Paka-so 2 - FỊAFỊA BAỊBỤLỤ

In Mozizi Iyim

¹ Izirẹlịapụ ma mị ḅara kẹ Ijiputi ḅụ tọrụsierịmarị sakị, Livayị ḅẹ gbọrụ owiḅọ Livayị ẹrẹḅọtụḅọ ọkị simem;

² Ẹrẹḅọ ma nwẹnị sime kọn tẹ gbọrụ owiḅọtụḅọ iyi, á tụḅọ ḅe iḅi lama wararị ḅara ẹrị tẹso, á tẹra akalụ kẹ ọ̀ kẹ ḅọịm.

³ Kụma á ḅarị inetẹ ọ̀ kẹ ḅọị ọkọ nẹngịma ḅịa ḅẹ sakị, á nwẹnị asịra kẹ ḍori kana ọkị tẹ kpootẹ agba kẹ anị oḅolo, tẹ á nwẹnị tụḅọ ḅe kẹ anị ḅio sụa tẹ kẹ sịẹ gele-geletẹ asịra ma ḅio koroma tọrụ mẹ akaka ḅụ.

⁴ Tụḅọ ḅe ịyịmbara nwẹnị ḅele tẹ sịẹsime tẹ ọ̀ la ḅẹ ye nimi ḅẹ ḅara.

⁵ Mịọkụ Fero ẹrẹḅọtụḅọ Nayịlị tọrụ mẹ ḅụ minji ḅiri ḅẹ ideri-ḅom, tẹ arị afịrịmẹnjị-eremịna-awọmẹ tọrụ mẹ akaka mẹnjịma ḅọrọarị ogbo, arị nwẹnị asịra ma ogbo-ḅio ḅụ kana mẹ ẹrị, tẹ á fịrịmẹnjị-ẹrẹḅọ fịrịma mu anị saakị ḅo.

⁶ Árị anị finji tẹso, á nwẹnị tụḅọ ḅe ẹrị. Ori owuarị, á nwẹnị tụḅọ ḅe ḍiki sịḅị-kanakana tẹ ḅẹẹ, “Ḅieḅe anie Hiburu ḅẹ ḍọkọḍọkọ-awọmẹ ma ḅẹ gbọrụḅọ.”

⁷ Anịtẹso ori mbịra ma nwẹnị Fero ẹrẹḅọtụḅọ ma gbela, “À mu Hiburu ḅẹ ereme ma ḅụ ḅẹ tụḅọ ḍikiḍiki gbọrụḅọ sịn ḅo ị́ pịrị tẹ mḅọ tụḅọ ḅe ḍikiḍiki ị́ pịrị?”

⁸ Fero ẹrẹḅọtụḅọ ma nwẹnị á ḅẹẹ, “Muu,” Mie ḅụ ẹrẹḅọtụḅọ ma nwẹnị mu tụḅọ ḅe iyingiḅọ ma sịn ḅo.

⁹ Fero ẹrẹḅọtụḅọ ma nwẹnị ẹrẹḅọ ma ḅẹẹ, “Ḅị tụḅọ ḅe ọkị soo, tẹ ò ḍikiḍiki ị̀ pịrịị, anịsakị arị ị́ gbẹẹ-ye kẹ ị́ pịrị ḅa.” Mie ḅụ ẹrẹḅọ ma tụḅọ ḅe ọkị so tẹ mu ò ḍikiḍikim.

¹⁰ Tụḅọ ḅe ḍụḅa tẹso, á nwẹnị ori ọkị-ḅo Fero ẹrẹḅọtụḅọ ma pịrị, tẹ ori arị owiḅọtụḅọ sọm; tẹ árị ẹrẹ kẹ ò korom Mozizi, arị mẹẹ, “Gbala minji ḅio arị ọ̀ nụnụ pakama-ḅom.”

Mozizi Mangị-so Midiyanị Mum

¹¹ Mozizi ḍụḅa tẹ sakị mẹ ḅẹ gbọrụ ene ḅụ, ọ̀ mẹnjị paka ori atomi ẹrị ḅẹ mu, tẹ ịna iku aị ma ḍikim; tẹ ọ̀ nwẹnị Ijiputi ḅẹ gbọrụḅọ ori atomi Hiburu ḅẹ ḅọ fomuarị ye ẹrị.

¹² Ọ̀ nwẹnị tọrụ pịkị mịanga na, anịanga na ḍiki, tẹ ọ̀ gbọrụḅọ-sọ ẹrị-a, mie ori Ijiputi-ḅẹ-ḅọ ḅe ḅaa tẹ ọ̀ kẹ onwin mẹ ḅio ḍiḅi ye.

