Paka-so 22 - FỊAFỊA BAỊBỤLỤ

Gbẹẹfị Gbẹẹ Gboloma Oloko Ma

¹ “Gbọrụḅọ gbọrụ pootẹ-nambulo, anịanịa, gbọrụ anana furu, tẹ anị ḅaa, anịanịa anị dẹrị-dẹrị, gbọrụ pootẹ-nambulo ḅe sịḅị mḅọ sọnọa pootẹ-anambulo gbẹẹ ḅa; anịsakị gbọrụ anana ḅe sịḅị mḅọ inia anana gbẹẹ ḅa.

² Furuḅọ warị kan tẹ sọ-muarị ḍin ḅụ tẹ ini ò kun tẹ ò fomu tẹ ọ̀ fị-fịị, amịna ḅụụ ḍụa ḅọ ḅe ọmbie ọsụma ḅẹrẹ-ḅarasii nyana-a;

³ Kụma anị nwẹnị ịrụa puu-paka tẹ, eneḅaka-fịafịa-ogbo ḅụ ọkọ paka ḅẹḅẹ, mḅọ ọmbie ọsụma ḅọ sọ tẹ.” “Furuḅọ mḅọ furuye gbẹẹ ḅa; mḅọ ye nyana-a ḅẹḅẹ, ini mḅọ dẹrị tẹ kẹ mḅọ furuye mẹ gbẹẹ ḅa.”

⁴ “Mḅọ furu nama ḍumo wararị tẹ mḅọ ḅara emi-emii, anị ḅọrọ pootẹ-nambulo-o, yedogi-nama-o, anana sọ; mḅọ anị ḅẹ maa kiri gbẹẹ ḅa.”

⁵ “Gbọrụ tomḅọ ori anama mịẹtẹ in ḍụọ, anịanịa girepu-ḍụọ ḅio osuka fịarị, tẹ ịn wẹrịso tẹ ini etela-iri mu jụmọ ḍụọ ḅio so-pakarị afịaị fị-fị, ori ò soku-ḅẹ ḍụọ na, girepu-ḍụọ na ḅio paka-ḅo iḅitẹịn afịaị kẹ ḍụọ mẹ nyanaḅọ gbẹẹ ḅa.”

⁶ “Gbọrụ tomḅọ amịna ḍụọ ḅio fịnị sụa tẹ anị osuka ma dọkịma ma-mu jụmọ ḍụọ ḅio sọ tẹ ịn pẹlẹ tẹ kobiri koroma wararị afịaị, anịanịa sịẹ-sịẹ wararị aị, anịanịa bebe ḍụọ mẹ dọkịmam ḅẹḅẹ, anịḅọ ḅe tẹ fịnị mẹ sụa ḅọ ḅe ye kọnma-a ḅara kẹ arị gbẹẹ ḅa.”

⁷ “Gbọrụ tomḅọ igbigi, anịanịa ngọ kẹ mḅọ na kpeki tẹ angarị ḅọ pịrị kokom, tẹ furuḅọ mḅọ warị ḅụ anị furum; ịn furu ḅọ mẹ ḍọkị-ẹrị-ẹrị, mḅọ anị ḅẹ maa akiri gbẹẹ ḅa.

⁸ Kụma ịn furuḅọ mẹ ḍọkị-ẹrịa ḅẹḅẹ, warị mẹ nyana tẹ ye mẹ koko ḅọ ḅe sọma ḅo sunsin Tamụnọ pịrị yọ mẹ kpeki tẹ amịna ḅụụ-pikima ḅa, ọ̀ ḅara kẹ ọ̀ mịnaḅọ ḅe ngọ mẹ lama na, lama-a na.”

