Mịẹfinji 21 - FỊAFỊA BAỊBỤLỤ

Ịwọ So Mẹ Na Ịwọ Kiri Mẹ Na

¹ Anịtẹso à nwẹnị ịwọ So na ịwọ Kiri na ẹrị. Tarị sime So mẹ na Kiri mẹ na kịnị ḅarị ẹrị-a, tẹ abajị mẹ sọ mẹnịma-faam.

² Tẹ à nwẹnị Fịafịa Opu Ama mẹ, anie Ịwọ Jeruselemu mẹ, ẹrị, Tamụnọ So-ḅio anị kẹ fịrịmarị, tẹ ịn kẹ diḅọ pịrị ḅẹ-muarị ịwọ ẹrẹḅọ tẹlẹma kẹrẹịnma ḅara kẹ anị tẹlẹma kẹrẹịnma wararị.

³ À nwẹnị emine mẹ ọgọnọ lẹgị ḅọ ḅe gele pọkọ kẹ kọn ẹkwẹn naa, “Mịọkụ Tamụnọ ḅo tomina ogboku anga tẹẹ! Ori ini na sime ḅa, tẹ ini ori atomi sọ ḅa. Tamụnọ ḅarana ini na sime tẹ ịna Tamụnọ sọ ḅa.

⁴ Ori ịna atọrụ ḅẹ owu-minji mamgba sin ḅa. Fị ḅarị jen-maaịn kẹ paka ḅịa; kururu na, owu na, akụ na sọ ḅarị paka ḅịa. Elemu aị ma ḅọrọ so tẹẹ.”

⁵ Anịtẹso emine mẹ ọgọnọ lẹgị wararị ḅọ ḅe nwẹnị ḅẹẹ, “Tẹ mịọkụ à ye mamgba mịẹ ịwọma tẹẹ!” Ọ̀ pịkị ị̀ ḅẹẹm, “Miemẹ kẹẹ koromaa, kẹ gotẹ ọkọ ḅẹẹarị, mịna ẹkwẹn ma karakara ẹkwẹn, tẹ tomi pịkị arị kẹ ḅiokpọma na-iḅim.”

⁶ Tẹ ọ̀ nwẹnị ḅẹẹ, “À kọrị fama tẹẹ! Yẹrị anie Alịfa ḅee, pịkị Omega ḅee, ye ḅẹ suku-saakị, pịkị anị ḅẹ kunoma. Minji ḅuu pọkọ-tarịarị ḅọ emi ḅẹḅẹ, à kụrọ pịrị tẹ mḅọ ḍumo ngụngụḅa minji ḅuu ḅa, ye gbẹẹ-a ḅara ḅụ.

⁷ Owu-ḅara-iḅi mẹ nyana ḅọ, nyana ḅọ ị̀ ḅara ḅụ miemẹ nyana ḅa: yẹrị mḅọ Tamụnọ sọ ḅa, mḅọ pịkị ị̀ tụḅọ sọ ḅa.

⁸ Kụma mịẹ ḅẹ ye ẹrị tẹ ḅụụ gwẹ-gwẹarị apụ na, tomi kẹ ja apụ ḅara-ḅio dẹrịmarị apụ na, amịna ḍumo kọn pengemarị apụ na, kịnị-ḅaapụ na, ḅụụ wẹrị kpaịnma-a apụ na, ḍiri ibiam tii-arị apụ na, oru tẹkẹ apụ na, iruo apụ mamgba na, arị atomi ma sime anga anie, ọpọlị balị kọrị ḅara kọrịarị tọrụ mẹ ḅio, aniemẹ anie maaịn karama fịị mẹ.”

Ịwọ Jeruselemu Mẹ

⁹ Kunoma sọnọma ḅụụ-fụka ma sime sọnọma abọlị ma ọlọ sọnọma enjẹlị ma ḅẹ gbọrụḅọ ị̀ dama-ḅo tẹ ḅẹẹm, “Ḅo tẹ arị ịn kẹ Ịya pịrị ḅẹ ẹrẹḅọ ma kẹ í ḍie, Anana Tụḅọ ḅe taḅọ ma.”

¹⁰ Tẹmẹ ḅe nwẹnị ị̀ ḅụụ sọ, tẹ ḅẹrẹtọn ị̀ pịrị, tẹ enjẹlị ḅe nwẹnị ị̀ kẹ mu gele lamatẹ gbọrụ tụndụ ọgọnọ ḅẹ kunoma jụ la tẹ Jeruselemu, Fịafịa Opu Ama mẹ, kẹ ì ḍie, anị Tamụnọ ḅara sime tẹ So-ḅio koro-ḅoarị,

¹¹ tẹ anị Tamụnọ ebube mẹ na kamarị. Opu ama mẹ ḅịya mẹ, yela lamarị ḍụḅarị, tẹ ịn kẹ jasịpa sịn ye mẹ na kịkam, tẹ yori-yorima ḅịyarị, kirisitalị nwẹn-sịn tẹmẹ-ḍikiye ḅịya ḅara famam.

¹² Ḍụḅatẹ, gele wararị onu ama mẹ ikelema-korom, tẹ oyi maa ḅọkọ finji, tẹ oyi maa enjẹlị finji ḍikiḍikiarị aị anị nwẹn nyanam. Onu aḅọkọ ma ḅụ ini Izirẹlị ḅẹ oyi maa afuro finji ma ẹrẹ ma kẹ kẹẹ wararị.

