Paka-so 10 - FỊAFỊA BAỊBỤLỤ

Igurube Ijiputi Sẹ Gbaịnm

¹ Anịtẹso KỊNỊNYANAḄỌ ḅe nwẹnị Mozizi ḅẹẹ, “Fero dama-muu; kẹ gotẹ ọkọ ḅẹẹarị, arị ori na, ori afịrịmẹnjịapụ na aḅioḅẹngbọ kụrọma tẹ, mịẹtẹ à mịna ì elekima ma kẹ ịn ḍie ḅarị ḅara,

² tẹ mịẹtẹ ọmịna owiapụ-awọmẹ na, ọmịna taa-awọmẹ na naa ḅarị ḅara kẹ ọmịnị arị Ijiputi ḅẹ apụ ma kẹ oḅori atomi sọma ḅara na, arị ịna ogboku mịẹ tẹ elekima ma na ḍuko ịn pịrị ḅẹ ḅara mịẹtẹ ó nimi ḅarị ḅara mịnẹ yẹrị anie KỊNỊNYANAḄỌ ḅee.”

³ Mie ḅụ Mozizi na, Erọnị na mẹnjị sọ Fero dama-mu tẹ ọ̀ ḅẹẹm, “Mie KỊNỊNYANAḄỌ, Hiburu ḅẹ apụ ma Tamụnọ ḅe ḍuko yee, ‘Anị mu tọ sakị la tẹrẹmẹ ị́ ị̀ tọrọkọ ị́ ḅụụ iderima ḅẹ? Ị̀ atomi ma wẹrịsoo, in so, mịẹtẹ ịn fịrịmẹnjị ị̀ pịrị ḅarị ḅara.

⁴ Kẹ gotẹ ọkọ ḅẹẹarị, ị́ ḍụkụ tẹ ịn wẹrịso tẹ in so-a ḅẹḅẹ, ḍikii, ḅaa, arị igurube ọkị-ḅo í opu sịẹ mẹ ḅio suu ḅa;

⁵ anịsakị in kiri mẹ gbaịn ḅa, tẹ mịẹtẹ gbọrụḅọ-sọ tọrụngbọ kẹ kiri mẹ ẹrị ḅịa; tẹ so-aḍụḅarị ma guluguluma kọnma aị ma fị fama ḅa, anịsakị sime ọ́ pịrị opu sịn goyegoye tẹ ọmịna piri-ḅio so-paka ye goyegoye ịn fị ḅa.

⁶ Anịsakị ini ị́ awarị ma na, ị́ afịrịmẹnjịapụ mamgba awarị na, Ijiputi-ḅẹ-apụ mamgba awarị na ḅio sọ-sọ ḅin ḅa; ị́ aḍapụ, anịanịa í opu aḍapụ ma tomikiri ḅo ene ḅụ ọkị-ḅo mịmgba la ḅụ amụ ẹrị-a ḅara.’ ” Anịtẹso ori ọḅụ pịkị Fero gbin tẹ mẹnjị paka-som.

⁷ Fero afịrịmẹnjịapụ nwẹnị ọ̀ ḅẹẹ, “Ḅị tomḅọ ḅe ḍiein sọ wa pịrị mu tọ sakị la ḅẹ? Owiapụ ma wẹrịsoo in so mịẹtẹ ịn mu fịrịmẹnjị KỊNỊNYANAḄỌ ịna Tamụnọ ḅe pịrị ḅarị ḅara. Amụ ị́ paa nimi-a mịnẹ Ijiputi gulugulu tẹ?

⁸ Mie ḅụ in Mozizi na Erọnị na pịkịma-ḅo Fero pịrịm; tẹ ori ịn ḅẹẹm, Ó soo, ó mu fịrịmẹnjị KỊNỊNYANAḄỌ ọmịna Tamụnọ ḅe pịrịị; kụma tọ apụ so ḅẹ?”

⁹ Mozizi nwẹnị pakịrị, “Wamịna asambịrịma apụ na, omongitẹ apụ na wamịnị na so ḅa; wamịna owiapụ awọmẹ-o, eremịna-awọmẹ-o, wamịna anana na oḅori na ogbo-ogbo-o, opu anama ogbo-ogbo ma sọ wa kẹ sụa so ḅa, gbala wa alalị fị kopini afịaị sọ KỊNỊNYANAḄỌ ḅe pịrị nyana wararị ẹrẹsị.”

