Matiyo 28 - FỊAFỊA BAỊBỤLỤ

Jizọsị Fị-ḅụ-saakịm

¹ Ịnyọsara-Ene mẹ ḅọrọ tẹ, Sọndị ene mẹ finjiarị ogbo, Magidala ḅẹ Meri na osi Meri ma na nwẹnị ḍuḅu mẹ ḍiki ḅẹ mu.

² Tẹ ḅiotọn-a ḅara ḅụ kiri kụrọma jikem; KỊNỊNYANAḄỌ ḅe enjẹlị So-ḅio sime tẹ koro ḅo tẹ ḍụḅarị mẹ mbelembele sikima tẹ anị ọgọnọ lẹgị-simem.

³ Ọ̀ tọrụkuḅu so ḅalapụ tẹ anị kọrị, kọrị ḅara ḅịyam, tẹ ọ̀ kapa ene mgbọlị ḅịya ḅara ḅịyam.

⁴ Ḍuḅu mẹ koru apụ ma, ḅalafa ḅo ịna ḅụụ ḅio sọ ḅara ḅụ ịna oju sẹkị tẹ ịn ḅo fịtẹ atomi kịkam.

⁵ Enjẹlị ḅe nwẹnị ẹkwẹn ereme ma pịrị tẹ ḅẹẹ, “Kẹlẹ-sọ ọ́ ḅalafa ma, ó Jizọsị, ịn kẹ ẹngbẹsẹ-sịn ḅụ ḅakụ ḅọ ḅe ḍọkịarị mẹ à nimi wararị.

⁶ Ọ̀ mịanga ofori; ‘Tamụnọ fịị ḅụ ọ̀ saakịma tẹ, anie ọ̀ ḅẹẹ ḅara mẹ. Ọ́ mịanga ḅo tẹ ò koro-sime anga mẹ ḍikii.

⁷ Mịọkụ ọ́ sarama mu tẹ ḍuko ò ḍukamẹnjịapụ ma pịrị, Tamụnọ fịị ḅụ ọ̀ saakịma tẹẹ, mịọkụ ori tarị Galili la ḅẹ muarị, ọmịnị amụ mu la-a ogbo; anịanga ọmịnị ori ẹrị ḅa!’ À ḍuko ọ́ pịrị ye mẹ ọ́ kẹ ḅiokoromaa.”

⁸ Mie ḅụ ịn nwẹnị fọnya, fọnya ḍuḅu mẹ koroma so, ịn paa ḅalafaarị sọ, ḅioḅẹlẹ ịna ḅụụ sọ ḅinm, tẹ ịn nwẹnị mangị mu ye mẹ ḍuko Jizọsị ḍukamẹnjịapụ ma pịrị.

⁹ Tẹ ḅiotọn-a ḅara ḅụ Jizọsị ḅo ini na bịama tẹ ḅẹẹm, “Dein ọmịnị na simee.” In mu ọ̀ la tẹ ori aḅụọ suku fịnama tẹ iḅo tẹ fụḅara kẹ kiri lama ọ̀ pịrịm.

¹⁰ Jizọsị nwẹnị ịn ḅẹẹ, “Ọ́ ḅalafa ma. Ó mu tẹ ḍuko ị̀ amịnapụ owiapụ ma pịrịị, mịnẹ in Galili muu, anịanga ini ị̀ ẹrị ḅa.”

Ḍuḅu Mẹ Koru Ọmụapụ Ma Ekpeni Fịm

¹¹ Ereme ma so muarị ogbo, ḍuḅu mẹ koru sime ọmụapụ ma ḅẹ ja apụ pịkịma opu ama mẹ ḅio mu tẹ paka ye goyegoye ḍuko agbamịẹapụ ma pịrịm.

¹² Agbamịẹapụ ma na ama ḅẹ omongiapụ ma na kobiri tẹ ịn mịẹ ḅẹ ḅara ḅiyam. Ịn nwẹnị ikutẹ igbigi kẹ ọḅụ kẹ ọmụapụ ma pịrị

¹³ tẹ ḅẹẹ, “Ó ḍuko ḅa mịnẹ ó monoarị ogbo, ḍin ḅụ, ò ḍukamẹnjịapụ ma ḅo ori oju akpakpa mẹ furu som.

¹⁴ Tẹ Ḅẹrẹtọnḅọ ḅe aniemẹ naa naa, wa mịẹtẹ ò minini ḅa mịnẹ ó nimi ye ofori, tẹ ó gotẹ ọmịna ḅụụ ḅaa ḅẹ ye ḅarị paka ḅịa.”

¹⁵ Ḍuḅu mẹ koru sime ọmụapụ ma nwẹnị igbigi mẹ ọkị tẹ in ḍuko ịn pịrị ye mẹ mịẹ. Mie ḅụ Juu-ḅẹ-apụ ogboku ḅụ miemẹ mie ịn kẹ anị ọkị tẹ ḍuko wasama wararị ḅara, ọkị-ḅo mịmgba ḅẹ eneḅaka mẹ sọ lam.

Jizọsị Ọ̀ Ḅụụ Pakama Ò Ḍukamẹnjịapụ Ḍiem

¹⁶ Jizọsị ḍukamẹnjị oyi gbọrụḅọ finji ma so Galili ḅụ, ori ịn ḅẹẹm in mu nwẹn ḅẹẹ tụndụ mẹ mum.

¹⁷ Ini ori ẹrị tẹso, ini ọ̀ tọrọkọ iḅo tẹ fụḅara kẹ kiri lama ọ̀ pịrịm, karakara ye ḅụ, ịna ḅụ ḅẹ ja apụ paa ḅio maaịn, maaịn tọnm sọ.

¹⁸ Jizọsị nwẹnị mẹnjị mu in kpeki tẹ ịn ḅẹẹ, “Tamụnọ kụrọ mamgba kẹ ị̀ pịrị tẹ, So-ḅio sime ye-o, kiri ḅio sime ye-o.

¹⁹ Ọkọẹrẹsị, ó mu tẹ ḅẹ anga, ḅẹ anga ḅụ simearị atomi mamgba mịẹ tẹ ini ì ḍukamẹnjịapụ sọọ; ó minji kẹ ịn sara-a, Ḍaḅọ ḅe na, Tụḅọ ḅe na, Fịafịa Tẹmẹ ḅe na ẹrẹ ḅụ,

²⁰ tẹ ọ́ pịkị ye kẹ in toluma tẹ ini à tọn ọ́ pịrị ye goyegoye koko. Anịsakị yẹrị na ọmịnị na sakị mamgba sime ḅa, ọkị mu tomikiri mẹ ḅẹ kunoma la.”