Paka-so 31 - FỊAFỊA BAỊBỤLỤ

KỊNỊNYANAḄỌ Akpụrụ-Warị Mẹ Nama Ḅẹ Ḅara-Ḍịn Apụ Sẹlẹm

¹ KỊNỊNYANAḄỌ ḅe nwẹnị Mozizi ḅẹẹ,

² À gbọrsịḅị ẹrẹ go ḅara ḅụ Bẹzalẹlị, anie Yuri owiḅọtụḅọ pịkị Họ taa-owiḅọtụḅọ Juda furo-ḅẹ-ḅọ ḅe sịn tẹẹ;

³ À Tamụnọ Tẹmẹ ḅe kẹ ọ̀ ḅụụ ḅio suu ḅinma tẹẹ, pịkị inetẹ ye mịẹ kụrọ na, yefieye naa na, ye ḍawọ ḍịn na, kẹ ye mamgba mịẹ tẹlẹma ḅẹ aka na,

⁴ ḅara kẹ ye sime na-iḅi ḅara mịẹ pakama-ḅo aka na, golu na seleḅa na ojo na kẹ kọrịnama kọrị aka na,

⁵ kẹ kọrịnama kọrị ḅara kẹ ḍụḅarị pẹlẹ aka na, sịn kẹ kọrịnama goyegoye na kura ḅara kara aka na kẹ sụa tẹẹ.

⁶ Anịsakị ḍikii, arị Oholiyabụ, Ayisamakị Danị furo-ḅẹ-ḅọ ḅe owiḅọtụḅọ ḅe tọn ọ̀ ḅụụ sụa tẹ; tẹ inetẹ ye mịẹ ḅẹ owiapụ ịnyọ kẹ inimgba pịrị tẹ, mịẹtẹ ini inetẹ à tọn ị́ pịrị tẹ aị mamgba mịẹ ḅẹ ḅara:

⁷ Kobiri Akpụrụ-warị mẹ na, Ḅụụ Ḍie-pakama Igbe mẹ na, Ọkụrụkụrụ Emine mẹ tẹ kẹ anị Ḅịḅị Gbaịn-arị Ye mẹ na, pịkị kẹ Akpụrụ-warị mẹ ḅirima aị mamgba na,

⁸ dẹbịlẹ mẹ na anị ḅẹ kọrịnama-kọrịaị na, gwa-a golu tọnjọ-sịẹmaye mẹ na anị ḅẹ kọrịnama-kọrịaị mamgba na, kụnụaị dọkịma edeni mẹ na,

⁹ dọkịma-agba mịẹ edeni mẹ na anị ḅẹ kọrịnama-kọrịaị mamgba na opu ẹfẹrẹ mẹ na, anị ḅẹ suku mẹ na,

¹⁰ Iḅi-fịtẹ ḅara kẹ gbin opu akapa ma na, sime Erọnị, agbamịẹḅọ ḅe pịrị fịafịa opu akapa ma na, agbamịẹ-fịrịmẹnjịapụ ḅara ḅụ sime ori owiapụ-awọmẹ pịrị opu akapa ma na,

¹¹ fịafịa-pulo mẹ na, sime fịafịa yọ mẹ pịrị kụnụ fịịarị kụnụaị ma na. À wẹrịtẹ tọn ị́ pịrị tẹ ḅara mamgba ini arị kọrị ḅa.

KỊNỊNYANAḄỌ Ḅe Tọnm In Ịnyọsara-Ene Mẹ Koko

¹² KỊNỊNYANAḄỌ ḅe nwẹnị Mozizi ḅẹẹ,

¹³ “Izirẹlịapụ ma ḅẹẹ, ‘Ọmịnị ị̀ Ịnyọsara-Ene mẹ koko ḅa, kẹ gotẹ ọkọ ḅẹẹarị, miemẹ yẹrị na, ọmịnị na ogboku elekima sọ ḅa ọmịna ḅụọ ḅụ mu ḅụọ-fa-ḅụọ-paka la, mịẹtẹ ó nimi ḅa mịnẹ Yẹrị KỊNỊNYANAḄỌ ḅe ọ́ mịẹ fịafịamam.

¹⁴ Ọmịnị Ịnyọsara-Ene mẹ koko ḅa, gbala anị fịafịa ene sọ ọ́ pịrị wararị ẹrẹsị ḅẹḅọ-ḅẹḅọ tẹ anị wọlọma ḅọ wọlọma ḅọ, ini mḅọ ḅaa ḅa; anị ene ḅụ ḅẹ kọrịnama, kọrịnama kọrị ḅọ, kọrị ḅọ, anị ḅọ mẹ mḅọ atomi ogbo-ḅio ḅụ ini mḅọ pẹlẹ-siin ḅa.

¹⁵ Sonio aḍin ḅụ mie kọrịnama kọrị ḅarịye, kụma sọnọma aḍin karama ene mẹ anie Ịnyọsara-Ene mẹ ḅẹ tẹmẹ-la ịnyọsara ene, fịafịa KỊNỊNYANAḄỌ ḅe pịrịm; Ịnyọsara-Ene mẹ ḅụ ḅẹḅọ-ḅẹḅọ tẹ ḅẹ kọrịnama, kọrịnama kọrị ḅọ kọrị ḅọ, ini mḅọ ḅaa ḅa.

¹⁶ Anịẹrẹsị Izirẹlịapụ ma Ịnyọsara-Ene mẹ koko ḅa, sime mu ḅẹẹ-sakị ḅẹẹ-sakị la ọḅọkụ ḅara ḅụ ịna aḅụọ ḅụ mu ḅụọ-fa-ḅụọ-paka la Ịnyọsara-Ene mẹ kẹ elekima sụa ḅa.

¹⁷ Anị elekima sọ kẹ yẹrị na, Izirẹlịapụ ma na ogboku ḅụ wa pịrịm mịnẹ sonio aḍin ḅụ KỊNỊNYANAḄỌ ḅe So na Kiri na tẹmẹm, tẹ sọnọma aḍin karama ene mẹ ḅụ ori ịnyọsaram, tẹ ịwọ ịnyọ sụam.’ ”

¹⁸ Sayịnayị Tụndụ ọgọnọ ḅụ ò Mozizi na ẹkwẹn fama tẹso ori oloko ma ḍie-pakamarị ḍụḅarị maa apakịrị ma, Tamụnọ ḅara-tụngbalị kẹ kẹẹ aị ma kẹ Mozizi pịrịm.