Mịẹfinji 16 - FỊAFỊA BAỊBỤLỤ

Tamụnọ Ori Ịganị Kẹ Sụa Wararị Abọlị Ma

¹ Anịtẹso Tamụnọ-warị mẹ ḅio gbọrụ opu pọkọ sime tẹ sọnọma enjẹlị ma ḅẹẹarị tẹ à naam, “Ó mu ịn Tamụnọ ịganị ma kẹ sụa wararị sọnọma abọlị ma ḅio simearị aị ma ọsụma tomikiri mẹ ḅụ sara-a!”

² Tarị enjẹlị ḅe nwẹnị mu tẹ ọ̀ bọlị ḅio sime ye mẹ kẹ tomikiri mẹ ḅụ ọsụma sara. Tẹ anị nwẹnị kịnị ḅaa, ḅaa opu nama ḅe elekima mẹ sụa apụ na, ọ̀ fụḅara mẹ tẹkẹ apụ na oju ḅụ ḅalafama, fụka lamarị ịnọ pakama sara.

³ Anịtẹso maaịn karama enjẹlị ḅe nwẹnị ọ̀ bọlị ḅio sime ye mẹ kẹ abajị ḅio ọsụma sara, tẹ minji mẹ nwẹnị fịtẹ tomḅọ ọmbie kịka, tẹ abajị mẹ ḅio ḍumo sime ye goyegoye fịịm.

⁴ Anịtẹso tẹrẹị karama enjẹlị ḅe ọ̀ bọlị ḅio sime ye mẹ kẹ ḅuu-minji atọrụ ma na, ngụngụḅa aminji ma na ḅụ ọsụma sara, tẹ arị ọmbie ḍim.

⁵ Tẹ minji ma ḍikiḍiki sime enjẹlị ḅe ḍuko tẹ à naam, “Ị́ aḅẹrẹkọn ma ḅụ aḍụa ofori, yei Fịafịa Ḅọ; í emii, ị́ pịkị simem.”

⁶ Ịn Tamụnọ atomi ma na, ịkịankoroapụ ma na, ọmbie ọsụmam ẹrẹsị, mịọkụ ị́ ọmbie kẹ ịn pịrị tẹ in ḅuu tẹ. Ịn la na-iḅi fomu-ḅara mie ịn la ye.

⁷ Anịtẹso à nwẹnị agbamịẹ-anga mẹ ḅụ fie ḅo gbọrụ pọkọ naa, tẹ ḅẹẹm, “KỊNỊNYANA-TAMỤNỌ, Kụrọmamgba Nyanaḅọ, ị́ aḅẹrẹkọn ma karakara lamam, aḍụa pịkị arị ḅụ ofori gbala-gbala!”

⁸ Anịtẹso ini karama enjẹlị ḅe ọ̀ bọlị ḅio sime ye mẹ ọsụma ịrụa mẹ ọgọnọ saram, tẹ ịn nwẹnị anị wẹrịso tẹ anị nwẹnị anị ḅẹ opu ọfịrị mẹ kẹ tomi dọkịma.

⁹ Anị ọfịrị ḅaka ye mẹ mie anị kẹ ịn dọkịma ye, tẹ ịn nwẹnị Tamụnọ ẹrẹ mẹ wori, ori tẹ mịna ḅụụ-fụka ma ḅụ kụrọ nyana ḅọ ḅe. Kụma ini ịna asi ḅụ pịkị tẹ ori opu mẹ tokini ḍụkụ-a.

¹⁰ Anịtẹso sọnọ karama enjẹlị ḅe ọ̀ bọlị mẹ ḅio sime ye mẹ ọsụma kịnị-ḅaaḅa opu nama ḅe emine mẹ ọgọnọ saram. Kanakana ḅo kịnị-ḅaaḅa opu nama ḅe ama-daarị anga ma gbaịnm, tẹ tomi ma aka kẹ ịna ḅịḅị-ḅio ḅẹ aḅẹlẹ onwinm, ịn daarị fụka aị ma ẹrẹsị,

¹¹ tẹ in So-ḅio ḅẹ Tamụnọ ḅe worim, ịna fụka aị ma na ịnọ ma na gotẹ. Kụma ịna asi etela ma ḅụ ịn pịkị-a.

