Mịẹfinji 2 - FỊAFỊA BAỊBỤLỤ

Kẹ Ẹfisọsị Fịrịma Oku Mẹ

¹ “Mị ḍiri mẹ kẹẹ tẹ kẹ Ẹfisọsị ḅẹ sọsị mẹ ḅẹ enjẹlị ḅe fịrịmaa: “Mie sọnọma alolia ma kẹ amịna ama-ḅara ḅụ ọlọ tẹ, sọnọma golu tọnjọ gbana aị ma ogboku mẹnjịarị ḅọ ḅe, kẹ fịrịma oku mẹ.

² Ị́ kọrị tẹ kọrịnama mẹ à nimi wararị. Ị́ kpọma ḅụụ kọsị tẹ kọrị kọrịnama mẹ à nimim; ị́ pịkị ye-inema la ḅara mẹ sọ. Ị́ ḍụkụ si-mịẹapụ pịrị pịrị-a ḅara mẹ sọ à nimim, ị́ pịkị kẹ amịna ḅụụ kẹ fịrịmẹnjịapụ sịn apụ ma tọn ḍiki tẹ ịn la-a tẹ, ini iruo apụ ḅara kẹ ịn ḍọkị-ẹrị ye sọ à nimim.

³ Í ye-inema ḍinm, ị́ pịkị ì gotẹ tọrụsiẹrịm, anịsọ ị́ ḅara-siin-a.

⁴ Kụma à kẹ ị́ ọgọnọ gbanarị ye anie, tarị ị́ kẹ ị̀ ḅẹlẹma-ḅẹlẹma ḅara mẹ mịọkụ ị́ ḅarị ọkọ mịẹ-a.

⁵ Ị́ ḅịkị mu koro tẹ anga ḍikii! Í asi ḅụ pịkị tẹ tarị-tarị ị́ kọn-kọn ḍumo kọọn. Ị́ ị́ asi ma ḅụ pịkị-a ḅẹḅẹ, à ḅo ị́ tọnjọ-gbanaye mẹ sịẹ kiri ḅụ anị saakị siin ḅa.

⁶ Kụma ị́ ḅụụ gbọrụ iḅiye emi; à kẹ Nikolayịtanị apụ ma amịẹaị ma ḍiki-ḅioḅu la ḅara mie ị́yẹrị sọ kẹ arị ḍiki-ḅioḅu ḅara.

⁷ “Í ḅeri nyana tẹ kẹ ye naarị ḅẹḅẹ, Tẹmẹ ḅe ḍuko sọsị ma pịrịarị ye mẹ pokii. “Owu-ḅara-iḅi nyana apụ ma à kụrọ kẹ ịn pịrị tẹ ịn Tamụnọ Ḍụọ mẹ ogboku so-pakarị ḍumo sịn mẹ ḅẹ mgbọlụ mẹ fị ḅa.

Kẹ Simana Fịrịma Oku Mẹ

⁸ “Mị ḍiri mẹ kẹẹ tẹ kẹ Sịmayịna ḅẹ sọsị mẹ ḅẹ enjẹlị ḅe fịrịmaa: “Mie Suku-saakị pịkị kunoma ḅe ḅara ḅo oku mẹ, fịtẹ pịkị sin ḍumo ḅọ ḅe.

⁹ Ị́ ḅụụ-fụka ma à nimi wararị; à nimim ị́ igoin wararị — kụma karakara-ḅara-ḅụ ị́yẹrị anie ngọ kọn ḅọ. Si aị tẹ, Juu-ḅẹ-apụ-a tẹ amịna ḅụụ kẹ Juu-ḅẹ-apụ sịn-arị apụ ma kẹ ị́ mịẹ simearị aị ma à nimim. Ini ma anie sime Ekwesu pịrị ogbo mẹ ḅẹ apụ.

