Nimi Tolumaḅọ 7 - FỊAFỊA BAỊBỤLỤ

Ḍumo Gboloma Akuroma

¹ Iḅi ẹrẹ yelatẹịn iḅi olo nẹngịm; anịsakị tomḅọ fị ene yefie-tẹịn in mḅọ iyi ene nẹngịm.

² Kịnị fị anga mu yefie-tẹịn ịn kopini afịaị fịarị anga mu nẹngịm; gbala fị anie tomi mamgba kunoma ẹrẹsị, ḍumo wararị apụ ma anị kẹ ḅiokoroma ḅa mịnẹ ini sọ fịị ḅa.

³ Kururu yefie-tẹịn ḍẹrị nẹngịm, gbala tọrụ-fụrụma ḅụ mie ḅioḅẹngbọ mẹ ḅẹlẹ nyanarị ye ẹrẹsị.

⁴ Ye-nimiḅọ ḅe fị kẹ sakị mẹmgba kuroma ḅio wẹrị wararị; kụma anị ḅọ tẹ ḅioḅẹlẹ kẹ sakị mẹmgba ḅioḅẹngbọ ḅụ wẹrị wararị ḅọ mẹ anie oḅori ḅọ.

⁵ Ye-nimiḅọ ḍukoarị datụkụma-ẹkwẹn poki yefie-tẹịn oḅori atomi tokini anume poki nẹngịm.

⁶ Nangị afịnị ọpọ ḅio ḅẹlẹ suku kpra-kpra-kprama poloarị ḅara, mie oḅori atomi ḍẹrị pọkọ mẹ sime-ḅara: miemẹ sọ ḅintẹ ḅara kẹ anị fieye nimi-a ye.

⁷ Kụrọ ḅara furo-tụḅọ kẹ omoniḅọ sọma ḅara, mie ponoma kẹ ye-nimiḅọ kẹ oḅori-ḅọ sọma ḅara; anịsakị ọḅụ-fị, tomḅọ ye-mịẹ-ḅara sima-simam.

⁸ Ye ḅẹ kunoma iḅi anị ḅẹ suku-saakị nẹngịm; anịsakị dein ḅara kẹ ye mịẹ iḅi kẹ opu amịẹaị nẹngịm.

⁹ Bẹkẹ ịganị kọn ma; gbala oḅori tomḅọ ḅe toni-ḅio ọ̀ kpapụ mẹnjịarị ye anie ịganị.

¹⁰ Ḅịẹịn ḅẹ ene ma tiegotẹ iḅi mịmgba ḅẹ ene ma nẹngị? Ḅẹ ma Ị́ ọkọ ḅẹ, ḅẹ, í nimi ẹkwẹn kọn-a.

¹¹ Ḍuu ḅụ fị warị wẹrịma ngọ iḅi ḅara, mie nimi iḅi ḅara; anị iḅi sọ tọrụngbọ kẹ ịrụa mẹ ẹrị tẹ apụ pịrịm.

¹² Igbigi tomḅọ sịḅị kikima ḅara, mie nimi sịḅị kikimarị ḅara; anịsakị ye ḍawọ ḍịn mẹ ḅẹ iḅi anie mie, nimi anị nyana ḅọ mẹ ḍumo wẹrị kpaịnmarị.

¹³ Tamụnọ kọrịnama mẹ kẹ ḅiokoromaa; tụḅọ inetẹ ò pengema ye mịẹ karakarama ḅẹ?

¹⁴ Ị́ lọkọlọkọ ene ḅụ ḍerekuu, anịsakị ị́ ḅụụ-fụka ene ḅụ ye kẹ ḅiokoromaa; Tamụnọ kẹ gbọrụḅọ tẹmẹ ḅara, mie ọ̀ pịkị kẹ osi-ḅọ sọ tẹmẹ ḅara; mịẹ tẹ tomḅọ ye kẹ Tamụnọ ọlọ ḅịa ḅara.

Ḍumo Ḅụ Tomḅọ Larị Aị

¹⁵ Ị̀ papaa ḍumo ḅụ à ye goyegoye ẹrị fama tẹ karakara tomḅọ amịna karakara ḅụ sime tẹ fịị guluguluarị, kụma si-sịḅịḅio-sụaḅọ amịna si amịẹaị ḅụ sime tẹ nangwọ ḍumo nyanarị.

