Nehimaya 5 - FỊAFỊA BAỊBỤLỤ

Igoinḅọ Ḅe Ponoma

¹ Ịna mịnapụ Juu-ḅẹ-apụ ma ẹngbẹsẹ ḅara ḅụ tomi ma na, ịna sime-ereme na ḅụụ gburo-gburotẹ owu pọkọ nwẹnị saakị paka-ḅo.

² Anị kẹ gotẹ ọkọ mịẹ ye ịna ḅụụ ḅụ ja apụ ḅẹẹm, “Wamịna owiapụ-awọmẹ na, eremịna-awọmẹ na kẹ wamịna aḅụụ sụa wa gburo-gburo wararị; ó yee wa fị tẹ ḍumo sime ḅarị fịye ḍọkị.”

³ Ịna ḅụụ ḅụ ja apụ pịkị ḅẹẹm, “Wa ịnụ mẹ ḅio fịye nyana gotẹ wamịna apiri na, wamịna kụrọ aḍụọ na, wamịna awarị na pakịrịarị.”

⁴ Ja apụ pịkị emi tẹ ḅẹẹm, “Wa wamịna apiri na, wamịna kụrọ aḍụọ sịḅị ḅụ, amadaḅọ ḅe ama oso igbigi ḅụ igbigi ḅọlọm.

⁵ Wamịna oju-meni mẹ wamịna mịnapụ ma oju-meni sime-ḅara simem, wamịna awọmẹ ma ịna awọmẹ sime-ḅara simem, anịsọ wa kụrọ-ḅara kẹ wamịna owiapụ awọmẹ ma na, eremịna-awọmẹ ma na kẹ omoni sọmarị, tẹ wamịna eremịna-awọmẹ ma ḅẹ ja apụ gbọrsịḅị omoniapụ sọ tẹ; kụma kụrọ wamịna ḅụụ ḅụ ofori kẹ ḅarasụa anị pịrị, kẹ gotẹ ọkọ ḅẹẹarị, wamịna piri, wamịna kụrọ aḍụọ na, ja apụ ḅara-ḅio emi.”

⁶ Arị ịna owu-pọkọ mẹ na mịna ẹkwẹn-aḅịḅị ma na naa tẹso, anị nwẹnị ị̀ ḅụụ-ḅẹsọ lama.

⁷ À nwẹnị ì ḅio ḅụ tọn-pẹlẹ, tẹ ye kẹ ama ḅẹ opu-apụ ma na, fịrịmẹnjị-opuapụ ma na ọlọ. Àrị ịn ḅẹẹm, “Ḅụọ-ḅụọ mḅọ iyimbere ḅara ḅụ igbigi sịḅị ḅụ gbana igbigi ọkịarị.” À nwẹnị gburo-gburotẹ kobiri-ogbo na kobiri nyana ịn pịrị,

⁸ tẹ ịn ḅẹẹ, “Wa wamịnị ịnyọ la ḅara ḅụ wamịna amịnapụ Juu-ḅẹ-apụ ma tẹ ịn kẹ opu asịẹ ma dẹrị tẹ apụ ma fẹẹ ḅo tẹ, kụma ọmịnị sọ ọmịna amịnapụ ma dẹrịarị mịẹtẹ ini ịn kẹ ḅo wa dẹrị ḅẹ ḅara.” Ịn nwẹnị ịn kọn ḅẹ ẹkwẹn gbọrụ ḅịḅị nimi-a ḅara kẹ gbọsime.

⁹ Anieḅụ à nwẹnị ḅẹẹ, “Ọ́ mịẹarị ye mẹ iḅi-a. Ọ́ Wamịna Tamụnọ ḅe mangịma ḅara kẹ mẹnjị tẹ wamịnị na fịya-a opu asịẹ ma wa kẹ kpọọtiarị ye mẹ dasịẹma na-iḅi-a?

¹⁰ Anie sikima, yẹrị na, ị̀ amịnapụ na, ị̀ afịrịmẹnjịapụ na, igbigi na, mbịaka na, kẹ ịn ḅọlọarị. Ó yee wa mie igbigi sịḅị ḅụ gbana igbigi mẹ wẹrịso.

