Mịẹfinji 22 - FỊAFỊA BAỊBỤLỤ

¹ Enjẹlị ḅe pịkị ḍumo minji tọrụ kẹ ì ḍiem, anị kịọnkịọn-arị, kirisitalị nwẹn-sịn ye mẹ sime-ḅara, tẹ Tamụnọ na Anana-Tụḅọ ḅe na emine mẹ ḅụ mie anị sarasara paka ḅoarị ye,

² tẹ anị opu ama mẹ ḅẹ etela mẹ ogboku ḅụ puu ḅọrọarị. Tọrụ mẹ akaka ḅẹ maa apakịrị ma ḅụ, ḍumo sịn simem, tẹ kụra oyi maa asakị finji-finji kẹ sụarị, anie akalụ gbọrụ sakị gbọrụ sakị, anị nwẹn kẹ sịnmgbọlụ sụarị. Tẹ anị ḅẹ ịnyịnya ma anie ịn kẹ tomikiri ḅẹ asịẹ ma gwọ ḅarịye.

³ Opu ama mẹ ḅio Tamụnọ woritẹ gberie-sọ sime ḅịa. Tamụnọ na Anana-Tụḅọ ḅe na emine mẹ opu ama mẹ ḅio sime tẹ ori afịrịmẹnjịapụ ma sunsin ọ̀ pịrị ḅa.

⁴ Ini ọ̀ tọrụkuḅu ẹrị ḅa, tẹ Tamụnọ ori ẹrẹ kẹ ịna afụḅara ḅọkọ kẹẹ ḅa.

⁵ Ene ḅarị jen kẹ ḍiin ḅịa, tẹ ịn ḅarị pịkị tọnjọ na ịrụa bele na ḅii ḅịa, gbala KỊNỊNYANA-TAMỤNỌ ḅe bele sọ ịn pịrị ḅa, tẹ ini ama-da ḅara kẹ ḅẹrẹtọn gbamaso ḅa.

Jizọsị Ala-a Ò Ḅo Ḅarị Mẹ Ḍukom

⁶ Anịtẹso enjẹlị ḅe nwẹnị ị̀ ḅẹẹ, “Mịna ẹkwẹn ma karakaram, pịkị kẹ ḅiokpọma na-iḅim, KỊNỊNYANA-TAMỤNỌ ḅe, tẹ amịna Tẹmẹ kẹ ịkịankoroapụ ma pịrịarị ḅọ ḅe, ori enjẹlị fịrịma tẹ ori ala-a sakị ḅụ paka ḅarị ye mẹ kẹ ori afịrịmẹnjịapụ ḍie tẹẹ.”

⁷ Jizọsị ḅẹẹarị, “Pokii! Ala-a sakị à ḅo ḅa! Mị ḍiri mẹ ḅio simearị ịkịankoroḅọ ẹkwẹn ma minini tẹ arị koro ḅara mịẹ apụ ma ḅioḅẹlẹ sime ịn pịrịm!”

⁸ Yẹrị, Jọnị, mịna aị mamgba naa tẹ pịkị ẹrị tẹẹ. Àrị arị naa tẹ pịkị ẹrị fama tẹso, à nwẹnị mịna aị ma kẹ ì ḍie enjẹlị ḅe ḅụọ-suku ḅịkị-koro tẹ ọ̀ tẹkẹ ḅẹ tọn.

⁹ Kụma ori ị̀ dasịẹma tẹ ḅẹẹm, “Ọkọ mịẹ ma! Yẹrị na ị́yẹrị na, ị́ amịnapụ ịkịankoroapụ ma na, inimgba tẹ mị ḍiri mẹ ḅio simearị ẹkwẹn ma minini tẹ mịẹarị apụ mamgba na, pembema fịrịmẹnjịḅọ. Sunsin Tamụnọ pịrịị!”

¹⁰ Tẹ ọ̀ nwẹnị ị̀ ḅẹẹ, “Mị ḍiri mẹ ḅio simearị ịkịankoroapụ ẹkwẹn-aḅịḅị ma ḅọị ma, kẹ gotẹ ọkọ ḅẹẹarị, ala-a sakị ḅụ mie mẹmgba paka ḅa.

