Mịẹfinji 17 - FỊAFỊA BAỊBỤLỤ

Eresoarị Ama-Mẹnjị-Ẹrẹḅọ Ma

¹ Anịtẹso sọnọma enjẹlị ma, tẹ sọnọma abọlị ma nyana apụ ma ḅẹ gbọrụḅọ, ị̀ dama-ḅo tẹ ḅẹẹm, “Ḅoo, anịsakị à Tamụnọ wẹrịtẹ fomu-ḅara kẹ anị eresoarị ama-mẹnjị-ẹrẹḅọ ma, tẹ tọnwa atọrụ gbori wararị opu ama mẹ pịrị ḅarị ḅara kẹ í ḍie.

² Tomikiri ḅẹ asịẹ ma ḅẹ amadapụ ma, arị na, ama-mẹnjị-ẹrẹḅọ na kọn, kọn si mẹnjị kọnm, tẹ tomikiri ḅẹ atomi ma pịkị arị ama-mẹnjị si mẹ ḅẹ iru ḅuu tọrụ-ḅaamam.”

³ Tẹ Tẹmẹ ḅe nwẹnị ị̀ ḅụụ sọ ḅin, tẹ ḅẹrẹtọn ị̀ pịrị ḅara sime, tẹ enjẹlị ḅe nwẹnị ì dogi-so ịkpa ḅio mu. Tẹ anịanga à gbọrụ ẹrẹḅọ ẹrịm, tẹ á kịnị-ḅaaḅa opu nama, tẹ awụ tọrụ sụa ye ọgọnọ lẹgị wararị, tẹ nama ḅe oju mẹmgba ḅụ Tamụnọ mịẹ-sima ẹrẹ kẹẹ fama wararị; nama ḅe ọ̀ sọnọma sịḅị na oyi ịfalị na nyanam.

⁴ Ẹrẹḅọ ma sọ awụ tọrụ sụa ḅiriye ḅiri wararị, tẹ á pịkị golu na, ye la aḍụḅarị na, palị nwẹn-sịn aị na, ḅiri ḅụlụ-ḅụlụ wararị. Árị á ḅara ḅụ golu bọlị ọlọm, tẹ anị ḅio ḅụ ḍiki na-iḅi-a, ịlọlị aị na, arị ama-mẹnjị amịẹaị ḅụ ḅo aị na sikima jen ofori.

⁵ Á fụḅara ḅọkọ ḅụ tomi inetẹ nimi ḅo ḅịa fieye nyana ẹrẹ kẹẹ wararị: “Opu Babịlọnị, ama-mẹnjị-ereme mamgba iyingiḅọ, anie tomikiri mẹ pịkị-iḅoarị apụ ma.”

⁶ Tẹ àrị ẹrịm, ẹrẹḅọ ma, Tamụnọ atomi ma na, Jizọsị minini tẹ ḅịḅị ḍima-a ẹrẹsị ịn ḅaa apụ ma na ọmbie à tọrụ ḅaa wararị. À ḅo árị ẹrị sakị tẹmẹ gbọrụmgbọ-sọ ḅarị ị̀ ḅụụ ofori.

⁷ Enjẹlị ḅe nwẹnị ì gbela, “Tiye paka tẹ ị́ nwẹn kẹ tẹmẹ-naịn-naịn fa soarị? Ḅọị ye tẹ ẹrẹḅọ ma na, kịnị-ḅaaḅa opu nama ḅe tẹ á dogi wararị ye ḅe na fiearị ye, à ḍuko ị́ pịrị ḅa, anie sọnọma sịḅị na, oyi ịfalị na sụa wararị nama ḅe.

⁸ Anị nama ḅe, sakị ḅẹ gbọrụ sakị ḅụ ò ḍumo simem, kụma mịọkụ ọ̀ ḅarị ḍumo-a; kẹlẹ kọnm ò pokolo ideri-mu kunoma la la-a olulu mẹ ḅio sime tẹ paka-ḅo da-da ini ọ̀ ḅaa guluguluma ḅẹ anga mu ḅa. Tomikiri angarị atomi ma tẹ, tomikiri mẹ amụ tẹmẹ-a kụra-ḅio ẹrẹ ḍumo wararị apụ ma ḍiri mẹ ḅio kẹẹ-a apụ ma tẹmẹ-naịn-naịn ḅa ịn kịnị-ḅaaḅa opu nama ḅe ḍiki sakị. Sakị ḅẹ gbọrụ sakị ḅụ ó ḍumo simem, mịọkụ ọ̀ ḅarị ḍumo-a, kụma ọ̀ pịkị sin tolu paka-ḅo ḅa.

