Nimi Tolumaḅọ 5 - FỊAFỊA BAỊBỤLỤ

Kuroma Nyana Ye Pịrị-a Ḅara kẹ Ye Minini ma

¹ Ị́ Tamụnọ-warị mẹ mu tẹ kọn ḅẹ amẹnjị ḅụ ị́ ḅụụ ẹbị-ẹbịị. Sọma kpeki tẹ ye poki tẹ ye ḍawọ mẹ iḅi kẹ oḅori atomi mịẹ, mị agba ma nẹngịm; inima tẹ siye mịẹarị tẹ nimi-a apụ ma.

² Kuroma nyana-a ḅara, anịanịa fọnya-fọnya ḅụụ pono-a ḅara kẹ Tamụnọ tọrọkọ ẹkwẹn ma, kẹ gotẹ ọkọ ḅẹẹarị, Tamụnọ So-ḅio ḅụ emi anịsakị ị́yẹrị tomikiri emi, anịẹrẹsị kpụlụ ẹkwẹn kọn.

³ Í kuroma mu la ḅara, anie ị́ kọọn ḅarị ḍawọ la ḅara; tọnwa ẹkwẹn kọn ḅụ mie ye-nimia-ḅọ ḅe oḅori ẹkwẹn kọn-arị ye.

⁴ Ị́ ịlọ minini Tamụnọ pịrị, pịrị, sakị fama ma tẹ anị sumaa, ori oḅori atomi ḅụụ tọrụ-ḅẹlẹ nyana-a. Ọkọẹrẹsị í minini ịlọ sumaa.

⁵ Ị́ ịlọ minini-a iḅitẹịn kẹ í minini tẹ ḅarị í minini ịlọ mẹ suma-a nẹngịm.

⁶ Ḍụkụ tẹ ị́ ḅịḅị-ḅio paka-ḅo ẹkwẹn si fẹ ḅo ị́ pịrị tẹ ị́ Tamụnọ-warị ḅio ḅẹ fịrịmẹnjịḅọ ḅe ḅẹẹ ma, “Ị̀ ḅịḅị-irim.” Í tiegotẹ ẹkwẹn-ẹkwẹn Tamụnọ ịganịma-ịganịma tẹ ori ị́ akọrịnama ma gulugulumarị?

⁷ Í gbeke Tamụnọ ḍiki-ḅalafarị tẹ papaa ẹkwẹn kọn-kọn sararị, ye ḅarị í ḅiotọn ḅara sime-a, tẹ ḅarị ị́ na kpaịn-a ḅẹ kụma?

Ḍumo Anie Papaaye

⁸ Ḅio-maaịn-tọn nyana ma, ị́ ẹrịm kọnsịnị ḅẹrẹtọn-apụ igoin-apụ ma ponomarị tẹ ịn nyana na-iḅi ye kẹ ịn pịrị-a, pịkị karakara ḅẹrẹ kọn ịn pịrị-a ḅẹḅẹ. Kọrịnama kọrịarị opu apụ ma jụmọ-jụmọ suku-ḅio emi, tẹ jụmọ-jụmọ gbaịn-arị, kụma gele inimgba nẹngị tẹ ịn ḍikiarị apụ emi.

⁹ Kụma arịmgba ḅụ, kọrị tẹ ḍụọ akiri emi ama ḅụ sime amadaḅọ iḅi ẹrịarị.

¹⁰ Igbigi ḅẹlẹma ḅọ ḅe nyana tẹ ori na iḅi ḅẹ ḅara ofori; ngọ-kọn ḅio-sẹsẹ nyana ḅọ ḅe pịkị gbala-gbala ò ḅiiarị aị mamgba nyana ḅịa. Miemẹ sọ ḅintẹ ḅara kẹ anị fieye nimi-a ye.

¹¹ Ngọ ma sun-arị ḅara, mie arị fị ḅẹ apụ ma kịẹn-ḅịḅị pịkị sun-arị ḅara. Ị́yẹrị arịmgba ḅụ nyana sọye anie í nimi wararị mịnẹ ị́ ngọ kọn wararị.

¹² Kọrịnama-kọrịḅọ ḅe tẹ boowa ye, anịanịa, furo ḅin ye fịarị ḅọ ḅe ḍin ḅụ ḅẹlẹ ḅụratẹ mono kọnm; kụma ngọ-kọnḅọ ḅe, ori ngọ ma ḅụụ-ḅalaḅala kẹ ọ̀ pịrị tẹ mono ọ̀ tọrụ sọ-a.

¹³ Tomikiri mẹ ḅụ à ḅalafama gbọrụ siye ẹrịm; tomi ịna igbigi koko tẹ kẹ ini anị ọkị ye mịẹ ḅẹ sakị wẹrịmarị,

¹⁴ tẹso, ọkụma, si-fụḅara ḅara ḅụ, ini arịmgba ọkị fama-fama tẹ, ḅarị kẹlẹ sọ kọnma koroma ịna awọmẹ sọ pịrị-a.

¹⁵ Wa gberie-sọ kẹ wamịna iyingiapụ furo ḅio paka-ḅo-a ḅara, mie wa lịlị ḅara, lịlị ḅara, wa pịkị paụ na so, tẹ inetẹ gberie-sọ dogi-so ḅịa ḅara.

¹⁶ Miemẹ sọ kịnị kururuma gbọrụ siye. Wa papaa ḅara kẹ ḅo ḅara, mie wa pịkị papaa ḅara kẹ so ḅarị ḅara, anịsakị wa nwẹnị wa kọn lịlị mẹ ḅụ tọ sọye nyana, gbala lịlị fẹrụ pịrị ye ọkụ?

¹⁷ Sime wa pịrị aị anie kanakana na, kururu na, ḅio pikiri na, ịganị na, obi na, ḅio anga.

¹⁸ Ḍikii, mịẹ na-iḅi ye tẹ àrị ẹrị iḅiye anie: fị-na-ḅuu-na, tẹ Tamụnọ kẹ mḅọ pịrị wararị kpụlụtẹ ḍumo mẹ ḅụ mḅọ kọrị pakama-ḅo tẹ ye mẹ ḅụ tọrụ-ḅẹlẹ nyana; miemẹ anie tomḅọ So ḅụ ḅo ye mị tomikiri mẹ ḅụ.

¹⁹ Ḅẹḅọ-ḅẹḅọ tẹ Tamụnọ ngọ na, nyana na iḅi tọnwa aị na, kụrọ na, kẹ pịrịm kẹ tọrụ-ḅẹlẹ ḅẹ ḅọ mẹ, mḅọ ịmịẹtẹ ḅẹ, tẹ mḅọ so ḅụ ḅo ye mẹ ọkị tẹ kẹ mḅọ lịlị ye mẹ ḅụ tọrụ-ḅẹlẹẹ — miemẹ anie Tamụnọ ḍiepịrịye mẹ

²⁰ Gbala ọ̀ ḅarị kpọma ò ḍumo-ene ma kẹ ḅiokoroma ḅịa, kẹ gotẹ ọkọ ḅẹẹarị, Tamụnọ ḅioḅẹlẹ kẹ ò ḅioḅẹngbọ ḅụ suu tẹ ò ḅioḅẹlẹarị ẹrẹsị.