Nahọmụ 3 - FỊAFỊA BAỊBỤLỤ

¹ Sule-ḅịḅị sime ọmbie opu ama mẹ pịrịị, ama mẹmgba iruo na fọịn-ọkị aị na ḅin wararị kụrọ-ḅara kẹ ye fọịn mẹ kunoma-a!

² Bẹkẹma mẹnjịarị arụ ḅẹ fie mẹ naa, kirimẹnjị-arụ ḅụọ fie mẹ naa, ḍosi-ḍosi mangịarị asụ naa, kiri sẹlẹ dọkụ-a kirimẹnjị-ọmụarụ gbii-gbiima dọkụarị naa!

³ Asụ-dọkụapụ tẹịn-arị okologie nwanam-nwanam-ma ḅịyarị, ḅẹkẹrẹ sanịarị fịị sara wararị inweni-ogbo-ogbo, ḍụẹịn oju sara pakama tụndụ-tụndụ mịẹm kịẹn-ḅịḅị nimi-a ḍụẹịn oju, ḍụẹịn ma ọgọnọ ịn pụmbụ-pụmbụ ḅịkị-ḅịkị korom.

⁴ Arịmgba sẹfị-ẹrẹḅọ ma kịẹn-kịẹn fa-a amịẹaị gotẹ, pọkọsọlịmarị tẹ ḅụụ ḅụ kịnị ḅaa pile ye emi ḅọ, arị ma tẹ amịna sẹfị amịẹaị kẹ opu asịẹ dẹrịarị, tẹ á kọn-arị kẹ tomi-kụlọkụlọ pilearị ḅọ ma.

⁵ Ḍikii arị ị́ da-paka wararị, Ye mamgba nyana KỊNỊNYANAḄỌ ḅe ọkọ ḅẹẹm; anịsakị à konju ḅụ ị́ sụa akapa saakị ị́ tọrụ gbaịn ḅa; tẹ arị ị́ wẹrịso tẹ opu asịẹ ị́ paụ ḍiki ḅa, tẹ ama kịrị-kịrị ma ị́ ḅụụ-jịrị ẹrị ḅa.

⁶ À fun kẹ ị́ ọgọnọ sara ḅa, ị́ kẹ ye-sịn-a ḅara à nwẹn kẹ ị́ mịẹ ḅa, tẹ ị́ kẹ tomi tọrụ pịkị-pịkị ḍiki ḅẹ ye sọma ḅa.

⁷ Anịsakị í ḍiki apụ mamgba ị́ ḅụụ mangị-so tẹ ḅẹẹ ḅa, Ninive fa tẹ, tụḅọ á ḍuu ḅẹ? Tọ anga à mu á dedema ḅẹ apụ ḍọkị á pịrị ḅẹ?

⁸ Ị́ iḅi Tibesi tẹ Nayịlị nwẹn-sịn tọrụ akaka emi ḅọ ma, minji ikelema wararị opu tọrụ kẹ á ḅụụ-ḍụaye mịẹ, tẹ minji amịna onu mịẹ ḅọ ma nẹngị?

⁹ Ẹtịyopịya anie arị ịnyọ, pịkị Ijiputi sọ, kunoma ofori ḅara, Putu na Libiya ḅẹ apụ na anie ḅarasụa á pịrịarị apụ.

¹⁰ Anịsọ ini á dogi-som, á mu kun-ḅara ḅio sọm, á ḍọkọḍọkọ-awọmẹ ini ịn kanị pakịrị-pakịrị mịẹm etela goyegoye sịḅị ḅụ; ini apịan sụa-sụa tẹ kẹ kụn nyana apụ ma ḍiemam, tẹ ikoli kẹ arị opu atomi mamgba sụam.

¹¹ Ị́yẹrị sọ iru ḅuu ị́ tọrụ-ḅaama ḅa, tẹ ye-nimia ḅara kẹ ye mịẹ ḅa, tẹ kịnị-na-fịya-a ḅọ ḅe ḅụụ ḅụ ḅụụ-ḅọị-yọ ḍọkị ḅa.

¹² Ị́ nama ị́ ḅụụ pịrị ọmụ kiki aị mamgba, tarị sụa tẹ ḅịyatẹ opu ịla asịnmgbọlụ sime-ḅara simem, anị jike-jike, arị sara yefịarị ḅọ ḅe ḅịḅị-ḅio sọm.

¹³ Ị́ ọmụgbin apụ ogbo-ogbo ma ḍikii, ereme-ereme mie ọmịna ogbo ḅio emi ye! Ọmịna ama ḅẹ ogigo-aḅọkọ ma, finji sara ọmịna ọmụapụ ma pịrị wararị; fịnị ọmịna ogigo-aḅọkọ ḅẹ ẹngbẹsẹ ma dọkịma tẹẹ.

¹⁴ Ini ama mẹ ikelema-koro tẹ owu paka ḅẹ ye mẹ gotẹ ó minji ḍuu, ị́ nama ọmụ kiki aị ma mịẹ kụrọmaa; Ó mu biriki tẹmẹ lịka mẹ nangaa, ó biriki tẹmẹ-aị ma ọlọ-sịẹmaa!

¹⁵ Anị yọ mie fịnị ọ́ dọkịma guluguluma ḅarịye, okologie mẹ ọ́ pẹlẹ-siin ḅa. Igurube ye guluguluma ḅara anị nwẹn kẹ ó guluguluma ḅa. Ọmịnị Igurube ḅin ḅara kẹ ọmịna aḅụụ ḍụḅamaa, ọmịnị ịkpakpa ḅin ḅara kẹ ọmịna aḅụụ ḍụḅamaa!

¹⁶ Ọ́ mịẹtẹ ọmịna opu tuḅo-akọnị, kịẹn-ḅịḅị ḅụ ḍụḅa So-tọrụ ḅẹ alolia ma nẹngị tẹ kụma igurube ḅe amịna apamba finji tẹ fiin-som.

¹⁷ Ọmịna sịḅịdapụ ma ịkpakpa sime-ḅara simem, ọmịna ḍiri-kẹẹapụ oḅoku ene ḅụ ḅụọ kiri sịẹ-a igurube ogbo-ogbo sime-ḅara simem otuka mẹ puu-paka tẹso, in fiin som, gbọrụḅọ-sọ in sime anga nimi-a.

¹⁸ Yei Asiriya ḅẹ amadaḅọ, ị́ anana-ḍikiḍikiapụ in monoarị; ị́ opu atomi ma sịngẹarị. Ị́ atomi tụndụ ma ọgọnọ ḅụ gala-gala wararị, ịn kobiri ḅẹ gbọrụḅọ-sọ ofori ḅara.

¹⁹ Kẹ ị́ la ye mẹ gwọ-gwọ ye ofori, ị́ la ye mẹ gwọ sọ iḅi ḅịa. Ị́ ḅụụ paka ye mẹ gbolomaye naa apụ mamgba ịna aḅara farị-farị ị́ pịrịarị, anị kẹ gotẹ ọkọ mịẹarị, ị́ sịkọpẹlẹ-a ḅara kẹ mịẹarị siye mẹ, tụḅọ ọgọnọ kụma anị amụ la-a?