¹⁰ Ọmịnị ẹrị ḅẹ-yearị tọrụsiẹrị goyegoye ọmịnị anị gotẹ ḅalafa ma. Ó pokii! Ekwesu ḅe ọ́ daaḍiki ḅa, ọmịna ḅụ ḅẹ ja apụ kẹ ikoli suu ḅụ, tẹ oyi aḍin mie ọ́ kẹ tọrụsiẹrị ḅarịye. Ọmịnị ọmịnị ị̀ ḅụ nyana minini mẹ ọlọ kụrọmaa, anị nwẹnị fịị dogi-ḅo sọ, tẹ yẹrị ḍumo kẹ owu-ḅara-iḅi apụ gbẹẹ-ye sọma tẹ kẹ ọ́ pịrị ḅa.

¹¹ “Ọkọẹrẹsị, ó ḅeri nyana tẹ kẹ ye naarị ḅẹḅẹ, Tẹmẹ ḅe ḍuko sọsị ma pịrịarị ye mẹ pokii! “Owu-ḅara-iḅi nyana apụ ma, maaịn karama fịị mẹ ye kẹ ịn lama ḅịa.

Kẹ Pagamọmụ Fịrịma Oku Mẹ

¹² “Mị ḍiri mẹ kẹẹ tẹ kẹ Pagamọmụ sọsị mẹ ḅẹ enjẹlị ḅe fịrịmaa: “Mie oḅuarị, maa tọrụ sụa okologie mẹ ọlọ wararị ḅọ ḅe ḅara ḅo oku mẹ.

¹³ Ị́ angarị anga mẹ à nimi wararị, anie Ekwesu emine simearị anga mẹ. Ị́ ị̀ ḅụụ karakara ḅara sime wararị, ị́ ị̀ ḅụụ nyana minini mẹ ị́ ḅara-siin-a, ini Anịtipasị, ị̀ ḅụụ sịẹ-kụrọ ḅọ ḅe ḅaa sakị sọ, Ekwesu angarị anga mẹ ḅụ.

¹⁴ Kụma à ḍuko ị́ ọgọnọ gbana ḅẹ boowa kala aị emi: ị́ ogboku simearị ja apụ Balamụ tolumaye mẹ ḍukamẹnjịarị, anie Balakị toluma tẹ ori Izirẹlịapụ ma da irima tẹ ini ịn kẹ oru pịrị tẹ fịye fị tẹ, pịkị sẹfị ma-ḅọrọ ḅọ ḅe.

¹⁵ Mị gbọrụ ḅara mẹ ḅụ, í ogboku ḅụ Nikolayịtanị apụ tolumaye mẹ ḍukamẹnjịarị apụ sọ paka tẹẹ.

¹⁶ Mịọkụ ị́ asi ḅụ pịkịị! Ị́ pịkị-a ḅẹḅẹ, ala-a sakị ḅụ à ḅo ị́ la tẹ ị̀ ḅịḅị-ḅio paka-ḅoarị okologie mẹ kẹ owu kẹ arị atomi ma paka ḅa.

¹⁷ “Ọkọẹrẹsị, í ḅeri nyana tẹ kẹ ye naarị ḅẹḅẹ, Tẹmẹ ḅe ḍuko sọsị ma pịrịarị ye mẹ pokii! “Owu-ḅara-iḅi mẹ nyana apụ ma à ḅọị wararị mana mẹ ḅẹ aị kẹ ịn pịrị fị ḅa. À pịkị pịna-pịna ḍụḅarị, tẹ ịwọ ẹrẹ anị ḅụ kẹẹ wararị ye, anie anị nyana wararị ḅọ sikima tẹ gbọrụḅọ-sọ inetẹ nimi, nimi-a ye, mẹ kẹ ịna ḅụ ọrụḅọ-ọrụḅọ pịrị ḅa.

Kẹ Tayatira Fịrịma Oku Mẹ

¹⁸ “Mị ḍiri mẹ kẹẹ tẹ kẹ Tayatira ḅẹ sọsị mẹ ḅẹ enjẹlị ḅe fịrịmaa: “Ḅie Tamụnọ Tụḅọ ḅe, tẹ tọrụngbọ fịnị kọrị ḅara kọrịarịḅọ ḅe, ori aḅụọ pịkị sịkịrị vịọịmatẹ ojo ḅịya ḅara ḅịyarị ḅọ ḅe kẹ fịrịma oku mẹ.

