Nehimaya 9 - FỊAFỊA BAỊBỤLỤ

Tomi Ma Ịna Asi Ḍuko-pakamam

¹ Mịọkụ mị akalụ mẹ ḅẹ si ini aḍin finji karama ene ḅụ Izirẹlịapụ ma nwẹnị ḅuru-ịmọ kẹ kobiri tẹ akpa sụa tẹ ịnwaịn, tẹ fọọn kẹ ịna asịḅị sara.

² Izirẹlịapụ ma nwẹnị igoniapụ mamgba ḅụụ ịna aḅụụ sikima, tẹ sịẹsime tẹ ịna asi na, ịna aḍapụ ma mịẹ-irima aị ma go.

³ Ini ịna sime anga ḅụ sịẹsimem, tẹ KỊNỊNYANAḄỌ ịna Tamụnọ ḅe oloko mẹ ḅẹ ḍiri mẹ gom, ene mẹ kẹ inia akiri ḍiya ḅẹ gbọrụ pakịrị ḅụ, tẹ inia akiri ḍiya mẹ ḅẹ jen gbọrụ pakịrị kẹ si gom, tẹ sunsin KỊNỊNYANAḄỌ ịna Tamụnọ ḅe pịrịm

⁴ Jọsụwa na, Bani na, Kadimiyẹlị na, Sẹbanaya na, Buni na, Sẹrẹbaya na, Bani na, Kenanị na nwẹnị Livayị furo-ḅẹ-apụ ma tanjịye mẹ ọgọnọ sịẹsime tẹ nwẹnị gele pọkọ kẹ owu KỊNỊNYANAḄỌ ịna Tamụnọ ḅe pịrị.

⁵ Anịtẹso Livayị furo-ḅẹ-apụ ma ḅụụ Jọsụwa na, Kadimiyẹlị na, Bani na, Hasabiniya na, Sẹrẹbaya na, Hodiya na, Sẹbanaya na, Pẹtaya na nwẹnị ḅẹẹ, “Ọ́ saakị tẹ KỊNỊNYANAḄỌ ọmịna Tamụnọ ḅe boma, gbamaso ḅụ mu gbamaso la. Boma sime Í ebube ẹrẹ mẹ tẹ gele boma na tokini na mamgba nẹngị ẹrẹ mẹ pịrịị”.

Si Ḍuko-pakama Tẹkẹ Mẹ

⁶ “Ị́yẹrị anie KỊNỊNYANAḄỌ ḅe, ị́yẹrị ngẹrị. Ị́yẹrị So mẹ tẹmẹm, gele tẹịn So mẹ sọ, na arị ḅio simearị aị mamgba na; kiri mẹ na anị ḅio simearị aị mamgba na. Anịsakị ị́yẹrị mịẹ arịmgba ḍikiḍikiarị ye, tẹ So mẹ ḅio simearị aị mamgba sunsin ị́ pịrịarị.

⁷ Ị́yẹrị anie KỊNỊNYANAḄỌ ḅe, Ebiramụ sẹlẹtẹ Kalidizi ḅẹ Họ ḅụ ọ̀ pakama ḅo tẹ Ebira-amụ kẹ ẹrẹ kẹ ọ̀ sịn ḅọọ.

⁸ Ị́ tọrọkọ ị́ ò ḅioḅẹngbọ mẹ minini ḍọkị ẹrịm, tẹ ori na ọḅọkụ fịm ị́ Kenanị na Itayịti na Amọrayịtị na, Pẹrịzayịtị na Jebusayịtị na, Gagasayịtị na ama ma kẹ ori na ọ̀ ḅụụ paka-ḅo apụ na pịrị ḅa; ị́ ị́ karịma ḅara mịẹ tẹ, ị́ karakaram ẹrẹsị.

⁹ Wamịna ḍapụ ma atọrụsiẹrị ma ị́ nwẹn ẹrịm Ijiputi ḅụ, tẹ Awụ Tọrụ mẹ ḅụ ịna owu naam.