¹³ Anị ḅẹ ene ḅaa ḅụ ọ̀ paka-mu tẹso, ori ẹrịm Hiburu ḅe maa apụ owu sọarị, tẹ ọ̀ nwẹnị ḅẹrẹ-gbo ḅọ ḅe ḅẹẹ, “Í tiegotẹ í pembema Hiburu ḅẹ ḅọ fomuarị?”

¹⁴ Ọ̀ nwẹnị pakịrị “Tụḅọ ị́ kẹ ḅẹrẹtọnḅọ na ḅẹrẹkọnḅọ na mịẹ wa pịrị? Í Ijiputi-ḅẹ-ḅọ ḅe ḅaa ḅara kẹ ị̀ ḅaa ḅẹ tẹ?” Anịtẹso Mozizi nwẹnị ḅalafa lama tẹ kuroma, “Tụkụma ḅara ḅụ tomi nimi tẹ ḅa.”

¹⁵ Fero anị ḅẹ ye naa tẹso, ò Mozizi ḅaa ḅẹ ḍọkịm. Kụma Mozizi Fero ḅụ ḍumo-mangị kọn tẹ mu Midiyanị ḅẹ sịẹ ḅụ angam; tẹ ọ̀ gbọrụ suḅe suku lẹgị-simem.

¹⁶ Anị sakị mẹ ḅụ Midiyanị ḅẹ agbamịẹḅọ sọnọma eremịna-awọmẹ nyanam; tẹ minji kẹ ịna ḍaḅọ anana ogbo pịrị ḅuu ḅẹ ḅara kẹ minji ḍuu nama minji-ḅuuye mẹ ḅio sụa ḅinma ḅẹ tẹ in ḅom.

¹⁷ Ja anana ḍikiḍikiapụ nwẹnị ḅo tẹ ịn dee-siin, kụma Mozizi saakị-sịẹ tẹ ḅarasụa ịn pịrị tẹ ịn minji kẹ ịna anana ogbo ma pịrị buum.

¹⁸ Ịn ḅo ịna ḍaḅọ Ruwẹlị (anịanịa Jetiro) la tẹso, ọ̀ nwẹnị ịn gbela, “Ndẹẹ ọmịnị ala-a tẹ ḅo ḅara mịmgba?”

¹⁹ Ịn nwẹnị pakịrị, “Ijiputi ḅẹ gbọrụḅọ anana ḍikiḍikiapụ ma ḅara-ḅio wa ḍụa pakama ḅom, tẹ minji sọ ḍuu-ḍuu wa pịrịm tẹ anana ogbo ma ḅuum.”

²⁰ Ọ̀ nwẹn ori eremịna-awọmẹ ma gbela, “Tẹ ọ̀ tọ-anga emi? Ó tiegotẹ owiḅọ ḅe koroma-so? Ó mu ọ̀ sịn, mịẹtẹ ò ḅo fịye fị ḅe ḅara.”

²¹ Mie ḅụ tomḅọ ḅe na anga mẹ nwẹnị Mozizi ḅụụ-ḅẹlẹ, tẹ ori ori ẹrẹḅọtụḅọ Zipora saakị Mozizi pịrị simem.

²² Á gbọrụ owiḅọtụḅọ iyim, tẹ ọ̀ nwẹnị Gasọmụ kẹ ẹrẹ kẹ tụḅọ ḅe koro, anie ori mẹẹ, “À bịanḅọ sọ tẹ igoni ama ḅụ.”

²³ Sakị kẹlẹ ḅọrọ tẹso, Ijiputi ḅẹ amadaḅọ ḅe fịịm. Izirẹlịapụ ma ịna suku-ḅio omoni ḅara mẹ sime tẹ iningi tẹ ḅarasụa gotẹ owum, tẹ omoni ḅara mẹ suku-ḅio ịn kọn owu mẹ nwẹnị iwo ḅo Tamụnọ la.

²⁴ Tamụnọ nwẹnị ịn kọn-arị iningi mẹ naa, tẹ ori Ebira-amụ na, Ayịzịkị na, Jekọbụ na, fị ọḅọkụ mẹ kẹ ḅiokoroma.

²⁵ Tamụnọ Izirẹlịapụ ma ḅụụ-fụka ẹrịm, tẹ ḅarasụa ịn pịrị ḅara ḍọkị.