Matiyo 5 - FỊAFỊA BAỊBỤLỤ

Jizọsị Tụndụ Ọgọnọ Tamụnọ Ẹkwẹn Kọnm 5.1—7.29

¹ Jizọsị tomi ogbo-ogbo gbii-gbiima ọ̀ dama-ḅoarị ye ẹrị tẹ tụndụ kpọlị tẹ lẹgị-simem (Juu-ḅẹ-apụ ma ye-tolumapụ mịẹ-mịẹ ḅara ḅụ), ò ḍukamẹnjịapụ ma mu ò gbori-ikelema tẹso,

² ọ̀ nwẹnị saakị ye kẹ ịn toluma tẹ ḅẹẹ:

Jizọsị Ḅioḅẹlẹ Nyana Ḅẹ Ḅara Tolumam

³ “Ḅioḅẹlẹ sime ịn tẹmẹ ḅụ igoin wararị ḅara nimi apụ ma pịrịm; ini ma ịn Tamụnọ Ama-da suku-ḅio sọ tẹẹ!”

⁴ “Ḅioḅẹlẹ sime amịna asi gotẹ kururuarị apụ ma pịrịm; Tamụnọ ịna ḅiokpọma ḅa!”

⁵ “Ḅioḅẹlẹ sime ḅụụ iderimarị apụ ma pịrịm, Tamụnọ minini ori atomi pịrị aị ma ịna aḅara la ḅa!”

⁶ “Ḅioḅẹlẹ sime Tamụnọ ḅụụ-ḅẹlẹ ye mịẹ ḅụụ ḅụ ye la ḅẹẹye-ḅẹẹye nẹngị apụ ma pịrịm; Tamụnọ mịẹtẹ anị ọkọ sime ịn pịrị gbasịma ḅa!”

⁷ “Ḅioḅẹlẹ sime ọkụrụkụrụ nyana ja atomi pịrịarị apụ ma pịrịm; Tamụnọ ọkụrụkụrụ nyana ịn pịrị ḅa!”

⁸ “Ḅioḅẹlẹ sime gbọrụ ḅioḅẹngbọ kẹ Tamụnọ nimi ḅẹ ḍọkịarị apụ ma pịrịm; ini ma ịn Tamụnọ ẹrị ḅa!”

⁹ “Ḅioḅẹlẹ sime dein mịẹarị apụ ma pịrịm; Tamụnọ ori awọmẹ kẹ ịn sịn ḅa!”

¹⁰ “Ḅioḅẹlẹ sime ini ma tẹ Tamụnọ ḅụụ-ḅẹlẹ ye mịẹarị ẹrẹsị tomi kẹ tọrụsiẹrịmarị apụ ma, pịrịm; ini ma ịn Tamụnọ Ama-da suku-ḅio sọ tẹẹ!”

¹¹ “Ḅioḅẹlẹ sime ọmịnị ma tẹ ì ḍukamẹnjịarị ẹrẹsị tomi ịna ḅịḅị sọ asi-aị, asi-aị kẹ wori sima, tẹ kẹ tọrụsiẹrịma, tẹ pịkị mịẹ-a asi-aị kẹ sịḅị ḅụ sẹịn-arị apụ ma pịrịm.”

¹² Ó ḅioḅẹlẹ tẹ ḍerekuu, kẹ gotẹ ọkọ ḅẹẹarị, So-ḅio ḅụ opu gbẹẹ-ye Tamụnọ nwẹn kẹ ọ́ wẹrịma wararị. Mị gbọrụ ḅara mẹ mie tomi kẹ ịkịankoro apụ ma tẹ ọmịna tọrọkọ-tarịapụ ma kẹ ḅaa-ḅọkọ ḅụ suu ḅara.

Jizọsị Tolumam Ò Minini apụ Fụn Na Bele Na Kịkam

¹³ “Ọ́ kịkarị ye anie ó simearị tomina-ogbo mẹ ḅẹ fụn. Tẹ fụn ḅarị fụn ḅẹlẹ-a kụma ndẹẹ ịn kẹ anị mịẹ tẹ anị pịkị fụn ẹrẹ fị ḅẹ ḅara? Anị gbala ḅo kịnị kẹ mịẹ, mịẹye ofori ye sọ tẹ, tomi anị kẹ wakị nguma tẹ nanga, nanga ḅọrọ ḅẹ tẹ ḅa.”

