Nimi Tolumaḅọ 3 - FỊAFỊA BAỊBỤLỤ

Ye Goyegoye Amịna Sakị Nyana Wararị

¹ Tomikiri ye goyegoye amịna sakị nyana wararị, pakarị ye goyegoye pịkị anị ḅẹ sakị kẹ pakarị.

² Tomḅọ iyi sakị emii, tomḅọ fị sakị emii. Fịye ḍiḅi sakị emii, fịye soku sakị emii.

³ Kịnị-ḅa sakị emii, kịnị-gwọ sakị emii. Ye kan-sara sakị emii, ye nama sịẹma sakị emii.

⁴ Owu sakị emii, ḍẹrị sakị emii. Kururu sakị emii, sẹkị sakị emii.

⁵ Ḍụḅarị apakịrị kẹ wakị-nguma sakị emii. Ḍụḅarị apakịrị kobiri gboloma sakị emii. Ekpe kẹ jụmọ-jụmọ lama sakị emii. Jụmọ-jụmọ ḅụụ ḅele sakị emii.

⁶ Ḍọkị sakị emii, fama sakị emii. Koko sakị emii, kẹ gbin nguma sakị emii.

⁷ Ye kaan sakị emii, ye gbin-gboloma sakị emii. Gbọsime sakị emii, ẹkwẹn sakị emii.

⁸ Kịnị ḅẹlẹma sakị emii, kịnị ḍiki-ḅioḅu sakị emii. Ọmụgbin sakị emii, dein sakị emii.

⁹ Kọrịnama-kọrịḅọ ḅe ọ̀ kọn lịlị mamgba ḅụ tọ sọye nyana?

¹⁰ Kọrịnama mẹ tẹ Tamụnọ kẹ tomina awọmẹ pịrịm kọrịị nwẹn ḅẹẹ kụrọ kọrịnama ma àrị arị sime-ḅara ẹrị tẹẹ.

¹¹ Ò ye goyegoye mịẹ tọrụ-gbẹ ḅara wẹrị wararị anịḅẹ sakị ḅụ, tẹ jen-a jen-a, pịkị sịḅịḅio kẹ ḅọrọtẹ sakị ḅụ mịẹ ye na, tọrọkọ-jụ ḅụ mịẹ ḅarịye na ọlọ gbamaso ḅẹ ḅioḅẹngbọ kẹ wa pịrịm, anịsọ aniemẹ tẹ Tamụnọ sukuyọ-saakị ọkị mu kunoma la ḅụ mie ye mẹ wa inetẹ ḍọkị-nimi ḅịa.

¹² À nimi wararị mịnẹ ịn ḍumo wararị sakị goyegoye ini na iḅi kẹ fị-na-ḅuu-na, ḅioḅẹlẹ na nẹngị ḅẹ ye ofori;

¹³ aniemẹ anie Tamụnọ ḍiepịrịye tẹ ọ̀ kẹ tomḅọ pịrị ye, mịnẹ ḅẹḅọ-ḅẹḅọ fị, pịkị ḅuu tẹ mḅọ nụnụ ye mẹmgba ḅẹ tọrụ-ḅẹlẹ nyana-a.

¹⁴ À nimi wararị mịnẹ Tamụnọ mịẹ ye, mịẹ ye sime gbamasom; kẹ anị ḅụ sụa-sụa ye, anịanịa sin-sin ye ofori; Tamụnọ ọkọ kẹ anị mịẹm, mịẹ tẹ tomi ò ḍiki-ḅalafa na-iḅi ḅara kẹ ọ̀ tọrọkọ ḅalafa ḅẹ ḅara.

¹⁵ Anie mẹ tẹ mịọkụ simearị ye mẹ, iḅerea sakị ḅụ sọ emi; aniemẹ tẹ ḅo ḅarịye mẹ, anịngẹ-kụraḅio ḅo tẹ emi, kẹ gotẹ ọkọ ḅẹẹarị, Tamụnọ mịẹtẹ mịẹ ḅọrọtẹ ye mẹ pịkị siin mịẹarị.

Tomikiri Ḅụ Simearị Inoma

¹⁶ Anie sikima, tomikiri mẹ ḅụ àrị ẹrị ye anie, si-sịḅịḅio karakara ḅẹrẹkọn kiri ọkị tẹẹ, tẹ karakara mẹ sime na-iḅi kiri sọ si-sịḅịḅio mie emi yee.

¹⁷ À nwẹnị ì ḅioḅẹngbọ ḅụ ḅẹẹ, Tamụnọ karakaraye-mịẹḅọ ḅe na, si-sịḅịḅio-sụaḅọ ḅe na kọn ḅa, kẹ gotẹ ọkọ ḅẹẹarị, ọ̀ sakị pẹlẹ tẹ kẹ ḅẹrẹ goyegoye na, kọrịnama goyegoye na pịrị tẹẹ.

¹⁸ À nwẹnị ì ḅioḅẹngbọ ḅụ ḅẹẹ, tomina awọmẹ ma gboloma ye kụma, Tamụnọ ịn pekele-ḍikiarị, kẹ ịn ḍie mịnẹ ini iḅi piri-ḅio-ḅẹ anama nẹngị-a.

¹⁹ Kẹ gotẹ ọkọ ḅẹẹarị, tomina awọmẹ ma na, piri-ḅio-ḅẹ anama ma na sọ tọọn wararị gbọrụ ye mẹ mie sime ịn pịrị yee: tomḅọ fịị ḅara, mie nama sọ fịịarị ḅara. Inimgba gbọrụ ḅara. Inimgba gbọrụ ḅara kẹ ọwụ sarasara pakamarị, tẹ tomḅọ nwẹnị ọngụrụ nyana kẹ nama ma nẹngị; kụma arịmgba ḅintẹ ḅara kẹ arị fieye nimi-a aị.

²⁰ Inimgba gbọrụ anga mie in muarị ye; fọọn ḅio ịn ḅom, ịn pịkị siin anị ḍọkụma-mu ḅa.

²¹ Tụḅọ inetẹ ḅẹẹ ḅẹ mịnẹ tomḅọ fị kụma mḅọ tẹmẹ mẹ iwoarị, tẹ nama fị kụma anịḅẹ tẹmẹ mẹ ideri kiri-ḅio muarị?

²² Anieḅụ arị ẹrịm mịnẹ tomḅọ amịna kọrịnama ḅụ tọrụ-ḅẹlẹ mẹ iḅi anị nẹngị ye ofori, kẹ gotẹ ọkọ ḍukoarị ye, aniemẹ mie sime tomḅọ pịrị yee; tụḅọ inetẹ ọ̀ kẹ ḅo tẹ ọ̀ tọrụngbọ kẹ ọ̀ fị sakị ḅụ paka ḅẹ ye ẹrị ḅẹ?