Nehimaya 4 - FỊAFỊA BAỊBỤLỤ

Nehimaya Ḅụọ Ẹngbẹsẹ Ọ̀ Kọrịnama Pịrị Apụ Nẹngịmam

¹ Sanịbalatị naam mịnẹ wa onu mẹ tẹlẹmarị nwẹn ḅẹẹ ye ḅụ, anị nwẹnị ọ̀ ḅụụ-ḅẹsọ tẹ ịganị nwẹnị gburo-gburoma ọ̀ ḅụụ ḅin, tẹ ò Juu-ḅẹ-apụ ma kẹ kpọọtii.

² Ọ̀ nwẹnị ori amịnapụ na, Sameriya ḅẹ ọmụ-ogbo mẹ na tọrọkọ ḅụ ḅẹẹ, “Mịna ịnyọ nyana-a Juu-ḅẹ-apụ ma ịn tiye mịẹarị? Ini arị aị ma kẹ arị sime-ḅara wẹrị ḅẹ? Ini agba mịẹ ḅẹ? Gbọrụ ene ḅụ ini arị kọrị fama ḅẹ? Ịn sara ma ḅio sin ḍụḅarị ma soku pakama-ḅo, tẹ dọkịtẹ aị ma kẹ arị sime-ḅara wẹrị ḅẹ?”

³ Tobaya, Amọnị ḅẹ ḅọ ḅe ori akaka emi, tẹ ọ̀ nwẹnị ḅẹẹ, “Inn, ịn namarị ye mẹ, pụnụ ịna ḍụḅarị onu mẹ ọgọnọ mẹnjị sọ ori anị kan sara ḅa!”

⁴ Naa, yei wamịna Tamụnọ, gbala in wa ḍiki-sima wararị ẹrẹsị; ịn tọn tẹ kẹ wa lama ḅẹ aị ma kẹ ọḅụ pịkị ịna asịḅị sara-a; tẹ ịn kẹ in kun-so faa ḅarị ama ḅara-ḅio suu.

⁵ Mịẹ gbẹẹ-a aị tẹ ịn mịẹ aị ma gbaịn ma, anịsakị yee ịna si í ḍiki-tọrụ ḅụ ḅọị ma, kẹ gotẹ ọkọ ḅẹẹarị, onu mẹ namarị apụ ma tọrọkọ ini ị́ ịganị sịn saakị tẹ.

⁶ Anieḅụ wa onu mẹ namam, gbala tomi ma kọrịnama mẹ kọrị ḅẹ ḅioḅẹngbọ nyanam tẹ onu mẹmgba nama gboloma ḅo anị ḅẹ gele mẹ ḅẹ maa anga ḍie na gbasị tẹ.

⁷ Kụma Sanịbalatị na, tobaya na, Arabụ apụ na, Amọnị ḅẹ apụ na, Asịdọdị ḅẹ apụ na, naam mịnẹ Jeruselemu onu ma ḅẹ nama mẹ tọrọkọ-tọrọkọ muarị, tẹ ḅiri-ḅiri ḅụ kan anga ma saakị gbaịn famarị nwẹn ḅẹẹ ye mẹ nwẹnị ịn ḅụụ-ḅẹsọ lama.

⁸ Inimgba nwẹnị ḅo owu kẹ Jeruselemu paka tẹ anị ḅio ḅịḅị-kẹ-ogbosọ-a pakama ḅẹ ḅara kẹ gboloma tẹ ḅẹrẹ-ḅiya,

⁹ tẹ wa nwẹnị wamịna Tamụnọ tẹkẹ, tẹ ye-yọ ḍikiḍiki pakama ḍin na, eneḅaka na ḅụ, kẹ ịna ḅụụ ḅụ wamịna ḅụụ ẹbị.

¹⁰ Kụma Juda mẹẹ, “Ikuye dogiapụ ma, ịnyọ pọkọ tarị, Fun paa ḅin wararị, wa ḅarị inetẹ onu mẹ kọrị-a.”

¹¹ Wamịnị na fịya-a apụ ma mẹẹ, “Ịn nimi ḅịa, anịanịa ẹrị, nwenii wa ḅo ịna ogbo la tẹ ịn ḅaa, tẹ kọrịnama mẹ dasịẹma ḅa.”

¹² Juu-ḅẹ-apụ ma tẹ inina kpekitẹ anga apụ ma ḅo sakị ini oyi asakị kẹ wa ḅẹẹm, “Ini angarị anga mamgba ḅụ ịn ḅo wa da-paka ḅa.”