¹⁴ “Ọ́ kịkarị ye anie bebe tomikiri mẹ ḅẹ bele. Tụndụ ọgọnọ simearị opu ama ḅọị ḅẹ ọkụ ofori.

¹⁵ Ene furutẹ amịna warị ḅio tọnjọ tọnjị ḅọ ye kẹ anị jụjụ-a; anie nakara mḅọ anị kẹ tọnjọ sịẹma ye ọgọnọ gbanatẹ anị bele kẹ warị mẹ ḅio sime-ḅọ sime-ḅọ pịrị ḅa.

¹⁶ Anị gbọrụ ḅara ḅụ yee ọmịna tọnjọ sọ ọkọ kẹ kọrị paka tomina tọrọkọ, mịẹtẹ ini ọmịna iḅi amịẹaị ẹrị tẹ ọmịna Ḍaḅọ So-ḅio simearị ḅọ ḅe tokini.”

Jizọsị Oloko Mẹ Gbolomaye Tolumam

¹⁷ “Ó kuroma ma mịnẹ à ḅo Mozizi Oloko mẹ na ịkịankoro apụ ma toluma aị ma na saakị anga pịrị ḅẹ ḅom. À ḅo arị saakị anga pịrị ḅẹ ḅo-a, kụma mịẹtẹ arị tolumarị aị ma ḅo mịẹ tẹ aị sọ.

¹⁸ Ọ́ kẹ ḅioḅọrọma ma mịnẹ So na Kiri na paa emi sakị goyegoye, Oloko mẹ ḅụ ḅẹ ịrụ-tẹịn ye sọ papaa ḅọrọ-so ḅịa, nwenii anị toluma aị mamgba mịẹ fama ḅa.

¹⁹ Ọkọẹrẹsị, ḅẹḅọ-ḅẹḅọ tẹ Oloko mẹ tọn koroma tẹ tolumarị aị ma ḅụ ịrụ-tẹịn ye kan tẹ anị ḅara kẹ ja apụ toluma tẹ ini anị ḅara mịẹ-mịẹ, ini anị ḅọ mẹ kẹ Tamụnọ Ama-da suku-ḅio simearị atomi ma ḅụ iderima tẹịnḅọ sọma ḅa. Jen pakịrị anga kẹ anị ḍiki ḅụ, ḅẹḅọ-ḅẹḅọ tẹ Oloko mẹ ḅẹẹ ye mịẹ tẹ anị ḅara kẹ ja apụ tolumaḅọ mẹ, mḅọ opu sọ tẹịn ḅọ sọ ḅa Tamụnọ Ama-da tẹ ḅẹrẹtọn ḅarị sakị mẹ ḅụ.

²⁰ Mie ḅụ, ó nimi mịnẹ ọ́ nyana tẹ kẹ Tamụnọ ḅụụ-ḅẹlẹ ye mịẹ ḅarị minini Oloko toluma apụ ma na Farịsiiapụ ma na nyana minini nẹngị rẹ, mie ọmịnị inetẹ Tamụnọ Ama-da suku-ḅio simearị atomi sọ ḅarịye.”

Jizọsị Ịganị Gbolomaye Tolumam

²¹ “Ọ́ naa tẹ mịnẹ ḅọrọtẹ sakị ḅụ ịn ḅẹẹ-ḅẹẹm, ‘Kịnị ḅaa ma; ọkọ sime ye mịẹḅọ-mịẹḅọ ini mḅọ kẹ ḅẹrẹkọn ḅo ḅa.’”

²² Kụma mịọkụ yẹrị ọ́ ḅẹẹarị: ḅẹḅọ-ḅẹḅọ tẹ ịganị nyana mḅọ mịnaḅọ pịrị-ḅọ pịrị-ḅọ, ini mḅọ kẹ ḅẹrẹkọn ḅo ḅa, tẹ “Ị́yẹrị papaa tomḅọ” kẹ mḅọ mịnaḅọ sịnḅọ-sịnḅọ ini mḅọ kẹ Ama-kobiri (kịnị atesi oyi finji lẹgị lẹgịm) mẹ tọrọkọ ḅo ḅa, anịsakị “papaa, oḅori tomḅọ” kẹ ịn mḅọ mịnaḅọ sịn-arị ḅọ mẹ amịna ḅụụ kẹ ẹlị fịnị akaka sịẹma tẹ.

