Paka-so 20 - FỊAFỊA BAỊBỤLỤ

KỊNỊNYANAḄỌ Oyia Oloko Tọnm

¹ Tamụnọ mịna ẹkwẹn-aḅịḅị mamgba kọnm, tẹ ḅẹẹm:

² Yẹrị anie KỊNỊNYANAḄỌ ọmịna Tamụnọ ḅee, tẹ Ijiputi ḅẹ ama mẹ ḅio ọ́ pakama-ḅo ḅọ ḅee, ọmịnị omoni-sọ anga mẹ ḅio.

³ Ì sikima tẹ ọ́ sunsin oru-atamụnọ pịrị ma.

⁴ Ḅara kẹ tẹmẹ gbọrụ oru-fụḅara sọ ọ́ tẹmẹ ọmịna aḅụụ pịrị ma, ḅẹẹye-ḅẹẹye tẹ ọgọnọ-jụ simearị So mẹ ḅio sime ye na kịkaye-o, aniemẹ tẹ suku-ḅio simearị Kiri mẹ ḅio sime ye na kịkaye-o, anịanịa aniemẹ tẹ kiri mẹ suku-ḅio simearị minji mẹ ḅio simearị ye na kịkaye sọ.

⁵ Ọ́ sunsin anịanịa fịrịmẹnjị arị pịrị ma, gbala yẹrị KỊNỊNYANAḄỌ ọmịna Tamụnọ ḅe anie afana Tamụnọ ẹrẹsị. À fomu-ḅara kẹ inima tẹ ị̀ ḍiki-ḅioḅuarị apụ ma pịrịarị, pịkị anị kẹ ịna awọmẹ ma ọgọnọ gbana mu tẹrẹị karama ḅụọ-ḅẹ-apụ na, ini karama ḅụọ-ḅẹ-apụ na laarị.

⁶ Kụma inima tẹ ị̀ ḅẹlẹma tẹ ì oloko ma kokoarị apụ ma, à jike-a ḅẹlẹma nyana ịn pịrịarị, pịkị ịna awọmẹ ma sọ, mu ḅụọ-fa-ḅụọ-paka la.

⁷ Ọmịnị yẹrị KỊNỊNYANAḄỌ ọmịna Tamụnọ ḅe ẹrẹẹ mẹ kẹ papaaye mịẹ ma; gbala à ḅẹrẹ-ḅarasii-a ḅara kẹ anị ḅọ mẹ tẹ ị̀ ẹrẹ kẹ papaaye mịẹ ḅọ mẹ wẹrịso ḅịa.

⁸ Ọmịnị Ịnyọsara-Ene mẹ kẹ ḅiokoroma tẹ anị wẹrị fịafịamaa.

⁹ Sonio aḍin mie ọ́ kẹ kọrịnama kọrị tẹ ọ́ nyana kọrịnama mamgba kọrị ḅarịye;

¹⁰ kụma sọnọma aḍin karama ene mẹ anie yẹrị KỊNỊNYANAḄỌ ọmịna Tamụnọ ḅe Ịnyọsara-Ene. Anị ḅụ ḅẹ kọrịnama sọ ọ́ kọrị ma, ọmịnị anịanịa ọmịna awọmẹ sọ, anịanịa ọmịna omoniapụ sọ, anịanịa ọmịna opu anama sọ, anịanịa ọmịna ama ma ḅio simearị igoniapụ sọ.

¹¹ Gbala sonio aḍin mie yẹrị KỊNỊNYANAḄỌ ḅe kẹ So ma na Kiri mẹ na, tọrụ mẹ na anị ḅio simearị aị mamgba tẹmẹ ye, tẹ nwẹnị sọnọma aḍin karama ene mẹ ḅụ ịnyọsara yee. Miemẹ gotẹ anie à sọnọma aḍin karama ene mẹ boma tẹ anị wẹrị fịafịama yee.

¹² Ọmịnị ọmịna aḍapụ na ọmịna iyingiapụ na kụn, mịẹtẹ ọ́ nangwọ ḍumo kọn ḅẹ ḅara ama mẹ tẹ yẹrị KỊNỊNYANAḄỌ ọmịna Tamụnọ ḅe kẹ ọ́ pịrịarị ama mẹ ḅio.

¹³ Gbọrụḅọ-sọ amịna pembe tomḅọ ḅaa ma.