¹¹ Mị gbọrụ ene mẹ ḅụ ọmịnị ịna piri ma na, ịna kụrọ aḍụọ ma na, ịna olivu aḍụọ ma na, ịna awarị ma na, igbigi kẹ kiri sọnọa si ḍie ḅẹ gbọrụ kiri mẹ na, mgbọlị mẹ na, iru mẹ na, pulo mẹ na tẹ ọmịnị ịna aḅara ọkịarị aị ma pịkịma ịn pịrị.”

¹² Anịtẹso ịn nwẹnị pakịrị, “Wa mịna aị ma kẹ ịn pịrịtẹ ḅarị ịna ḅara gberie-sọ ḅii ḅịa. Wa ị́ ḅẹẹ ḅara mịẹ ḅa.” À nwẹnị agbamịẹapụ ma sịn tẹ ịn nwẹnị karị mịnẹ ini ịn minini ḅara mịẹ ḅa.

¹³ À nwẹnị pịkị ị̀ kapa suku kporima tẹ gugu tẹ ḅẹẹ, “Yee Tamụnọ mị-ḅara kẹ ḅẹḅọ-ḅẹḅọ tẹ mị minini ye mẹ mịẹ-a ḅọ jike pakama mḅọ warị ḅio na, mḅọ kọrịnama na ḅụ. Yee mḅọ mị-ḅara kẹ gugu tẹ ye ḅio ofori ḅara sime.” Tẹ kobiri-ogbo mẹmgba nwẹnị ḅẹẹ, “Amẹnị” tẹ KỊNỊNYANAḄỌ ḅe tokini. Tẹ tomi ma nwẹnị minini ḅara mịẹ.

Nehimaya Ị̀ Ḅụụ Ngẹrị Ḅụụ Nyana-a

¹⁴ Jen-a jen-a Juda ama mẹ ḅio ịna ḅẹrẹtọnḅọ sọ kẹ ini ị̀ tọn sakị, amadaḅọ Atakịzazẹsị ama-da tẹ si kụra karama kụra ḅụ mu kụra asuei maa kụra finji karama kụra la, oyi maa kụra finji, yẹrị, anịanịa ị̀ amịnapụ amụ ịn kẹ ḅẹrẹtọnḅọ ḅe pịrị-pịrị fịye igbigi mẹ fị-a.

¹⁵ Ḅọrọtẹ ḅẹrẹtọn-apụ ma tẹ ị̀ tọrọkọ sime apụ ma iku dogiye kẹ tomi ma ọgọnọ gbanam, tẹ ịna aḅara seleḅa pakịrị amesi mẹ sikima fịye na, iru na ọkịm. Ịna afịrịmẹnjịapụ kịngẹ sọ anị tọn kẹ tomi ma ọgọnọ gbanam. Kụma arị ọkọ mịẹ-a, Tamụnọ mangịma ẹrẹsị.

¹⁶ Mị onu mẹ kọrịnama mẹ à pịkị nwẹn ọlọ wararị, tẹ gbọrụ kiri sọ nyana-a; tẹ ị̀ afịrịmẹnjịapụ mamgba kọrịnama mẹ gotẹ anịjụ kobirima wararị.

¹⁷ Jen-a jen-a ị̀ fịye suku ḅụ wamịnị na kpeki opu asịẹ ma ḅụ sime tẹ ḅo apụ sikima, Juu-ḅẹ-apụ na, fịrịmẹnjị-opuapụ na tẹ sime apụ kịnị sọnọma asi oyi finji.

¹⁸ Gbọrụ ene ḅụ, ịn kẹ fịye sọarị ye gbọrụ pootẹ-nambulo na, sẹlẹmatẹ sonio anama na; ọḅọkọ pịkị ọkọ kẹ emi tẹ ịn tẹlẹma ị̀ pịrịarị; oyi aḍin goyegoye ḅụ iru kụma ḍuko-ḍuko ọkụ ofori; mie mẹmgba ḅụ anịsọ kẹ ḅẹrẹtọnḅọ pịrị-pịrị fịye igbigi mẹ àrị anị ḅii-a, kẹ gotẹ ọkọ ḅẹẹarị kụrọ-ḅara kẹ tọn tẹ mịna apụ ma kọrịarị ye mẹ ịna ọgọnọ ḅụ iku wararị.

¹⁹ Yei ị̀ Tamụnọ, à mịẹ mịna apụ ma pịrị tẹ ye mẹmgba kẹ ị̀ iḅi gotẹ ḅiokoroma.