¹⁰ Tẹ ọ̀ nwẹnị ịn ḅẹẹ, “KỊNỊNYANAḄỌ ḅe ọmịnị na simee, à nwẹnị anị sime-ḅara, sime-ḅara sọ wẹrịso tẹ ọmịnị ọmịna ḍọkọḍọkọ-awọmẹ ma na som ḅẹḅẹ! Ḍikii ó siye kẹ ḅiotọn wararị.

¹¹ Ẹn-ẹn, ọmịna ogbo-ḅio simearị owiapụ ma so tẹ mu fịrịmẹnjị KỊNỊNYANAḄỌ ḅe pịrịị, gbala anie mie ó ḅii ye ẹrẹsị.” Tẹ ịn Fero tọrọkọ ịn dee pakamam.

¹² Anịtẹso KỊNỊNYANAḄỌ ḅe nwẹnị Mozizi ḅẹẹ, “Ị́ ḅara sụn-pakama Ijiputi ama mẹ da igurube ma ḅo mẹ pịrịị, mịẹtẹ ịn ḅo Ijiputi ama mẹ gbaịn tẹ so-pakarị sịn goyegoye tẹ so-aḍụḅarị ma ḅaa kọnma aị mamgba fị ḅaa famaa.”

¹³ Mie ḅụ Mozizi ori mkpara sụn-pakama Ijiputi ama mẹ dam, tẹ KỊNỊNYANAḄỌ ḅe nwẹnị ịrụa-saakịarị-anga mẹ ḅụ kụrọ fẹrụ ọkị-ḅo ama mẹ pịrị tẹ bebe anị eneḅaka mẹmgba na, anị ḍin mẹmgba na anị fiem; tẹ anị ḅo dede-ḅio la sakị ịrụa-saakịarị-anga mẹ ḅẹ kụrọ fẹrụ mẹ igurube ma tan ḅo tẹ.

¹⁴ Tẹ igurube ma ḅo Ijiputi ama mẹmgba gbaịn, tẹ bebe Ijiputi opu sịẹ mẹmgba ḅụ simem, jene-jene ḍụḅa ọkọ la igurube ogbo gbala-gbala amụ paka-a, pịkị ḅarị gbala-gbala paka ḅịa.

¹⁵ Kẹ gotẹ ọkọ ḅẹẹarị, ịn bebe ama mẹ gbaịn-koro tẹ ama mẹ furum, tẹ so-pakarị asịn mamgba na, sịnmgbọlụ tẹ so-aḍụḅarị ma ḅaa kọnma opu asịn ma ḅụ ḅẹ aị mamgba fị famam; mie kụma eleleinda tọrụ sụa ye ḅụ ḅẹ gberie-sọ kirikọn-a, opu asịn-o, piri mẹ ḅio sime asịn ma sọ, bebe Ijiputi ama mẹmgba ikelema-koro ḅụ.

¹⁶ Anịtẹso Fero nwẹnị fọnya Mozizi na Erọnị na sịn, tẹ ḅẹẹ, “À si kẹ KỊNỊNYANAḄỌ, ọmịna Tamụnọ ḅe mịẹ tẹ, pịkị ọmịnị so.

¹⁷ Anịẹrẹsị mịọkụ arị ọ́ tẹkẹm, mị gbọrụ sakị mẹ kịngẹ ḅụ ọmịnị ì si wẹrịso ị̀ pịrịị, tẹ KỊNỊNYANAḄỌ ọmịna Tamụnọ ḅe tẹkẹẹ ọ̀ paa ị̀ ḅụụ ḅụ mị fịị mẹ kịngẹ saakị sin.”

¹⁸ Mie ḅụ Mozizi Fero koroma mẹnjị-paka tẹ KỊNỊNYANAḄỌ ḅe tẹkẹm.

