Mayịka 5 - FỊAFỊA BAỊBỤLỤ

¹ Mịọkụ ini onu kẹ ó gbori-ikelemakoro tẹ, ini owu kẹ wa paka ḅẹ wa gbaịn-koro tẹ! Jeruselemu ḅẹ apụ ọmịnị ọmịna ọmụ-ogbo ma kobirii, ịn fomuye kẹ ḅẹrẹtọn Izirẹlị pịrịarị ḅọ ḅe amgba fomu tẹ!

Tamụnọ Bẹtịlịhẹmụ Ḅụ Ḅo Ḅọ Gbọrụ Ḅẹrẹtọnḅọ Kẹ Izirẹlị Karịmam

² KỊNỊNYANAḄỌ ḅe mẹẹ, “Kụma yei Ị́yẹrị Bẹtịlịhẹmụ, Ẹfịrata ḅẹ kala-ama, Juda opu sịẹ mẹ ḅụ ị́yẹrị ịrụ tẹịnm, kụma í ḅio mie gbọrụḅọ tẹ Izirẹlị ḅụ ḅẹrẹtọn ḅarị ḅọ ḅe paka-ḅo ị̀ pịrị ḅarịye; ori atẹngịapụ ma elemu aḍapụ ma ḅụụ saakịm elemu sakị ḅụ.”

³ Anịẹrẹsị ori ịna aḅụụ ḅara-siin ini na fịya-a apụ pịrị nwenii anị sakị mẹ tẹ, arị ma tẹ iyiarị ḅọ ma iyi koroma ḅa, anị tẹrẹmẹ ori amịnapụ omoni ḅara-ḅio simearị apụ ma, pịkịma kọn wararị Izirẹlịapụ ma ḍọkụma-ḅo ḅa.

⁴ Ò ḅo sakị, KỊNỊNYANAḄỌ ḅe ịnyọ mẹ ḅụ, KỊNỊNYANAḄỌ ọ̀ Tamụnọ ḅe ẹrẹ mẹ ḅẹ ama-da opu mẹ ḅụ, ọ̀ sịẹ sime tẹ ḅẹrẹtọn ori atomi pịrị ḅa. Anịsakị mị sakị mẹ, ò gburo-gburo mu tomikiri mẹ ḅẹ akunoma ma la ḅa, tẹ ori atomi kpaịn tẹ gberie-sọ ḅụụ la-a ḅara kẹ anga ḅa.

⁵ Tẹ ò dein kẹ ḅo tomikiri mẹ pịrị ḅa. Asiriya ḅẹ apụ ḅo wamịna opu sịẹ gbaịn, tẹ wa kikima onu mẹ kan sakị, wa wamịna kụrọ tẹịn tọrọkọ-tarịapụ ma fịrịma mu inina owu sọ ḅa.

Tamụnọ Ori Atomi Ḅọrọma Tẹ Ini Na Fịya-a Apụ Ma Fomu Ḅa

⁶ Okologie ḅụ ini Asiriya nẹngịma ḅa, tẹ lubulu ḅio nụnụ paka-ḅo okologie kẹ Nimirọdị nẹngịma ḅa; anịsakị ini Asiriya ḅẹ apụ ḅara ḅụ wa ḅọrọma ḅa, Nimirọdị wamịna ama ḅio sọ ḅo tẹ wamịna ama agara mẹnjị sakị.

⁷ Anịtẹso Izirẹlị ḅụ fịị-a tẹ kọn apụ ma, tọnwa tomi-kụlọkụlọ ogbo-ḅio, KỊNỊNYANAḄỌ ḅe fịrịma ye mịẹ iwomarị igirigi na, osuka ọgọnọ sịrarị nwẹịn-nwẹịn eene na sime-ḅara sime ḅa, Anịsakị ịn Tamụnọ ḅụụ ḅụ sịrẹrẹ ḅa, tomi ḅụ-a.

⁸ Izirẹlị ḅụ kirikọn-apụ ma, opu asịẹ ma ogbo-ḅio ḅụ, tọnwa tomi-kụlọkụlọ ma ogboku, ọkụkụ opu piri-ḅio-ḅẹ anama ogboku sime-ḅara sime ḅa, asambịrịma ọkụkụ tọnwa anana ogbo ḅio sime-ḅara, tẹ saakị tẹso, ọkụma nwẹnị ịna ogboku mẹnjị ḅọrọ, tẹ ịn ḍụa ḅẹ gbọrụḅọ-sọ ofori ḅara kẹ ịn kẹ pakịrị-pakịrị puu ḅa.

⁹ Ị́ ḅara saakị gele ḅa í ḍiki-ḅioḅẹlẹ-a apụ ọgọnọ, tẹ ị́ na fịya-a apụ mamgba pẹlẹ-pẹlẹ-siin ḅa.

¹⁰ Anị ene mẹ ḅụ, yẹrị KỊNỊNYANAḄỌ ḅe ọmịna asụ ma pẹlẹ-siin ḅa ọmịna ogbo-ḅio tẹ ọmịna kirimẹnjị-ọmụarụ ma sima ḅa.

¹¹ Àrị ọmịna ama mẹ ḅẹ opu ama ma pẹlẹ-siin ḅa, tẹ kụrọtẹ ọmịna ḅiokpọmarị anga ma sukuruma-gbin ḅa.

¹² Àrị ọmịna ḅara ḅụ ó pilearị ibiam ma sima fama ḅa, anịsakị ọ́ ḅarị jen-maaịn kẹ tọrụ-tolu tẹ ye ẹrịarị apụ nyana ḅịa.

¹³ Àrị ọ́ kẹ ye kịkama mịẹ aị ma na, ọmịna fịafịa aḍụḅarị ịḅalị ma na pẹlẹ-siin ḅa ọmịna ogboku ḅụ, tẹ ọ́ ḅarị jen-maaịn kẹ sịḅị-tuu ọmịna aḅara ḅẹ kọrịnama pịrị ḅịa.

¹⁴ Anịsakị àrị ọmịna ogboku ḅụ Asịra, Ere oru fụḅara mẹ soku siin, tẹ ọmịna opu ama ma fama ḅa.

¹⁵ Ye ḅụụ-ḅẹsọọ na, opu ịgbanịya na ḅụ, à nwẹnị gbẹẹ fị ḅii ḅa opu asịẹ mamgba tẹ ị̀ ḅịḅị poki-a apụ ma ọgọnọ ḅụ.