Mịẹfinji 12 - FỊAFỊA BAỊBỤLỤ

Ẹrẹḅọ Ma Na Ịn Kẹ Daragọnị Sin Pamba-Sụa Nama Ḅe Na

¹ Anịtẹso gbọrụ ḅalafama opu ịkịan So-tọrụ pakam. Gbọrụ ẹrẹḅọ, tẹ ịrụa mẹ kẹ kapa sọma sụa, tẹ akalụ mẹ kẹ ḅụọ gbanama wararị ḅọ paka-ḅom, tẹ ini oyi maa lolia finji kẹ ama-da sun sọma tẹ kẹ á surem.

² Á fura wararị, tẹ iyi ḅẹ-yearị, tẹ tụḅọ iyi akụ na tọrụsiẹrị na mịẹtẹ á nwẹnị oloku pakama.

³ Jen ḅalafama opu ịkịan sọ So-tọrụ ḅụ pakam. Gbọrụ awụ ḅịyarị, mamataḅaye ologboingboin opu nama, tẹ ịn kẹ daragọnị sịn ye nwẹnị So-tọrụ mẹ ḅụ paka-ḅo. Sọnọma asịḅị na oyi ịfalị na ọ̀ nwẹn sụam, tẹ amada-sun sịḅị-sịḅị ma ọgọnọ emi.

⁴ Ọ̀ nwẹnị ori etemi kẹ So-ḅio simearị alolia ma kẹ tẹra kiri ḍie ḅẹ gbọrụ kiri kpọrọrọ tomikiri sara. Ọ̀ nwẹnị mu ẹrẹḅọ ma tọrọkọ sịẹ, mịẹtẹ árị á tụḅọ mẹ iyi koroma gbọrụ kiri, ori ọkị pẹị ḅẹ ḅara.

⁵ Anịtẹso á nwẹnị owiḅọtụḅọ iyi koroma, anie ikulele ama-da mkpara kẹ tomikiri mẹ ḅụ ḅẹrẹtọn ḅarị ḅọ ḅe. Kụma kịnị á ḅara tụḅọ mẹ kaịn ọkị tẹ ọ̀ kẹ mu Tamụnọ na ori emine na lamam.

⁶ Ẹrẹḅọ ma nwẹnị mangị-so ịkpa ḅio Tamụnọ tẹlẹma á pịrị anga mu, anịanga mie á ḍin tẹra ẹndẹ tesi finji kẹ sime tẹ ini á ḍikiḍiki ḅarịye.

⁷ Anịtẹso ọmụ So-ḅio korom, tẹ Mayịkẹlị na amịna enjẹlị apụ na owu kẹ daragọnị ḅe pakam, tẹ ori na amịna enjẹlị apụ na ini na owu mẹ sọm;

⁸ kụma owu daragọnị ḅe ḅara siinm, tẹ ịn ḅarị ḍụkụ tẹ ori na ori enjẹlị apụ na jen-maaịn kẹ So-ḅio sime-a.

⁹ Tẹ in So-ḅio anị mamataḅaye ologboingboin opu daragọnị ḅe sukuruma pakamam — anie elemu sakị ḅẹ ododo ḅe, tẹ in Si-ḅọ, anịanịa Ekwesu, kẹ sịn ḅọ ḅe, tẹ oḅori kẹ bebe tomikiri mẹ sịn sime ḅọ ḅe. Ini ò sukuruma iderima tomikiri ḅụ koromam, ori na ori enjẹlị ma na.

¹⁰ Anịtẹso à So-ḅio gele pọkọ kẹ olokuarị gbọrụ pọkọ naam ḅẹẹarị, “Mịọkụ Tamụnọ ḅọrọma mẹ ḅo tẹ! Mịọkụ Tamụnọ ori Amadaḅọ nwẹn ḅẹẹ ḅara kẹ amịna kụrọ ḍie-pakama tẹ! Mịọkụ Tamụnọ ọ̀ Mẹsaya ḅe kẹ ḅẹrẹtọn ḅẹ kụrọ ḍie-pakama tẹ! Kẹ gotẹ ọkọ ḍukoarị, Tamụnọ tọrọkọ sịẹ tẹ, eneḅaka na ḍin na kẹ ḅẹrẹ ḍuko, ḍuko wamịna amịnapụ ma sịḅị sẹịn-arị ḅọ ḅe ini ò sukuruma pakama tẹ So-ḅio ḅụ.”

¹¹ Anana Tụḅọ ḅe ọmbie mẹ na in ḍuko wasamarị karakara mẹ na ḅụ mie wamịna amịnapụ ḅọrọ tẹ owu-ḅara-iḅi mẹ nyana ye; tẹ ini ịna aḍumo ḅụ ḅara sin tẹ fịị ḅẹ sọ ịna ḅụụ ḅẹrẹ-a.

¹² Ọkọẹrẹsị, ọmịnị So amẹẹ, pịkị ọmịnị-mgba tẹ anịanga angarị apụ, ó ḅioḅẹlẹẹ! Kụma kpongbo-kiri mẹ na abajị mẹ na tẹkẹlẹtẹ ḅara ḍikii! Kẹ gotẹ ọkọ ḅẹẹarị, Si-ḅọ ḅe koro ḅo ọ́ la tẹẹ, tẹ ịganị ọ̀ ḅụ emi lamam, gbala ò nimi wararị ọ̀ nyana sakị ḅarị boowa ẹrẹsị.

¹³ Daragọnị ḅe ḅo ẹrị tẹ mịnẹ ini ò sukuruma iderima-ḅo tomikiri koroma tẹ ḅẹ sakị, ọ̀ saakị owiḅọtụḅọ ḅe iyi ẹrẹḅọ ma ḅaa ḅẹ tẹ á ḍukam.

¹⁴ Tamụnọ nwẹnị maa opu igo apamba kẹ á pịrị, á kẹ fiin ịkpa mẹ ḅio á sime-sime anga mẹ muu, anịanga ịn tẹra akụra na pakịrị na kẹ á ḍikiḍiki kpaịnma tẹ daragọnị ḅe ḅarị mu ye kẹ á lama ḅịa.

¹⁵ Anịtẹso daragọnị ḅe nwẹnị ọ̀ ḅịḅị ḅio, kẹ mu ẹrẹḅọ ma gbaịn tẹ anị á fọnọ so ḅẹ ḅara kẹ opu minji ọsụma pakama.

¹⁶ Kụma kpongbo-kiri mẹ ḅarasụa ẹrẹḅọ ma pịrịm; anị nwẹnị amịna ḅịḅị finji tẹ daragọnị ḅe amịna ḅịḅị ḅio ọsụma paka-ḅo minji mẹ mẹnị ọkị.

¹⁷ Daragọnị ḅe nwẹnị kpọma ịganị nyana ẹrẹḅọ ma pịrị, tẹ so owu kẹ á furo-ḅẹ-apụ tẹ kirikọn-apụ ma paka ḅẹ mu, anie inimgba tẹ Tamụnọ tọn koroma aị ma koko, tẹ pịkị Jizọsị mịẹfinji wararị karakara mẹ minini kụrọma apụ ma.

¹⁸ Tẹ daragọnị ḅe nwẹnị abajị mẹ ḅẹ tuḅu ọgọnọ sịẹsime.