Nehimaya 2 - FỊAFỊA BAỊBỤLỤ

Nehimaya So Jeruselemu Mum

¹ Amadaḅọ Atakịzazẹsị ama-da tẹ si kụra karama kụra ịn kẹ Nizanị sịn akalụ mẹ ḅio, iru ọ̀ tọrọkọ emi, à nwẹnị iru mẹ saakị tẹ anị kẹ amadaḅọ ḅe pịrị, ọ̀ tọrọkọ à kururu ḅara sime sime-a, tẹso,

² amadaḅọ ḅe nwẹnị ị̀ ḅẹẹ, “Tiye gotẹ ḍiki-tọrụ ḅụ ị́ obi-a tẹ ị́ tọrụ fụrụarị ḅara? Miemẹ anị gberie-sọ gberie-a kụma ḅioḅẹngbọ ḅẹ kururu.”

³ Anịtẹso à nwẹnị kpọma ḅalafa. À nwẹnị amadaḅọ ḅe ḅẹẹ, “Yee amadaḅọ ḅe ḍumo gbamaso! Ị̀ tọrụ tiegotẹ fụrụ ḅịa, opu ama mẹ, ị̀ aḍapụ aḍuḅu ma simearị anga mẹ fatẹ koro-simearị, tẹ fịnị pịkị anị ḅẹ ogigo-aḅọkọ ma dọkịma fama tẹ ḅẹ sakị?”

⁴ Anịtẹso amadaḅọ ḅe nwẹnị ị̀ gbela, “Í tiye ḅiiarị?” Anieḅụ à nwẹnị So-ḅio ḅẹ Tamụnọ ḅe tẹkẹ,

⁵ tẹ amadaḅọ ḅe ḅẹẹ, “Anị ị́ ḅụụ-ḅẹlẹ tẹ yẹrị ị́ fịrịmẹnjịḅọ ị́ tọrụ ḅụ ḍiki-ḅụụjịrị ḍọkị-ẹrị tẹ ḅẹḅẹ, ị̀ kẹ Juda ḅụ ị̀ aḍapụ ma aḍuḅu ma simearị opu ama mẹ fịrịmaa, mịẹtẹ à siin anị nama ḅẹ ḅara.”

⁶ Amadaḅọ ḅe nwẹnị ị̀ gbela (amada-ẹrẹḅọ ma ori akaka lẹgị wararị), “Í mu ḅarịye mẹ ala mu tọ-sakị la ḅẹ, anịsakị ị́ tọ-sakị pịkịma-ḅo ḅẹ?” Ị̀ kẹ fịrịma mẹ nwẹnị amadaḅọ ḅe ḅụụ ḅẹlẹma; à nwẹnị sakị go ọ̀ pịrị.

⁷ À nwẹnị amadaḅọ ḅe ḅẹẹ, “Anị ị́yẹrị amadaḅọ ḅe ḅụụ-ḅẹlẹ ḅẹ namịna, mimgbe ịn ḍiri kẹẹ ị̀ pịrị tẹ à kẹ Tọrụ mẹ Ọgọnọ-jụ ḅẹ itu mẹ ḅẹ ḅẹrẹtọnḅọ ḅe pịrị tẹ, mịẹtẹ ini ị̀ wẹrịso tẹ à mẹnjị nwenii tolu ḅo Juda la ḅarị ḅara;

⁸ pịkị gbọrụ ḍiri kẹẹ Asafụ, amadaḅọ ḅe piri ḍikiḍikiḅọ ḅe fịrịma mịẹtẹ ori opu sịn aḅiri kẹ ị̀ pịrịtẹ à kẹ oluku koroma ḅẹ ḅara ịn sime tẹ Tamụnọ-warị mẹ ḍikiḍikiarị warị mẹ ḅẹ ogigo-aḅọkọ ma na, opu ama mẹ ḅẹ onu mẹ na, à sime ḅarị warị mẹ na ḅụ.” Amadaḅọ ḅe nwẹnị à ḅii aị ma kẹ ị̀ pịrị, gbala ị̀ Tamụnọ ḅe iḅi ḅara mẹ ị̀ ọgọnọ emi ẹrẹsị.

⁹ Anịtẹso à nwẹnị ḅo Tọrụ mẹ Ọgọnọ-jụ ḅẹ itu mẹ ḅe ḅẹrẹtọn-apụ ma la, tẹ amadaḅọ ḅe aḍiri ma kẹ ịn pịrị. Mịọkụ amadaḅọ ḅe ọmụ-ogbo mẹ ḅẹ opu fịrịmẹnjịapụ na, asụ-dọkụ-ọmụapụ na kẹ ị̀ ḅụụ sụa fịrịma wararị.

