Nahọmụ 2 - FỊAFỊA BAỊBỤLỤ

Ninive Ḅịkị Mẹ

¹ Kaan gala-gala tẹ ḅaa guluguluma mẹ, ḅo ị́ da-paka tẹẹ. Owiapụ kẹ nama amẹẹ kikimarị finjimatẹ onu ma ọgọnọ kụrọmaa; opu etela mẹ ḅii; ḅiri-ponoye kẹ ị́ aḅiri ponoo ị́ ịnyọ mẹmgba kobiri ḅo gbolomaa.

² (Kẹ gotẹ ọkọ ḅẹẹarị, KỊNỊNYANAḄỌ ḅe Jekọbụ ama-da opu mẹ pịkịma ḅoarị Izirẹlị ama-da opu mẹ sime-ḅara, gbala kụrọ-ḅara kẹ ngọ fọịn apụ ịn fọịn tẹ ịna ịkpangị ma sima sara tẹẹ.)

³ Ọ̀ kụrọtẹ opu atomi ma ekpeke ma awụ tọrụ ḅịyarị, ori ọmụgbin-apụ ma pọpụlụ nwẹn-sịn tọrụ ḅịya akapa sụa wararị. Kirimẹnjị-ọmụarụ ma kọrịarị fịnị-ḅẹlẹ ḅịya ḅara ḅịyarị, ini arị pekele-ḍiki tẹ arị ọgbụrụ-sụn tẹ paka sakị la tẹ ḅẹḅẹ; opu apụ ma asụ ma ḅarị inetẹ dein sime-a.

⁴ Kirimẹnjị-ọmụarụ ma owima opu etela ma ḅụ dọkụm, ịna ama-ogbo ma ḅụ dọkụ iwo-na-ideri-nam, in pọnjị atọnjọ kọrị ḅara kọrịm, so-alagba ye tẹịn tẹ gbarị-a ḅara ịna aḅara nwẹn kẹ ye dam.

⁵ Ịn fịrịmẹnjị-opuapụ ma sịn kobirim, ịn muarị ḅara ḅụ ịn pụmbụm, ịn fọnya mangị onu mẹ mum, tẹ ye fomu-kan mgbele kikimaye mẹ saakị sịẹmam.

⁶ Tọrụ da ogigo-aḅọkọ ma finji sara tẹ; ama-da opu warị mẹ ekpe tukutuku tẹ.

⁷ Anị ḅẹ warị nyana ẹrẹḅọ ma ini á kun tẹẹ, ini á dogi-so tẹẹ, á fịrịmẹnjị-eremịna-awọmẹ kururu tẹ owuarị tẹ tọrụsiẹrị ḅụ olosịkịya mbụrụmbụrụ ḅara mbụrụmbụrụarị tẹ ḅara kẹ ịna ekpe fomuarị.

⁸ Ninive sime-ḅara anie gbala ḍaḅa, tẹ anị ḅio ḅẹ minji puu paka tẹ ye sime-ḅara. “Daasịẹ! Daasịẹ!” Ịn nwẹn olokum; kụma gbọrụḅọ-sọ tọrụ-pịkị ọḅụ ḍiki-a.

⁹ Kụrọ-ḅara kẹ seleḅa mẹ fọịịn, kụrọ-ḅara kẹ golu mẹ fọịịn! Ngọ-warị faa kụnụnụ paka ḅịa, anịanịa ḅụụ ḅụ yela ngọ goyegoye faa fama!

¹⁰ Ịn Ninive ḅaa fama tẹ, tomi anị koroma mangị tẹ, anị fatẹ yọ sọ tẹẹ! Ḅalafa ḅioḅẹngbọ sanịm, ḅụọ-akụkụ sẹkịm, ịnyọ fa tẹẹ, tọrụkuḅu ḅo fọọn ḅịyam.

¹¹ Ọkụkụ ma ịḅụkụ mẹ tọ-anga emi, asambịrịma ọkụkụ ma fukuru mẹ, ọkụkụ ḅe ọ̀ pẹị ḅẹ nama mẹ ḍọkị ḅo-ḅo anga mẹ, ori ịwọma iyi aị ma sime tẹ gberie-sọ ịna aḅụụ fụkama-a anga mẹ?

¹² Ọkụkụ ḅe ịwọma iyi aị ma furo ḅin ḅẹ ḅara kẹ nama kanị-kanị ịn pịrịm, tẹ nama fangala ḅaa ịyọrọ ọkụkụ ḅe pịrịm; ori ọ̀ ḅaa pẹị ḅẹ nama kẹ ò fukuru ma ḅinmam tẹ kanị-saratẹ nama meni kẹ ori ịḅụkụ ḅinmam.

¹³ Ḍikii arị ị́ da-paka tẹ, ye mamgba nyana KỊNỊNYANAḄỌ ḅe ọkọ ḅẹẹm, anịsakị à fịnị kẹ í kirimẹnjị-ọmụarụ ma dọkịma tẹ onwin turee-tureema so ḅa, tẹ okologie mẹ ị́ asambịrịma ọkụkụ ma ḅaa guluguluma ḅa; tomikiri ḅụ arị í kun-kun pẹịarị aị ma pẹlẹ-siin ḅa, tẹ kịnị ḅarị jen-maaịn kẹ ị́ fịrịmẹnjịapụ pọkọ mẹ naa ḅịa.