Mịẹfinji 3 - FỊAFỊA BAỊBỤLỤ

Kẹ Sadisi Fịrịma Oku Mẹ

¹ “Mị ḍiri mẹ kẹẹ tẹ kẹ Sadisi ḅẹ sọsị mẹ ḅẹ enjẹlị ḅe fịrịmaa: “Mie Tamụnọ sọnọma atẹmẹ ma na, sọnọma lolia ma na nyana ḅọ ḅe kẹ fịrịma oku mẹ. Ị́ mịẹarị ye mẹ à nimi wararị; ị́ fịị wararị tẹ kịnị mamgba ḍumo wararị ḅọ kẹ ị́ sịn-arị ye mẹ à nimim!

² Ọkọẹrẹsị, mono ḅụ saakị tẹ ị́ ḅụụ kọn wararị ịnyọ mẹ mịẹ kụrọma, tẹrẹmẹ anị ḅo biin koro ḅẹ sakị la. Kẹ gotẹ ọkọ ḅẹẹarị, à ḍọkị-ẹrịm mịnẹ ị́ kọrị tẹ kọrịnama mẹ ị̀ Tamụnọ tọrọkọ ḅụ anị paa amụ bebe ye sọ-a.

³ Ọkọẹrẹsị ịn kẹ í toluma tẹ ị́ naa tẹ ye mẹ kẹ ḅiokoromaa; anị ḍiki anga tẹ ị́ asi ḅụ pịkịị. Í mono mẹ ḅụ saakị-a ḅẹḅẹ, à ḅo ị́ la ḅa, furuḅọ ḅo ḅara, tẹ à ḅo ḅarị sakị í nini ḅịa.

⁴ Kụma Sadisi mẹ ḅụ ọmịna ḅụ boowa apụ emi tẹ amịna akapa wẹrị fịafịama wararị. Ọmịnị mie pịna-pịna kapa sụa tẹ ị̀ na mẹnjị ḅarịye; ọmịnị ọkọ mịẹ gbẹẹm ẹrẹsị.

⁵ Owu-ḅara-iḅi apụ ma mị-ḅara kẹ pịna-pịna akapa sụa ḅa, tẹ ḍumo wararị apụ ẹrẹ kẹ sụarị ḍiri mẹ ḅio àrị ịna ẹrẹ sin ḅịa. Ị̀ Ḍa ḅe na ori enjẹlị apụ ma na tọrọkọ ḅụ à giregire ḅara kẹ ḍuko pakama ḅa mịnẹ ini ma in sime ị̀ pịrịm.

⁶ “Ọkọẹrẹsị, ó ḅeri nyana tẹ kẹ ye naarị ḅẹḅẹ ọ́ Tẹmẹ ḅe ḍuko sọsị ma pịrịarị ye mẹ pokii!

Kẹ Fịladẹlịfịya Fịrịma Oku Mẹ

⁷ “Mị ḍiri mẹ kẹẹ tẹ kẹ Fịladẹlịfịya ḅẹ sọsị mẹ ḅẹ enjẹlị ḅe fịrịmaa: “Miemẹ anie fịafịa tẹ pịkị karakara wararị ḅọ ḅe ḅara ḅo oku mẹ. Ori anie Devidi sambị mẹ ọlọ ḅọ, tẹ ḅọkọ finji kụma inetẹ gbaịn ḅẹ ḅọ ofori, pịkị gbaịn kụma inetẹ finji ḅẹ ḅọ ofori, ḅọ ḅe.

⁸ Ị́ mịẹarị ye à nimi wararị; à nimim ị́ kụrọ kalịye nyana wararị ḅara. Ị́ ì tolumaye mẹ ḍukamẹnjị tẹ sịẹsime ị̀ pịrị wararị. Ị́ tọrọkọ à ḅọkọ finji sara tẹ, anie gbọrụḅọ-sọ inetẹ gbaịn ḅịa ye mẹ.

⁹ Ị̀ Pokii! Anị sime Ekwesu pịrị ogbo mẹ kụma, iruo apụ ma, tẹ Juu-ḅẹ-apụ-a tẹ amịna ḅụụ kẹ Juu-ḅẹ-apụ sịn-arị apụ ma, à mịẹtẹ in ḅo ị́ aḅụọ-suku kparakị ḅa. Tẹ inimgba nimi ḅa mịnẹ àrị ị́ ḅẹlẹmarị.

¹⁰ Ị́ à tọnm inema ḅẹ ḅara mẹ mịẹ tẹ ẹrẹsị, arị ị́ koko kpaịnma ḅa, ḅo tomikiri mẹ gbaịn ḅarị ḅụụ-fụka tẹ tomikiri ḅẹ atomi mamgba daaḍiki ḅarịye mẹ ḅụ.