¹⁰ Ị́ elekima na ḅụụ-gbiripuma aị na mịẹm, tẹ kẹ Fero na ori afịrịmẹnjịapụ mamgba na, ori ama ḅẹ apụ mamgba ẹngbẹsẹm; ị́ ini ọkụrụkụrụ nyana-a ḅara kẹ wamịna ḍapụ na mịẹ ḅara nimim ẹrẹsị, tẹ anị ḅụ ẹrẹ fịm, anị sime ḅo mịmgba la ḅara.

¹¹ Ịna tọrọkọ ị́ tọrụ mẹ ḍiemam, anieḅụ tọrụ mẹ ogbo ḅụụ in samụnọ kiri ḅụ mẹnjị-tolum. Ị́ nwẹnị in ḍukarị apụ ma kẹ pokolo yọ mẹ ḅio suu, ḍụḅarị kẹ opu minji ḅio suu ḅara.

¹² Í oḅuto kẹ ịn kẹ tọrọkọ-tarịmam eneḅaka ḅụ, tẹ ḍin ḅụ ị́ fịnị kẹ ịna mẹnjị etela belema in pịrịm.

¹³ Sayịnayị tụndụ ọgọnọ í tuuideri-ḅom, tẹ So-ḅio sime tẹ ini na ẹkwẹnm; kura ḅẹrẹtọn na, karakara oloko na, kẹẹ tẹ oloko na, tọn na-iḅi aị na kẹ in pịrịm.

¹⁴ Ị́ mịẹtẹ ini ị́ fịafịa ịnyọsara mẹ nimim, tẹ tọn aị na kẹẹ tẹ oloko na kẹ in pịrịm, ị́ fịrịmẹnjịḅọ Mozizi ḅara-ḅio ḅụ.

¹⁵ Í fie kẹ in pịrịm So-ḅio, ḅuru in tarịm ẹrẹsị, tẹ minji kẹ in pịrịm ịkụ mẹ ḅio, minji in tarịm ẹrẹsị. Ị́ nwẹnị in ḅẹẹ in mu ọkị nyana-a, ị́ kẹ in pịrị ḅẹ karị tẹ ama mẹ.”

¹⁶ “Kụma ini na wamịna ḍapụ ma na, ḅụụ-gelema ḅara kẹ ye mịẹm tẹ kọngọ kụrọmam, tẹ í oloko ma koko-a.

¹⁷ In koko ḍụkụ-a, tẹ ịna ogboku ị́ mịẹ ḅụụ-gbiripuma aị ma bala-a, kụma in kọngọ kụrọmam, tẹ tọrọkọ tarị in pịkịma Ijiputi ḅụ pịkị omoni-sọ ḅẹ ḅọ tọnm. Kụma ị́yẹrị anie tẹlẹma si-wẹrịso pịrị-pịrị ḅọ pịkị ḍiki-ḅụụjịrị na ọkụrụkụrụ na nyana wararị ḅọ; ị́yẹrị kpekele ịganị-ịganị-a ḅọ, tẹ jike-a ḅẹlẹma nyana ḅọ ẹrẹsị ị́ in sịkị-a.

¹⁸ In kala nambulo tẹmẹ ịna ḅụụ pịrịm, tẹ ḅẹẹm, ‘Mie ọmịna tamụnọ tẹ ọ́ pakama ḅo ḅọ Ijiputi ḅụ ḅẹẹ sakị’, tẹ opu ḅara kẹ ḅịḅị kẹ Tamụnọ lama sakị sọ.

¹⁹ Ị́yẹrị í opu ọkụrụkụrụ ḅụ in sịkị-a ịkpa mẹ ḅio ḅụ; etela mẹ ḅụ ịn kẹ tọrọkọ tarị oḅuto mẹ ịna ḅụụ so-a eneḅaka ḅụ, in mẹnjị na-iḅi etela mẹ belema in pịrị fịnị mẹ ịna ḅụụ so-a ḍin ḅụ.

²⁰ Ị́yẹrị í iḅi Tẹmẹ kẹ fịrịmam, tẹ ye kẹ in tolumam; tẹ mana dasịẹma-a ịna aḅịḅị ḅụ, tẹ minji kẹ in pịrịm, minji in tarị sakị ḅụ.