²³ Mie ḅụ í ḅo Tamụnọ agbamịẹ-anga mẹ tọrọkọ la tẹ kẹ ḅiokoromam mịnẹ ị́ mịnaḅọ na ị́ na ḅẹrẹ nyana wararị ḅẹḅẹ,

²⁴ ị́ kẹ agba mẹ mịẹ ḅẹ ḅo ye mẹ kẹ agbamịẹ-anga mẹ tọrọkọ koroma tẹ anị-gbọrụ-kirikiri so mu ị́ mịnaḅọ ḅe na ḅẹrẹ famaa, tẹrẹmẹ pịkịma ḅo tẹ ị́ kẹ Tamụnọ pịrị ḅẹ ye mẹ kẹ ọ̀ pịrịị.

²⁵ “Kịnị ḅẹrẹkọn warị ḅụ ogbo kẹ í gbo-gboo, tẹrẹmẹ ó mu ḅẹrẹkọn warị mẹ ḅụ ḅẹrẹ mẹ kọn, í ine-ḅara, ine-ḅara mịẹ tẹ mḅọ na ḅẹrẹ mẹ famaa. Anie ofori, ó mu tẹ ḅẹrẹ ị́ ḅara si-sii, ḅẹrẹkọn ḅọ ḅe ị́ saḅama kịnị-kun-apụ pịrị ḅa, tẹ ini ị́ saḅama ikoli-warị ḍikiḍikiḅọ pịrị tẹ,

²⁶ í ikoli ḅio paka-ḅo ḅịa nwenii ị́ ịn pẹlẹ ị́ sịḅị gbana igbigi mẹ ḅẹ kunoma mẹ gbẹẹ sakị la ḅa.”

Jizọsị Sẹfị Gbolomaye Tolumam

²⁷ Ọ́ naa tẹ mịnẹ ịn ḅẹẹm, “Sẹfị ma.”

²⁸ Kụma mịọkụ yẹrị ọ́ ḅẹẹarị mịnẹ amịna taḅọ-a ẹrẹḅọ na tii ḅẹ tọrụ kịngẹ kẹ á ḍiki ḅọ sọ sẹfị tẹ mḅọ ḅioḅẹngbọ ḅụ.

²⁹ Ọkọ ẹrẹsị, ị́ ama-ḅara ḅẹ tọrụngbọ mịẹtẹ í si mịẹarị ḅẹḅẹ, anị sọkị sin tẹ kẹ wakị nguma! Í oju ḅẹ gbọrụ pakịrị ḅarị ofori iḅi ini í bebe oju mẹ kẹ ẹlị ḅio gbin suu nẹngị lamam.

³⁰ Ị́ ama-ḅara mịẹtẹ í si mịẹarị ḅẹḅẹ anị pẹlẹ-siin tẹ kẹ wakị nguma, ị́ gbọrụ ḅara, anịanịa ị́ gbọrụ ḅụọ ofori iḅi kẹ í bebe oju mẹ ẹlị ḅio sọ nẹngịm.

Jizọsị Siya Gbolomaye Tolumam

³¹ Ịn pịkị ḅẹẹm, “Ḅẹḅọ-ḅẹḅọ tẹ amịna taḅọ na siyarị ḅọ, mḅọ siya ḍiri kẹẹ á pịrịị.”

³² Kụma yẹrị ọ́ ḅẹẹarị, tomḅọ amịna taḅọ si mẹnjị kọn-a tẹ árị na siya ḅẹḅẹ, mḅọ á mịẹtẹ á sẹfị tẹ, á jụmọ sime sakị, sime sakị; anịsakị á sime ḅarị owiḅọ ḅe sọ sẹfị tẹ.

Jizọsị Ịlọ Minini Gbolomaye Tolumam

³³ Ọ́ pịkị naa tẹ mịnẹ ini elemu sakị ḅẹ apụ ma ḅẹẹm, “Í minini kịnị pịrị ye ḅụ ḅịḅị ḍima ma, pịkị í minini Tamụnọ pịrị ịlọ sumaa.”

³⁴ Kụma mịọkụ yẹrị ọ́ ḅẹẹarị; ó ye minini kịnị pịrịarị ḅẹḅẹ ọmịnị ịlọ minini ḅara kẹ ye karị ḅụụ pịrị ma. So mẹ kẹ ye karị ma, so mẹ anie Tamụnọ emine ẹrẹsị;

³⁵ kiri sọ ọ́ kẹ ye karị ma, anị anie ọ́ ḅụọ gbanaye ẹrẹsị; Jeruselemu sọ ọ́ kẹ ye karịma, anị anie Opu Amadaḅọ ḅe opu ama mẹ ẹrẹsị.

