Nehimaya 6 - FỊAFỊA BAỊBỤLỤ

Ịn Ḅiya Nehimaya Pịrị Ḅẹrẹ

¹ Mịọkụ ini anị kẹ ịba-fị Sanịbalatị na, Tabaya na, Gisẹmụ, Arabụ ḅọ ḅe na, wamịnị na fịya-a kirikọn-apụ ma pịrị tẹ mịnẹ arị onu mẹ nama tẹ, tẹ anị ḅụ kọn anga ḅarị ofori tẹso, (ọkị-ḅo anị sakị mẹ la amụ àrị ogigo-aḅọkọ ma ḅụ ḅọkọ sụa-a ḅẹsọ)

² Sanịbalatị na, Gisẹmụ na nwẹnị ḅịḅị kẹ ị̀ fịrịma, tẹ ḅẹẹm, “Ḅoo wa kobiri gboloma Ono ele mẹ ḅio ḅẹ kala-ama mẹ ḅẹ gberie ḅụ.” Kụma ye kẹ ị̀ mịẹ mie ịn kẹ ḅiotọn ye.

³ À nwẹnị fịrịmẹnjịapụ kẹ ịn fịrịma tẹ ḅẹẹ, “À gburo-gburotẹ kọrịnama kọrịarị tẹ inetẹ ideri-ḅo ḅịa. À tiegotẹ kọrịnama mẹ dasịẹma tẹ anị koroma so tẹ ọ́ ḍọkụma-ḅo na-iḅi àrị ideri-ḅo ḅẹ sakị?”

⁴ Ini asakị kẹ ịn mị-ḅara kẹ ḅịḅị kẹ ị̀ fịrịmam, tẹ à gbọrụ ḅara mẹ kẹ ịn pakịrịm.

⁵ Mị gbọrụ ḅara ḅụ Sanịbalatị sọnọ asakị karama sakị ḅụ finjitẹ ḍiri kẹẹ tẹ kẹ ọ̀ fịrịmẹnjịḅọ ḅara ḅụ ị̀ fịrịmam.

⁶ Anị ḅio kẹẹ wararị ye, “Opu asịẹ ma ogbo-ḅio ḅụ ịn ḍuko-sụa wararị, Gisẹmụ sọ anị ḍukom, mịnẹ ị́yẹrị na Juu-ḅẹ-apụ ma na, sịḅị-kụrọma ḅẹ ḅara kẹ ḅiotọn tẹẹ, anie mie ó gotẹ onu mẹ namarị; anịsakị ị́yẹrị ḅo ịna amadaḅọ sọ ḅẹ-ḅiiarị mị ḍuko-sụa mẹ wẹrịtẹ sime-ḅara.

⁷ Tẹ ị́ pịkị Jeruselemu ḅụ í gbolomaye ḍuko wasa ḅarị ịkịankoroapụ tọn pakama tẹẹ, ịn ḅẹẹ, ‘Juda ḅụ gbọrụ amadaḅọ emi.’ Ma ẹkwẹn-aḅịḅị ma wẹrịtẹ koro ḅara mie ịn mịọkụ kẹ ịba-fị amadaḅọ ḅe pịrị ḅarịye. Anị ḅara ḅụ mịọkụ ḅo tẹ yee wa ḅịḅị ọkị-a gboloma.”

⁸ Anịtẹso à nwẹnị ḅịḅị kẹ ọ̀ fịrịma tẹ ḅẹẹ, “Ẹn-ẹn, ì ḍuko aị ma pembe aị mịẹ tẹ, ị́yẹrị í ḅioḅẹngbọ ḅụ í soku na ọkọ tẹ ḍukoarị.”

⁹ Kẹ gotẹ ọkọ ḅẹẹarị, inimgba wamịna ḅala fama ḅẹ ḅiim, kuromarị, “Ịn ḅara sin ḅa kọrịnama mẹ ḅụ, tẹ anị ḅarị kọrị ḅịa.” Kụma Yei Tamụnọ, ịnyọ kẹ ị̀ aḅara ma ḅụ sụa, mịọkụ.