¹¹ Si-ḅọ emi ḅẹḅẹ, mḅọ sii ma-muu, anịsakị muno-muno ḅara sime ḅọ emi ḅẹḅẹ, mḅọ ọkọ sime ma-muu; iḅi-ḅọ emi ḅẹḅẹ, mḅọ iḅi ma-muu; tẹ fịafịaḅọ emi ḅẹḅẹ, mḅọ fịafịa ma-muu.”

¹² Jizọsị mẹẹ, “Pokii! Ala-a sakị ḅụ à ḅo ḅa! Àrị à kẹ ọrụḅọ-ọrụḅọ gbẹẹ ḅẹ aị kẹ ḅo ḅa, tẹ mḅọ mịẹye ḍiki mḅọ gbẹẹ ḅa.

¹³ Yẹrị anie Alịfa ḅee, pịkị Omega ḅee; ye suku saakị, pịkị anị ḅẹ kunoma!”

¹⁴ Amịna akapa sịkịrị fịafịama tẹ ẹrẹsị ḍumo sịn mgbọlụ mẹ fị kụrọ nyana tẹ, pịkị onu aḅọkọ ma ḅụ ḅọrọ opu ama mẹ ḅio sọ-mu ḅẹ apụ ma, ḅioḅẹlẹ sime ịn pịrịm.

¹⁵ Kụma opu ama mẹ ḅio sọ-a apụ ma anie amịna ḍumo kọn pengemarị apụ na, ḍiri ibiam tii-arị apụ na, ḅụụ kpaịnma-a ḍumo kọn-arị apụ na, kịnị-ḅaapụ na, oru tẹkẹ apụ na, pịkị iruo-apụ na, ịn kọn-arị ẹkwẹn ma na ịna amịẹaị na ḅụ.

¹⁶ “Yẹrị, Jizọsị, ì enjẹlị fịrịmam mịnẹ ọ̀ mịna aị ma ḍuko ọmịnị sọsị ma ḅẹ atomi ma pịrịị. Yẹrị, Devidi furo ḅụ à pakam, yẹrị anie kamarị ḅaaso Lolia ḅee.”

¹⁷ Tẹmẹ ḅe na Ịya ḅẹ ẹrẹḅọ ma na mẹẹ, “Ḅoo!” Miemẹ naa ḅọ, naa ḅọ sọ tẹ ḅẹẹ, “Ò ḅoo!” Minji pọkọ tarị ḅọ, tarị ḅọ ḅoo; ḅii ḅọ, ḅii ḅọ ḅo ḍumo minji mẹ ọkị ḅuu, ḍiepịrịye ḅara ḅụ.

Jọnị Mịẹfinji Ọ̀ Pịrị-aị Ma Ḍuko Gbaịn

¹⁸ Yẹrị, Jọnị, tẹmẹ-la ḅara kẹ ḅẹḅọ-ḅẹḅọ, tẹ mị ḍiri mẹ ḅio simearị ịkịankoroapụ ẹkwẹn-aḅịḅị ma naa ḅọ ḅeri nụnụarị: ye kẹ árị ḅụ sụa ḅọ sụa ḅọ, Tamụnọ mị ḍiri mẹ ḅio in ḍuko finji wararị ḅụụ-fụka ma kẹ mḅọ fomu-ḅara ḅụ sụa ḅa.

¹⁹ Tẹ mị ḍiri mẹ ḅio simearị, ịkịankoroapụ ẹkwẹn-aḅịḅị ma ḅụ ye sin ḅọ sin ḅọ, Tamụnọ ḍumo sịn mẹ ḅẹ sịnmgbọlụ mẹ ḅụ na, Fịafịa Opu Ama mẹ ḅio na ḅụ, mḅọ la kiri mẹ ọkị ḅa, mḅọ ḅara ḅụ, mị ḍiri mẹ ḅio ịn ḍuko finji ḅara ḅụ.

²⁰ Mie-mẹmgba nimi tẹ ḍukoarị ḅọ ḅe ḅẹẹarị, “Inn, karakarayee! Ala-a sakị ḅụ à ḅo ḅa!” Anị ọkọ simee. KỊNỊNYANAḄỌ Jizọsị, ḅoo!

²¹ Yee KỊNỊNYANAḄỌ Jizọsị ḍiki-ḅụụjịrị mẹ ọrụḅọ-ọrụḅọ na sime. Amẹnị.