³⁶ Ị́ sịḅị sọ kẹ ye karịma, í inetẹ mịẹtẹ sịḅị-ḅẹ-inume gbọrụmgbọ-sọ pịna-pịna, anịanịa, kurukuru ḅịa ẹrẹsị.

³⁷ Ị́yẹrị paa ḅẹẹ, “Inn” anịanịa “Ẹn-ẹn”, miemẹ nẹngị tẹ í ḍuko ye, ḍuko ye Ekwesu ḅe ḅara ḅom.

Jizọsị Gbẹẹfị Gbolomaye Tolumam

³⁸ Ọ́ naa tẹ mịnẹ ịn ḅẹẹm, “Tọrụngbọ na tọrụngbọ na ḅụra-a, aka na aka na ḅụra-a.”

³⁹ Kụma mịọkụ yẹrị ọ́ ḅẹẹarị: siye kẹ si kẹ ị́ mịẹ ḅọ mịẹ ọkị ma. Tomḅọ ḅara finji ị́ ama-ḅara ḅẹ amgba ḅọrọ ḅọrọ, ye mḅọ pịkị ere-ḅara ḅẹ amgba mẹ sọ ḅọrọ.

⁴⁰ Tẹ tomḅọ nwẹnị í suku-ḅio ḅẹ kapa ọkị ḅẹ ẹrẹsị ḅẹrẹkọn warị ḅụ ogbo kẹ í gbo-gboo, yee mḅọ ị́ ọgọnọ ḅẹ kapa sọ kẹ sụa ọkị.

⁴¹ Tẹ ama ọkị tẹ ama koruarị ọmụapụ ḅẹ gbọrụḅọ nwẹnị ponoma ḅara kẹ ị́ ḅẹẹ mịnẹ ò nye dogi tẹ ori na gbọrụ tombi mẹnjị ḅẹḅẹ, ori na maa tombi mẹnjịị.

⁴² Tomḅọ ḅo ị́ ḅara ye ḅii, ḅii mḅọ pịrịị; gbọrụḅọ ị́ ḅara ye ḅọlọ ḅẹ-ḅiiarị ḅẹḅẹ kẹ mḅọ ḅọlọọ.

Jizọsị Si-apụ Ḅẹlẹma Gbolomaye Tolumam

⁴³ Ọ́ naa tẹ mịnẹ ịn ḅẹẹm, “Í ikiapụ ḅẹlẹma, tẹ si kẹ ị́ tọn apụ ḍiki-ḅioḅuu.”

⁴⁴ Kụma mịọkụ yẹrị ọ́ ḅẹẹarị: ó si kẹ ọ́ tọn apụ ḅẹlẹmaa, tẹ tẹkẹ ḅaa-ḅọkọ kẹ ọ́ ḍọkịarị apụ pịrịị,

⁴⁵ miemẹ mịẹtẹ ó ḅo ọmịna So-ḅio ḅẹ Ḍaḅọ ḅe awọmẹ sọ ḅa. Kẹ gotẹ ọkọ ḅẹẹarị, ori mie mịẹtẹ ịrụa mẹ gbọrụ ḅara kẹ ḅịya iḅi atomi na, si-mịẹapụ na saramarị ye, tẹ ọ̀ pịkị eene kẹ iḅiye mịẹ apụ na siye mịẹ apụ na pịrịarị ye.

⁴⁶ Ị́ nwẹnị ị́ ḅẹlẹmarịapụ ngẹrị ḅẹlẹmarị ḅẹ kụma Tamụnọ gotẹ gbẹẹ-ye kẹ ị́ pịrị ḅẹ ye tiye? Mị-ḅara mie ama-igbigi da apụ ma sọ kọkọ mịẹarị!

⁴⁷ Ị́ nwẹnị sịn-ḅịḅị kẹ í ikiapụ kịngẹ pịrịarị kụma, ị́ tọ kịrị ye mịẹ? Anie oru nimi apụ ma sọ kọkọ mịẹ-mịẹ ḅara!

⁴⁸ Iḅiye mịẹ ḅụ ọ́ kara-gbasị tẹ ḅara simee, anie ọmịna Ḍaḅọ So-ḅio simearị ḅọ ḅe sọ simearị ḅara mẹ!