⁹ “Ye goyegoye ḅụ tomḅọ ḅioḅẹngbọ kẹ tomḅọ ọgọnọ gbana ḅarị ofori ḅẹḅẹ, anị ḅọrọ pootẹ-nambulo ḅụ-o, yedogi-nama ḅụ-o, anana ḅụ-o, ḅịtẹ na kapa na ḅụ-o, ḅẹẹye-ḅẹẹye tẹ fa ye goyegoye, tẹ gbọrụḅọ ḅẹẹm, ‘Mie anị sime-ḅara,’ ḅẹḅẹ, ḅẹrẹ ịgbanịarị maa apakịrị ma Tamụnọ tọrọkọ ḅo ḅa; oriḅe tẹ Tamụnọ ḅẹrẹ-ḅarasii pẹlẹ pịrị ḅarị ḅọ ḅe maa akiri kẹ mḅọ mịnaḅọ ḅe gbẹẹ ḅa.”

¹⁰ “Gbọrụ tomḅọ gbọrụ yedogi-nama, anịanịa, gbọrụ pootẹ-nambulo, anịanịa gbọrụ anana, anịanịa ḅẹ nama, nama kẹ mḅọ na kpeki tẹ angarị ḅọ ḅara sụam, tẹ anị fịị, anịanịa ye anị la, anịanịa, kịnị anị dee fama tẹ gbọrụḅọ-sọ anị ẹrị-a ḅẹḅẹ,

¹¹ KỊNỊNYANAḄỌ ḅe ḅụụ ḅụ karị ye ini maa apụ ma ogboku sime ḅa, kẹ ḍie-pakama, ọ̀ ḅara kẹ paa ọ̀ mịnaḅọ ḅe nyana ye mẹ lama, lama, anịsakị ye mẹ nyana ḅọ ḅe karị ye mẹ ọkị ḅa, tẹ mḅọ ḅarị gberie-sọ gbẹẹ ḅịa.

¹² Kụma kịnị ọ̀ ḅara ḅụ anị furu ọkị ḅẹḅẹ, ori anị kẹ anị nyanaḅọ gbẹẹ ḅa.

¹³ Piri-ḅio-ḅẹ anama anị ḅaa, ḅaa, yee mḅọ anị ḅụ ịn pẹị kọnma ye ọkị-ḅo tẹ kẹ ḍie mịnẹ nama anị ḅaam; mḅọ ḅarị nama ḅaa ye gotẹ ye gbẹẹ ḅịa.”

¹⁴ “Gbọrụḅọ mḅọ na kpeki tẹ angarị ḅọ ḅara nama ḅọlọ, tẹ ye nama ḅe la, anịanịa ọ̀ fịị, fịị; nama ḅe nyana ḅọ ḅe kiri ḅụ ofori sakị, mḅọ nama ḅe gbẹẹ ḅinma ḅa.

¹⁵ Kụma nama ḅe nyana ḅọ ḅe sọ kiri ḅụ emi ḅẹḅẹ, mḅọ gberie-sọ gbẹẹ ḅịa mḅọ nama ḅe ọkọm ḅẹḅẹ, mḅọ kẹ nama ḅe ọkọ Igbigi mẹ fa mẹ gbaịn tẹ.

Ama-anganga-ḅara Na Tẹmẹ Ḅụ Ḅẹ Oloko Na

¹⁶ “Gbọrụ owiḅọ ere kẹ ḅụụ-gboloa iriawọ-tụḅọ tẹ owiḅọ amụ sime ḅẹ ọlọ-a ḅọ sịn tẹ árị na gboloma ḅẹḅẹ, ori ini ẹrẹḅọ sịḅị mịẹ-mịẹye mịẹ á pịrị tẹ gbọrsịḅị á kẹ ọ̀ ta mịẹ ḅa.

¹⁷ Á ḍa á kẹ ọ̀ pịrị mẹ ḍụkụ-a ḅẹḅẹ, ori ịn kẹ ḅụụ-gboloa iriawọ-tụḅọ sime-sime igbigi na gbasị ye gbẹẹ ḅa.”

¹⁸ “Ọ́ ḍụkụ tẹ arịḅọ ḍumo-sime ma.”

¹⁹ “Ḅẹḅọ-ḅẹḅọ tẹ nama na gboloma ḅọ, gboloma ḅọ ọmịnị mḅọ ḅaa ḅa.”

