Paka-so 24 - FỊAFỊA BAỊBỤLỤ

Ini Ọḅọkụ Mẹ Mịẹ Kụrọmam

¹ KỊNỊNYANAḄỌ ḅe nwẹnị Mozizi ḅẹẹ, “Ị́yẹrị na, Erọnị na, Nadabụ na, Abihu na, Izirẹlị ḅẹ omongiapụ ma ḅẹ kịnị atesi oyi finji na iwo ị̀ ḍọkụma-ḅo tẹ ala-jụ sime tẹ sunsin.

² Ị́yẹrị ngẹrị mie iwo ḅo ì kpeki ḅarịye; kụma osi apụ ma ịn ḅo kpeki ḅịa, anịsakị tomi ma ini ị́ ḅụụ sọ tẹ ị́nịna iwo ḅo ḅịa.”

³ Mozizi ḅo tẹ KỊNỊNYANAḄỌ ḅe ẹkwẹn-aḅịḅị mamgba na, kụrọ ḅara-ḅio sime ḅọ oloko tẹ ọ̀ sụa aị mamgba na ḍuko tomi ma pịrịm; tẹ tomi mamgba gbọrụ pọkọ kẹ pakịrị gboloma tẹ ḅẹẹm, “Ẹkwẹn-aḅịḅị tẹ KỊNỊNYANAḄỌ ḅe kọn ẹkwẹn mamgba wa mịẹ ḅa.”

⁴ Tẹ Mozizi KỊNỊNYANAḄỌ ḅe ẹkwẹn-aḅịḅị mamgba kẹẹ famam. Ọ̀ nwẹnị dede-funfun ḅụ saakị, tẹ nwẹnị tụndụ mẹ suku ḅụ gbọrụ agbamịẹ-anga nama, tẹ oyi maa ḅeriaị finji pike Izirẹlị ḅẹ oyi maa afuro finji ma wẹrịtẹ sime-ḅara.

⁵ Anịtẹso ori Izirẹlịapụ ma ḅẹ asawọ ma fịrịmam, inima tẹ dọkịma-agba na, pootẹ-anambulo kẹ dein-pịrị-agba na mịẹ KỊNỊNYANAḄỌ ḅe pịrị apụ ma.

⁶ Tẹ Mozizi nama ma ọmbie mẹ kẹ maa anga ḍiya ḅẹ gbọrụ anga ọkị tẹ kẹ opu apanị ḅio sụam, tẹ ọmbie mẹ ḅẹ osi anga mẹ kẹ agbamịẹ-anga mẹ ḅụ saram.

⁷ Anịtẹso ori ọḅọkụ mẹ ḅẹ ḍiri mẹ ọkịm, tẹ tomi ma anị naarị ḅara kẹ anị gom; tẹ ịn nwẹnị pakịrị tẹ ḅẹẹ, “Ẹkwẹn tẹ KỊNỊNYANAḄỌ ḅe kọn tẹ ye mẹmgba wa mịẹ ḅa, anịsakị wa ḅịḅịpoki ḅa.”

⁸ Tẹ Mozizi nwẹnị opu apanị ma ḅio sime ọmbie mẹ kẹ tomi ma ọgọnọ sara, tẹ ḅẹẹ, “Ọmịnị Ọḅọkụ mẹ tẹ KỊNỊNYANAḄỌ ḅe na, ọmịnị na mịna ẹkwẹn-aḅịḅị mamgba wẹrịtẹ koro ḅara ḅụ fị Ọḅọkụ mẹ ḍikii.”

⁹ Anịtẹso Mozizi na, Erọnị na, Nadabụ na, Abihu na, Izirẹlị ḅẹ omongiapụ tesi oyi finji ma na tụndụ mẹ kpọlị iwom,

¹⁰ tẹ ini Izirẹlịapụ tẹkẹarị Tamụnọ ḅe ẹrịm. Anịsakị ori aḅụọ-suku ḅio ḅụ gbala ịn kẹ safaya nwẹn sịn ḍụḅarị kẹlẹ kiri mẹ ọgọnọ nama gelema finjima tẹ banabana ḅara ḅụ so mẹ sime-ḅara sime wararị.

¹¹ Ọ̀ gbọrụ ḅara ḅụ so ḅara kẹ Izirẹlị ḅẹ atomi ma asịḅịdapụ ma ọgọnọ gbana-a; ịn Tamụnọ ẹrịm, tẹ fịye fị, tẹ minji ḅuum.

Mozizi Tamụnọ Dama-mum Sayịnayị Tụndụ Ọgọnọ

¹² KỊNỊNYANAḄỌ ḅe nwẹnị Mozizi ḅẹẹ, “Tụndụ mẹ ọgọnọ-jụ ḅụ ị̀ ḍọkụma-ḅo tẹ anị yọ ḅụ sime koru anịsakị à ḍụḅarị ma tẹ arị à kẹ ịn toluma ḅẹ oloko ma na, à tọn aị ma na kẹ kẹẹ wararị aḍụḅarị ma kẹ ị́ pịrị ḅa.”

¹³ Mie ḅụ Mozizi ò fịrịmẹnjịḅọ jọsụwa kẹ ọ̀ ḅụụ sụa tẹ saakịm tẹ Mozizi Tamụnọ Tụndụ mẹ kpọlị iwom.

¹⁴ Ọ̀ nwẹnị omongiapụ ma ḅẹẹ, “Ọ́ mị yọ sime wa koru nwenii wa sin ḅo ọ́ la sakị la, anịsakị ḍikii, Erọnị na Họ na ọmịnị na emi; ọmịna aḅụụ ye ḅụụ-fụkama ḅọ fụkama ḅọ, yee mḅọ ịn ḍọkụma-ḅo.”

¹⁵ Anịtẹso Mozizi tụndụ mẹ kpọlị iwom, tẹ oḅuto tụndụ mẹ gbaịnm.

¹⁶ KỊNỊNYANAḄỌ ḅe ebube mẹ Sayịnayị Tụndụ mẹ ọgọnọ sime tẹ ḅịyam, tẹ oḅuto mẹ sonio aḍin kẹ anị gbaịnm; tẹ sọnọma aḍin karama ene ḅụ KỊNỊNYANAḄỌ ḅe nwẹnị Mozizi sin oḅuto mẹ ogboku ḅụ.

¹⁷ Mịọkụ KỊNỊNYANAḄỌ ḅe ebube mẹ tụndụ mẹ sịḅị ọgọnọ ḅụ Izirẹlịapụ ma tọrụ ḅio sime-ḅara gbala ye-yọ dọkịma gulugulumarị fịnị.

¹⁸ Tẹ Mozizi mẹnjị oḅuto mẹ ḅio sọ-mu, tẹ tụndụ mẹ kpọlị iwom. Tụndụ mẹ ọgọnọ-jụ ḅụ Mozizi ḍin amesi na, eneḅaka amesi na simem.