Nehimaya 13 - FỊAFỊA BAỊBỤLỤ

Igoniapụ Ḅụ Ḅụụ Sikima

¹ Anị ene mẹ ḅụ, in Mozizi ḍiri mẹ go tomi pịrị tẹ in naam; anị ḅio in ḍọkị ẹrịm in kẹẹ wararị mịnẹ Amọnị, anịanịa Mohabụ ḅẹ ḅọ jene-jene Tamụnọ kobiri-ogbo mẹ ḅio sọ-mu ḅịa.

² Kẹ gotẹ ọkọ ḅẹẹarị, in fịye na minji na kẹ ḅo Izirẹlị ḅẹ awọmẹ ma na bịama-a, kụma in da-paka gotẹ in Balamụ ọkọm ori in wori — anịsọ wamịna Tamụnọ wori nume mẹ pịkị boma mịẹm.

³ Tomi ma oloko mẹ naa tẹso, in Izirẹlị ḅụ igoniapụ ḅụụ paka-ḅo apụ mamgba sikima famam.

Nehimaya Siin Mịẹ Tẹlẹma Aị

⁴ Tẹrẹmẹ ḅọ miemẹ la, in Ẹlịyasibu agbamịẹḅọ ḅe tẹ Tobaya na gboloma wararị ḅọ ḅe tọnm, ọ̀ wamịna Tamụnọ warị mẹ ḅẹ aḅio ma ḍikiḍikii kẹ ḅẹ ḅọ ḅẹ tẹ Tobaya na gboloma wararị ḅọ ḅe,

⁵ Ọ̀ nwẹnị gbọrụ ḍụḅatẹ ḅio kẹ Tobaya pịrị. Tarị-tarị ḅụ mị ḅio mẹ ḅụ anie ịn mgbọlị-fịye ḅẹ agba na, fịranịkịnịsẹnịsị agba na, fịafịa-namakọrịaị na, mbgọlị-fịye kẹ oyia akiri ḍiya ḅẹ gbọrụ kiri mẹ na, iru na, pulo na kẹ koko-koko yee, anie ịn kẹ Livayị furo-ḅẹ-apụ ma na, nume-suapụ ma na, ogigo-aḅọkọ ḍikiḍikiapụ ma na, agbamịẹapụ ma na pịrịarị aị ma.

⁶ Miemẹ pakarị sakị à Jeruselemu ḅụ ofori; kẹ gotẹ ọkọ ḅẹẹarị, Atakịzazẹsị, Babịlọnị ḅẹ Amadaḅọ ḅe ama-da tẹ kụra suei maa kụra finji karama kụra ḅụ mịẹ àrị Amadaḅọ ḅe ḍọkụma-mu yee. Sakị pịkị kẹlẹ ḅọrọ tẹrẹmẹ à mu Amadaḅọ ḅe ḅara ḅụ ịnyọsara sakị ḅiim,

⁷ tẹ Jeruselemu ḅom, anị tẹrẹmẹ àrị Ẹlịyasibu Tobaya gotẹ mịẹ siye mẹ — Tamụnọ warị ḅio ḅụ ḅio tẹlẹma Tobaya pịrịarị ye mẹ ḍọkị nimim.

⁸ Anị ì ḅụụ-ḅẹsọ lamam tẹ à Tobaya kẹ ḅio mẹ ḅirima aị mamgba kẹ etela ogbo gbin pakamam.

⁹ Anịtẹso à tọn tẹ in ḅio mẹ mie fịafịamam; tẹ à nwẹnị Tamụnọ warị mẹ ḅẹ ẹfẹrẹ ma na, mgbọlụ agba mẹ na, sịn ḅụ paka-ḅo kụnụarị owu minji mẹ na pịkịma ḅo sunm.

¹⁰ À pịkị ḍọkị-ẹrịm mịnẹ Livayị furo-ḅẹ-apụ ma aḍiekiri ma amụ ịn kẹ in pịrị-a; anị mịẹtẹ Livayị furo-ḅẹ-apụ ma na, nume-suapụ ma tẹ kọrịnama mẹ kọrị apụ ma, ḅụọ-ḅụọ kẹ ḍumo-mangị kọn mḅọ ḍụọ mu tẹ.

¹¹ Anieḅụ à nwẹnị fịrịmẹnjị-opuapụ ma na ḅịḅị-dama tẹ ḅẹẹ, “Tiye gotẹ Tamụnọ warị mẹ sịkị tẹ anga sọ?” Tẹ à nwẹnị in kobiri ḅo gboloma tẹ ịn kẹ ịna sime akiri ḅụ koroma.

