Nehimaya 3 - FỊAFỊA BAỊBỤLỤ

Sin Jeruselemu Onu Mẹ Nama mẹ

¹ Anịtẹso Ẹlịyasibu Sịḅịda-Agbamịẹḅọ ḅe nwẹnị ori amịnapụ agbamịẹapụ ma na saakị tẹ Anana Ogigo-ḅọkọ mẹ nama. Ịn nwẹnị anị finji tẹ kẹ mịẹye ḅụ su tẹ anị ḅẹ aḅọkọ ma sụa. Ini onu mẹ nama tẹ anị finji mu “Sọnọa si Ḅẹ Gele-Warị” na “Hananẹlị Ḅẹ Gele-Warị” jụjụ-ḅio na lam.

² Ọ̀ palị tẹ nama apụ Jeriko ḅẹ apụ, Zakọ, Imuri owiḅọtụḅọ ḅe ịn palị tẹ namam.

³ Hazẹna owiapụ-awọmẹ ma sin Inji Ogigo-ḅọkọ mẹ namam; ini anị ḅẹ oluku koromam, tẹ anị ḅẹ ḅọkọ na, jụkoroma na, ẹngbẹsẹ na sụam.

⁴ Ịn palị tẹ tẹlẹmaḅọ Mẹrẹmọtị, Uraya owiḅọtụḅọ, pịkị Hakọzị taa-owiḅọtụḅọ ḅe. Ọ̀ palị tẹ tẹlẹmaḅọ Mesulamu, anie Bẹrẹkaya owiḅọtụḅọ, pịkị Mesezabeli taa-owiḅọtụḅọ ḅe. Ọ̀ palị tẹ pịkị tẹlẹmaḅọ Zadọkụ, Bahana owiḅọtụḅọ ḅe.

⁵ Tẹkowa ḅẹ apụ ịn palị tẹ tẹlẹmam kụma ama mẹ ḅẹ opu apụ ma ḅara kẹ ịn nyanaḅọ ḅe kọrịnama mẹ ḅio sụa.

⁶ Johihada, Pasịya owiḅọtụḅọ ḅe na, Mesulamu, Besodeya owiḅọtụḅọ ḅe na Jesana Ogigo-ḅọkọ mẹ tẹlẹmam; ini anị ḅẹ oluku koromam, tẹ anị ḅẹ ḅọkọ na, jụkoroma na, ẹngbẹsẹ na sụam.

⁷ Mẹlataya, Gibiyọnị ḅẹ ḅọ ḅe na, Jadọnị, Mẹrọnọtị ḅẹ ḅọ ḅe na, Gibiyọnị ḅẹ apụ na, Mizipa ḅẹ apụ na tẹ Tọrụ mẹ Ọgọnọ-jụ ḅẹ itu mẹ ḅẹ ḅẹrẹtọnḅọ ḅe suku-ḅio simearị apụ ma ịn palịtẹ tẹlẹmam.

⁸ Ịn palịḅọ Uziyẹlị, Hahaya owiḅọtụḅọ golu-tẹmẹḅọ ḅe tẹlẹmam. Ọ̀ palịtẹ tẹlẹmaḅọ, Hananaya, sẹntị mịẹ apụ ma ḅẹ gbọrụḅọ; tẹ ịn sin Jeruselemu tẹlẹma ma mu Finjimatẹ onu sin anga mẹ lam.

⁹ Ịn palịtẹ tẹlẹmaḅọ, Rẹfaya, Họ owiḅọtụḅọ ḅẹrẹtọn ịn Jeruselemu ḅụ tomi ma kẹ ḍiema wararị maa akpo ma ḅẹ gberie pịrịarị ḅọ ḅe.

¹⁰ Arumafụ owiḅọtụḅọ Jedaya ịn palịtẹ ọ̀ warị na dama-dama wararị anga mẹ tẹlẹmam. Hasabiniya owiḅọtụḅọ, Atusi ọ̀ palịtẹ tẹlẹmam.

¹¹ Malikịja, Arimu owiḅọtụḅọ ḅe na, Hasububu anie Pahati-mohabụ owiḅọtụḅọ ḅe na jen anga na Fịturu Fọị Gele-warị mẹ na tẹlẹmam.

