄE,’ mẹ go pakama ḅa; anịsakị à ḍiki-ḅụụjịrị nyana anị ḅọ mẹ tẹ à ḍiki-ḅụụjịrị nyana pịrị ḅẹ ḅọ mẹ pịrị ḅa, tẹ sịḅị-kụrụkụrụ nyana anị ḅọ mẹ tẹ àrị ọkụrụkụrụ nyana pịrị ḅẹ ḅọ pịrị ḅa.

²⁰ Í inetẹ ị̀ tọrụkuḅu ẹrị ḅịa; kẹ gotẹ ọkọ ḅẹẹarị, tomḅọ tọrụngbọ kẹ anị ẹrị tẹ ḍumo ḅịa.”

²¹ Tẹ KỊNỊNYANAḄỌ ḅe nwẹnị ḅẹẹ, “Ḍikii, ị̀ akaka gbọrụ yọ emi, í inetẹ ịkụ mẹ ọgọnọ sịẹsime ḅarị yọ;

²² tẹ ì ebube mẹ ḅịya ma ḅọrọarị sakị àrị ị́ kẹ ịkụ mẹ ḅẹ gẹẹ wararị anga ḅụ suu ḅa, tẹ àrị ị̀ ḅara kẹ í kikima nwenii à mẹnjị-ḅọrọ ḅa;

²³ anịtẹrẹmẹ àrị ị̀ ḅara sin ḅa, tẹ í ì oḅukulo ẹrị ḅa, kụma ị̀ tọrụkuḅu mẹ ị́ ẹrị ḅịa.”