¹⁰ Kụma Sanịbalatị, Ọrọnị ḅẹ ḅọ ḅe na, Tobaya fịrịmẹnjịḅọ, Amọnị ḅẹ ḅọ ḅe na, miemẹ naa tẹso, mịnẹ kịnị ḅo Izirẹlị ḅẹ awọmẹ ma iḅi ḍọkị ḅẹ ḅom mẹ anị nwẹnị gburo-gburoma ịna ḅioḅuma.

Nehimaya Jeruselemu Onu Ma Kan Ḅara Ḍikim

¹¹ Anieḅụ à ḅo Jeruselemu la tẹ tẹra aḍin simem.

¹² Anịtẹso yẹrị na, ị̀ ḅụụ sọ boowa apụ na nwẹnị saakị ḍin ḅụ; Tamụnọ kẹ ì ḅioḅẹngbọ suu tẹ à kọrị Jeruselemu pịrị ḅarịye mẹ à ḍuko gbọrụḅọ-sọ pịrị-a. À kpọlị tẹ dọkụ nama ḅe sikima à jen nama ọkị-a.

¹³ Ḍin ḅụ arị Tụndụ-ogboku Ogigo-ḅọkọ mẹ ḅụ paka-so mu Daragọnị Suḅe mẹ na Nama Pọkụ-muaị Ogigo-ḅọkọ na la, tẹ Jeruselemu onu ma ḅụ kan sara aị ma na, arị ḅẹ ogigo-aḅọkọ ma tẹ fịnị dọkịma aị ma na sime-ḅara ḍikim.

¹⁴ Anịtẹso à nwẹnị mẹnjị tọrọkọ mu Minji-sararị Ogigo-ḅọkọ mẹ na, Amadaḅọ Minji-koko-anga mẹ na la; kụma ì suku-ḅio simearị nama ḅe mẹnjị ḅọrọ ḅẹ anga ofori.

¹⁵ Anịtẹso à nwẹnị ḍin mẹ ḅụ tụndụ mẹ ḅụ ḅọrọ tẹ mu onu mẹ sime-ḅara ḍiki; tẹ ọḅụ pịkị tẹ tụndụ Ogigo-ḅọkọ mẹ ḅụ pịkịma-ḅom.

¹⁶ Fịrịmẹnjị-opuapụ ma à mu anga, anịanịa à mịẹarị ye nimi-a; anịsakị Juu-ḅẹ-apụ ma-o, agbamịẹapụ ma-o, ama ḅio ḅẹ opu atomi ma-o, fịrịmẹnjị-opuapụ ma-o, kirikọntẹ kọrịnama mẹ kọrị ḅẹ apụ ma-o, amụ à ye ḍuko ịn pịrị-a.

¹⁷ Anịtẹrẹmẹ à nwẹnị ịn ḅẹẹ, “Ọ́ wa sọ ḅụụ-fụka mẹ ẹrị wararị Jeruselemu fatẹ ḅara sime tẹ anị ḅẹ ogigo-aḅọkọ ma dọkị ḅara mẹ. Ó ḅo, yee wa sin Jeruselemu onu mẹ nama, mịẹtẹ wa ḅarị jen kẹ ḅụụ-jịrị nyana ḅịa ḅara.”

¹⁸ Tẹ à nwẹnị ị̀ Tamụnọ ḅara mẹ tẹ iḅi gotẹ ị̀ ọgọnọ gbana ye mẹ ḍuko ịn pịrị, pịkị ẹkwẹn-aḅịḅị ma tẹ amadaḅọ ḅe kọn ị̀ pịrị tẹ aị ma na. Ịn nwẹnị ḅẹẹ, “Ó yee wa virikama saakị tẹ sin nama.” Anieḅụ ịn nwẹnị ịna aḅụụ mịẹ kụrọma iḅi kọrịnama mẹ pịrị.

Ịn Ḅụọ Ẹngbẹsẹ Ịn Pịrịm

¹⁹ Kụma Sanịbalatị, Ọrọnị ḅẹ ḅọ ḅe na, Tobaya, fịrịmẹnjịḅọ Amọnị ḅẹ ḅọ ḅe na, Gisẹmụ Arabụ ḅọ ḅe na anị naa tẹso, ịn nwẹnị wa kẹ kpọọti tẹ wa ḍiki-sima tẹ ḅẹẹ, “Ọ́ nwẹn mịẹarị ye mẹ ó tiye mịẹarị? Ọ́ sịḅị-kụrọma amadaḅọ ḅe pịrịarị?”

²⁰ Anịtẹso à nwẹnị ịn pakịrị, “So-ḅio ḅẹ Tamụnọ ḅe wa mịẹtẹ wa lolo ḅa, tẹ wamịnị ori afịrịmẹnjịapụ ma virikama saakị tẹ sin nama ḅa, Kụma ọmịnị ma kiri, anịanịa kụrọ, anịanịa go ḍuko ḅiokoromaye nyana-a Jeruselemu ḅụ.”