²¹ Ị́ kụra amesi kẹ in ḍikiḍikim ịkpa mẹ ḅio, tẹ in gberie-sọ ḍọkị-a; ịna akapa kan-a, ịna ḅụọ sọ foin-a.

²² Ị́ ama-da na tomi na kẹ in pịrịm, tẹ ịkọlị goyegoye kẹ in pịrịm. Anị ḅara ḅụ in Siyọnị Ẹsịbọnị ḅẹ Amadaḅọ ḅe ama ọkị nyanam; in pịkị Ọgụ Bẹsani ḅẹ Amadaḅọ ḅe ama ọkị nyanam.

²³ So-tọrụ ḅẹ lolia ḅin ḅara kẹ ị́ mịẹtẹ ịna ḅụụ paka-ḅo apụ kamam; tẹ ị́ ịn kẹ ḅo ḍuko ịna ḍapụ pịrịm, in so tẹ nyana ḅẹ ama mẹ ḅio koromam.

²⁴ Anieḅụ ịna ḅụụ paka-ḅo apụ ma ama mẹ sọ tẹ nyanam; tẹ ịna tọrọkọ ị́ ama nyana Kenanị apụ ma sịḅị-tuu in pịrịm; Ị́ ịna Amadaḅọ na ini na kẹ ịna ḅara-ḅio sunm; ini ịna ḅụụ ḅẹlẹ ḅara kẹ in mịẹ ḅẹ ḅara.

²⁵ Ini in mịẹ kụrọma tẹ opu ama na iḅi kiri na ọkịm tẹ iḅi aị mamgba ḅin wararị awarị na, sokutẹ asuḅe na, kụrọ aḍụọ na, olivu aḍụọ na ḅin wararị mgbọlụ sụa asịn na ọkị nyanam. Anieḅụ in fị tẹ ịna afuro ḅinm, tẹ in ḍụḅam, tẹ í gburo-gburotẹ iḅi mẹ ḅụ tọrụ-ḅẹlẹm.”

²⁶ “Anịsọ in ḅịḅị poki-a, tẹ sịḅị kụrọma ị́ pịrịm, tẹ ị́ oloko kẹ ịna ọḅụ gbin koromam. Ini ịkịankoroapụ ma tẹ ịn pịkị-ḅo ị́ pịrị ḅẹ apụ ma ḅaam tẹ gburo-gburoma ḅịḅị kẹ ị́ lamam.

²⁷ Anị ẹrẹsị ị́ ịn kẹ inina fịya-a apụ ḅara-ḅio sunm, inima tẹ ịn kẹ tọrụsiẹrịma apụ ma. Ịna tọrụsiẹrị sakị ḅụ ini owu ị́ pịrịm, tẹ ị́ So-ḅio ḅụ in naam. Í opu ọkụrụkụrụ sime-ḅara ḅụ, Ị́ ḅọrọma-apụ kẹ in fịrịmam, inima tẹ in ḅọrọma-apụ ma inina fịya-a apụ ḅara ḅụ.

²⁸ Kụma ini ịnyọsara tẹso, in pịkị si mịẹm ị́ tọrọkọ ḅụ, ị́ nwẹnị in sịkị inina fịya-a apụ ḅara-ḅio suu tẹ in nwẹnị anieḅụ ḅẹrẹtọn in pịrịm. Anịsọ in pịkịma-ḅo owu ị́ pịrị tẹso, So-ḅio ḅụ ị́ in naam. Tọnwa sakị ị́ nwẹn kẹ ịn ḅọrọma tẹ, ị́ ọkụrụkụrụ sime-ḅara gotẹ.

²⁹ Kẹ in pịkị í oloko mẹ ḅo gotẹ, ị́ ịna ḅeri nụnụm. Anịsọ in ḅụụ-gelema ḅara kẹ ye mịẹtẹ ị́ tọn aị ma koko-a; kụma ị́yẹrị kụrọ-ḅara ḅụ simearị ḅọ ḅe tọn aị ma ḅụ si mịẹm, tẹ tomḅọ mịẹm ḅẹḅẹ mḅọ ḍumo ḅa. In nwẹnị apana saakị tẹ kọngọ kụrọma ḅarị ḅịḅị poki ḍụkụ-a.