¹² Anịtẹso sonio karama enjẹlị ḅe nwẹnị ọ̀ bọlị mẹ ḅio sime ye mẹ kẹ Yuferetisi nwẹn-sịn opu tọrụ mẹ ḅụ ọsụma sara. Tọrụ mẹ nwẹnị samụnọ, tẹ kpongbo etela sọ, kẹ ịrụa mẹ saakị paka-ḅoarị anga mẹ ḅẹ amadapụ ma pịrị.

¹³ Anịtẹso à nwẹnị tẹra si-atẹmẹ, tẹ ngụ kịka aị ẹrị. Daragọnị nwẹn-sịn, mamataḅaye ologboingboin opu nama ḅe ḅịḅị-ḅio na, kịnị-ḅaaḅa opu nama ḅe ḅịḅị ḅio na, iruo ịkịankoroḅọ ḅe ḅịḅị-ḅio na, mie in sime tẹ paka-paka-ḅo ye.

¹⁴ Ini ma anie ḅụụ-buama-aị mịẹ-mịẹ oru si-atẹmẹ. Mịna tẹra si-atẹmẹ ma nwẹnị mu tomikiri sime amadapụ mamgba kobiri ḅo mịnẹ in ḅo Kụrọmamgba Nyana Tamụnọ ḅe opu Ene mẹ ḅẹ ọmụ mẹ gbin.

¹⁵ “Ó pokii! À furuḅọ ḅo-ḅo ḅara kẹ ḅoarị! Mono-a tẹ amịna kapa ẹbịarị ḅọ mẹ ḅioḅẹlẹ sime mḅọ pịrịm, mịẹtẹ mḅọ ḅarị paụ tẹ ḅụụ-jịrịma ḅara kẹ ama-ogbo mẹnjịma ḅọrọ ḅịa ḅara!”

¹⁶ Anịtẹso, si-atẹmẹ ma nwẹnị amadapụ ma kobiri Hiburu ḅịḅị ḅụ ịn kẹ Amagẹdọnị sịn anga mẹ ḅo.

¹⁷ Anịtẹso sọnọma karama enjẹlị ḅe ọ̀ bọlị mẹ ḅio sime ye mẹ kẹ fẹrụ mẹ ḅio ọsụma saram. Tẹ gbọrụ opu pọkọ nwẹnị Tamụnọ-warị mẹ ḅio simearị emine mẹ ḅụ fie paka-ḅo, tẹ ḅẹẹm, “Mịẹ tẹẹ!”

¹⁸ So nwẹnị ḅalapụ-ḅalapụ tẹ kọrị-kọrị ḅọrọ, tẹ So ḍarị tẹ so-alagba fie, tẹ kiri pịkị iḅiọkụ jikem. Tamụnọ tomi tẹmẹ kụra-ḅio anị ḅara sime kiri-jike amụ paka-a; miemẹ anie si tẹịn kiri-jike.

¹⁹ Opu ama mẹ tẹra kiri puum, tẹ tomikiri ḅẹ asịẹ ma ḅẹ opu ama mamgba fa famam. Tamụnọ opu Babịlọnị mẹ sọ kẹ ḅio kuromam, tẹ mịẹtẹ árị ọ̀ kọpụ mẹ ḅio sime iru mẹ ḅuum — anie ori opu ịganị iru mẹ.

²⁰ Sọ mamgba ḅile sọ faam, tẹ tụndụ mamgba pịkị ịmaịn-faam.

²¹ Tẹ ḍụḅarị kpo, kpo pembe eene-mgbọlị, tẹ iku ḅụratẹ aị, nwẹnị So-tọrụ sin, sin tomi ọgọnọ sara, ini tẹ Tamụnọ mị ḅụụ-fụka mẹ kẹ ḅo ye mẹ gotẹ ò wori apụ ma, in gotẹ ọkọ mịẹ ye ḅụụ-fụka mẹ kpọma ḅalafamam ẹrẹsị.