Mịẹfinji 10 - FỊAFỊA BAỊBỤLỤ

Enjẹlị Ḅe Na Iko Kala Ḍiri Mẹ Na

¹ Anịtẹso à gbọrụ opu enjẹlị ẹrịm, ò So-ḅio sime tẹ ideri ḅoarị. Ini oḅuto kẹ ọ̀ gbaịn tẹ, ogono pịkị ọ̀ sịḅị ikelema-koro wararị: ọ̀ tọrụkuḅu ịrụa ḅịya ḅara ḅịya, tẹ ori aḅụọ ma ku-ku-kuma anyịmgbọ kpo kọrị ḅara kọrịarị.

² Ọ̀ gbọrụ iko wararị kala ḍiri finji tẹ ọlọ wararị. Ọ̀ nwẹnị ori maa aḅụọ kẹ tọrụ-minji sịẹma, tẹ ori ere ḅụọ kẹ kpongbo-kiri sịẹma,

³ tẹ ọ̀ nwẹnị ọkụkụ oloku ḅara kẹ oloku pakama. Ori ọkọ oloku tẹso, sọnọma so-alagba aḅịḅị nwẹnị anị pono tẹịn.

⁴ Ini ọkọ kẹ ẹkwẹn gbọrụ kiri arị ini ẹkwẹn ye mẹ kẹẹ koroma ḅẹm. Kụma à So-ḅio sime tẹ ẹkwẹn ị̀ pịrị pọkọ naam, “Sọnọma aso-alagba ma ḍuko ye mẹ kẹ kikima ye sọmaa; anị kẹ ḍiri ḅio kẹẹ koroma ma!”

⁵ Anịtẹso arị ẹrị tẹ tọrụ-minji na kpongbo-kiri na ḅụ sịẹsime enjẹlị ḅe, nwẹnị ori ama-ḅara saakị so da

⁶ tẹ kụrọ nyana ḅara kẹ Tamụnọ, anie ḍumo mu ḅẹ sakị, ḅẹ sakị laarị ḅọ ḅe, so na, kiri na, tọrụ na, arị ḅio sime ye goyegoye na tẹmẹḅọ ḅe, ẹrẹ ḅụ ye karị. Enjẹlị ḅe mẹẹ, “Jen sakị fama ḅarị ofori!

⁷ Kụma sọnọma karama enjẹlị ḅe ori ọdụ ofuro tẹ ḅẹḅẹ, Tamụnọ ọ̀ tọn tẹ kikima wararị aị mịẹfinji ḅa, anie ó ḍuko ọ̀ fịrịmẹnjịapụ na, ịkịankoroapụ ma na pịrị tẹ ḅara mẹ.”

⁸ Anịtẹso So-ḅio sime tẹ ẹkwẹn ị̀ pịrị, pịrị pọkọ mẹ nwẹnị pịkị ẹkwẹn ị̀ pịrị, tẹ ḅẹẹm, “Mu tẹ tọrụ-minji na kpongbo-kiri na sịẹ wararị enjẹlị ḅe ḅara finji wararị iko ḍiri mẹ daa-ọkịị.”

⁹ À nwẹnị enjẹlị ḅe dama-mu tẹ ọ̀ ḅẹẹ, mịnẹ ori iko kala ḍiri mẹ kẹ ị̀ pịrị. Ọ̀ nwẹnị ị̀ ḅẹẹ, “Anị ọkị tẹ anị fị; anị í furo pikirima ḅa, kụma ị́ ḅịḅị ḅio anị ḅẹm ḅẹlẹ ḅara ḅẹlẹ ḅa.”

¹⁰ À nwẹnị ọ̀ ḅara iko kala ḍiri mẹ daa-ọkị, tẹ anị fị, tẹ anị ị̀ ḅịḅị-ḅio ḅẹm ḅẹlẹ ḅara ḅẹlẹm. Kụma arị anị mẹnị ḅọrọma tẹ so anị nwẹnị ì furo pikirima.

¹¹ Anịtẹso in ḍuko ị̀ pịrịm, “Mu sin Tamụnọ oku mẹ ḍuko wasama tọnwa asịẹ na, tomi ḅara, ḅara na, ẹkwẹn-ḅịḅị kịrị-kịrị na amadapụ na pịrịị.”