Nimi Tolumaḅọ 1 - FỊAFỊA BAỊBỤLỤ

Ḅintẹ Ḅara Kẹ Anị Fieye Nimi Ye Oforii

¹ Mịna ẹkwẹn-aḅịḅị ma anie Nimi tolumaḅọ ḅe kọn ẹkwẹn ma, Devidi owiḅọtụḅọ, tẹ Jeruselemu ḅụ ama-da sime ḅọ ḅe.

² Ḅintẹ ḅara kẹ anị fieye nimi gberie sọ oforii! Nimi Tolumaḅọ ḅe ọkọ ḅẹẹm, Ḅintẹ ḅara kẹ anị fieye nimi gberie sọ oforii! Inn, ọkọ mie ye-goyegoye sime-ḅara!

³ Í í ḍumo mamgba kẹ tomikiri mẹ ḅụ kọrịnama kọrị, tẹ lịlịarị ye mẹ ḅụ, ị́ tọ sọye kọrị pakama-ḅo tẹ kẹ anị ḍie-pakama ḅẹ?

⁴ Ḅụọ-fa-ḅụọ-pakarị, kụma tomikiri mẹ paa anị sime-ḅara sime gbamasom.

⁵ Otuka mẹ paa puu-puupakarị, pịkị tuu-tuuideriarị tẹ fọnya anị saakị-saakị anga mẹ muarị.

⁶ Fẹrụ mẹ fie-fie iwo-na-ideri-naarị, mị-ḅara mie anị fie ikelema-ikelema-koroarị ḅara, tẹ pịkị pịkịma-ḅoarị ḅara.

⁷ Tọrụ goyegoye ọmọ-ọmọ mu abajị ḅio sararị, kụma abajị mẹ ḅin-a; minji mẹ ọmọ paka-so anga, mie anị pịkị seri sọ muarị anga.

⁸ Ḅụụ-ḅalaḅala ye mamgba ḅụụ ḅin wararị; tomḅọ inetẹ anị ḍuko ḅịa; tọrụngbọ mẹ inetẹ ye ẹrị anị ḅụụ na iḅima ḅịa; ḅeri mẹ inetẹ ye naa ḅin ḅịa.

⁹ Jen sakị paka ḅọrọtẹ ye, mie pịkị siin paka ḅarịye. Jen sakị mịẹ ḅọrọtẹ ye, mie pịkị siin mịẹ ḅarịye. Bebe tomikiri mẹ ḅụ ịwọ ye ofori.

¹⁰ Tọ ye paka ọkụma kịnị ḅẹẹ ḅẹ, “Ḍikii, mie ịwọ ye?” Iḅere-iḅerea kụra-ḅio anị paka ḅọrọ tẹẹ, wa amụ iyi-a sakị ḅụ.

¹¹ Iḅere-iḅerea sakị ḅẹ aị ḅarị ḅiokoroma-a ḅara, mie ḅo ḅarị sakị ḅụ paka ḅarị aị ma sọ, inima tẹ arị paka ḅọrọ tẹ ḅo ḅarị apụ ma ḅarị arị kẹ ḅiokoroma ḅịa ḅara.

Nimi Tolumaḅọ Ḅe Nimi Ḅọrọtẹ Ye

¹² Yẹrị Nimi Tolumaḅọ ḅe Jeruselemu ḅụ sime simem tẹ Izirẹlị dam.

¹³ Àrị ì ḅioḅẹngbọ ḅụ tọn-pẹlẹm mịnẹ à mị tomikiri mẹ ḅụ mịẹarị aị mamgba ḍọkị tẹ arị sọkịrị ḍiki ḅa nimi ḅụ. Tọrụ-ḅẹlẹ ofori kọrịnama mie Tamụnọ kẹ tomina awọmẹ pịrị kọrịarị ye.

¹⁴ Tomikiri mẹ ḅụ mịẹarị ye goyegoye àrị ẹrị tẹẹ; anịmgba ḅintẹ ḅara kẹ anị fieye nimi-a ye, gbala fẹrụ ḍukarịbọ ọkụ.

¹⁵ Ị́ inetẹ kpịkịma-kpịkịmatẹ ye mịẹ sụụn ḅịa, anịsakị ị́ inetẹ ofori ye sọ kịẹn ḅịa.

¹⁶ À nwẹnị ị̀ ḅụụ ḅẹẹ, “À ḅo opu tomḅọ sọ tẹ, tẹ kpọma gburo-gburo nimi nyana ị̀ tọrọkọ tarị Jeruselemu da tẹ so apụ mamgba nẹngịm, anịsakị ì ḅioḅẹngbọ gburo-gburotẹ nimi na kuroma na nyana tẹẹ.”

¹⁷ À nwẹnị ì ḅioḅẹngbọ ḅụ tọn mịnẹ arị oḅori sọ na, ye ḍawọ ḍịn na; nimi na, nọmụ na ḅẹ kịrị ḍawọ nimi ḅa, kụma à ḍọkị-ẹrịm mịnẹ anie paa fẹrụ ḍuka mẹ.

¹⁸ Kẹ gotẹ ọkọ ḅẹẹarị, ḅaka nimi ḅụ, ḅaka ịganị emii; anịsakị ye ḍawọ ḍịn ḅaka ḅọ, ḅaka kururu nyanam.