Nahọmụ 1 - FỊAFỊA BAỊBỤLỤ

¹ Ye-nimiḅọ ḅịḅị ḅio Ninive gbolomaye ḅụ paka-ḅo oku-ḅịḅị. Miemẹ anie Ẹlịkọsị ḅẹ Nahụmụ ẹrị ịkịan mẹ ḅẹ ḍiri mẹ.

Ninive Ḅụ KỊNỊNYANAḄỌ Ḅe Nyana Ịganị Mẹ

² KỊNỊNYANAḄỌ ḅe anie afana Tamụnọ, tẹ gbẹẹfị ḅiiarị ḅọ; KỊNỊNYANAḄỌ ḅe ọ̀ gbẹẹfị ḅiiarị, tẹ pịkị kụrọ ịganị kọn-kọnm; KỊNỊNYANAḄỌ ḅe ori na fịya-a apụ ḅara gbẹẹfị ọkịarị tẹ ịganị wẹrị ori na fịya-a apụ pịrị-pịrịm.

³ KỊNỊNYANAḄỌ ḅe ọ̀ nwana-nwanama ịganị-ịganị-a, tẹ gburo-gburo ḅụratẹ kụrọ nyana wararị; KỊNỊNYANAḄỌ ḅe gbala-gbala ḅẹrẹ-ḅarasii-ḅọ mẹ fomu-a ḅara kẹ mḅọ wẹrịso ḅịa. Kụrọ fẹrụ na erise na ḅio mie ori etela simearị ye, anịsakị kpiti aso-tọrụ ma anie ori aḅụọ-suku ḅẹ fọọn.

⁴ Ori opu tọrụ mẹ ḍiki ịganịm, tẹ mịẹtẹ anị samụnọm ọ̀ tọrụ mẹmgba samụnọmam; Basani na Kamẹlị na kpatụ tẹ samụnọm, Lẹbanọnị panga-ḅaa mẹ ḍisim.

⁵ Ọ̀ tọrọkọ tụndụ ma jike tẹ gẹẹm, tụndụ ma sanịm; ọ̀ tọrọkọ kiri mẹ ye ḅụ sọ-a ḅara kẹ koro-simem tomikiri mẹ na anị ḅio anga aị mamgba na.

⁶ Tụḅọ inetẹ ye ọ̀ ḅụụ-ḅẹsọ tẹ ọ̀ tọrọkọ sịẹsime ḅẹ? Tụḅọ inetẹ ori ịganị mẹ ḅẹ ọfịrị mẹ inema ḅẹ? Ọ̀ kụrọ ịganị fịnị ọsụma paka ḅara pakam, tẹ ori ịkụ ma kẹ pakịrị-pakịrị puu-puu saram.

⁷ KỊNỊNYANAḄỌ ḅe ori iḅim ḅụụ-fụka ene ḅụ kụrọtẹ ḅụụ ḅọị anga; inima tẹ ò ḅio ḅụ ḅụụ ḅọịarị apụ ma, ori in nimi wararị.

⁸ Kụma seri ḅo ye-yọ mẹmgba gbaịn-arị opu minji, mie ọ̀ kẹ ori na fịya-a apụ ma gbọrsịḅị ini ọfịn sin ḅarịye: anịsakị ori ori na fịya-a apụ ma ḍuka kanakana ḅio suu ḅa.

⁹ Ị́ KỊNỊNYANAḄỌ ḅe kẹ tọ ḅẹrẹ-ḅiya ḅẹ? Ọ̀ mịẹtẹ anị gbọrsịḅị kunoma ḅa; ọ̀ maa sakị kẹ gbẹẹfị ḅii ḅịa ori ọmụapụ ḅụ.

¹⁰ Jen-jen fịnama wararị anangị dọkị fa ḅara, ịn dọkị fa tẹ samụnọtẹ ịkpakụ dọkị fa ḅara.

¹¹ Ị́ ḅụụ ḅio kịnị paka-ḅo-a, KỊNỊNYANAḄỌ ḅe kẹ si ḅẹrẹ-ḅiya, tẹ ḅiokpọ ḅara kẹ kịnị toluma ḅọ.

¹² Mie KỊNỊNYANAḄỌ ḅe ḍuko yee, “Ịn nwẹnị ịnyọ nyana tẹ tọnwa atomi sọm ḅẹsọ, ịn pẹlẹ-so tẹ ḅọrọ-so ḅa. À fomu-ḅara kẹ ị́ pịrị tẹ ḅẹsọ, à ḅarị jen-maaịn kẹ í fomu ḅịa.

¹³ Anịsakị mịọkụ arị ị́ ḅụụ ḅụ ọ̀ kọngọ sụa ikuye mẹ anyịma siin ḅa, tẹ ọmịna gboloma ma kan gala-gala ḅa.”

¹⁴ KỊNỊNYANAḄỌ ḅo ḅe í gboloma oloko sụa tẹ: “mịẹtẹ ị́ ẹrẹ goo gbamaso ḅẹ ye ḅarị paka ḅịa; ọmịna oru-atamụnọ ma tẹkẹ awarị ma ḅio àrị ọ́ kẹ ye kịkama kara aị na tẹmẹ-aị ma na pẹlẹ-siin fama ḅa. À ḍuḅu tẹlẹma ọ́ pịrị ḅa gbala ó sii kọnma-a ẹrẹsị.”

¹⁵ Tụndụ ma ọgọnọ oriḅe tẹ iḅi-oku ma ọkị-ḅoarị ḅọ ḅe aḅụọ-suku ma ḍikii, oriḅe tẹ dein ḍuko wasarị ḅọ ḅe! yei Juda, ọmịnị ọ́ fị-fị alalị ma fị, ọmịnị ó minini ịlọ ma sumaa, kẹ gotẹ ọkọ ḅẹẹarị, si-sịḅịḅio-sụaḅọ ḅe gbala-gbala ḅarị ḅo ọ́ da-paka ḅịa; ịkatakirikọn-a-ḅara ịn nwẹn kẹ pẹlẹ-so tẹẹ.