Matiyo 6 - FỊAFỊA BAỊBỤLỤ

Jizọsị Ye Ḍiya Pịrị Gbolomaye Tolumam

¹ “Ẹrị mịnẹ Tamụnọ nimi ḅọ ḅara ḅụ, ị́ mịẹarị ye mịẹarị ye í tomi ẹrị ḅẹ ḅara gotẹ ama-karakara-ogbo anị mịẹ-a. Ị́ kịnị ẹrị ḅarị ḅara gotẹ ama-karakara-ogbo mịna aị ma mịẹ kụma, ị́ Ḍa So-ḅio simearị ḅọ ḅe ḅara ị́ gbẹẹ-ye nyana ḅịa.

² “Mie ḅụ ị́ ḅọrọ ye kẹ mịẹ ọkụ ofori ḅọ pịrịarị ḅẹḅẹ, anị kẹ kpokpo gbolo ma, anị ḅara anie mịẹ tomi ḍie atomi ma mịẹ-mịẹ ḅara, ama-awarị ma ḅio na, etela ogbo ma ḅụ na. Ini ọkọ mịẹ tẹ tomi ẹrị tẹ in tokini ḅarị ḅara. Ó nimi mịnẹ ịna gbẹẹ-ye ini ọkị gbasịma tẹ.

³ Kụma, ị́yẹrị, ị́ ḅarasụa mịẹ ḅẹ ọkụ ofori ḅọ pịrịarị sakị ḍụkụ tẹ í ere-ḅara ị́ ama-ḅara mịẹarị ye nimi ma.

⁴ Anịsakị anị ḅo ḅọị anga mịẹ ye sọ ḅa. Tẹ ị́ Ḍa So-ḅio simearị ḅọ ḅe tẹ ḅọị anga ị́ mịẹarị ye ẹrịarị ḅọ ḅe nwẹnị gbẹẹ-ye kẹ ị́ pịrị ḅa.

Jizọsị Tẹkẹ Gbolomaye Tolumam

⁵ “Ị́ tẹkẹarị sakị mịẹ tomi ḍie apụ ma tẹkẹ, tẹkẹ ḅara tẹkẹ ma. Ini ma ịna ḅụụ-ḅẹlẹarị ye anie ama-awarị ḅio na, etela akaka na ḅụ, sịẹsime tẹ tẹkẹ, mịẹtẹ kịnị ịn tẹkẹarị mẹ kẹ ini ẹrị ḅarị ḅara. Ó nimi mịnẹ ini ịna gbẹẹ-ye nyana gbasịma kụra ḅio iḅerea.

⁶ Kụma,, ị́ tẹkẹ ḅarị sakị, ị́ kala-ḅio sọ mu tẹ ḅọkọ gbaịn tẹrẹmẹ ị́ Ḍa kịnị tọrụngbọ kẹ ẹrị-ẹrịa ḅọ ḅe tẹkẹẹ. Tẹ ị́ Ḍa ḅe tẹ ḅọị anga ị́ mịẹye, mịẹye ẹrịarị ḅọ ḅe gbẹẹ-ye kẹ ị́ pịrị ḅa.

⁷ “Anịsakị ị́ tẹkẹarị sakị, papaa ẹkwẹn kọn sarama, oru nimi apụ ma mịẹ-mịẹ ḅara, gbala ịn kuromarị mịnẹ nangwọ ẹkwẹn ḅụ mie Tamụnọ ịna tẹkẹ naa ḅarịye.

⁸ In ḍikima mịẹ ma. Ị́ Ḍa ḅe ị́ ḅụụ-fụka mẹ nimi fama tẹrẹmẹ ị́ ọ̀ ḅara ḅarasụa ḅii sakị lam.

⁹ Anị ḅara ḅụ, mie ọ́ tẹkẹ na-iḅi ḅara: “Wamịna Ḍaḅọ So-ḅio simearị ḅọ: fịafịa sime ị́ ẹrẹ pịrị;

¹⁰ yee ị́ Ama ḅọ; yee í minini ye tomikiri ḅụ mịẹ, So-ḅio anị sime-ḅara.

¹¹ Mịmgba wa fị na-iḅi fịye kẹ wa pịrịị.

¹² Wa mịẹ-irima tẹ aị ma wẹrịso wa pịrịị, wa ja apụ kẹ wa iri tẹ aị ma wẹrịso ịn pịrịarị ḅara.