¹² Ịn palịḅọ Salumu, Halohẹsị owiḅọtụḅọ, ḅẹrẹtọn Jeruselemu ḅụ tomi ma ḍiema wararị maa akpo ma ḅẹ osi kpo mẹ pịrịarị ḅọ ḅe, ori na, ori eremịna-awọmẹ na tẹlẹmam.

¹³ Hanunu na, Zanoha ḅụ simearị apụ ma na Tụndụ ogboku ḅẹ Ogigo-ḅọkọ mẹ tẹlẹmam; ịn siin anị nama tẹ anị ḅẹ ḅọkọ na, jụkoroma na, ẹngbẹsẹ ma na sụam, tẹ onu mẹ ḅụ tẹra ẹndẹ na jeia si ḅụọ-kuḅu finji (440 m) tẹlẹma mu Pọkụ-muaị Ogigo-ḅọkọ mẹ lam.

¹⁴ Malikịja, Rekabụ owiḅọtụḅọ, Bẹtị-hakeremu tomi kpo mẹ ḅẹrẹtọnḅọ ḅe “Nama Pọkụ-muaị Ogigo-ḅọkọ” mẹ tẹlẹmam; ò sin anị nama tẹ anị ḅẹ ḅọkọ na, jụkoroma na, ẹngbẹsẹ ma na sụam.

¹⁵ Salumu, Kolozẹhi owiḅọtụḅọ, Mizipa tomi kpo mẹ ḅẹrẹtọnḅọ ḅe Minji-sararị Ogigo-ḅọkọ mẹ tẹlẹmam; ò sin anị nama tẹ isun ịkasị anị gbaịnm, tẹ anị ḅẹ ḅọkọ na, jụkoroma na, ẹngbẹsẹ ma na sụam; ori amadaḅọ ḅe ḍụọ mẹ ḅẹ Sẹla Minji-koko-anga mẹ ḅẹ onu mẹ nama mu Devidi Opu ama mẹ ḅụ mẹnjị ideri tanjịye mẹ lam.

¹⁶ Ọ̀ ḅọrọ tẹso, Nehimaya, Azibuku owiḅọtụḅọ, Bẹtị-zọ tomi kpo mẹ kẹ maa anga ḍiya ḅẹ gbọrụ anga ḅẹ ḅẹrẹtọnḅọ ḅe tẹlẹma mu Devidi aḍuḅu ma na, ḅara-mịẹ minji-koko-anga mẹ na, opu atomi ma warị mẹ na dama-dama anga ḅụ gbọrụ anga lam.

Livayị Furo-ḅẹ-apụ tẹ Onu Mẹ Ḅụ kọrịnama Kọrị Apụ

¹⁷ Ọ̀ ḅọrọ tẹso, Livayị furo-ḅẹ-apụ ma tẹlẹmam: Rehumu, Bani owiḅọtụḅọ ḅe; ọ̀ palị ḅọ Hasabaya, Kẹyịla tomi kpo mẹ kẹ maa anga ḍiya ḅẹ gbọrụ anga ḅẹ ḅẹrẹtọnḅọ ḅe tẹlẹma kẹ ò tomi kpo mẹ pịrịm.

¹⁸ Ọ̀ ḅọrọ tẹso, ịna mịnapụ Kẹyịla kpo mẹ kẹ maa anga ḍie ḅẹ osi anga mẹ ḅẹ ḅẹrẹtọnḅọ Bevayị, Inadadị owiḅọtụḅọ ḅe tẹlẹmam.

¹⁹ Ọ̀ palịḅọ Ẹza, Jọsụwa owiḅọtụḅọ, Mizipa ḅẹ ḅẹrẹtọnḅọ ḅe jen anga tẹlẹmam kpọlị iwo anga mẹ na dama-dama ḅụ ọkị mu ịkụkụ mẹ ḅụ ọmụ-aị koko anga mẹ la.

²⁰ Ọ̀ ḅọrọ tẹso, Baruku, Zabayị owiḅọtụḅọ ḅe jen anga tẹlẹmam ịkụkụ mẹ ḅụ ọkị mu Ẹlịyasibu Sịḅịda-Agbamịẹḅọ ḅe warị ḅẹ ḅọkọ mẹ la.

²¹ Ọ̀ ḅọrọ tẹso, Mẹrimọtị, Uraya owiḅọtụḅọ, pịkị Hakọzị taa-owiḅọtụḅọ ḅe jen anga tẹlẹmam Ẹlịyasibu warị mẹ ḅẹ ḅọkọ mẹ ḅụ ọkị mu anị ḅẹ kunoma la.

