Mayịka 4 - FỊAFỊA BAỊBỤLỤ

KỊNỊNYANAḄỌ Ḅe Dein Kẹ Tomikiri Ọ́ gbọrụ Ḅụ Ama-da Ḅa

¹ Ene ma ḅẹ gbọrụ ene ḅụ, anị giregire paka ḅa, KỊNỊNYANAḄỌ ḅe Tẹkẹ-warị mẹ sịẹ tụndụ mẹ, tụndụ mamgba ḅụ geletẹịn tụndụ sọ ḅa, sịẹ-sịẹ ḅẹ atomi mamgba, gbiri-gbirima anị sọma ḅo ḅa;

² anịsakị sịẹ-sịẹ ma ḅụ ḅo atomi ma ḅẹẹ ḅa, “Ḅoo, ye wa KỊNỊNYANAḄỌ ḅe tụndụ mẹ kpọlị, tẹ Izirẹlịapụ tẹkẹarị Tamụnọ ḅe Tẹkẹ-warị mẹ mu; mịẹtẹ ori ori etela ma kẹ wa toluma, tẹ wa arị ḅụ mẹnjị ḅẹ ḅara. Gbala KỊNỊNYANAḄỌ ḅe ẹkwẹn-ḅịḅị mẹ Jeruselemu ḅụ ḅom, tẹ Zayọnị ḅụ ori ẹkwẹn ori atomi pịrịm.”

³ Kụlọ-kụlọ ḅụ ọ̀ ḅẹrẹkọn tọnwa tomi pịrị ḅa tẹ kụrọ nyana opu asịẹ ma, kpeki anga na, ala-jụ ḅẹ aị na ịgbanịya ḍuko-ḍuko siin ịn pịrị ḅa; tẹ ini ịna okologie ma ḅakụ-ḅakụ tẹ kẹ ọgụ sọma ḅa, tẹ ịna asụḅa ma kẹ ye kịrị kala-ogie sọma ḅa; sịẹ ḅarị gbala-gbala okologie saakị jen sịẹ na ọmụgbin ḅịa, ịn pịkị ḅarị gbala-gbala ḅụụ tẹlẹma owu pịrị ḅịa.

⁴ Ọrụḅọ-ọrụḅọ dein ḅụ mḅọ kụrọ na, mḅọ ịla sịn na suku ịnyọsara ḅa, tẹ gberie-sọ ḅarị mịẹtẹ ịn ḅalafa ḅịa; gbala Kụrọmamgba nyana Tamụnọ ḅe ḅịḅị finji tẹ anị ḍuko tẹ ẹrẹsị.

⁵ Kẹ gotẹ ọkọ ḅẹẹarị, tomi-kụlọkụlọ mamgba sunsin amịna oru-atamụnọ pịrịarị, tẹ arị aḅịḅị pokiarị; kụma wamịnị, wa sunsin KỊNỊNYANAḄỌ wamịna Tamụnọ ḅe pịrị tẹ ọ̀ ḅịḅị poki gbamaso ḅa.

KỊNỊNYANAḄỌ Minini Izirẹlị Ḅẹ Apụ Pịrịm Omoni Sọ Ḅụ Ori Ịn Pịkịma Zayọnị Ḅo Ḅa

⁶ Anị ene mẹ la sakị, yẹrị KỊNỊNYANAḄỌ ḅe ị̀ atomi ma tẹ à fomu ekelima tẹ dee pakama, tẹ kẹ omoni sọma apụ ma kobiri gboloma ḅa, à kẹ ịn pịrị ḅụụ-fụka mẹmgba ḅụ.

⁷ Anịsakị ekeliapụ ma à nwẹn kẹ kirikọn-apụ mịẹ ḅa, tẹ inima tẹ ịn kẹ wakị nguma apụ ma ḅo kụrọtẹ opu sịẹ sọ ḅa; tẹ KỊNỊNYANAḄỌ ḅe Zayọnị Tụndụ ọgọnọ ḅụ amadaḅọ sọ ịn pịrị ḅa, mị sakị mẹ ḅụ ọkị mu ḅẹẹ-sakị ḅẹẹ-sakị la.

⁸ Anịsakị ị́yẹrị, kpọma-ḅẹlẹmarị Jeruselemu, tẹ Tamụnọ anana-ogbo ḍikiḍiki ḅara kẹ ori atomi ḍikiḍiki anga, ị́ pịkị siin tarị-tarị í sime-ḅara ḅụ gbọrụ sakị kẹ sịḅịdaa ị́ amakiri mẹ pịrị ḅa.

⁹ Í tiegotẹ mịọkụ peema-peema oloku-oloku owuarị? Ị́ ḅarị amadaḅọ nyana-a? Nimi ẹkwẹn kọn í tolumarị apụ ma fịị fa tẹ ẹrẹsị, ị́ iyiarị ẹrẹḅọ iyi akụ da ḅara kẹ tọrụsiẹrị aro?

¹⁰ Yei kpọma-ḅẹlẹmarị Jeruselemu, iyiarị ẹrẹḅọ fangala tẹ iningi ḅara kẹ fangala tẹ iningii; gbala mịọkụ ị́ ama mẹ koroma so tẹ mu ama mẹ akaka ḅụ sime ḅa ẹrẹsị; í so Babịlọnị mu ḅa. Anịjụ mie ini ị́ ḍụa ḅọrọma ḅarịye, anịjụ mie KỊNỊNYANAḄỌ ḅe ị́ na fịya-a apụ ma ḅara ḅụ ị́ pakịrị ọkị ḅarịye.

¹¹ Tọnwa opu asịẹ mịọkụ owu kẹ ọ́ paka ḅẹ kobiri tẹ Ini mẹẹ, “Jeruselemu faa nyanam! Wa mị opu ama mẹ ẹrị ḅa mịnẹ anị sara sọ tẹ.”

¹² Kụma mịna opu asịẹ ma KỊNỊNYANAḄỌ ḅe kuroma nimi-a, ini ọ̀ mịẹ ḅẹ tọn-arị ye mẹ fiearị ye nimi-a mịnẹ mbịaka kobiri gbẹ anga mu ḅara kẹ ori ịn kobiri tẹ ḅara.

¹³ KỊNỊNYANAḄỌ ḅe nwẹnị ḅẹẹ, “Ọ́ nwẹnị saakị tẹ fomu-ḅara kẹ ọmịnị na fịya-a apụ pịrịị, yei Jeruselemu ḅẹ apụ! Kẹ gotẹ ọkọ ḅẹẹarị; arị ọmịna ịfalị mẹ kẹ ikulele mịẹ tẹ ọmịna aḅụọ ḅẹ okuro ma kẹ ojo mịẹ ḅa; ọ́ tọnwa atomi-kụlọkụlọ fomu-fomu, pakịrị-pakịrị puu ḅa, tẹ ịna sọye ma na ngọ ma na kẹ yẹrị bebe tomikiri mẹ nyana KỊNỊNYANAḄỌ ḅe pịrị ḅa.”