⁹ “Miemẹ anị ye-nimi na yefieye naa na ḅiiarị. Nwẹn ḅẹẹ sọnọma asịḅị ma anie sọnọma atụndụ ma tẹ ẹrẹḅọ ma lẹgị wararị anga ma. Arị pịkị fiearị aị anie sọnọma amadapụ;

¹⁰ ini ḅẹ sọnọ ḅịkị tẹ, gbọrụḅọ paa ḅẹrẹtọn-arị, anịsakị osi-ḅọ amụ paa ḅo-a; ó ḅo sakị, mịẹ ḅara, mịẹ ḅara sọ, boowa kala-sakị kịngẹ mie ọ̀ kẹ ḅẹrẹtọn ḅarị ye.

¹¹ Anịsakị kịnị-ḅaaḅa opu nama ḅe tẹ ḍumo simem, tẹ ḅarị jen kẹ ḍumo-a ḅọ ḅe ḅioju nine karama amadaḅọ sọ ḅa, tẹ ori anie ini sọnọma apụ ma ḅẹ gbọrụḅọ, tẹ ịn ḅaa guluguluma ḅẹ tẹ muarị ḅọ ḅe.

¹² “Ị́ ẹrị oyi ịfalị ma anie oyi amadapụ, tẹ amụ saakị ḅẹrẹtọn-a apụ, kụma ịn kụrọ kẹ ịn pịrị tẹ ịn kẹ kịnị-ḅaaḅa opu nama ḅe ḅụ sọ tẹ boowa kala-sakị kịngẹ kẹ ḅẹrẹtọn ḅa.

¹³ Mịna oyi apụ mamgba gbọrụ ye mie ịn mịẹ ḅẹ tẹ ịna ḅioḅẹngbọ simearị ye, tẹ ịn nwẹnị ịna opu na kụrọ na kẹ kịnị-ḅaaḅa opu nama ḅe pịrịarị.

¹⁴ Ini owu kẹ Anana Tụḅọ ḅe paka ḅa, kụma Anana Tụḅọ ḅe sịn tẹ, sẹlẹ tẹ ḅioḅẹngbọ-kẹ-sịrẹrẹ-niḅi ḅara kẹ ò ḍukamẹnjịarị apụ ma ọ̀ jụ sọ tẹ owu mẹ sọ tẹ ịn nẹngịma ḅa; anị gotẹ ọkọ mịẹ ḅarịye, ori Anana Tụḅọ ḅe anie kịnịnyanapụ mamgba Nyana ḅọ, pịkị amadapụ mamgba Amadaḅọ.”

¹⁵ Enjẹlị ḅe pịkị ị̀ ḅẹẹm, “Minji ma tẹ ị̀ ẹrị aị ma, tẹ ama-mẹnjị-ẹrẹḅọ ma lẹgị wararị anga ma anie sịẹ, sịẹ ma na, tomi ma na, kịrị-kịrị atomi ma na, ama-ḅịḅị, ḅịḅị ma na.

¹⁶ Oyi ịfalị ma tẹ ị̀ ẹrị aị ma, na kịnị-ḅaaḅa opu nama ḅe na, ini ama-mẹnjị-ẹrẹḅọ ma ḍiki ḅioḅu ḅa; ini á nyana ye goyegoye ọkị so tẹ á paụma koroma ḅa; ini árị oju ḅẹ meni mẹ pẹị tẹ á ḅụụ kirikọn-ye mẹ dọkịma ḅa.

¹⁷ Anị gotẹ ọkọ mịẹ ḅarịye, Tamụnọ ini ọ̀ tọn ye mịẹ ḅẹ ḅioḅẹngbọ kẹ ịn pịrị tẹ, ịn gbọrụ ḅụ ḅụ ịna kụrọ kẹ kịnị-ḅaaḅa opu nama ḅe pịrị tẹ, ọ̀ kẹ ḅẹrẹtọn nwenii mu Tamụnọ ẹkwẹn-aḅịḅị ma mịẹ fama ḅẹ sakị la ḅa.

¹⁸ “Ị́ ẹrị ẹrẹḅọ ma anie ḍụḅa lamatẹ opu ama mẹ, tẹ ḅẹrẹtọn tomikiri ḅẹ amadapụ ma pịrịarị ama mẹ.”