¹³ Ḍụkụ tẹ wa mu kụrọtẹ daaḍiki ḅio sọma, kụma Si-ḅọ ḅe ḅara-ḅio wa ḍụa pakama-ḅo.”

¹⁴ “Ị́ ja apụ kẹ í iri tẹ aị ma wẹrịso ịn pịrị, pịrị, ị́ Ḍa So-ḅio simearị ḅọ ḅe sọ wẹrịso ị́ pịrị ḅa.

¹⁵ Kụma ị́ wẹrịso ja apụ pịrị-a ḅẹḅẹ, ị́ Ḍa ḅe sọ ị́ mịẹ-irima tẹ aị ma wẹrịso ị́ pịrị ḅịa.”

Jizọsị Ḅuru-Ịmọ Gbolomaye Tolumam

¹⁶ “Tẹ í ḅuru-ịmọ ḅarị sakị, ị́ kururuarị ḅara kẹ ị́ tọrụkuḅu wẹrị ḅịa, anie mịẹ tomi ḍie apụ ma mịẹ-mịẹ ḅara mẹ. In go ịna tọrụ kuḅu mịẹ simearị ye tomi in ḅuru-ịmọarị mẹ nimi ḅarị ḅara. Ó nimi mịnẹ ịna gbẹẹ-ye ịn nyana gbasịma kụra ḅio iḅerea.

¹⁷ Ị́yẹrị, í ḅuru-ịmọarị sakị, ị́ tọrụ sịkịrị fịafịama, olo ọmbịị, tẹ ị́ sịḅị-dala pompomaa,

¹⁸ mịẹtẹ ja apụ inetẹ nimi ḅịa ḅara, mịnẹ ị́ ḅuru-ịmọarị — ị́ Ḍa kịnị tọrụngbọ kẹ ẹrị-ẹrịa ḅọ ḅe ngẹrị mie nimi ḅarịye. Tẹ ị́ Ḍa ḅe, tẹ ḅọị anga ị́ mịẹarị ye mịẹarị ye ẹrịarị ḅọ ḅe nwẹnị gbẹẹ-ye kẹ ị́ pịrị ḅa.”

Jizọsị So-ḅio Ḅẹ Ngọ Gbolomaye Tolumam

¹⁹ “Ọmịnị ngọ tan kpolima ọmịna ḅụụ wẹrịma ma mị tomikiri ḅụ, anie akarakaraḅa na, asarị na, ye gulugulumarị, tẹ furu apụ pịkị kan sọ tẹ ye furu, furu anga mẹ.

²⁰ Anie nakara, ọmịnị ngọ tan kpolima ọmịna ḅụụ wẹrịma So-ḅio, anịanga akarakaraḅa na, asarị na, ye guluguluma guluguluma-a, tẹ furu apụ pịkị inetẹ kan sọ tẹ furu ḅịa.

²¹ Ị́ ngọ simearị anga mie sakị mamgba í ḅioḅẹngbọ pịkị sime ḅarị anga.”

Jizọsị Bele Gbolomaye Tolumam

²² “Tomḅọ atọrụngbọ ma tọnjọ sọ mḅọ oju mẹ pịrị wararị. Ị́ atọrụngbọ obi-a ḅẹḅẹ, í bebe oju mẹ bele anị gbaịn ḅa.

²³ Kụma ị́ atọrụngbọ obiarị ḅẹḅẹ, í bebe oju mẹ kanakana ḅio sọ ḅa. Mie ḅụ ị́ ḅụụ simearị bele mẹ ḅo kanakana sọ tẹ ḅẹḅẹ, anị kpọma ḅalafama ye sọ ḅa!”

Jizọsị Omoni-sọ Maa Sịḅịdapụ Pịrị Gbolomaye Tolumam

²⁴ Gbọrụḅọ-sọ inetẹ gbọrụ sakị ḅụ omoni-sọ maa sịḅịdapụ pịrị ḅịa; ọ̀ gbọrụḅọ ḍiki-ḅioḅu tẹ osi-ḅọ ḅẹlẹma ḅa; ọ̀ sịḅị-tuu gbọrụḅọ pịrị tẹ osi-ḅọ ḍiki-sima ḅa. Ọmịnị inetẹ Tamụnọ na igbigi na kẹ pii-pii ḅẹẹ ḅara kẹ fịrịmẹnjị pịrị ḅịa.