¹⁹ Ị́ mịẹarị ye à nimi wararị. Àrị ị́ ḅẹlẹma na ị́ nyana minini na, ị́ kọrịarị kọrịnama na, ị́ ye-inema na nimi wararị. À nimim mịnẹ mịọkụ ị́ kọrịarị kọrịnama tarị ị́ kọrị ḅara nẹngịm.

²⁰ Kụma à kẹ ị́ ọgọnọ gbanarị ye anie, ị́ anị amịna ḅụụ kẹ Tamụnọ ọkị-ḅo ḅọ sịn-arị, Jezibẹlị nwẹn-sịn ẹrẹḅọ ma wẹrịso tẹ árị á ḅụụ ḅẹlẹ ye, ḅẹlẹ ye mịẹarị. Á tolumarị ye ḅụ árị ị̀ afịrịmẹnjịapụ ma da irima mu sẹfị amịẹaị ḅụ suuarị, pịkị ịn kẹ oru gbin tẹ fịye fị ḅụ na.

²¹ À sakị kẹ á pịrịm, á kẹ árị asi ḅụ pịkịị, kụma á kọn-arị sẹfị ḍumo mẹ ḅụ á ḅara-siin ḅẹ ḅịa.

²² Ọkọẹrẹsị àrị á kẹ gbọrụ iḅila ọgọnọ gbin tẹ árị na sẹfị mẹnjị kọn-arị apụ ma na anịanga kpọma tọrụsiẹrị ḅa. Ini árị na kọn tẹ si mẹnjị mẹ ḅụ in pịkị-a kụma, mị gbọrụ sakị àrị à ḍuko ḅara mịẹ ḅa.

²³ À pịkị á ḍukamẹnjịarị apụ ma ḅaa ḅa, anịsakị sọsị mamgba nimi ḅa mịnẹ yẹrị anie ọrụḅọ-ọrụḅọ sime-ḅara nimi ḅọ. Ọmịna ḅụ ọrụḅọ-ọrụḅọ mịẹye à nwẹn ḍiki tẹ mḅọ gbẹẹ ḅa.

²⁴ “Kụma ọmịnị Tayatira ḅụ kirikọn-apụ ma tẹ amụ mị si tolumaye mẹ ḍukamẹnjị-a apụ; osi-apụ ma kẹ ‘Ekwesu pokolotẹ ḅọị aị sịn-arị aị ma amụ ọ́ ḍawọ-a.’ Àrị ọ́ ḅẹẹarị mịnẹ à jen ikuye kẹ ó ponoma ḅịa.

²⁵ Kụma ọmịnị ọmịnị ọlọ ye ọlọ kụrọma nwenii à ḅo sakị la.

²⁶ Owu-ḅara-iḅi ḅọ tẹ à ḅii ye mịẹ mu kunoma la ḅarị ḅọ, à kụrọ kẹ mḅọ pịrị ḅa, tomikiri ḅẹ asịẹ ma ḅụ.

²⁷ Mḅọ ikulele kịẹnị ọlọ tẹ kẹ ḅẹrẹtọn ịn pịrị ḅa; mḅọ in sukuruma-gbin kọsịma ḅa, aḅaịn-ḅẹlẹ fịị kọsị ḅara;

²⁸ anie à kẹ ị̀ Ḍa ḅara kụrọ daa-ọkị ḅara pembe ḅara. Owu-ḅara-iḅi nyana ḅọ, dede lolia mẹ sọ à kẹ mḅọ pịrị ḅa.

²⁹ “Ọkọẹrẹsị, í ḅeri nyana tẹ kẹ ye naarị ḅẹḅẹ, Tẹmẹ ḅe ḍuko sọsị ma pịrịarị ye mẹ pokii.