Nimi Tolumaḅọ 6 - FỊAFỊA BAỊBỤLỤ

¹ Tomikiri mẹ ḅụ ḅụ gbọrụ siye tẹ à kẹ elekima sụa tẹ ye, kịnị-inoma tomina ọgọnọ ịn ponoma ḅaarị.

² Tamụnọ pẹrẹ na, kụn na, ḅẹẹye-ḅẹẹye na kẹ pịrị tẹ kọn kara tẹ ye mamgba ḅụ ḅii, ḅii ye ḅarị ofori ḅọ ḅe, anịsọ Tamụnọ kụrọ kẹ ọ̀ pịrị-a ọ̀ sime tẹ arịḅẹ tọrụ-ḅẹlẹ nyana-a; kụma igoniapụ mie arị kẹ tọrụ-ḅẹlẹarị ye; miemẹ anie ḅintẹ ḅara kẹ anị fieye nimi-a ye; anị kụrọ ḅụra tẹ ḅụụ-fụkama lamam.

³ Gbọrụ owiḅọ nwẹnị awọmẹ sọnọa si iyi tẹ tọnwa akụra kẹ ḍumo-sime, gbala ọ̀ sịḅị ḅọrọtẹ akụra ḅụ ọ̀ tọnwa ene sime tẹ, kụma ḍumo ḅụ kẹ tọrụ-ḅẹlẹ-ḅẹlẹ iḅi-aị ma ḅẹ gbọrụ tọrụ-ḅẹlẹ sọ ọ̀ nyana-a, ịn pịkị iḅi ḅara sọ kẹ ò ḍiḅi-a ḅẹḅẹ, à ḅẹẹm mịnẹ posi paka tụḅọ (eremịna ọgọnọ ẹrị ḅụ ḅọrọ tụḅọ) iḅi ọ̀ nẹngịm.

⁴ Kẹ gotẹ ọkọ ḅẹẹarị, anị ḅo fị ḅio sọ tẹ ḅọrọ mu kanakana ḅio sọm, tẹ kanakana mẹ ḅio ori ẹrẹ nwẹnị gbaịn faa;

⁵ anie sikima, anị amụ ịrụa So-tọrụ sọ ẹrị-a, anị pịkị amụ gberie-sọ nimi-a; anịsọ anie nakara ori ịnyọsara nyanam.

⁶ Ọ̀ nwẹnị maa sakị kẹ kụra maa ẹndẹ oyia asi finji finji nẹngị sakị kẹ ḍumo-sime ḅa, tẹ anịsọ gbọrụ iḅi tọrụ-ḅẹlẹ sọ nyana-a kụma, arịmgba gbọrụ anga mẹ mu-a?

⁷ Tomḅọ gotẹ lịlịarị ye mẹmgba sime ọ̀ ḅịḅị pịrịm anịsọ paa ọ̀ pọkọ-ta-a.

⁸ Nwẹnị ọkọ kụma, ye-nimi ḅọ ḅe tọ-ḅara kẹ iḅi ye-nimia-ḅọ ḅe nẹngị? Anịsakị igoinḅọ ḅe tẹ amịna ḅụụ nimi iḅi ḅara kẹ ḍumo wararị apụ ma tọrọkọ ḍumo kọn ḅọ ḅe tiye nyana?

⁹ Tomḅọ tọrọkọ emi tẹ mḅọ ẹrịarị ye mẹ iḅitẹịn ikele-ikelema mḅọ nyana ḅẹ-ḅiiarị ye ḍọkị nẹngịm; miemẹ sọ ḅintẹ ḅara kẹ anị fieye nimi-a ye, tẹ fẹrụ na ịgbanịarị ye ọkụ.

¹⁰ Pakarị ye goyegoye iḅere-iḅerea kụra-ḅio ini ẹrẹ kẹ anị sịn tẹ, anịsakị kịnị tomina sime-ḅara nimi wararị mịnẹ ọ̀ kụrọ ọ̀ nẹngị ḅọ na ye ịgbanị-a ịgbanị-a.

¹¹ Ẹkwẹn mẹ ḅaka la ḅara, mie anị pịkị ḅarị yefie-a la ḅara; anịsakị aniemẹ nwẹnị tọ sọye mịẹ ḅẹḅọ-ḅẹḅọ pịrị?

¹² Tụḅọ ḅọrọ tomḅọ na iḅi ḅẹ ye nimi, ori amịna papaa ḍumo mẹ ḅẹ boowa ene ma ḅụ ḍumo-sime wararị ogbo aniemẹ tẹ ori ịrụa ḅio ḅẹ tẹmẹ tẹ kiri-ḅio tọn-arị ye mẹ ḅọrọ-so ḅara kẹ ḅọrọ-soarị ye mẹ? Tụḅọ nwẹnị tomikiri mẹ ḅụ paka ḅarị aị ma ḍuko tomḅọ ḅe pịrị ḅẹ ọ̀ ḅọrọ so sakị?