Mịẹfinji 4 - FỊAFỊA BAỊBỤLỤ

So-ḅio Ḅẹ Apụ Sunsin Tamụnọ Pịrịarị

¹ Anị ḅo nwẹn la sakị à ḅo jen ịkịan ẹrị tẹ, tẹ So-ḅio ḅụ gbọrụ ḅọkọ finji saram. Tẹ tarị-pịrịpịrị-ḅụ à naa, ọdụ mẹ fie ḅara kẹ ẹkwẹn ị̀ pịrị pọkọ mẹ nwẹnị ḅẹẹ, “Iwo mịanga ḅo, tẹ à mị sakị mẹ ḅọrọ tẹ so sakị paka ḅẹ ye kẹ í ḍie.”

² Anị gbọrụ kiri Tẹmẹ ḅe nwẹnị ị̀ ọlọ kụrọma. Anịanga, so mẹ ḅio, gbọrụ emine sime tẹ gbọrụḅọ anị ọgọnọ lẹgị-sime wararị.

³ Ọ̀ gẹnịma-gẹnịma aḍụḅarị kama ḅara kamarị, ịn kẹ jasịpa na kanẹlịyanị na nwẹn-sịn aḍụḅarị ma ḅịya ḅara. Tẹ ẹmẹralịdi nwẹn-sịn ḍụḅarị ḅịyarị ḅara ḅẹ ogono emine mẹ ikelema-korom.

⁴ Ja sii ini emine finji ọkọrọ mịẹ tẹ emine mẹ ikelema-koro tẹ si inia omongiapụ finji arị ọgọnọ lẹgị, tẹ pịna-pịna akapa ḅiri tẹ golu ama-da sun sure wararị.

⁵ Tẹ opu emine mẹ ḅụ ḅalapụ-ḅalapụma kọrị paka bele na, so-gbururu fiearị ye na, so-alagba na paka-paka-ḅom. Emine mẹ tọrọkọ sọnọma atọnjọ tọnjị tẹ kọrị simem, anie Tamụnọ sọnọma atẹmẹ ma.

⁶ Paa pịkị emine mẹ tọrọkọ ḅụ gbọrsịḅị tẹmẹ-ḍikiye sime-ḅara sime ḅịyarị opu tọrụ sọ simem. Pakịrị-pakịrị mamgba ḅụ, ḍumo wararị Tamụnọ tẹmẹ ini aị emine mẹ gbori-ikelema simem, tẹ ịna ọḅụ na kuḅu na ḅụ tọrụngbọ-tọrụngbọ-tọrụngbọ.

⁷ Tarị ye ḅe ọkụkụ na kịkam; maaịn karama ye ḅe pootẹ-nambulo na kịkam; tẹrẹị karama ye ḅe tomḅọ tọrụ sụam; tẹ ini karama ye ḅe fiin-arị igo na kịkam.

⁸ Arị ḍumo wararị tẹ Tamụnọ tẹmẹ-aị ma gberie sonio apamba, sonio apamba-sụam; tẹ tọrụngbọ, tọrụngbọ, tọrụngbọ mie arị gbori-ikelema ye, ḅioju na ọḅụjụ na ḅụ. Ene ḅaka na ḍin na ḅụ in kuno-a ḅara kẹ nume su-su tẹ ḅẹẹarị: “Fịafịa, fịafịa, fịafịa anie KỊNỊNYANA-TAMỤNỌ Kụrọmamgba nyana ḅọ ḅe, ḅọrọtẹ sakị-o, mịọkụ-o, pịkị ḅo ḅarị sakị ḅụ sọ, emi ḅọ ḅe!”

⁹ Tamụnọ tẹmẹ tẹ ḍumo wararị ini aị ma nwẹnị nume su-su tẹ kẹ emine mẹ ọgọnọ lẹgị-sime ḅọ ḅe ebube na kụn na boma, tẹ ịmịẹtẹ kẹ ọ̀ ḅẹẹarị — anie ḍumo mu ḅẹ sakị, ḅẹ sakị laarị ḅọ ḅe. Ini ọkọ mịẹarị sakị,

¹⁰ si inia omongiapụ finji ma nwẹnị emine mẹ ọgọnọ lẹgị ḅọ ḅe tọrọkọ iḅo tẹ sunsin ọ̀ pịrịarị, anie ḍumo mu ḅẹẹ-sakị ḅẹẹ-sakị laarị ḅọ ḅe. Ini ịna ama-da sun ma kẹ emine mẹ tọrọkọ gbin koroma tẹ ḅẹẹarị,

¹¹ “Wanyanaḅọ, pịkị wamịna Tamụnọ! Ị́ ebube na, kụn na, kụrọ na nyana gbẹẹm. Kẹ gotẹ ọkọ ḅẹẹarị, ị́yẹrị ye mẹmgba tẹmẹm, tẹ ị́ ḅụụ-ḅẹlẹm ẹrẹsị arịmgba emi tẹ ḍumoarị.”