¹² Anị tẹrẹmẹ Juda ḅẹ apụ mamgba mgbọlị-fịye na, iru na, pulo na kẹ oyia akiri ḍiya ḅẹ gbọrụ kiri kẹ ḅo ngọ-koko-aḅio ma ḅio sunm.

¹³ À nwẹnị ngọ-kokoapụ ḅara ḅụ Selemaya agbamịẹḅọ ḅe na, Zadọkụ, ḍiri-kẹẹḅọ ḅe na, Pedaya, Livayị furo-ḅẹ-ḅọ ḅe na tọn; tẹ ịna ḅarasụaḅọ ḅara kẹ Hanani, Zakọ owiḅọtụḅọ, pịkị Metanaya taa-owiḅọtụḅọ ḅe tọnm; gbala ini in kịẹnm ḅioḅẹngbọ-kẹ-sịrẹrẹ-niḅi apụ ẹrẹsị, ịna kọrịnama anie ye ḍie ịna mịnapụ pịrị.

¹⁴ Yei ị̀ Tamụnọ, miemẹ gboloma ye kẹ ị̀ kẹ ḅiokoromaa. Ḍụkụ tẹ àrị ị́yẹrị na ị́ warị ḅẹ fịrị mẹ na gotẹ mịẹ tẹ iḅi-amịẹaị ma sịkịrị fa so aị sọ ma.

Ịnyọsara-Ene Koko Mẹ

¹⁵ Arị ene ma ḅụ, Juda ḅụ à tomi ẹrịm ini Ịnyọsara-Ene mẹ ḅụ iru mịẹarị tẹ mgbọlị kịrị-kịrị tan-tan kpolima. Ịn pịkị iru na, girepu-asịnmgbọlụ na, figi-asịnmgbọlụ na, kịrị-kịrị dogi-aị na kẹ Jeruselemu ḅom Ịnyọsara Ene mẹ ḅụ; tẹ à nwẹnị ịna aḅeri nụnụ in fịye dẹrị ma anị ene mẹ ḅụ.

¹⁶ Taya ḅẹ apụ tẹ opu ama mẹ ḅio angarị apụ so, inji na, ngọ ḅara-ḅara mamgba na kẹ Ịnyọsara-Ene mẹ ḅụ ḅo Juda ḅẹ apụ na, Jeruselemu ḅio na dẹrịarị.

¹⁷ Anịtẹso à nwẹnị Juda ḅẹ opu-apụ ma na ḅịḅị-dama tẹ in ḅẹẹ, “Mie tọ siye tẹ ọ́ mịẹarị, tẹ Ịnyọsara-Ene mẹ wọlọmarị?

¹⁸ Mị-ḅara mie ọmịna ḍapụ mịẹtẹ wamịna Tamụnọ mị siye mẹmgba kẹ wamịnị na, mị opu ama mẹ na ọgọnọ gbana ye ọkọ-a? Anịsọ ọ́ paa Ịnyọsara-Ene mẹ wọlọma-wọlọmatẹ jen ịganị ọkị-ḅo Izirẹlị ọgọnọ gbanarị”.

¹⁹ Tẹrẹmẹ Ịnyọsara-Ene mẹ la, Jeruselemu Ogigo-aḅọkọ ma saakị furu tẹso, à nwẹnị tọn mịnẹ ini Ogigo-aḅọkọ ma gbaịn, tẹ kuro pịrị mịnẹ arị finji ma nwenii Ịnyọsara-Ene mẹ ḅọrọ. À nwẹnị ị̀ afịrịmẹnjịapụ ḅẹ jen-apụ kẹ Ogigo-aḅọkọ ma ḅụ kuroma, mịẹtẹ Ịnyọsara-Ene mẹ ḅụ in gberie so dogi sọ ḅo ḅịa ḅara.

²⁰ Anịtẹso Ja sịẹ ḅẹ ngọ-sẹma-dẹrị opu tuḅokọn-apụ na ngọ ḅara-ḅara mamgba dẹrịarị apụ na nwẹnị gbọrụ sakị anịanịa maa sakị kẹ Jeruselemu sọ-mu-a ḅara kẹ sime.

