Nimi Tolumaḅọ 11 - FỊAFỊA BAỊBỤLỤ

Ịnyọ Kpọmatẹ Tọrụ Kẹ Tọrọkọ Mẹ daa

¹ Ị́ igbigi kẹ igoniapụ tuḅo ḅụ suu, anịsakị mịna ene ma ḅẹ gbọrụ ene ḅụ ị́ sọye mịẹ ḅa.

² Kịrị-kịrị tọnwa anga ḅụ igbigi kẹ suu wẹrịị — karakara-ḅara-ḅụ tọnwa anga — kẹ gotẹ ọkọ ḅẹẹarị, gbala-gbala í nimi-a mịẹ tomikiri mẹ ḅụ ḅo ị́ la ḅarị si-fụḅara sime-ḅara.

³ Kpiti so mẹ ḅụ eene ḅin, ḅin, anị tomikiri mẹ ḅụ sara ḅa; anịsakị gbọrụ opu sịn nwẹnị ḅịkị suku-jụ, anịanịa ọgọnọ-jụ da, daa, opu sịn mẹ ḅịkị-koro anga mẹ ḅụ, mie anị koro-sime ḅarịye.

⁴ Fiearị fẹrụ ḍiki ḅọ ḍiki ḅọ, mḅọ fịye ḍiḅi ḅịa; anịsakị kpiti-so kẹ ye-sịn ḅọ sịn ḅọ, fịye soku ḅịa.

⁵ Ị́ wẹrịtẹ fẹrụ mẹ ḅọrọarị etela mẹ, anịanịa ẹrẹḅọ furo ḅio tụḅọ tẹmẹ paka-ḅoarị ḅara mẹ nimi-a ḅara, mie ị́ pịkị inetẹ Tamụnọ, Ye-mamgba Tẹmẹ Ḅọ ḅe kọrịnama mẹ fiearị ye nimi ḅịa ḅara.

⁶ Dede-ḅio ị́ sịnmgbọlị mẹ ḍiḅi tẹ ḅoḅiri-so ḅụ ḅara kẹ ị́ ḅụọ ogbo suu ma; kẹ gotẹ ọkọ ḅẹẹarị, arị ḅụ lolo ḅẹ ye í nimi-a, ḅọrọ miemẹ-o, anịanịa aniemẹ-o, anịanịa maa asakị ḅẹ aị mamgba ḅọrọ gbọrụ ḅara kẹ iḅi ḅarị ḅoto.

Ị́ Asambịrịma Sakị Ḅụ Tamụnọ Nimii

⁷ Bele iḅim, anịsakị tọrụngbọ ma ịrụa mẹ ẹrị mẹ pịkị ḅụụ ḅẹlẹmam.

⁸ Kẹ gotẹ ọkọ ḅẹẹarị, tomḅọ nwẹnị tọnwa akụra kẹ ḍumo sime-sime, yee mḅọ arịmgba ḅụ ḍereku; kụma yee mḅọ kẹ ḅiokoroma mịnẹ kanakana ene ma tọnwa ene mịẹ ḅa. Ḅo ye ḅo ye mẹmgba sọ anie ḅintẹ ḅara kẹ anị fieye nimi-a ye.

⁹ Yei asambịrịma tomḅọ, ị́ asa sakị ḅụ ḍerekuu, anịsakị yee ị́ asambịrịma sakị mẹ ḅụ í ḅioḅẹngbọ ị́ ḅụụ kuroma ye sọ; í ḅioḅẹngbọ tọn ị́ pịrị etela, etela na, ị́ atọrụngbọ ẹrị ye, ẹrị ye na ḅụ mẹnjịị. Kụma nimi mịnẹ, mịna aị mamgba gotẹ, Tamụnọ ị́ kẹ ḅẹrẹkọn ḅo ḅa.

¹⁰ Í ḅioḅẹngbọ ḅụ ịganị siin, tẹ í oju ḅụ ye ḅụụ ḅụ akụ saakị siin; kẹ gotẹ ọkọ ḅarị, asambịrịma mẹ na ḍumo ḅụ ḅo omongi sọ mẹ na, arịmgba ḅintẹ ḅara kẹ arị fieye nimi-a aị.