¹⁰ Sakị kẹlẹ ḅọrọ tẹso, à Sẹmaya, Delaya owiḅọtụḅọ, pịkị Mẹhẹtabẹlị taa-owiḅọtụḅọ ḅe tẹ warị ḅio amịna ḅụụ ịkasị wararị ḅọ ḅe dama-mum. Ọ̀ nwẹnị ḅẹẹ, “Yee wa mu Tamụnọ warị mẹ ḅio bịama, tẹ Tamụnọ-warị mẹ ḅio ḅụ ḅọkọ ma gbaịn; kẹ gotẹ ọkọ ḅẹẹarị, ịn ḅo ị́ ḅaa ḅẹ ḅoarị, ḍin ḅụ ịn ḅo ị́ ḅaa ḅẹ ḅoarị.”

¹¹ Kụma à ḅẹẹm, “À sime-ḅara sime ḅọ ḍumo mangị kọn na-iḅi? Tẹ tọ-ḅara sime tomḅọ, à sime-ḅara sime ḅo inetẹ Tamụnọ warị mẹ ḅio sọ-mu tẹ anga ḅẹ? À sọ-mu ḅịa.”

¹² À nwẹnị kuroma nimi tẹ ẹrị mịnẹ Tamụnọ amụ ọ̀ fịrịma-a, kụma ori ọkọ tẹ ịkịan mẹ koro ị̀ pịrịarị gbala Tobaya na, Sanịbalatị na ọḅụ kẹ ọ̀ pịrị fịm ẹrẹsị.

¹³ Miemẹ mie ịn gotẹ ọḅụ mẹ kẹ ọ̀ pịrị fị ye, mịẹtẹ à ḅalafa tẹ mị-ḅara mẹ mịẹ tẹ si mịẹ, tẹ ini anie ḅụ si ẹrẹ kẹ ị̀ pịrị tẹ ị̀ kẹ kpọọti ḅẹ ḅara.

¹⁴ Yei ị̀ Tamụnọ, Tobaya na, Sanịbalatị na kẹ ḅiokoroma ịn wẹrịtẹ ma aị ma tẹ ịn mịẹ aị ma mịẹ ḅara, na pịkị Nohadiya ịkịankoro-ẹrẹḅọ ma tẹ mịẹtẹ à ḅalafaa ḅẹ ḅii ḅọ ma na.

Kọrịnama Mẹ Kọrị Kunoma Ḅara Mẹ

¹⁵ Anieḅụ kọrịnama mẹ kọrị famam ịn kẹ Elulu sịn akalụ mẹ ḅẹ si sọnọ aḍin finji karama ene mẹ ḅụ, anie anị ḅẹ ḍin amesi oyi finji na maa aḍin na ḅụ.

¹⁶ Wamịnị na fịya-a apụ mamgba anị naa tẹso, wamịnị ikelema-koro wararị opu asịẹ mamgba nwẹnị ḅalafa tẹ ịn soku-ḅẹ gele kuroma ḅụ ḅịkị, gbala ịn kụrọma nimim mịnẹ wamịna Tamụnọ ḅarasụa ḅụ mie mị kọrịnama mẹ kẹ kọrị fama ye.

¹⁷ Jen-a jen-a arị ene ma tẹ Juda ḅẹ opu atomi ma tọnwa aḍiri kẹẹ Tobaya fịrịmam, tẹ Tobaya kẹẹ aḍiri ḅo ịn lam.

¹⁸ Kẹ gotẹ ọkọ ḅẹẹarị, ori anie Sekanaya, Ara owiḅọtụḅọ ḅe fụanḅọ tẹ ori owiḅọtụḅọ Jehohananị pịkị Mesulamu, Bẹrẹkaya owiḅọtụḅọ ḅe ẹrẹḅọtụḅọ na sime tẹ gbala Juda ḅẹ tọnwa apụ Tamụnọ ḅarasụa ḅụ ịn karị ye ḅụ ori na gboloma wararị ẹrẹsị.

¹⁹ Ị̀ tọrọkọ ịn pịkị ori iḅi amịẹaị gbolomaye ḍukom, tẹ à kọn ẹkwẹn ḍuko ọ̀ pịrịm. Tẹ Tobaya nwẹnị ị̀ mịẹtẹ à ḅalafaa ḅẹ aḍiri kẹẹ ị̀ fịrịma.