¹⁴ Gbọrụḅọ-sọ jụmọ taḅọ anịanịa jụmọ diḅọ na sẹfị ma.

¹⁵ Gbọrụḅọ-sọ jụmọ nye furu ma.

¹⁶ Gbọrụḅọ-sọ iruo ogbo-sịẹḅọ sọ amịna pembe tomḅọ pịrị ma.

¹⁷ Gbọrụḅọ-sọ amịna pembe tomḅọ warị mọnị ma; mḅọ taḅọ anịanịa diḅọ, anịanịa omoniapụ, anịanịa mḅọ pootẹ-anambulo, anịanịa mḅọ yedogi-nama, anịanịa ḅẹẹye-ḅẹẹye tẹ sime mḅọ pịrị ye goyegoye sọ mọnị ma.

Tomi Ma Ḅalafaam

¹⁸ Mịọkụ tomi mamgba ḅo so-alagba ma tẹịn-arị ḅara mẹ na, so mẹ ḅalapụ ḅalapụarị ḅara mẹ na, ọdụ mẹ ḅẹ fie mẹ na, turee-tureema tụndụ mẹ ḅụ soarị onwin mẹ na ẹrị tẹso, tomi ma ḅalafa lama tẹ oju sẹkịm; tẹ ịn nwẹnị ala-jụ ḅụ sịẹsime.

¹⁹ Ịn nwẹnị Mozizi ḅẹẹ, “Ị́yẹrị ẹkwẹn wa pịrịị, anịsakị wa naa ḅa; kụma yee Tamụnọ da-da ẹkwẹn wa pịrị ma, anieofori wa ḅofa fịị.”

²⁰ Tẹ Mozizi nwẹnị tomi ma ḅẹẹ, “Ọ́ ḅalafa ma, gbala Tamụnọ ọ́ daaḍiki ḅẹ ẹrẹsị ḅom, tẹ mịẹtẹ ò mangịma mẹ ọmịna atọrụngbọ ḅio so ḅịa, mịẹtẹ ọ́ ḅarị si mịẹ ḅịa ḅara.”

²¹ Tomi ma ala-jụ ḅụ sịẹsimem, Mozizi nwẹnị sọma Tamụnọ sime-sime furu katapụtẹ kanakana mẹ kpeki tẹ sime.

Agbamịẹ-anga Gboloma Oloko Ma

²² KỊNỊNYANAḄỌ ḅe nwẹnị Mozizi ḅẹẹ: Mị-ḅara mie ị́ kẹ Izirẹlịapụ ma ḅẹẹ ḅarị ḅara, “Ọmịnị sọ ḅarana ẹrị ọmịna aḅụụ pịrị tẹ mịnẹ à So-ḅio ḅụ sime tẹ ọmịnị na ẹkwẹn tẹ.

²³ Ó seleḅa oru-atamụnọ tẹmẹ tẹ kẹ ị̀ afana ma, ọ́ pịkị golu oru-atamụnọ tẹmẹ tẹ kẹ ọmịna aḅụụ pịrị ma.

²⁴ Lịka mie ọ́ kẹ agbamịẹ-anga nama ị̀ pịrị ḅarịye, tẹ anị ọgọnọ ḅụ ọmịna anana ma na, ọmịna pootẹ-anambulo ma na kẹ dọkịma-agba ma na, dein-pịrị-agba ma na mịẹ ị̀ pịrị ḅarịye; à mịẹtẹ kịnị ị̀ ẹrẹ kẹ ḅiokoroma ḅẹ anga goyegoye ḅụ à ḅo tẹ ó boma ḅa.

²⁵ Anịsakị ọ́ nwẹnị ḍụḅarị kẹ agbamịẹ-anga nama ị̀ pịrịarị ḅẹḅẹ, ó pẹlẹtẹ aḍụḅarị kẹ nama ma; kẹ gotẹ ọkọ ḅẹẹarị, ọmịnị ọmịna kọrịnama-kọrịaị kẹ ḍụḅarị ma lama-lama, ọmịnị arị wọlọ tẹ arị ḅarị karakara kụn nyana-a.

²⁶ Anịsakị ị̀ agbamịẹ-anga ḅụ ọ́ ḅụọ sịẹma aị ḅụ ḅụọ kẹ sịẹma-sịẹma kpọlị iwo ma, mịẹtẹ anị ọgọnọ ḅụ ọmịnị ọmịna paụ kẹ kịnị ḍie ḅịa ḅara.”