¹³ Anieḅụ onu mẹ ọḅụjụ simearị finji wararị anga ma ḅụ à furo-furo ma wẹrịtẹ sime-ḅara ḅụ tomi na ịna okologie na, ḅẹkẹrẹ na, iboli na kẹ koroma wararị.

¹⁴ À nwẹnị ḍiki, tẹ saakị tẹ ama ḅẹ opu apụ ma na, opu fịrịmẹnjịapụ ma na, tomi ma ḅụụ kirikọn-apụ ma na ḅẹẹ, “Ọmịnị ịn ḍiki-ḅalafa ma. Ọ́ KỊNỊNYANAḄỌ ḅe tẹ gburo-gburotẹ, tẹmẹ-naịn-naịnmarị ḅọ ḅe tẹ owu-sọ ọmịna mịnapụ na, ọmịna owiapụ-awọmẹ na, ọmịna eremịna-awọmẹ na, ọmịna sime-ereme na, ọmịna ama ma na pịrị ḅọ ḅe kẹ ḅiokoromaa.”

¹⁵ Wamịnị na fịya-a apụ ma naam mịnẹ wa nimi tẹ mịnẹ. Tamụnọ ịn mịẹ ḅẹ tọn aị ma ḅụ ịn dasịẹma tẹ ḅẹ sakị wamịnị-mgba ọrụḅọ-ọrụḅọ nwẹnị pịkịma onu mẹ ḅụ mḅọ kọrịnama kọrị ḅẹ mu.

¹⁶ Anị ene mẹ ḅụ ọkị tọrọkọ mu, ị̀ afịrịmẹnjịapụ kẹ maa anga ḍiya ḅẹ gbọrụ pakịrị mu kọrịnama kọrịm, tẹ pakịrị sụḅa na, ekpeke na, iboli na ọlọtẹ ọmụgbin ikulele akapa sụam; tẹ tọrọkọ-tarịapụ ma nwẹnị Juda warị mẹmgba,

¹⁷ tẹ onu mẹ namarị apụ ma ọḅụjụ sịẹ. Inima tẹ iku aị dogiapụ kẹ anị kọrị ḅara, ḅụọ-ḅụọ gbọrụ ḅara kẹ kọrịnama kọrị tẹ osi ḅara kẹ ọmụgbinye ọlọm,

¹⁸ anịsakị namarị apụ ma ḅụọ-ḅụọ amịna okologie kẹ mḅọ akaka ḅụ amịna ḅụụ ẹbịma tẹ kọrịarị. Ọdụ ofuro ḅọ ḅe nwẹnị ị̀ akaka ḅụ emi.

¹⁹ À nwẹnị ama ḅẹ opu apụ ma na, fịrịmẹnjị-opuapụ ma na, tomi ma ḅẹ kirikọn-apụ ma na ḅẹẹ, “Kọrịnama mẹ gburo-gburo wararị, tẹ ḅele-ḅeletẹ finjima wararị anịsakị onu mẹ ọgọnọ ḅụ wa pịkị jụmọ-jụmọ ḅụụ ḅele-ḅeletẹ emi.

²⁰ Ó simearị anga ḅụ ọdụ mẹ fietẹ ọ́ naa naa, ọ́ mangị anịjụ wa ḍọkụma-ḅoo. Wamịna Tamụnọ owu mẹ sọ wa pịrị ḅa.”

²¹ Anị ḅara mie wa kẹ kọrịnama mẹ ḅụ kọrị ḅara, tẹ ịn kẹ maa anga ḍiya ḅẹ gbọrụ pakịrị ene-ḅaa finji ḅụ ḅẹkẹrẹ ọlọ nwenii lolia pakam.

²² Anị sakị ḅụ à pịkị tomi ma ḅẹẹm. “Yee ḅẹ tomḅọ-tomḅọ mḅọ fịrịmẹnjịḅọ na ḍin mẹ kẹ Jeruselemu ḅụ sime mịẹtẹ ịn ḍin-koruapụ sọ wa pịrị ḅẹ ḅara ḍin ḅụ ḅụ, tẹ eneḅaka kẹ kọrịnama kọrị ḅẹ ḅara.”

²³ Anieḅụ yẹrị-o, ị̀ amịnapụ ma-o, ị̀ afịrịmẹnjịapụ ma-o, ye-yọ ḍikiḍikiapụ ma tẹ ị̀ ḍuka-ḅo apụ ma-o, gbọrụḅọ-sọ mḅọ oju ḅẹ akapa sịn-a; ḅụọ-ḅụọ mḅọ ọmụgbinye ọlọ sịẹmam.