Agbamịẹapụ Tẹ Onu Mẹ Ḅụ Kọrịnama Kọrị Apụ

²² Ọ̀ ḅọrọ tẹso, ḅo agbamịẹapụ ma lam, Ele mẹ ḅẹ apụ ma tẹlẹmam.

²³ Ịn ḅọrọ tẹso, Benijamịnị na, Asubu na ịna awarị na dama-dama anga tẹlẹmam. Ịn ḅọrọ tẹso, Azaraya, Masẹya owiḅọtụḅọ, pịkị Hananaya taa-owiḅọtụḅọ ḅe ò soku-ḅẹ warị akaka tẹlẹmam.

²⁴ Ọ̀ ḅọrọ tẹso, Binuhi, Inadadị owiḅọtụḅọ ḅe jen anga tẹlẹmam, Azaraya warị mẹ ḅụ ọkị mu ịkụkụ mẹ ḅẹ ịkọlị mẹ na la.

²⁵ Palalị, Uzayị owiḅọtụḅọ ḅe ịkụkụ mẹ na, amadaḅọ ḅe warị sime tẹ ye-yọ ḍikiḍiki anga mẹ ḅụ ḅẹ gele warị mẹ ḅẹ ọgọnọ ḅẹ warị mẹ ḅụ sụa-paka warị-anga mẹ na dama-dama anga tẹlẹmam. Ọ̀ ḅọrọ tẹso, Pedaya anie Parọsị owiḅọtụḅọ ḅe,

²⁶ na Tamụnọ-warị mẹ ḅẹ fịrịmẹnjịapụ tẹ Ofeli tụndụ ọgọnọ angarị apụ ma na tẹlẹma ḅo gbọrụ ḅiri lam Minji Ogigo-ḅọkọ mẹ ḅụ ịrụa-saakịarị-anga mẹ na, sụa-paka wararị gele warị mẹ na dama-dama anga ḅụ.

Ja apụ Tẹ Nama Apụ

²⁷ Ịn ḅọrọ tẹso, Tẹkowa ḅẹ apụ jen anga tẹlẹmam sụa-paka wararị opu gele warị mẹ na dama-dama ḅụ mu Ofeli ḅẹ Onu mẹ la.

²⁸ Asụ Ogigo-ḅọkọ mẹ ọgọnọ-jụ ḅụ agbamịẹapụ ma ọrụḅọ-ọrụḅọ mḅọ soku-ḅẹ warị na dama-dama tẹlẹmam.

²⁹ Ịn ḅọrọ tẹso, Zadọkụ, Ịma owiḅọtụḅọ ḅe ò soku-ḅẹ warị na dama-dama tẹlẹmam. Ọ̀ ḅọrọ tẹso, Sẹmaya, Sekanaya owiḅọtụḅọ, Ịrụa-saakịarị-anga ḅẹ Ogigo-ḅọkọ ḍikiḍikiḅọ ḅe tẹlẹmam.

³⁰ Ọ̀ ḅọrọ tẹso, Hananaya, Selemaya owiḅọtụḅọ ḅe na, Hanụnụ, Zalafụ owiapụ-awọmẹ ḅụụ sonio karama ḅọ ḅe na jen anga tẹlẹmam. Ọ̀ ḅọrọ tẹso, Mesulamu, Bẹrẹkaya owiḅọtụḅọ ḅe ò ḅio na dama-dama anga tẹlẹmam.

³¹ Ọ̀ ḅọrọ tẹso, Malikịja, golu-tẹmẹapụ ma ḅẹ gbọrụḅọ tẹlẹma mu Tamụnọ-warị mẹ ḅẹ fịrịmẹnjịapụ na, ja sịẹ ḅẹ sịẹma dẹrị opu ngọ tuḅokọn-apụ ma na warị lam, Kobiri Pekele-ḍiki Ogigo-ḅọkọ mẹ ḅụ mu ịkọlị mẹ ḅẹ ọgọnọ ḅẹ ḅio mẹ na dama-dama ḅụ.

³² Golu-tẹmẹapụ ma na, ja sịẹ ḅẹ sịẹma dẹrị opu ngọ tuḅokọn-apụ ma na nwẹnị ịkọlị mẹ ḅẹ ọgọnọ ḅẹ ḅio mẹ na, Anana Ogigo-ḅọkọ mẹ na ogboku tẹlẹma.