¹⁶ Gbana ḅara kẹ karakarama, anịsakị gbana ye-nimiḅọ ḅara kẹ ị́ ḅụụ wẹrị ma; í tiegotẹ ị́ ḅụụ guluguluma na-iḅi?

¹⁷ Si-sịḅịḅio-sụa ḅụra, anịanịa oḅori-sọ ma; tiegotẹ amụ ị́ sakị la-a ogbo ị́ fịị na-iḅi?

¹⁸ Í gbọrụ ye ọlọ-sịẹma tẹ osi ye wẹrịso na-iḅi-a. Tamụnọ ḍiki-ḅalafarị ḅọ arịmgba ḅụ mịẹ-wama ẹkịlẹ ḅa.

¹⁹ Nimi ḅẹlẹma ịnyọ kẹ ye-nimiḅọ pịrị tẹịn kẹ oyi ḅẹrẹtọn-apụ gbọrụ opu ama ḅụ sime tẹ ḅẹrẹtọn nẹngịm.

²⁰ Tụkụma ḅara ḅụ gbọrụ karakara tomḅọ sọ tomikiri ḅụ iḅi-ḅi-ḅi mịẹ, tẹ gbala-gbala si mịẹ-a ḅọ ofori.

²¹ Tomi ḍukoarị aị mamgba poki fama ma, anieofori í ḅofa naa ị́ fịrịmẹnjịḅọ í woriarị;

²² í ḅioḅẹngbọ ḅụ í nimi wararị mịnẹ sọ tọnwa sakị ḅụ jen-apụ wori tẹ.

²³ Nimi ḅụ à mịna aị mamgba pekele-ḍiki fama tẹ; à ḅẹẹm, “À ye-nimi ḅẹ ḅii ḅa”; kụma anị ị̀ ḅụụ ḅụ ḅele mu la anga iḅerea.

²⁴ Anie mẹ tẹ simearị ye mẹ, iḅere-iḅerea jụjụ-ḅio anị emi, tẹ pokolotẹ, iḅiọkụ pokolo lama wararị; tụḅọ inetẹ anị ḍọkị-ẹrị ḅẹ?

²⁵ Anie ḅụ à nwẹnị vuunma ì ḅioḅẹngbọ pịkị kẹ nimi ḅio ḍọkị, anị sọkịrị ḍiki tẹ anị fiearị ye naa tẹ ye amịẹaị ma ḅẹ suku nimi; tẹ pịkị si-sịḅịḅio-sụa mẹ ḅẹ oḅori na, oḅori mẹ ḅẹ nọmụ na fiearị ye naa ḅẹ ḅara.

Ereme Gbolomaye

²⁶ À nwẹnị akụ fịị nẹngị ye ḍọkị-ẹrị, anie ẹrẹḅọ tẹ ḅioḅẹngbọ ḍiein na ịgbọ na sụa wararị ḅọ, anịsakị arị aḅara ma anie kụrọtẹ ikoli. Ḅẹẹ owiḅọ-owiḅọ tẹ Tamụnọ ḅụụ-ḅẹlẹ ye mịẹḅọ mịẹḅọ, arị aḅara ma ḅio pụkọ-pakaḅo ḅa, kụma si mịẹ ḅọ ḅe árị ori ọkị ḅa.

²⁷ Ẹkwẹn-kọnḅọ ḅe mẹẹ, “Ḍikii, mie à ḍọkị-ẹrị yee, gbọrụ ye kẹ jen na sụa kịẹn gbolomaa, tẹ arịmgba pakaye nimii,

²⁸ aniemẹ tẹ ì ḅioḅẹngbọ sịkọpẹlẹ-a ḅara kẹ nimi ḅẹ ḍọkị ye mẹ. Owiapụ maa ẹndẹ oyia asi finji sime anga à karakara mịẹarị gbọrụ owiḅọ ḍọkị-ẹrịm, kụma ereme mamgba ogbo-ḅio ḅụ karakara mịẹarị kpọkpọ gbọrụ ẹrẹḅọ sọ ofori.”

²⁹ Ḍikii, miemẹ ḅụ ngẹrị sọ à ḍọkị-ẹrịm mịnẹ Tamụnọ karakara mịẹ kẹ tomḅọ tẹmẹm, kụma tomi tọnwa kịrị-kịrị aḅọkọ ḍọkị amịna aḅụụ pịrị tẹ.