Mịẹfinji 20 - FỊAFỊA BAỊBỤLỤ

Kụra Maa Ẹndẹ Oyia Asi Finji Ma

¹ Anịtẹso à So-ḅio sime tẹ koro-ḅoarị gbọrụ enjẹlị ẹrịm, ọ̀ ḅara ḅụ kẹ pokolo ideri-mu kunoma la la-a olulu mẹ finji ḅẹ sambị na ikuarị ikoli na emi.

² Ọ̀ nwẹnị gịẹsịma anị mamataḅaye ologboingboin opu nama, tẹ ịn kẹ daragọnị sịn ye ḅe kun koroma, anie elemu sakị ḅẹ ododo ḅe tẹ ịn kẹ Si-ḅọ, anịanịa Ekwesu sịn ḅọ ḅe, tẹ ọ̀ nwẹnị ikoli mẹ kẹ ori ịkasị koroma, mịnẹ ori ọkọ sime nwenii kụra maa ẹndẹ oyia asi finji la.

³ Enjẹlị ḅe nwẹnị ọ̀ kẹ pokolo ideri-mu kunoma la-laa olulu mẹ ḅio gbin suu, tẹ anị ḅẹ ḅọkọ mẹ ịkasị oḅolo kpaịnma, mịẹtẹ ọ̀ ḅarị inetẹ jen kẹ oḅori kẹ tomikiri ḅẹ asịẹ ma sịn ḅịa ḅara, nwenii kụra maa ẹndẹ oyia asi finji ma ḅọrọ sakị la. Anị sakị mẹ ḅọrọ sakị ini ọ̀ ḅụ ḅara-siin tẹ ò boowa kala-sakị kẹ ò ḅio tọn ye, tọn ye mịẹ ḅa.

⁴ Anịtẹso à pịkị tọnwa emine ẹrịm, tẹ ịn kụrọ kẹ arị ọgọnọ lẹgị apụ ma pịrịm mịnẹ ịn kẹ ḅẹrẹ kọn. À pịkị Jizọsị ḍie-pakama karakara mẹ na Tamụnọ ẹkwẹn mẹ na ḍuko wasamam ẹrẹsị ịn ḅaa tẹ apụ ma atẹmẹ ma sọ ẹrịm. Ini ma amụ ịn sunsin kịnị ḅaa, ḅaa opu nama ḅe na ọ̀ fụḅara mẹ na pịrị-a, ori elekima mẹ sọ amụ ịn kẹ ịna afụḅara ḅọkọ anịanịa ịna aḅara ḅụ sụa-a. Ịn fị-ḅụ-saakị tẹ Kịrayịsị na sọ tẹ kụra maa ẹndẹ oyia asi finji kẹ ama-da tẹ ḅẹrẹtọnm.

⁵ (Kirikọn fịtẹ-apụ ma ịn saakị-a, nwenii kụra maa ẹndẹ oyia asi finji ma karam.) Mie tarị fị-ḅụ-saakị mẹ.

⁶ Mị tarị fị-ḅụ-saakị mẹ ḅụ sọ apụ ma ịn kpọma boma tẹ pịkị ḅioḅẹlẹ tẹ. Maaịn karama fịị mẹ ḅarị ịna ḅụ kụrọ nyana-a; ini agbamịẹapụ sọ Tamụnọ na Kịrayịsị na pịrị ḅa, tẹ ịn pịkị ori na sọ tẹ kụra maa ẹndẹ oyia asi finji kẹ ḅẹrẹtọn ḅa.

Owu Ekwesu Ḅara Siinm

⁷ Kụra maa ẹndẹ oyia asi finji ma ḅọrọ tẹ ḅẹḅẹ, ini Ekwesu ḅụụ ḅara sin tẹ ori ikoli mẹ ḅio paka-ḅo tẹ ò ḅio tọn-ye tọn-ye mịẹ ḅa,

⁸ tẹ ò mu bebe tomikiri mẹ kana-koro ḅụ simearị asịẹ ma toluma ḅa, anie Gọgụ na, Magọgụ na ma. Ekwesu ịna ọmụapụ ma sịn kobiri ḅo tẹ ini ọmụ gbin ḅa. Tuḅu ọgọnọ ḅẹ onwin mẹ kịẹn-ḅịḅị nimi ḅọ, nimi ḅọ ịna kịẹn-ḅịḅị nimi tẹ.

⁹ Bebe tomikiri mẹ ḅụ in sime tẹ ḅo tẹ ọkọrọ mịẹ Tamụnọ atomi ma sime-anga mẹ na Tamụnọ ḅẹlẹmarị opu ama mẹ na ikelema-korom. Kụma kọrị-fịnị So-ḅio sime tẹ koro ḅo ịn dọkịma ḅaa famam.

¹⁰ Anịtẹso Si-ḅọ ḅe tẹ ịn toluma ḅo mị ḅụụ-fụka mẹ ḅio suu ḅọ ḅe kịnị ọ̀ kẹ mu ọpọlị kọrị ḅara kọrịarị fịnị tọrụ ḅio gbin suum, anie ịn kịnị-ḅaaḅa opu nama ḅe na iruo ịkịankoroḅọ ḅe na kẹ tarị gbin suu tẹ anga mẹ; tẹ ini akụye da ḅa eneḅaka na ḍin na ḅụ, nwenii mu ḅẹ sakị, ḅẹ sakị la ḅa.

Kunoma Ḅẹrẹkọn Mẹ

¹¹ Anịtẹso à pịna-pịna emine na anị ọgọnọ lẹgị ḅọ ḅe na ẹrịm. Tẹ So na Kiri na ọ̀ tọrọkọ mangị faam, tẹ kịnị ḅarị jen kẹ arị ẹrị-a.

¹² Tẹ à nwẹnị fịtẹ-apụ ma ẹrị, opu na kala na emine mẹ tọrọkọ sịẹsime wararị. Ḍiri finji finji sara wararị, tẹso ịn nwẹnị jen gbọrụ ḍiri finji, anie ḍumo wararị apụ ḍiri mẹ. Ịn nwẹnị fịtẹ-apụ ma kọn, ịn mịẹ tẹ ḍiri ma ḅio kẹẹ koro wararị aị ma mie in ḍiki tẹ ịn kọn yee.

¹³ Anịtẹso tọrụ mẹ nwẹnị anị ḅio simearị fịtẹ-apụ ma pakama-ḅo. Fị na Ḍuḅu ḅio na sọ ịna aḅara simearị fịtẹ-apụ ma pakama-ḅom, tẹ inimgba ịn mịẹ tẹ aị mie in ḍiki tẹ ịn kọn yee.

¹⁴ Anịtẹso Tamụnọ nwẹnị Fị na Ḍuḅu ḅio na kẹ kọrị-fịnị tọrụ mẹ ḅio gbin suu. (Mị kọrị-fịnị tọrụ mẹ anie maaịn karama fị mẹ.)

¹⁵ Ḍumo wararị apụ ma ḍiri mẹ ḅio ẹrẹ ofori ḅọ, ofori ḅọ ini mḅọ kẹ kọrị-fịnị tọrụ mẹ ḅio gbin suum.