¹³ Onu mẹ ini apakịrị nyanam, tẹ gbọrụ pakịrị tẹra aḅọkọ, tẹra aḅọkọ, mie ịn ḅọkọ ma sụa ḅara. Ịrụa mẹ saakị pakarị anga mẹ da pakịrị mẹ tẹra aḅọkọ, abajị da pakịrị, tẹra aḅọkọ; ọgọnọ-jụ da anga, tẹra aḅọkọ; tẹ ịrụa mẹ tuuideriarị pakịrị anga mẹ da pakịrị mẹ, pịkị tẹra aḅọkọ.

¹⁴ Opu ama mẹ ḅẹ onu mẹ nyana ye oyi maa sukutarị-aḍụḅarị finji, tẹ arị ọgọnọ Anana Tụḅọ ḅe oyi maa fịrịmẹnjịapụ finji ma ẹrẹ kẹẹ wararị.

¹⁵ Ẹkwẹn ị̀ pịrị enjẹlị ḅe ḅara golu ye-tọnye simem, tẹ ọ̀ kẹ opu ama mẹ na, anị ḅẹ onu aḅọkọ ma na, onu mẹ na tọn ḅẹm.

¹⁶ Opu ama mẹ ḅẹ finji na nangwọ na gbasị-kịrịrịkwaị wararị. Enjẹlị ḅe golu ye-tọnye mẹ kẹ opu ama mẹ tọnm; tẹ anị nwẹnị tombi sonio ẹndẹ pembe ye paka. Anị ḅẹ nangwọ mẹ la ḅara mie finji mẹ sọ la ḅara, anie gele mẹ sọ la ḅara.

¹⁷ Enjẹlị ḅe onu mẹ tọn sakị ori ẹrịm anị ḅẹ gele mẹ kuḅu atesi pembe ye, anie anị sakị ḅụ ịn kẹ ye-tọnye sime-ḅara ḅụ.

¹⁸ Onu mẹ ịn kẹ jasịpa sịn ḍụḅarị ịn nwẹn kẹ anị namam, tẹ opu ama mẹ ḅioju kụma karakara golu tọrụngbọ mie ịn kẹ anị nama ye, anị nwẹnị yori-yorima tẹmẹ-ḍikiye ḅịya ḅara ḅịyarị.

¹⁹ Opu ama mẹ ḅẹ onu mẹ ḅẹ sukutarị-aḍụḅarị ma kpọma ye la lamatẹ, kịrị-kịrị aḍụḅarị, mie ịn kẹ arị ḅirima ye. Tarị sukutarị-ḍụḅarị mẹ ẹrẹ jasịpa; maaịn karama ye, safaya; tẹrẹị karama ye, ageti; ini karama ye, emiralịdị;

²⁰ sọnọ karama ye, ọnịkịsị; sonio karama ye, kanẹlịyanị; sọnọma karama ye, odo tọrụ sụatẹ ịn kẹ kwatisi sịn ḍụḅarị; nine karama ye, bẹrịlị nwẹn kẹ anị sịnm; eseni karama ye, tọpazị; oyi karama ye, kalisidọnị; oyi gberie finji karama ye, tọrkwẹsị; tẹ oyi maaịn finji karama ye, amẹtisi.

²¹ Oyi maa aḅọkọ finji ma pịkị oyi maa pahalị finji, gbọrụ ḅọkọ gbọrụ pahalị, gbọrụ pahalị. Opu ama mẹ etela mẹ golu mie ịn kẹ anị sara ye, tẹ anị nwẹnị yori-yori tẹmẹ-ḍikiye ḅịya ḅara ḅịya.

²² Opu ama mẹ ḅio à Tamụnọ-warị ẹrị-a, gbala Kụrọmamgba Nyana KỊNỊNYANA-TAMỤNỌ ḅe na, Anana Tụḅọ ḅe na warị sọ ịn pịrị wararị ẹrẹsị.

²³ Opu ama mẹ ịrụa na akalụ na bele ḅii-a, gbala Tamụnọ ebube mẹ ḅịya anị saramarị, tẹ Anana Tụḅọ ḅe pịkị tọnjọ sọ anị pịrị wararị ẹrẹsị.

²⁴ Tomikiri ḅẹ atomi ma anị ḅẹ bele mẹ ḅụ tọrụ ye ẹrị tẹ mẹnjị ḅa, tomikiri ḅẹ amadapụ ma ịna ngọ ma kẹ ḅo anị ḅio suu ḅa.

²⁵ Opu ama mẹ ḅẹ onu aḅọkọ ma finji sara sime ḅa, bebe ene mamgba; gbala-gbala ini arị gbaịn ḅịa, ene ḍin ḅịa ẹrẹsị anịanga ḅụ.

²⁶ Tomikiri ḅẹ asịẹ ma opu mẹ na, ịna ngọ ma na ịn kẹ ḅo opu ama mẹ ḅio suu ḅa.

²⁷ Kụma fịafịa-a gberie-sọ opu ama mẹ ḅio sọ-mu ḅịa, ḅẹḅọ-ḅẹḅọ tẹ ḅụụ-jịrịma aị mịẹarị ḅọ, anịanịa iruo aị ḍukoarị ḅọ, sọ sọ-mu ḅịa. Ẹrẹ Anana Tụḅọ ḅe ḍiri mẹ, tẹ in ḍumo wararị apụ ẹrẹ kẹ kẹẹ koroma wararị ye mẹ ḅio simearị apụ ngẹrị mie ama mẹ ḅio sọ-mu ḅarịye.