³⁰ Ị́ tọnwa kụra kẹ inoma fị in pịrịm, tẹ ị́ ịkịankoroapụ ḅụụ ḅụ ị́ Tẹmẹ kẹ fịrịmatẹ ịna ḅeri nụnụm. Anịsọ in poki-a. Anịẹrẹsị ị́ ịn kẹ ama ma ḅio ḅẹ atomi ma ḅara-ḅio sunm.

³¹ Anịsọ í gburo-gburotẹ ọkụrụkụrụ ḅụ, ị́ ịn ḅa fama-a anịanịa ịn sịkị-a. Gbala ị́yẹrị anie ḍiki-ḅụụjịrị na ọkụrụkụrụ na Tamụnọ ẹrẹsị.”

³² “Anịẹrẹsị mịọkụ yei wamịna Tamụnọ, gburo-gburotẹ kụrọ-nyanatẹ tẹmẹ-naịn-naịnmarị Tamụnọ! Tẹ ọḅọkụ na jike-a ḅẹlẹma na kokoarị ḅọ, yee Asiriya ḅẹ amadapụ ma sakị kụra-ḅio ḅo mịmgba la ḅụ wamịna amadapụ na, wamịna amadapụ awọmẹ na, wamịna agbamịẹapụ na, wamịna ịkịankoroapụ na, wamịna ḍapụ na, í atomi mamgba na ọgọnọ gbana ḅụụ-fụka mamgba ị́ ḅụụ kalịye sọma.

³³ Anịsọ ị́ karakaram, wamịna ọgọnọ gbana ye mamgba ḅụ; kẹ gotẹ ọkọ ḅẹẹarị, ị́ ị́ minini ye kokom, wamịnị masi si-sịḅịḅio-sụam.

³⁴ Í oloko koko ḅọ, anịanịa ị́ tọn aị kẹ ye-sịn ḅọ ofori; ḅeri nụnụ tẹ ị́ kẹ ịna ḅeri nụnụ aị kẹ ye-sịn ḅọ sọ ofori, wamịna amadapụ-o, wamịna amadapụ awọmẹ-o, wamịna agbamịẹapụ-o, wamịna ḍapụ-o.

³⁵ Ịna amakiri mẹ ḅio in fịrịmẹnjị ị́ pịrị-a; í gburo-gburotẹ iḅi ḅio ị́ kẹ in pịrị ye na, ị́ kẹ ịna tọrọkọ koroma in pịrị ḍụḅatẹ iḅi mẹ na sọ, ini ịna si-sịḅịḅio akọrịnama ḅụ pịkị-a.

³⁶ Ị́ kẹ wamịna ḍapụ pịrị ama mẹ ḅụ ḍikii, mịmgba wamịnị omoniapụ!; wa anị ḅẹ sịnmgbọlụ na iḅi ḍiepịrị-aị na kẹ tọrụ-ḅẹlẹ ḅarị ama mẹ ḅụ ḍikii, wamịnị omoniapụ!.

³⁷ Anị ḅụ paka-ḅo tọnwa aị ma, wamịna si gotẹ arị so ị́ kẹ wamịna amadapụ mịẹ apụ ma ḍọkụma-muarị; wamịna-aḅụụ na wamịna anama na ḅụ sọ, ini ịna ḅụụ-ḅẹlẹ ḅara kẹ kụrọ-a kọn-arị, tẹ wamịnị opu ḅụụ-ḅalaḅala ḅụ emi.”

Tomi Ma Ḅịḅị-kẹ-ogbosọ Ḅụ Ḅara Ponom.

³⁸ Mie-mẹmgba gotẹ wa kụrọtẹ ọḅọkụ fịm, tẹ anị kẹẹm; tẹ wamịna amadapụ awọmẹ na, wamịna Livayị furo-ḅẹ-apụ na, wamịna agbamịẹapụ na nwẹnị ịna aḅara pono anị pịrị.