¹⁹ Tẹ KỊNỊNYANAḄỌ ḅe nwẹnị fẹrụ mẹ da pịkị ịrụa-ideriarị-anga ḅẹ kụrọ lamatẹ fẹrụ mịẹ, aniemẹ tẹ igurube ma tan saakị tẹ ịn dee mu Awụ Tọrụ mẹ ḅio sara ye mẹ; Ijiputi opu sịẹ mẹmgba ḅụ paa igurube gbọrụmgbọ kirikọn gbọrụ anga sọ ofori.

²⁰ Kụma KỊNỊNYANAḄỌ ḅe Fero ḅioḅẹngbọ kụrọmam, tẹ ọ̀ ḍụkụ tẹ Izirẹlị ḅẹ awọmẹ ma wẹrịso tẹ ịn so-a.

Kanakana Ijiputi Sẹ Gbaịnm

²¹ Anịtẹso KỊNỊNYANAḄỌ ḅe nwẹnị Mozizi ḅẹẹ, “Ị́ ḅara sụn-pakama so daa, mịẹtẹ kanakana Ijiputi ama mẹ gbaịn ḅarị ḅara, tomina aḅụụ ye la ḅarị kanakana.”

²² Anie ḅụ Mozizi amịna ḅara sụn-pakama so dam, tẹ furu katapụtẹ kanakana nwẹnị tẹra aḍin kẹ Ijiputi ama mẹmgba gbaịn;

²³ ịn tọrụngbọ kẹ jụmọ-jụmọ ẹrị-a, tẹra aḍin ḅụ gbọrụḅọ-sọ pịkị mḅọ sime kiri ḅụ pụpụrụ jen anga mu-a; kụma Izirẹlịapụ mamgba ini anga yọ ḅụ bele nyanam.

²⁴ Anịtẹso Fero nwẹnị Mozizi sịn, tẹ ḅẹẹ “Ó so mu fịrịmẹnjị KỊNỊNYANAḄỌ ḅe pịrịị; ọmịna ḅụụ ḅẹlẹ-ḅẹlẹ, ọmịnị inetẹ ọmịna awọmẹ sọ kẹ sụa so ḅa; yee ọmịna anana na, oḅori na ogbo-ogbo ma na, ọmịna opu anama ogbo-ogbo ma na ngẹrị ọ́ nwẹn koroma-so.”

²⁵ Kụma Mozizi nwẹnị pakịrị, “Ị́ wa wẹrịso tẹ wa pịkị wa kẹ agba mịẹ, pịkị dọkịma-agba mịẹ ḅẹ aị sọ ọkị nyanam, mịẹtẹ wa agba mịẹ KỊNỊNYANAḄỌ wamịna Tamụnọ ḅe pịrị ḅẹ ḅara.

²⁶ Wa wamịna opu anama sọ kẹ sụa so nyanam, nama ḅụọ ḅẹ okuro ma ḅẹ gberie-sọ wa koroma-so ḅịa, kẹ gotẹ ọkọ ḅẹẹarị, ịna aḅụụ mie wa ye ọkị tẹ kẹ fịrịmẹnjị KỊNỊNYANAḄỌ wamịna Tamụnọ ḅe pịrị nyana ye, anịsakị wa kẹ fịrịmẹnjị KỊNỊNYANAḄỌ ḅe pịrị nyana ye mẹ wa nimi ḅịa nwenii wa mu anị yọ mẹ la tẹrẹmẹ mie wa nimi ḅarịye.”

²⁷ Kụma KỊNỊNYANAḄỌ ḅe Fero ḅioḅẹngbọ kuromam, tẹ ori ịn wẹrịso tẹ ịn so-a.

²⁸ Anịtẹso Fero nwẹnị Mozizi ḅẹẹ, “Ini ị́ fọnọ sikimaa ị̀ tọrọkọ; ị́ ḅụụ ẹbị, ḅarị gbala-gbala jen-maaịn kẹ ị̀ tọrụkuḅu ẹrị ma; kẹ gotẹ ọkọ ḅẹẹarị, ị́ jen-maaịn kẹ ị̀ tọrụkuḅu ẹrị eneḅaka ị́ fịị ḅa.”

²⁹ Mozizi nwẹnị pakịrị, “Ị́ wẹrịtẹ ḅẹẹ ḅara, à ḅarị jen-maaịn kẹ ị́ tọrụkuḅu ẹrị ḅịa.”