²¹ Kụma à nwẹnị ịna ḅeri nụnụ tẹ in ḅẹẹ, “Ó tiegotẹ onu mẹ tọrọkọ sime? Ó jen kẹ ọkọ mịẹ-mịẹ, à ḅara kẹ ọmịnị ọgọnọ gbana ḅa.” Anị sakị mẹ ḅụ ọkị tọrọkọ mu Ịnyọsara-Ene mẹ ḅụ in ḅarị boowa,

²² À nwẹnị tọn Livayị furo-ḅẹ-apụ ma pịrị mịnẹ ini ịna aḅụụ mie fịafịama tẹ ḅo Ogigo-aḅọkọ ma ḍikiḍiki, kẹ Ịnyọsara-Ene mẹ wẹrị fịafịama. Í ḍiki-ḅụụjịrị ḅụ miemẹ sọ kẹ ḅiokoromaa, yei ị̀ Tamụnọ, tẹ fomu-ḅara wẹrịso ị̀ pịrịị í gburo-gburotẹ jike-a ḅẹlẹma mẹ wẹrịtẹ sime-ḅara ḅụ.

²³ Arị ene ma ḅụ à pịkị Juu-ḅẹ-apụ ma tẹ Asịdọdị na, Amọnị na, Mohabụ na ḅẹ ereme sime apụ ma ẹrịm.

²⁴ Ịna awọmẹ ma kẹ maa anga ḍiya ḅẹ gbọrụ anga Asịdọdị ama-ḅịḅị fiem, tẹ inetẹ Juda ama-ḅịḅị fie-a, kụma ọrụḅọ-ọrụḅọ paka anga ḅẹ atomi fie ama-ḅịḅị fiem.

²⁵ À nwẹnị ini na so, tẹ in wori, tẹ ini ḅẹ jen-apụ fomu tẹ ịna oju inume kanị-siin; à nwẹnị in mịẹtẹ in Tamụnọ ẹrẹ ḅụ ye karị, tẹ ḅẹẹm, “ọ́ ḅarị ọmịna eremịna-awọmẹ kẹ ịna owiapụ-awọmẹ pịrị, anịanịa ịna eremịna-awọmẹ ọkị ọmịna owiapụ-awọmẹ anịanịa ọmịna aḅụụ pịrị sime ḅịa.

²⁶ Ọkọ sime ereme ḅụụ ḅo ye mie Sọlọmọnị Izirẹlị ḅẹ amadaḅọ kẹ si mịẹ ye anị-a? Mana-mana opu asịẹ ma ḅụ ò pembema Amadaḅọ ofori; ori ḅe ọ̀ Tamụnọ ọ̀ ḅẹlẹmam, tẹ Tamụnọ ọ̀ kẹ Izirẹlị mẹmgba ḅụ Amadaḅọ mịẹm; anịsọ igoni ama ḅẹ ereme mịẹtẹ oriḅe so si mịẹm.

²⁷ Wa anịtẹrẹmẹ ó poki tẹ ọ́ mị opu si mẹmgba mie ḅẹ, tẹ igoni ama ḅẹ ereme sime ḅụ wamịna Tamụnọ ḅụụ si ḅara kẹ ye mie ḅẹ?”

²⁸ Ẹlịyasibu Sịḅịda-Agbamịẹḅọ ḅe owiḅọtụḅọ Jehohada owiapụ-awọmẹ ma ḅẹ gbọrụḅọ anie Sanịbalatị, Horoni ḅẹ ḅọ ḅe fụanḅọ; anịẹrẹsị arị ị̀ ḅụụ ò dee-siinm.

²⁹ Yei ị̀ Tamụnọ, arị kẹ ḅiokoroma, kẹ gotẹ ọkọ ḅẹẹarị, ini agbamịẹ mẹ pilema tẹ, pịkị agbamịẹ mẹ ḅẹ ọḅọkụ na, Livayị furo-ḅẹ-apụ ma na.

³⁰ Mị-ḅara mie à kẹ igoni amịẹaị goyegoye ḅụ in sịkịrị fịafịama ḅara, tẹ à nwẹnị agbamịẹapụ ma na, Livayị furo-ḅẹ-apụ na akọrịnama ma mie giregirema, ọrụḅọ-ọrụḅọ mḅọ kọrịnama ḅụ sime ḅẹ ḅara,

³¹ À pịkị sakị sakị ḅụ tọn wararị fịnị agba mẹ na, tarị asịnmgbọlụ ma na mie ḅẹ ḅara kẹ ọrụtọn tẹ. Iḅi kẹ ị̀ kẹ ḅiokoromaa, yei ị̀ Tamụnọ.