²⁰ “Ḅẹḅọ-ḅẹḅọ tẹ KỊNỊNYANAḄỌ ḅe sikima agba mịẹ ḅẹẹ oru-tamụnọ, oru-tamụnọ pịrị ḅọ pịrị ḅọ, ịn gbọrsịḅị mḅọ ḅaa ḅa.”

²¹ “Ó si kẹ igoniḅọ mịẹ, anịanịa mḅọ ponoma ma, kẹ gotẹ ọkọ ḅẹẹarị, ọmịnị sọ Ijiputi ama ḅụ igoniapụ sọ simem.

²² Ó diḅọ-fịtẹ-ẹrẹḅọ, anịanịa, ḍaḅọ-na-iyingiḅọ-na-fịtẹ-tụḅọ sọ ḅụụ fụkama ma.

²³ Ọmịnị ịna aḅụụ fụkama, tẹ ini owu pakama ị̀ pịrị ḅẹḅẹ, tụkụma ḅara ḅụ àrị ịna owu naa ḅa;

²⁴ tẹ ị̀ kụrọ ịganị fịnị kọrị ḅara kọrị tẹ àrị okologie mẹ kẹ ọ́ ḅaa ḅa, tẹ ó sime-ereme ma ḅo diapụ-fịtẹ-ereme sọ ḅa, anịsakị ọmịna awọmẹ ma ḅo ḍapụ ofori awọmẹ sọ ḅa.”

²⁵ “Ọmịnị igbigi kẹ ị̀ atomi ma ḅụ ḅẹḅọ-ḅẹḅọ tẹ igoin wararị ḅọ ḅọlọ-ḅọlọ, ị́ ḅụụ kẹ igbigi kẹ kịnị ḅọlọ ḅọ sọma ọ̀ pịrị tẹ ọ̀ ḅara igbigi sịḅị ḅụ gbana ye ọkị ma.

²⁶ Pakịrị ḅụ ị́ ị́ na kpeki tẹ angarị ḅọ opu kapa ọkị ḅẹḅẹ, anị kẹ ọ̀ pịrị tẹrẹmẹ otuka tuuideri;

²⁷ kẹ gotẹ ọkọ ḅẹẹarị, anie kịngẹ mie ọ̀ kẹ ọ̀ ḅụụ gbaịn-arị, aniemẹ anie ori oju gbaịn opu kapa ọ̀ tọ jen ye ḅio sọ-mu mono ḅẹ? Tẹ ori owu ị̀ pịrị ḅẹḅẹ, arị ọ̀ naa ḅa, gbala à sịḅị-kụrụkụrụ nyana wararị ẹrẹsị.”

²⁸ “Tamụnọ fie-sima ma, pịkị ḅẹrẹtọn ị́ atomi pịrịarị ḅọ wori ma.”

²⁹ “Ọmịnị ọmịna fịye soku fama gbọrụ sakị ọ́ sakị fama ma tẹ anị ḅụ fịye na, ọmịna iru pọnjị aị ḅio paka-ḅo iru na kẹ agba mịẹ ị̀ pịrị ḅa.” “Ọ́ tarị iyi owiapụ-awọmẹ ma ọ́ nwẹn kẹ ị̀ pịrị ḅa.

³⁰ Mị gbọrụ ḅara mẹ ọ́ nwẹn kẹ ọmịna pootẹ-anambulo na, ọmịna anana na mịẹ ḅa; anị sọnọma aḍin kẹ anị iyi iyingiḅọ na sime ḅa; nine aḍin karama ene ḅụ ọmịnị anị kẹ ị̀ pịrị ḅa.”

³¹ “Ọmịnị ịn sikima wẹrị fịafịama ị̀ pịrị tẹ owiapụ sọ ḅa; ọkọẹrẹsị ó piri-ḅio-ḅẹ anama kanị tẹ nama pẹị ma, ọmịnị anị kẹ wakị obiri ma pịrị pẹị.”