¹¹ À ḅoarị ala-a sakị ḅụ. Ị́ ọlọ ye ọlọ kpaịnmaa, mịẹtẹ gbọrụḅọ-sọ owu ị́ ḅara iḅi tẹ ị́ nyana ḍiepịrịye mẹ pụkọ-ọkị ḅịa ḅara.

¹² Owu-ḅara-iḅi ḅọ mẹ àrị mḅọ kẹ ị̀ Tamụnọ ḅe warị mẹ ḅẹ gbọrụ ḅeriye mịẹ ḅa, tẹ mḅọ ḅarị anị koroma-so ḅịa. Mḅọ ọgọnọ ḅụ àrị ị̀ Tamụnọ ḅe ẹrẹ na, ị̀ Tamụnọ ḅe ama mẹ ẹrẹ na, Ịwọ Jeruselemu mẹ tẹ So-ḅio ị̀ Tamụnọ ḅe ḅara ḅụ ḅo ye mẹ na kẹ kẹẹ ḅa. Ị̀ ịwọ ẹrẹ mẹ sọ à kẹ mḅọ ọgọnọ ḅụ kẹẹ ḅa.

¹³ “Ọkọẹrẹsị, í ḅeri nyana tẹ kẹ ye naarị ḅẹḅẹ, Tẹmẹ ḅe ḍuko sọsị ma pịrịarị ye mẹ pokii!

Kẹ Lahodisiya Fịrịma Oku Mẹ

¹⁴ “Mị ḍiri mẹ kẹẹ tẹ kẹ Lahodisiya ḅẹ sọsị mẹ ḅẹ enjẹlị ḅe fịrịmaa: “Mie Amẹnị ḅe ḅara ḅo oku mẹ, ḅioḅẹngbọ kẹ ḅụụ ḅụ gbana na-iḅi, karakara ḅẹrẹ kiri sime ḅọ ḅe, anie Tamụnọ tẹmẹ-aị mamgba ḅẹ ḅẹrẹtọn ḅọ ḅe.

¹⁵ Ị́ kọrị tẹ kọrịnama mẹ à nimi wararị; à nimi wararị mịnẹ ị́ ọfịrị-a, ị́ pịkị oḅoku-a. Mimgbe anị ị̀ ḅụụ ḅẹlẹ lama tẹ, mịnẹ ị́ ọfịrịm, anịanịa ị́ oḅokum.

¹⁶ Kụma ị́ mẹmẹ wararị ẹrẹsị, anie ị́ ọfịrị-a, ị́ pịkị oḅoku-a mẹ, àrị í osoro pakama ḅa ị̀ ḅịḅị ḅio ḅụ!

¹⁷ Ị́yẹrị mẹẹ, ‘Àrị ngọ-kọn wararị, tẹ ye ị̀ na iḅi fama wararị; à ḅiiarị ye goyegoye à nyana tẹ.’ Kụma ye si ị́ pịrị la ḅara na, ị́ sịḅị-jịrịma ḅara simearị mẹ na, í nimi-a! Ị́yẹrị, í igoin wararị, ị́ paụ wararị, tẹ ị́ tọrụngbọ pịkị pụụn wararị.

¹⁸ Ọkọẹrẹsị àrị ị́ ḅẹẹarị, ị̀ ḅara golu fẹẹ, iḅi golu, mịẹtẹ ị́ ngọ-kọn ḅarị ḅara. Pịna-pịna ḅịtẹ sọ fẹẹ tẹ kẹ ị́ ḅụụ ḅirimaa, tẹ kẹ ị́ paụ mẹ kikimaa. Olo sọ fẹẹ tẹ kẹ ị́ atọrụngbọ tan, mịẹtẹ í ye ẹrị ḅarị ḅara.

¹⁹ À ḍiki ịganị tẹ fomu-ḅara kẹ pịrịarị apụ mamgba anie à ḅẹlẹmarịapụ. Ọkọẹrẹsị, ḅụụ sarasara tẹ ị́ asi ḅụ pịkịị.

²⁰ Pokii! À ḅọkọ anga sịẹ tẹ ḅọkọ mẹ ḅakụarị, ị̀ pọkọ lekiri tẹ ḅọkọ mẹ finji ị̀ pịrị ḅọ emi-emii, à sọ mḅọ warị ḅio mu tẹ mḅọ na fịye fị ḅa, tẹ mḅọ ị̀ na fị gboloma ḅa.

²¹ Owu-ḅara-iḅi nyana apụ ma à kụrọ kẹ ịn pịrị tẹ ini ị̀ na palịa ḅa ì emine ọgọnọ ḅụ, anie yẹrị sọ owu-ḅara-iḅi nyana tẹ mịọkụ ị̀ Ḍa na palịa wararị ḅara, ori emine ọgọnọ ḅụ.

²² “Ọkọẹrẹsị, í ḅeri nyana tẹ kẹ ye naarị ḅẹḅẹ, Tẹmẹ ḅe ḍuko sọsị ma pịrịarị ye mẹ pokii!”