Nehimaya 1 - FỊAFỊA BAỊBỤLỤ

Nehimaya Tẹkẹ Izirẹlị Pịrịm

¹ Mie Nehimaya, Akalaya owiḅọtụḅọ ḅe ẹkwẹn-aḅịḅị ma. Si kụra karama kụra mẹ ḅẹ ịn kẹ Kisilevu sịn akalụ mẹ ḅụ anị pakam, à Suza sịḅịda ama mẹ ḅio simearị ogbo,

² Hanani ị̀ amịnapụ ma ḅẹ gbọrụḅọ nwẹnị Juda ḅụ ḅo ja apụ na ḅo; à nwẹnị Juu-ḅẹ-apụ ma tẹ omoni-sọ ḅara mẹ ḅio sọ-a tẹ ḍumo sime wararị apụ ma na, Jeruselemu na gbolomaye kẹ ịn gbela.

³ Ịn nwẹnị ị̀ ḅẹẹ, “Anịanga itu mẹ ḅio ḍumo sime wararị tẹ omoni ḅara mẹ ḅio sọ-a apụ ma gburo-gburotẹ ḅụụ-fụka na, ḅụụ-jịrị na ḅio emi; Jeruselemu onu mẹ kaan-sara tẹẹ, tẹ fịnị pịkị anị ḅẹ ogigo-aḅọkọ ma dọkịma tẹẹ.”

⁴ À mịna ẹkwẹn-aḅịḅị ma naa tẹso, à nwẹnị lẹgị-sime tẹ tẹmẹ-la ḅara kẹ owu tẹ ene kịẹn-a ḅara kẹ kururu; So ḅio ḅẹ Tamụnọ ḅe tọrọkọ à ḅuru-ịmọ tẹ tẹkẹ tọrọkọ tọrọkọ mum.

⁵ Yẹrị mẹẹ, “yei So-ḅio ḅẹ KỊNỊNYANA-TAMỤNỌ, gburo-gburotẹ tẹmẹ-naịn-naịnma Tamụnọ, tẹ ọḅọkụ koko tẹ jike-a ḅẹlẹma wẹrị kẹ ọ̀ ḅẹlẹma tẹ ori oloko koko apụ pịrị ḅọ,

⁶ yee í ḅeri-tokoloma, tẹ ị́ atọrụngbọ ma finji kẹ ị́ fịrịmẹnjịḅọ tẹkẹ mẹ tẹ ḍin na, eneḅaka na ḅụ arị ị́ tọrọkọ tẹkẹ kẹ Izirẹlị ḅẹ atomi ị́ afịrịmẹnjịapụ ma pịrịarị, ị́ atomi Izirẹlịapụ ma mịẹ asi ma tẹ wa ị́ ḅụụ mịẹ-irima aị ma ḍuko-pakamarị ye mẹ naa. Inn, yẹrị na, ị̀ ḍa ḅe warị mẹ na si mịẹ tẹ.

⁷ Wa kpọma si lama tẹ ḅara kẹ ye mịẹ ḅẹ tẹ tọn aị ma na, kẹẹ wararị oloko ma na, kụrọ ḅara-ḅio sime apụ tọn aị ma tẹ ị́ tọn ị́ fịrịmẹnjịḅọ Mozizi pịrị aị ma na koko-a.

⁸ Ẹkwẹn-ḅịḅị mẹ tẹ ị́ tọn ị́ fịrịmẹnjịḅọ Mozizi pịrị ye mẹ kẹ ḅiokoroma, tẹ ḅẹẹm, ‘Ó minini nyana-a ḅẹḅẹ, arị ọ́ gala-galama ḅa tomi ma ogbo ḅio ḅụ;

⁹ kụma ọ́ pịkịma ị̀ ḍọkụma-ḅom tẹ ì oloko ma koko tẹ arị mịẹ-mịẹ, ọ́ gala-gala mu ala-tẹịn So-atọrụ ma suku-ḅio sọ-sọ, arị arị ayọ ma ḅụ ó kobiri ḅo à ḅẹẹm ị̀ ẹrẹ mẹ sime ḅẹ tẹ à sẹlẹ-ọkị anga mẹ ḅụ koroma ḅa.’

¹⁰ Inima anie ị́ afịrịmẹnjịapụ ma, pịkị ị́ atomi ma tẹ ị́ í opu kụrọ na, ị́ kụrọ-ḅara na kẹ pakịrị ọkị apụ ma.

¹¹ Yei KỊNỊNYANAḄỌ, yee ị́ í ḅeri-tokoloma ị́ fịrịmẹnjịḅọ tẹkẹ na, ị́ afịrịmẹnjịapụ ma tẹ ị́ ẹrẹ mangịma mẹ ḅẹlẹma apụ ma tẹkẹ na naa; tẹ mịmgba ị́ fịrịmẹnjịḅọ mịẹ ye mẹ ori na iḅi, tẹ ḅị tomḅọ ḅe ḍiki-tọrụ ḅụ ọkụrụkụrụ nyana ọ̀ pịrị.” Mịọkụ, yẹrị anie ò ḅio-koruḅọ.