Mịẹfinji 5 - FỊAFỊA BAỊBỤLỤ

Iko Wararị Ḍiri Mẹ Na Anana Tụḅọ Ḅe Na

¹ À nwẹnị emine mẹ ọgọnọ lẹgị wararị ḅọ ḅe ama-ḅara ḅụ iko wararị ḍiri ẹrị; maa apakịrị ma ḅụ ye kẹẹ fama wararị, tẹ ịn sọnọma ḅiri ḅụ ye kẹ anị sara oḅolo wararị.

² Tẹ à gbọrụ opu kụrọtẹ enjẹlị ẹrịm, ò gele pọkọ kẹ olokuarị, “Tụḅọ ịn kẹ iko wararị ḍiri mẹ oḅolo wararị aị ma kpẹngbẹ sin tẹ anị finji gbẹẹ?”

³ Kụma So-ḅio-o, tomikiri-o, pịkị Ḍuḅu ḅio sọ, inetẹ iko wararị ḍiri mẹ finji tẹ anị ḅio ḍiki ḅẹ ḅọ ofori.

⁴ À nwẹnị kpọma owu, ini inetẹ iko wararị ḍiri mẹ finji tẹ anị ḅio ḍiki ḅẹ ḅọ ḍọkị-ẹrịa ẹrẹsị.

⁵ Anịtẹso omongiapụ ma ḅẹ gbọrụḅọ nwẹnị ị̀ ḅẹẹ, “Owu ma, ị́ na. Ḍikii! Juda ḅụ paka-ḅo ọkụkụ ḅe, Devidi furo ḅẹ opuḅọ ḅe, owu-ḅara-iḅi nyana tẹ; ori inetẹ sọnọma ye-oḅolo-aị ma kpẹngbẹ sin tẹ iko wararị ḍiri mẹ finji ḅa.”

⁶ Anịtẹso à gbọrụ Anana Tụḅọ ẹrịm, ori emine mẹ karakara ogboku sịẹsime wararị, tẹ Tamụnọ tẹmẹ inia aị ma na, omongiapụ ma na tọkọrọ mịẹ ò gbori-ikelema wararị. Anana Tụḅọ ḅe sime-ḅara gbala ini ọ̀ ḅaa ye ọkụ; ọ̀ sọnọma ịfalị na sọnọma atọrụngbọ na sụa wararị, arị atọrụngbọ ma anie Tamụnọ sọnọma atẹmẹ ma tẹ ịn kẹ bebe tomikiri mẹ fịrịma ikelema tẹ aị ma.

⁷ Anana Tụḅọ ḅe nwẹnị mu tẹ emine mẹ ọgọnọ lẹgị wararị ḅọ ḅe ama-ḅara ḅụ iko wararị ḍiri mẹ ọkị.

⁸ Ori ọkọ mịẹ sakị Tamụnọ tẹmẹ tẹ ḍumo wararị ini aị ma na, si inia omongiapụ finji ma na nwẹnị Anana Tụḅọ ḅe tọrọkọ iḅo. Ịna ḅụụ ọrụḅọ-ọrụḅọ ọbọ na golu-golu kụnụaị dọkịma ye na ọlọ wararị, ịn kụnụaị kẹ sụa, sụa ḅinma fama wararị, arị aị ma mie Tamụnọ atomi ma kọn-arị atẹkẹ ma.

⁹ Ịn nwẹnị ịwọ nume-su ḅẹẹarị: “Ị́yẹrị anie iko wararị ḍiri mẹ ọkị tẹ anị oḅolo aị ma kpẹngbẹ sin gbẹẹ ḅọọ. Kẹ gotẹ ọkọ ḅẹẹarị, ini ị́ ḅaam, tẹ ị́ agbamịẹ fịị ḅụ furo goyegoye na, ẹkwẹn-ḅịḅị goyegoye na, sịẹ goyegoye na, tomi-kụlọkụlọ goyegoye na ḅụ, ị́ kịnị fẹẹ ḅo Tamụnọ pịrị tẹ.

¹⁰ Ị́ ịn kẹ ama-da ḅẹ agbamịẹapụ mịẹ tẹ, ịn fịrịmẹnjị wamịna Tamụnọ ḅe pịrị tẹ pịkị tomikiri mẹ ḅụ ḅẹrẹtọn ḅẹ ḅara.”

¹¹ Tẹ à pịkị ḍikim, tẹ nwẹnị enjẹlị apụ naa, kịẹnkịẹn-ọkụ-ofori enjẹlị ogbo ẹndẹ-ẹndẹ na, puku-puku na ḅụ! Ịn sịẹ emine mẹ na Tamụnọ tẹmẹ ini aị ma na, omongiapụ ma na ikelema-koro,

¹² tẹ nwẹnị gele pọkọ kẹ mị nume mẹ su: “Ịn ḅaa Anana Tụḅọ ḅe anie kụrọ na, pẹrẹ na, nimi na, ịnyọ na, kụn na, ebube na, tokini na nyana gbẹẹ ḅọọ!”

¹³ Tẹ à nwẹnị Tamụnọ tẹmẹ ye goyegoye tẹ So-ḅio sime ye-o, kiri ọgọnọ sime ye-o, kiri suku-ḅio sime ye-o, abajị ḅio sime ye sọ, Tamụnọ tẹmẹ tẹ ḍumo wararị aị mamgba naa, so na kiri na ḅụ, inimgba nume-suarị: “Tokini na, kụn na, ebube na, opu kụrọ na, sime emine mẹ ọgọnọ lẹgị wararị ḅọ ḅe na Anana Tụḅọ ḅe na pịrị mu ḅẹẹ-sakị ḅẹẹ-sakị laa!”

¹⁴ Tamụnọ tẹmẹ tẹ ḍumo wararị ini aị ma nwẹnị pakịrị, “Amẹnị!” Tẹ omongiapụ ma nwẹnị ḅịkị-koro tẹ sunsin Tamụnọ pịrị.