Nimi Tolumaḅọ 10 - FỊAFỊA BAỊBỤLỤ

¹ Fịtẹ ọmọmọ mịẹ tẹ kụnụ-olo fụrụ ḅara, mie kala ḅara kẹ oḅori-sọ nimi na kụn na gulugulumarị ḅara.

² Ye-nimi tomḅọ ḅe, ò ḅioḅẹngbọ ọ̀ daa karakaramatẹ ò kuraye mịẹarị; kụma oḅori tomḅọ ḅe, ò ḅioḅẹngbọ ọ̀ daa irimatẹ ò siye mịẹarị.

³ Oḅori tomḅọ etela ogbo mẹnjịarị sọ, anị ḍie-pakarị mịnẹ ori apantu; tẹ ọ̀ pịkị ḅẹḅọ-ḅẹḅọ ḍiearị mịnẹ ori apantu.

⁴ Ḅẹrẹtọnḅọ ịganị ị́ pịrị-pịrị, í sime-kiri ḅụ saakị so ma; ị́ yaụ-simem ḅẹḅẹ, anị jen gburo-gburotẹ ịganị dogi-ḅo ḅịa.

⁵ Tomikiri mẹ ḅụ àrị ẹrị gbọrụ siye emi. Anị sime-ḅara gbala ḅẹrẹtọnḅọ ḅe ḅara saakị paka-ḅoarị ye ọkụ:

⁶ ini apantu kẹ kụrọ nyana opu akiri ḅụ koroma tẹ ngọ-kọn wararị ḅọ ḅe ideri kiri ḅụ lẹgị wararị.

⁷ Arị omoniapụ ẹrịm, ini asụ ọgọnọ dọkụarị; anịsakị sịḅịdapụ ma nwẹnị ḅụọ kẹ omoniapụ mẹnjị ḅara mẹnjịarị.

⁸ Olulu soku ḅọ soku ḅọ, ḅịkị anị ḅio koro ḅa; anịsakị warị-anga kan tẹ sọ ḅọ, sọ ḅọ oronwi mḅọ gbọn ḅa.

⁹ Ḍụḅarị pẹlẹ ḅọ mie ḍụḅarị ye kẹ lamarị ḅọ; anịsakị sịn ḅiri puu ḅọ mie ḍụḅọ ye kẹ lamarị ḅọ.

¹⁰ Kumbu mẹ kpingbiri tẹ mḅọ anị farị-a ḅẹḅẹ, mḅọ ịwọ ịnyọ fama ḅa; kụma nimi ḅarasụa mḅọ pịrị tẹ, mḅọ mịẹ sọma ḅa.

¹¹ Oronwi ọ̀ gbọn ḅẹ ye gbọn tẹrẹmẹ ò pile ḅẹ ḅọ ò pile-pile, pile ḅọ ḅe gbọrụ sọye sọ mịẹ-a.

¹² Ye-nimiḅọ ḅịḅị ḅẹ ẹkwẹn, ḍiki-ḅụụjịrị ọkị-ḅo ọ̀ pịrịm; kụma apantu ḅe ḅịḅị-ḅọkọ, ò sama-mẹnịm.

¹³ Ọ̀ ḅịḅị ḅẹ ẹkwẹn ma Suku-saakị anie nimi-a; anịsakị ori ẹkwẹn kunoma anie si-sịḅịḅio nọmụ.

¹⁴ Oḅori tomḅọ ḅe ẹkwẹn tẹ pịkị siin ẹkwẹn-ẹkwẹnm; paka ḅẹ ye nimi ḅọ ofori ḅẹsọ; anịsakị tụḅọ inetẹ ori ọḅụ gbin tẹ paka ḅẹ ye ḍuko ọ̀ pịrị ḅẹ

¹⁵ Oḅori tomḅọ ḅe kọrịnama anie lịlị ḅụụ ḅaa tẹ ḅarị etela nimi tẹ so ama mu-a.

Kọrịnama Nyana Iḅi

¹⁶ Sule-ḅịḅị sime ị́ pịrịị, opu sịẹ, ị́ amadaḅọ kala wararị sakị ḅụ; tẹ ị́ amadapụ awọmẹ ma dede kẹ alalị fịarị ḅẹḅẹ.

¹⁷ Ḅioḅẹlẹ sime í pịrịm, opu sịẹ, ị́ amadaḅọ ama mẹ ḅio ḅẹ sịḅị nyana atomi ma ḅẹ tụḅọ; tẹ ị́ amadapụ awọmẹ ma ịnyọ nyana gotẹ karakara sakị ḅụ alalị fịarị; tẹ iru ḅuu tọrụ-ḅaama gotẹ fịya-a ḅẹḅẹ!

¹⁸ Ḅụụ sarasara-a gotẹ warị isun mẹ poom, anịsakị ḅụụ lọkọ ḅụ warị isun mẹ firim.

¹⁹ Alalị sime ḅioḅẹlẹ ḍẹrị-ḅịḅị pịrịm; tẹ iru ḍumo ḅụ ḅioḅẹlẹmam; anịsakị igbigi ye goyegoye ḅịḅị pakịrịm.

²⁰ Í kuroma ḅụ sọ, amadaḅọ ḅe wori ma, anịanịa ị́ kala-ḅio ḅụ ngọ-kọn ḅọ ḅe wori; gbala So-tọrụ ḅẹ feni í ḍuko ye dogi-so ḅa, anịanịa pamba-sụa jaị mu ḅẹrẹ mẹ ḍuko ḅa.