Mịẹfinji 1 - FỊAFỊA BAỊBỤLỤ

¹ Mị ḍiri mẹ ḅio kẹẹ wararị aị ma, anie paka ḅarị aị tẹ Jizọsị Kịrayịsị mịẹfinji aị ma. Tamụnọ arị mịẹfinji ọ̀ pịrịm, ọ̀ kẹ ori afịrịmẹnjịapụ ma ḍie ḅẹ ḅara, mịnẹ ala ḅịa arị paka ḅa. Kịrayịsị nwẹnị mịẹtẹ ọ̀ fịrịmẹnjịḅọ Jọnị arị nimi, ori enjẹlị kẹ ọ̀ fịrịma ḅụ,

² tẹ Jọnị ḅe, ori ẹrị aị mamgba ḍuko famam. Mie ó ḍuko ye mẹ, anie Tamụnọ oku mẹ na Jizọsị Kịrayịsị mịẹfinji karakara mẹ na.

³ Mị ḍiri mẹ go ḅọ, go ḅọ mḅọ boma tẹ, anị ḅio kẹẹ koro wararị ịkịan mẹ ḅẹ oku mẹ poki tẹ pịkị anị ḍiki anga ḅọ, sọ mḅọ pịkị boma tẹ. Kẹ gotẹ ọkọ ḅẹẹarị, ḍuko aị ma paka ḅẹ sakị mẹ kpeki tẹ.

Kẹ Sọnọma Asọsị Ma Fịrịma Ḅii-ḅịḅị

⁴ Jọnị, mị ḍiri mẹ kẹẹ tẹ kẹ Esiya ibe ḅụ simearị sọnọma asọsị ma fịrịmam: Anịngẹ-kụraḅio emi Tamụnọ ḅe, tẹ gbọrụ sakị ḅụ sime, sime, tẹ pịkị ḅo ḅarị ḅọ ḅe ḍiki-ḅụụjịrị na dein na sime ọ́ pịrị, pịkị sọnọma atẹmẹ ma tẹ ori emine mẹ tọrọkọ simearị aị ma ḅara ḅụ sọ ḅo ye,

⁵ pịkị Jizọsị Kịrayịsị, ḅẹrẹ paka ḅara ngẹrị kẹ ḅẹrẹ ḍukoarị ḅọ ḅe, fị-ḅụ-saakị apụ ma ḅẹ tarị ḅọ ḅe, tẹ pịkị ḅẹrẹtọn tomikiri ḅẹ amadapụ ma pịrịarị ḅọ ḅe na ḅara ḅụ ḅo ye sime ọ́ pịrịị. Ori ḅe anie wa ḅẹlẹmarị tẹ amịna fịị kẹ wamịna asi ḅụ wa fima ḅọ ḅe,

⁶ tẹ pịkị wa kobiri tẹ kẹ agbamịẹapụ sọma ọ̀ Tamụnọ, pịkị ọ̀ Ḍa ḅe pịrị ḅọ ḅe. Ebube na, kụrọ na, sime Jizọsị Kịrayịsị pịrị mu ḅẹẹ-sakị ḅẹẹ-sakị la! Amẹnị.

⁷ Ḍikii, oḅuto na ò ḅoarị! Ọrụḅọ-ọrụḅọ ori ẹrị ḅa, ḅẹkẹrẹ kẹ ò temi apụ ma sọ ori ẹrị ḅa. Tomikiri ḅẹ atomi mamgba ò gotẹ kururu ḅa. Anie anị sime ḅarị ḅara!

⁸ KỊNỊNYANAḄỌ, Kụrọmamgba Nyana Tamụnọ ḅe, Anịngẹ-kụraḅio emi ḅọ ḅe, sime-sime ḅọ ḅe, tẹ ḅo ḅarị ḅọ ḅe ḅẹẹarị, “Yẹrị anie tarị, pịkị kunoma-a.”