²⁵ Miemẹ anie à gotẹ ọ́ ḅẹẹarị mịnẹ ọmịnị ọ́ fị ḅẹ aị na, ó ḅuu ḅẹ aị na ẹrẹsị ḅụụ-ḅalaḅala ma, mịẹtẹ ó ḍumo sime ḅarị ḅara, anịanịa ọ́ sụa ḅẹ kapa. Mie-mẹmgba ọgọnọ ḅụ, ọ́ kọkọ nimi wararị, mịnẹ tomḅọ ḍumo mẹ, ḅịḅị-ḅio sụa fịye nẹngịm, anịsakị oju mẹ pịkị kẹ anị sụarị kapa nẹngịm.

²⁶ Ó So-tọrụ fiin ma ḅọrọarị afeni ma ḍikii: ịn ḍụọ ḍiḅi tẹ, soku tẹ, fịaị kobiri mu koko ḅụụ wẹrịma-a: anịsọ ịn paa ye fịarị, ọmịna Ḍaḅọ So-ḅio simearị ḅọ ḅe mie in kokoarị! Ọmịnị ma ọ́ kpọma ye la feni ma nẹngị-a?

²⁷ Ọmịna ḅụ tụḅọ inetẹ ḅụụ-ḅalaḅala ḅụ ḅọrọ tẹ mḅọ tomikiri ḅẹ ḍumo mu la ḅẹ aḍin ḅụ gbọrụ ene kịngẹ kẹ gbana ḅẹ?

²⁸ Tẹ ó tiegotẹ sụa ḅẹ kapa gotẹ ḅụụ-ḅalaḅalarị? Ó piri-ḅio simearị fịlawa ma brebrema so-pakarị ḅara ḍikii: ịn kọrịnama kọrị tẹ kapa gbin ịna ḅụụ sụa-a.

²⁹ Kụma yẹrị ọ́ ḅẹẹarị, mịnẹ Ama-da Sọlọmọnị, ọ̀ kọn sara ngọ mamgba ḅụ sọ, ọ̀ sụa kapa amụ iḅi mịna afịlawa ma na gbasị-a.

³⁰ Kapa kẹ piri-ḅio so-pakarị osuan mẹ sụarị ḅọ anie ḅị Tamụnọ ḅe — osuka tẹ mịmgba emi tẹ ḅaa ḅarị sime ḅịa tẹ ịn kẹ kọrị fịnị ḅio suu dọkịmarị ye mẹ. Ori inetẹ mịẹtẹ, gbarị-a ḅara ḅụ, ọ́ kapa sụa anị ḅara nẹngị ḅịa? Ọ́ nyana minini boowa ḅara ḍiki!

³¹ Mie ḅụ ọ́ ḅarị ḅụụ-ḅalaḅala tẹ gbela ma: “À fị ḅẹ ye na, à ḅuu ḅẹ ye na, à sụa ḅẹ kapa na ḅọrọ tọ-anga ḅo ḅẹ?”

³² Mịna aị ma anie sakị mamgba oru nimi apụ ma aḅụụ ḅẹrẹ tẹịn-tẹịn aị. Karakara yee, ọmịna Ḍaḅọ So-ḅio simearị ḅọ ḅe nimi wararị mịnẹ ọmịnị sọ mịna aị ma nyana na-iḅim.

³³ Anie nakara, ọ́ mịẹ ḅẹẹye-ḅẹẹye nẹngị na-iḅi ye anie, Tamụnọ Ama-da mẹ na ò ḅiiarị ọ́ mịẹ ḅẹ kura-aị ma na ḍọkịị, tẹ ori nwẹnị ḅarana osi-aị mamgba mịẹ tẹ arị ḅo ọmịna ḅara la.

³⁴ Mie ḅụ, ọ́ ḅaa ḅụ paka ḅarịye gotẹ ḅụụ-ḅalaḅala ma; ḅaa mẹ anị ḅẹ ḅụụ-ḅalaḅalama aị nyana ḅa. Anị sọye mịẹ tomḅọ pịrị ḅịa, mḅọ sime mịmgba mẹ pịrị ḅụụ-fụka ma ḅụ ofori aị dogi-ḅo sụa.