Jọnị Ḍawọ Ḅara Kẹ Kịrayịsị Ẹrịm

⁹ Yẹrị Jọnị, ọmịna mịnaḅọ ḅe, anie ọmịnị na sọ tẹ Jizọsị ḍukamẹnjịarị ḅọ ḅara ḅụ, pịkị ọmịnị na ye-inema ḅara kẹ tọrụsiẹrị gbolomarị ḅọ ḅe wa sime ori Ama-da mẹ pịrịm gotẹ. Ini ị̀ kẹ mu Patịmọsị sọọ mẹ ḅụ koromam, à Tamụnọ ẹkwẹn mẹ na Jizọsị mịẹfinji karakara mẹ na ḍuko wasamam ẹrẹsị.

¹⁰ Anịanga ḅụ, KỊNỊNYANAḄỌ Ene mẹ ḅụ, Tẹmẹ ḅe kụrọ mẹ ḅo ị̀ ọlọm, tẹ à naa ḅẹ sakị, gbọrụ geletẹ pọkọ ọdụ ofuro ḅara kẹ ì tongu ḅio fie tẹ.

¹¹ Anị mẹẹ, “Ị́ ẹrị ye kẹẹ koroma, tẹ ḍiri mẹ kẹ mịna sọnọma opu ama ma ḅẹ asọsị ma fịrịmaa: Ẹfisọsị na, Simana na, Pagamọmụ na, Tayatira na, Sadisi na, Fịladẹlịfịya na, pịkị Lahodisiya na.”

¹² Àrị ẹkwẹn ị̀ pịrị ḅọ ḅe ẹrị ḅẹ tẹ pịkị ọḅụ ḍiki sakị, sọnọma golu tọnjọ gbana aị mie àrị ẹrị ye,

¹³ tẹ arị ogboku ḅụ tomḅọ kịkaye emi, mḅọ vọrọrọ-kapa sụa iderima ḅo mḅọ aḅụọ-suku lama wararị, pịkị golu ḅiri-ponoye kẹ iwoma mḅọ ekpe lama tẹ kẹ pono ikelema wararị.

¹⁴ Ọ̀ sịḅị-ḅẹ-inume afalafa, anịanịa ene mgbọlị ḅịya ḅara ḅịyarị, tẹ ori atọrụngbọ ma nwẹnị fịnị kọrị ḅara kọrị pakarị.

¹⁵ Tẹ ori aḅụọ nwẹnị ịn kẹ fịnị ḅio fọịtẹ sikiri vịọịmatẹ ojo ḅịya ḅara ḅịyarị, tẹ ọ̀ pọkọ nwẹnị opu ene koroarị tẹ fie, fie ḅara fiearị.

¹⁶ Ọ̀ sọnọma alolia kẹ ori ama-ḅara ḅụ ọlọm, tẹ oḅuarị maa tọrụ sụa okologie nwẹnị ọ̀ ḅịḅị-ḅio paka-ḅo. Ọ̀ tọrụkuḅu mẹ eneḅaka-fịafịa-ogbo ḅụ ịrụa ḅịya-ḅịya ḅara ḅịyarị.

¹⁷ Arị ori ẹrị sakị, àrị ori aḅụọ-suku ḅịkị koro tẹ fịtẹ ḅọ ḅara simem. Ọ̀ nwẹnị ori ama-ḅara kẹ ị̀ ọgọnọ gbana tẹ ḅẹẹ, “Ḅalafa ma! Yẹrị anie tarị, pịkị kunoma-a.

¹⁸ Yẹrị anie ḍumo wararị ḅọ ḅe! À fịịm, kụma mịọkụ à ḍumo wararị, mu ḅẹ sakị ḅẹ sakị la. À kụrọ nyana wararị fịị ḅụ, pịkị Ḍuḅu ḅio ḅụ.

¹⁹ Ọkọẹrẹsị, ị́ ẹrịarị aị ma kẹẹ koroma, mịọkụ emi aị na, mịọkụ mẹ ḅọrọ tẹ so sakị paka ḅarị aị na.

²⁰ Miemẹ anie ḅọị ye tẹ sọnọma alolia ma tẹ ị̀ ama-ḅara ḅụ ị́ ẹrịarị aị ma na, sọnọma golu tọnjọ gbana aị ma na fiearị ye; sọnọma alolia ma anie sọnọma asọsị ma ḅẹ enjẹlị ma, tẹ sọnọma golu tọnjọ gbana aị ma anie sọnọma asọsị ma.